Vavega, Agelu ma le Mana o le Perisitua
Afai tou te mananao i faamanuiaga o le perisitua, e aofia ai vavega ma auaunaga a agelu, ia savavali i le ala o feagaiga ua faaavanoa mai e le Atua.
Ua fai mai le toatele i aso nei, ua le toe i ai ni vavega, o agelu e le mo’i, ma ua tapunia le lagi. Ou te molimau atu, e lei taofia vavega, o loo i ai agelu ma i tatou, ma o loo matala moni lava le lagi.
A o i ai lo tatou Faaola, o Iesu Keriso i le lalolagi, sa Ia tuuina atu ki o le perisitua i Lana Aposetolo sinia, o Peteru.1 E ala i nei ki, na taitaiina ai e Peteru ma isi Aposetolo le Ekalesia a le Faaola. Ae ina ua maliliu na Aposetolo, na aveesea ki o le perisitua mai le lalolagi.
Ou te molimau atu ua toefuataiina mai ki o le perisitua. Sa faaali mai Peteru, Iakopo ma Ioane ma isi perofeta anamua o ni tagata toetutu e faaee i luga o le Perofeta o Iosefa Samita mea na ta’ua e le Alii “o ki o lo’u malo, ma se tisipenisione o le talalelei.”2
O na lava foi ki ua tuufaasolo mai i lea perofeta i lea perofeta seia oo mai i le asō. Ua faaaoga e tamalii e 15 ua tatou lagolagoina o perofeta, tagatavaai ma talifaaaliga e taitai ai le Ekalesia a le Faaola. E pei ona i ai i aso anamua, e i ai le Aposetolo sinia e toatasi o lē e umia ma ua faatagaina e faaaogaina ki uma o le perisitua. O ia o Peresitene Russell M. Nelson, perofeta ma le peresitene o le Ekalesia toefuataiina a Keriso i o tatou aso: O Le Ekalesia a Iesu Keriso o le Au Paia o Aso e Gata Ai.
E ala mai i le Ekalesia a le Faaola, tatou te maua ai faamanuiaga o le perisitua—e aofia ai le mana o le Atua e fesoasoani ia i tatou i o tatou olaga. I lalo o ki faatagaina o le perisitua, tatou te osia ai folafolaga paia i le Atua ma maua sauniga paia ia e saunia ai i tatou e ola i Lona afioaga. E amata i le papatisoga ma le faamauga, sosoo ai ma totonu o le malumalu, tatou te agai ai i luma i le ala o feagaiga lea e taitai atu ai i tatou ia te Ia.
Faatasi ai ma le tuu o lima i luga o o tatou ulu, tatou te maua ai foi faamanuiaga o le perisitua, e aofia ai le taitaiga, faamafanafanaga, fautuaga, faamalologa, ma le mana e mulimuli ai ia Iesu Keriso. I lo’u olaga atoa, ua faamanuiaina au e ala i lenei mana maoae. E pei ona faaalia mai i tusitusiga paia, tatou te ta’ua o le mana paia o le Perisitua Mekisateko.3
I lo’u talavou sa ou maua ai se faaaloalo tele mo lenei mana, aemaise lava ona sa faaalia mai i faamanuiaga faaleperisitua. A o auauna ai o se faifeautalai talavou i Chile, sa pu’eina i ma’ua ma la’u soa ma tuueseeseina. Sa le’i ta’uina mai ia i ma’ua pe aisea. Sa o se taimi o le tele o le vevesi i faiga faaupufai. E faitau afe tagata na pueina ma tuu i falepuipui e leoleo o le militeli ma sa le’i toe maua lava se tala mai ia i latou.
Ina ua uma ona tu’ifesiliina, sa ou saofai toatasi i le sela o le falepuipui, ma le lē iloa pe ou toe vaai i ē pele ia te a’u. Sa ou liliu atu i lo’u Tama Faalelagi, ma augani atu ma le faanaunau: “Le Tama, na aoaoina a’u i taimi uma, e puipui e Lau Afio ia Au faifeautalai. Faamolemole Tama, e le o au o se tagata faapitoa, ae sa ou usiusitai ma ou te manaomia le fesoasoani a Lau Afio i lenei po.”
