“Elder Aroldo B. Cavalcante,” Liahona, Me 2024.
Elder Aroldo B. Cavalcante
Fitugafulu o le Pulega Aoao
I le valaaulia a se tausoga, sa auai ai Aroldo B. Cavalcante e 18 tausaga i se konafesi faarisone i le 1988 sa susū ai Peresitene Gordon B. Hinckley (1910–2008), a o avea ai ma Fesoasoani Muamua i le Au Peresitene Sili.
“Sa ou lagonaina se mea malosi tele,” na ia toe faamatalaina ai. “Sa mafai ona ou vaaia se malamalama ia Peresitene Hinckley.”
E ui ina sa auai o ia i le lotu mo le isi tolu tausaga, ae sa lei papatisoina o ia. I se tasi aso na tuitui mai ai faifeautalai i lona faitotoa. Sa la uuina la latou tusi o le eria, ma faitau mea na tusia e faifeautalai ua mavae e uiga ia te ia. O le mea na faate’ia ai o ia o le fuaiupu mulimuli: “E le manao o ia e tuuto atu ia Iesu Keriso.”
Na toe faamatalaina e Elder Cavalcante, “Sa ou manatu sa ou matua tuuto atu lava ia Iesu Keriso, ma sa malosi tele lena laina mo au.”
I le mafaufau ai pe o le manatu foi lena o le Faaola ia te ia, sa ia fesili ai, “O le a se mea e mafai ona ou faia e sui ai lenei mea, a Lua Susuga?’”
Sa amata ona aoaoina o ia e faifeautalai, ma sa papatisoina le 21 tausaga le matua i le na o le 10 aso mulimuli ane. Talu mai lena taimi, ua tuuto atu Elder Cavalcante i le talalelei a le Faaola.
“O lenei galuega e le faatatau ia i tatou. E faatatau i le Faaola. Ma ou te taumafai e fai le mea sili ou te mafaia mo Ia, ae le mo au,” o le tala lea a Elder Cavalcante.
Sa fanau Aroldo Barreto Cavalcante Filho i le aso 22 o Novema, 1970, i Fortaleza, Ceará, Pasila. Sa faamauina o ia ia Christiana Ramalho Bezerra Leite i le Malumalu o Recife Pasila i le aso 21 o Ianuari, 2004. O i la’ua o matua o se fanau e toafa.
Na maua e Elder Cavalcante se faailoga maualuga i le tulafono o le pulega mai le Iunivesite o le Malo o Ceará i le 1997. Sa faigaluega o ia o se loia mo le Procuradoria Geral do Município mai le 1997 i le 2005 ma o se pule faapaaga o le Barreto Cavalcante Advogados talu mai le 1999.
A o lei valaauina o ia o se Fitugafulu Pulega Aoao, sa auauna atu Elder Cavalcante o se peresitene o le misiona i Pasila. Sa avea foi o ia ma Fitugafulu Eria, peresitene o le siteki, epikopo, ma fesoasoani i le au epikopo.