O Iesu Keriso i le Ogatotonu o o Tatou Olaga
O fesili o’oo’o o le agaga, o fesili ia e aliae i o tatou taimi sili ona pogisa ma tofotofoga aupito maualuluga, o loo taulimaina e ala atu i le alofa e lē maluelue o Iesu Keriso.
A o tatou faimalaga ai i le olaga faitino, e i ai taimi tatou te aafia ai i tofotofoga: o le tiga matuitui o le maliu o e pele, o le tauiviga faigata e faasaga i ma’i, o le tui o le faailoga tagata, o aafiaga faapopoleina o sauaga po o faiga faatautala mataga, o le faamalumalu mai o le leai o se galuega, faigata i le aiga, o le tagi le leoa o le tuua toatasi, po o taunuuga tiga o fetauiga i taua.1 I taimi faapena, e moomoo ai o tatou loto mo le sulufaiga.2 Tatou te saili faatauanau ia iloa: O fea tatou te maua ai le pulu pasama o le toafilemu?3 O ai e mafai ona tatou tuu atu i ai lo tatou faatuatuaga e fesoasoani ia i tatou i le to’a ma le malosi e faatoilalo ai nei luitau?4 O ai o i ai le onosai, le alofa e siomia ai, ma le aao mamana e siitia ma lagolago ai i tatou?
O fesili o’oo’o o le agaga, o fesili ia e aliae i o tatou taimi sili ona pogisa ma tofotofoga aupito maualuluga, o loo taulimaina e ala atu i le alofa e lē maluelue o Iesu Keriso.5 O ia, ma e ala atu i faamanuiaga folafolaina o Lana talalelei toefuataiina,6 tatou te maua ai tali tatou te sailia. E ala mai i Lana Togiola e le iu ua ofoina mai ai ia i tatou se meaalofa e le mafuatiaina—o le meaalofa o le faamoemoe, faamalologa, ma le faamautinoaga o Lona i ai pea ma tumau i o tatou olaga.7 O lenei meaalofa e maua e i latou uma o e aapa atu ma le faatuatua, talia le filemu ma le faaolataga Na te ofo fua mai.
Ua faaloaloa mai e le Alii Lona aao ia i tatou taitoatasi, o se aga o le ute moni lea o Lona alofa ma le agalelei faalelagi. O Lana valaaulia ia i tatou e sili atu nai lo o se valaau faigofie; o se tautoga paia, na faamalosia i le mana tumau o Lona alofa tunoa. I tusitusiga paia, ua Ia faamautinoa mai ai ma le alofa ia i tatou:
“Ia outou o mai ia te a’u, outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te a’u; aua o a’u lē agamalu ma le loto maulalo: ona maua lea e outou o le malologa mo outou agaga.
“Aua e avegofie la’u amo, o la’u avega foi e māmā ia.”8
O le manino o Lana valaaulia ia “o mai ia te a’u” ma ia “amoina la’u amo” ua faamautu ai le natura loloto o Lana folafolaga—o se folafolaga e le mafuatia ma atoatoa lea e faatusa i ai Lona alofa, e ofo mai ai ia i tatou se faamautinoaga faamaoni: “O le a outou maua le filemu.”
