“Peresitene Paul V. Johnson,” Liahona, Me 2024.
Elder Paul V. Johnson
Peresitene Aoao o le Aoga Sa
Mai lana galuega o se faiaoga seminare e oo i le iva tausaga sa ia faaaluina o se Komesina o aoaoga a le Ekalesia, o le Peresitene Aoao o le Aoga Sa o Paul V. Johnson sa tele lona poto masani i le aoaoina atu o le talalelei. Ae o le uiga aupito sili ona taua na te aumaia i lona valaauga fou, na ia fai mai ai, o le “o lo’u alofa mo lo’u Tama Faalelagi ma le Faaola ma lo’u alofa mo tagata talavou ma isi tagata foi.”
Sa soifua mai Peresitene Johnson i le aso 24 o Iuni, 1954, i Gainesville, Florida, ISA, ia Vere Johnson ma Winefred Amacher. A o lei atoa lona tausaga, sa siitia atu ona matua i Logan, Iuta, ISA, lea sa la tausia ai o ia ma ona tei e toafitu.
Sa ia masani i lona faletua i le lumanai, o Jill Washburn, ina ua talia o ia e taalo lakapi a le aoga maualuga i Monticello, Iuta, e se faiaoga sa siitia atu iina mai Logan. Sa feiloai muamua Paul ma Jill, ae o lea ua avea nei i laua ma uo a o auai i le uarota ma le vasega seminare e tasi. Sa tusi atu Sister Johnson ia te ia a o auauna atu o ia i se misiona i le taimi atoa i Nouei.
Sa la faaipoipo i le aso 18 o Aokuso, 1976, i le Malumalu o Provo Iuta. E toa 9 le la fanau ma fanau a fanau e 43.
Sa feagai faatasi le au Johnson i o latou vaega o tofotofoga, mai le maliu ai o se afafine i le kanesa e oo i le tauivi ma o latou lava luitau faalesoifua maloloina. Ae na saunoa Peresitene Johnson o na aafiaga na mamanuina ai lana vaaiga i le fuafuaga a le Atua. “Ou te manatu ua ou naunau ai, i le avea ai ma se faiaoga, e fesoasoani i tagata talavou ia uumau i le Faaola ma agai atu i lo latou Tama Faalelagi,” na ia saunoa ai.
Sa maua e Peresitene Johnson se faailoga o le tagata malaga i le suesueina o manu i le 1977 ma se faailoga o le matuaofaiva i le fautuaina ma le taitaiga i le 1978, mai le Iunivesite o Polika Iaga. Sa ia mauaina se faailoga o le fomai o aoaoga mai le Iunivesite o le Setete o Iuta i le 1989.
Sa lagolagoina Peresitene Johnson o se Fitugafulu Pulega Aoao ia Aperila 2005 ma sa avea ma se sui o le Au Peresitene o Fitugafulu talu mai le aso 1 o Aokuso, 2021. Sa avea o ia ma se fesoasoani i le Au Peresitene o le Eria i Europa, fesoasoani i le Au Peresitene o le Eria a Chile, fesoasoani i se au peresitene o le siteki, ma se epikopo.
O le a tuuina atu ia te ia le tulaga o le faamalolo faamamaluina, e amata mai i le aso 1 o Aokuso, 2024, pe a amata lona valaauga fou.