O fatu o lenei fesoasoani sa totōina i le tele o tausaga na muamua atu. Ina ua uma lo’u papatisoga, sa faamauina a’u o se tagata o le Ekalesia ma tuuina mai le meaalofa o le Agaga Paia. A o ou tatalo, toatasi, i tua o na pa uamea, sa vave oo mai le Agaga Paia ia te a’u ma faamanafanaina a’u. Sa ia faamanatu mai i lo’u mafaufau se fuaitau sili ona fitoitonu mai lo’u faamanuiaga faapeteriaka, o se tasi lea o faamanuiaga faaleperisitua. I le [faamanuiaga], na folafola mai e le Atua ia te a’u e faapea, e ala i lo’u faamaoni o le a mafai ai ona faamauina a’u i le malumalu mo le taimi nei ma le faavavau i se tamaitai e tumu i le lalelei ma mamā ma alofa, o le a avea i ma’ua ma ni matua i ni atalii ma ni afafine faapelepele, ma o le a faamanuiaina ma viia a’u o se tamā i Isaraelu.
O na upu musuia e uiga i lo’u lumanai na faatumulia ai lo’u agaga i le toafilemu. Na ou iloaina sa oo mai mai lo’u Tama Faalelagi agaalofa, o lē e tausia i taimi uma Ana folafolaga.4 I lena taimi, sa ou maua ai le faamautinoaga o le a faasaolotoina a’u ma ola e vaai i le faataunuuina o na folafolaga.
Pe tusa ma se tausaga mulimuli ane, sa faamanuia ai a’u e le Tama Faalelagi i se toalua e tumu i le lalelei ma mamā ma alofa. Sa faamauina i ma’ua ma Lynette i le malumalu. Sa faamanuiaina i ma’ua i ni atalii faapelepele e to’atolu ma ni afafine faapelepele e to’afa. Sa avea a’u ma tamā, e tusa ai ma folafolaga uma a le Atua i le faamanuiaga faapeteriaka na ou mauaina o se tama e 17 tausaga le matua.
“O le mea lea, ou uso pele [ma tuafafine] e, pe ua taofia ea vavega ona ua toe afio a’e Keriso i le lagi? …
“… E leai; pe ua taofia foi le auauna mai o agelu i le fanauga a tagata.”5
Ou te molimau atu o loo faaauau pea ona tutupu vavega ma auaunaga i o tatou olaga, e masani lava o se taunuuga tuusao o le mana o le perisitua. O ni isi o faamanuiaga faaleperisitua e faataunuuina vave lava, i auala e mafai ona tatou vaaia ma malamalama i ai. O isi e faaali auauai mai ma o le a le iloaina atoa i lenei olaga. Ae e tausi e le Atua Ana folafolaga uma, i taimi uma, e pei ona faaalia mai i lenei tala mai le talafaasolopito o lo matou aiga.
O le tamamatua o lo’u tamā, o Grant Reese Bowen o se tagata e maoae tele le faatuatua. Ou te manatua lelei le faalogo ia te ia o faamatala le ala na maua ai lona lava faamanuiaga faapeteriaka. Sa ia tusia i le apitalaaga o lona olaga: “Sa folafola mai e le peteriaka ia te au le meaalofa o le faamalologa. Fai mai o ia, ‘O le a faamaloloina e mama’i. Ioe, o le a toefaatuina mai ē oti i ou aao.’”
I tausaga mulimuli ane, a o faaputu e tamamatua ia vaovaomago, sa ia lagonaina se uunaiga e toe foi i le fale. Sa faafetaui o ia e lona tamā o alu atu ia te ia. Sa fai atu lona tamā, “Grant, ua faatoa maliu lava lou tina.”