A tatou filigā e saili taitaiga faaleagaga,9 ua tatou tulioso i luga o se faagasologa o le tuputupu ae ma le atinaega faaletagata lava ia lea e faamalosia ai a tatou molimau. O le malamalama i le le gata mai o le alofa atoatoa o lo tatou Tama Faalelagi ma Iesu Keriso,10 ua faatumulia ai o tatou loto i le agaga faafetai, loto maualalo,11 ma se manao faafouina e tulitulimatagau le ala o le avea ma soo.12
Na aoao mai Peresitene Russell M. Nelson e faapea, “afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai ia te Ia ma ona o Ia.”13
Na tautino mai e Alema, a o talanoa atu i lona atalii o Helamana: “Ma o lenei, lou atalii e, Helamana, faauta, ua e i ai i lou talavou, ma o lea, ou te aioi atu ai ia te oe, ia e faalogo mai i au upu, ma aoao mai ia te au; ona ua ou iloa o ai lava e tuu atu lo latou faalagolago i le Atua e lagolagoina i o latou tofotofoga, ma o latou faalavelave, ma o latou puapuaga, ma o le a sii ae i latou i luga i le aso gataaga.”14
A o talanoa atu Helamana i ona atalii, sa aoao atu e uiga i lenei mataupu faavae e faavavau o le tuu o le Faaola i le ogatotonu o o tatou olaga: “Ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae.”15
I le Mataio 14 ua tatou aoao ai, ina ua faalogo i le maliu o Ioane le Papatiso, sa saili Iesu ia tuua na o Ia. Peitai, sa mulimuli atu ia te Ia se motu toatele o tagata. O le ootia ai i le agaalofa ma le alofa, ma lē faatagaina Lona faavauvau e faalavelave ia te Ia mai Lana misiona, sa talia i latou e Iesu, faamalolo e mama’i sa ia i latou. A o lata mai le afiafi, sa feagai le au soo ma se luitau taufaafefe: o se aofia toatele ae le lava ni meaai sa i ai. Sa latou fautuaina atu ia auina ese atu e Iesu ia le tumutumu e aumai ni meaai, ae o Iesu, faatasi ai ma le alofa tele ma faamoemoega maualuluga, na Ia talosagaina ai le au soo e fafaga i latou.
A o mafaufau ai le au soo i le luitau faafuasei, sa faaalia e Iesu Lona faatuatuaga ma le alofa mo Lona Tama, faatasi ai ma se alofa e le maluelue mo tagata. Sa ia faatonuina le motu o tagata e saofafai i luga o le mutia, ma aumai na’o falaoa e lima ma i’a e lua, sa Ia filifili ai e faafetai atu i Lona Tama, e faailoa ai le gafatia o le Atua i le tuuina mai ia te Ia o Lana pule ma le mana.
Ina ua uma ona Ia faafetai atu, sa tofitofi e Iesu le falaoa, ae tufatufa atu e le au soo i tagata. O le mea e ofoofogia ai, sa le gata ina sa lava meaai, ae sa matua tele foi, lea na totoe ai ato e 12. O le vaega sa fafagaina na aofia ai alii e lima afe, faapea foi ma tamaitai ma tamaiti.16
Ua aoao mai e lenei vavega se lesona loloto ia i tatou: pe a feagai ma luitau, e faigofie lava ona tatou soona ano i o tatou popolega. Ae peitai, sa faaalia e Iesu Keriso le mana o le taulai atu i Lona Tama, ofo atu le agaga faafetai, ma faailoa mai, o fofo i o tatou tofotofoga e le o taimi uma e taoto ai ia i tatou lava, ae ma le Atua.17
Pe a tatou fetoai ma faafitauli, e masani ona tatou matele e mafaufau i faafitauli tatou te feagai. O o tatou luitau e moni ma e manaomia ai lo tatou gauai atu, ae o le mataupu faavae o le faatoilaloga o ia luitau o le tatou taulaiga lea. O le tuu o Keriso i le ogatotonu o o tatou mafaufauga ma faatinoga, ua tatou faaogatusa ai i tatou lava ma Lona finagalo ma le malosiaga.18 O lenei fetuunaiga e le tuuitiitia ai o tatou tauiviga; nai lo o lena, e fesoasoani e taiala ai i tatou i lalo o le taitaiga faalelagi.19 O se taunuuga, tatou te maua ai tali ma le lagolago lea e aliae mai se atamai maualuga atu. O le faaaogaina o lenei manatu e faatutotonu ia Keriso e musuia ai i tatou i le malosi ma le malamalama e liliu ai o tatou tofotofoga i manumalo,20 e faamanatu mai ia i tatou, faatasi ai ma le Faaola, o mea e foliga mai o se faafitauli tele e mafai ona avea o se auala e tau atu i le alualu i luma faaleagaga sili atu.