Ou te toe sii atu foi mai le apitalaaga a Tamamatua: “Ou te le’i tu ae faatele’a’i atu loa i totonu o le fale ma fafo i le faapaologa i luma lea sa taoto ai o ia i luga o se moega. Sa ou tilotilo atu ia te ia ma iloa ai sa leai se faailo o le ola na totoe ia te ia. Sa ou manatuaina lo’u faamanuiaga faapeteriaka ma le folafolaga, afai ou te faamaoni, e ala atu i lo’u faatuatua o le a faamaloloina ai e mama’i; ma o le a toe faatulai ai e oti. Sa tuu o’u lima i luga o lona ulu, ma ou ta’u atu i le Alii, afai e moni le folafolaga sa Ia faia mai ia te a’u e ala i le peteriaka, ia faaali mai i lenei taimi ma ia toe faatu mai lo’u tina ia ola. Sa ou folafola atu ia te Ia afai o le a Ia faia lenei mea, o le a ou le toe faatuai lava i le faia o mea uma i lo’u malosi mo le atinaeina o Lona malo. A o o’u tatalo, sa pupula ae ona mata ma fai mai, ‘Grant, faanofo a’u i luga. Sa ou i ai i le lalolagi o agaga, ae ua e valaauina a’u e foi mai. Ia avea lenei mea e fai ma se molimau i taimi uma ia te oe ma i tagata uma o lo’u aiga.’”
Ua aoao mai Peresitene Russell M. Nelson ia tatou saili ma faamoemoe i vavega.6 Ou te molimau atu, ona ua toefuataiina mai le perisitua, ua faapea ona i ai le mana ma le pule a le Atua i luga o le lalolagi. E ala i valaauga ma aufono, ua mafai ai e alii ma tamaitai, talavou ma matutua, ona auai i le galuega o le perisitua. O se galuega o vavega, e auai ai agelu. O le galuega a le lagi, ma ua faamanuia ai fanau uma a le Atua.
I le 1989, sa toe foi mai ai le matou aiga e toafitu mai se tafaoga a le uarota. Na tuai. Sa maitaga Lynetter i le ma tamaitiiti lona ono. Sa ia lagonaina se uunaiga malosi e faamau lona fusipau, lea sa galo ona ia faia. E lei leva ona matou oo atu i se pioga i le auala, ae kolosi ane loa se taavale i totonu o le matou laina. Pe tusa ma le 70 maila (112 km) i le itula na ou toe seua ai ina ia le feto’ai ai ma le taavale la e sau. Sa taavalevale le matou veni, sesee i le auala, ma alu ese ai ma le alatele ma iu ai ina tu, ma o le itu o le pasese sa taatia i le palapala.
O le mea na sosoo ai, ou te manatua le faalogoina o le leo o Lynette: “Shayne, e tatau ona tatou o i fafo mai lau faitotoa.” Sa ou tautau i le ea i lo’u fusipa’u. Sa na o ni nai sekone na tau faasagatonu ai [le mafaufau]. Sa amata ona ma tasiia tamaiti taitoatasi i fafo o le veni e ala atu i la’u faamalama, lea sa avea nei ma taualuga o le veni. Sa latou fetagisi, ma taumafaufau po o le a le mea na tupu.
E lei leva ae ma iloaina na misi lo ma afafine e 10 tausaga le matua, o Emily. Sa ma taufonō i lona igoa, ae sa leai se tali. O tagata o le uarota o e sa agai foi i le fale, sa i ai i le mea na tupu ai le faalavelave sa sueina ma le popole o ia. Sa matuai pogisa lava. Sa ou toe autilo ma se moliuila i totonu o le veni ma i lo’u fefe, sa ou vaaia ai le tino laitiiti o Emily o loo mau i lalo o le veni. Sa ou valaau atu ma le atuatuvale, “E tatau ona tatou siia ese le veni mai ia Emily.” Sa ou mau i le taualuga ma toso i tua. Sa toalaiti isi na siia, ae na faavavega le mafiti o le veni ma tu i ona pa’u, ma aliali mai ai le tino ua lē minoi o Emily.
Sa lē manava Emily. O ona foliga sa pei o le lanu o se palamu viole. Sa ou faapea atu, “E tatau ona tatou faia sona faamanuiaga.” Sa ma tootutuli ma se uo pele o se tagata o le uarota, ma e ala i le pule o le Perisitua Mekisateko, i le suafa o Iesu Keriso, sa ma poloaiina ai o ia ia ola. O le taimi lena, sa manava loloa ai Emily.
I le mavae ai o le foliga mai o ni itula se tele, sa taunuu mai loa le taavale a le falemai. Sa ave faataalise atu Emily i le falema’i.” Sa omia lona mamā, ma sa matuai afaina le uaua i lona tulivae. O le popolega ina ne’i afaina lona faiai, ona o le taimi sa ia le maua ai se okesene. E tasi le aso ma le afa na koma ai Emily. Sa faaauau ona matou tatalo ma anapopogi mo ia. Sa faamanuiaina o ia i le toe malosi atoatoa. O le asō, ua avea Emily ma lana tane o Kevin, o ni matua o se fanau teine e toaono.
O se vavega lava, ona sa mafai e isi tagata uma ona sao mai. O le pepe lea sa tauaveina e Lynette, o Tyson. Sa faasaoina foi o ia mai se afaina, ma sa fanau mai o ia i a Fepuari na sosoo ai. O le valu o masina mulimuli ane, ina ua uma ona maua lona tino faaletino, sa toe foi atu ai Tyson i le aiga i le Tama Faalelagi. O ia o la matou atalii agelu puipui. Matou te lagona ana faatosinaga i totonu o le matou aiga ma ua tulimatai atu e toe faatasi ma ia.7
Sa matauina e i latou sa sii eseina le veni mai ia Emily, sa foliga mai sa leai ma se mamafa o le veni. Sa ou iloa na auai faatasi agelu faalelagi ma agelu faalelalolagi e sii ese le taavale mai le tino o Emily. Sa ou iloa foi, na toe ola mai Emily e ala i le mana paia o le perisitua.
Sa faaali mai e le Alii lenei upumoni i Ana auauna: “Ou te muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai loʼu Agaga i o outou loto, ma siʼo faataamilo outou e aʼu agelu, e sapasapai outou i luga.”8
Ou te molimau atu, “o le Perisitua Paia, e tusa ma le Faatulagaga a le Alo o le Atua”9—o le Perisitua Mekisateko—faatasi ma ona ki, pule, ma le mana ua toefuataiina mai i le lalolagi i nei aso, aso e gata ai. Ou te iloa e ui e le o tulaga uma e iu ane e pei ona tatou faamoemoe ma tatalo ai, ae o vavega a le Atua o le a oo mai i taimi uma e tusa ai ma Lona finagalo, Lana taimi, ma Lana fuafuaga mo i tatou.
Afai tou te mananao i faamanuiaga o le perisitua, e aofia ai vavega ma auaunaga a agelu, ou te valaaulia outou ia savavali i le ala o feagaiga ua faaavanoa mai e le Atua ia i tatou taitoatasi. O le a fesoasoani atu tagata ma taitai o le Ekalesia o e e alolofa ia te oe e uia le laasaga e sosoo ai.
Ou te molimau atu o Iesu Keriso, le Alo o le Atua, o loo soifua ma taitaia Lana Ekalesia e ala i perofeta soifua o e umia ma faaaogaina ki o le perisitua. E moni le Agaga Paia. Na tuuina mai e le Faaola Lona soifua e faamalolo ai i tatou, toe faafoi mai i tatou, ma aumai ai i tatou i le aiga.
Ou te molimau atu, e lei taofia vavega, o loo i ai agelu ma i tatou, ma o loo matala moni lava le lagi. Ma, oka, se matalatala o le lagi! I le suafa o Iesu Keriso, amene.