O le tala ia Alema le Itiiti i le Tusi a Mamona ua tuuina mai ai se faamatalaga faatalitonuina o le togiola ma le aafiaga loloto o le faaogatotonuina o le olaga o se tagata ia Keriso. I le taimi muamua, sa tulai ai Alema o se tagata tetee i le Ekalesia a le Alii, ma taitaiese le toatele o tagata mai le ala o le amiotonu. Ae peitai, o se faasalaveiga faalelagi, na faailogaina e ala i se asiasiga faaagelu, na fagua ai o ia mai ana amioga leaga.
I ona taimi sili ona pogisa, faatigaina e le ta’usalaga ma le popole ia maua se auala e sao ai mai le tigaina faaleagaga, sa manatua e Alema aoaoga a lona tama e uiga ia Iesu Keriso ma le mana o Lana Togiola. Faatasi ai ma se loto na moomoo mo le togiolaina, sa salamo ai o ia ma le faamaoni ma augani ma le faatauanau mo le alofa mutimutivale o le Alii. O lenei taimi taua o le gauai atoatoa atu e aumai ai Keriso i le pito i luma o ona manatu ma o le sailia faamaoni o Lona alofa mutimutivale, e faaosofia ai se suiga mataina. E mouese filifili mamafa o le ta’usalaga ma le leai o se faamoemoe ae na suia e se lagona lofituina o le olioli ma le toafilemu.21
O Iesu Keriso o lo tatou faamoemoe ma le tali i tiga ogaoga o le olaga. E ala i Lana taulaga, na Ia totogia ai a tatou agasala ma tauave i Ona Lava luga o tatou puapuaga uma—o tiga, le le fea, faanoanoa, ma le fefe—ma e faamagalo ma faamalolo e Ia i tatou pe a tatou faalagolago ia te Ia ma saili ia suia o tatou olaga mo le lelei atu. O Ia o lo tatou Fomai,22 e faamafanafana ma faaleleia o tatou loto e ala i Lona alofa ma le mana, e pei ona Ia faamaloloina ai le toatele i Lona taimi i luga o le fogaeleele.23 O Ia o le vai ola, e faatumulia ai manaoga loloto o o tatou loto i Lona alofa ma [Lona] agalelei tumau. Ua pei lenei mea o le folafolaga sa Ia faia i le fafine Samaria i le vaieli, na ofo atu “se vaipuna e puna i luga o le ola e faavavau.”24
Ou te molimau atu ma le mamalu o loo soifua Iesu Keriso, o loo pulefaamalumalu o Ia i lenei Ekalesia paia, O Le Ekalesia a Iesu Keriso o le Au Paia o Aso e Gata Ai.25 Ou te molimau atu o Ia o le Faaola o le lalolagi, o le Aloalii o le Filemu,26 o le Tupu o tupu, o le Alii o alii,27 o le Faaola o le lalolagi. Ou te faamautu atu ma le mautinoa, tatou te i ai e le aunoa i Lona mafaufau ma [Lona] loto. O se molimau i lenei mea, ua Ia toefuataiina ai Lana Ekalesia i nei aso e gata ai, ma ua valaauina Peresitene Russell M. Nelson e avea ma Lana perofeta ma le Peresitene o leEkalesia i lenei taimi.28 Ua ou iloa sa tuuina mai e Iesu Keriso Lona soifua ina ia mafai ona tatou maua le ola e faavavau.
A o tatou taumafai malosi e tuu o Ia i le ogatotonu o o tatou olaga, e matala mai faaaliga ia i tatou, e siomia i tatou e Lona filemu loloto, ma o Lana Togiola e le iu e aumaia ai lo tatou faamagaloga ma le faamalologa.29 O Ia ua tatou maua ai le malosi e faatoilalo ai, le lototele e finafinau ai, ma le filemu lea e silisili i mea uma e manatu i ai. Tau ina ia tatou taumafai malosi i aso taitasi e faalatalata atili atu ia te Ia, o le puna o mea lelei uma,30 o le sulu o le faamoemoe i la tatou malaga toe foi atu i le afioaga o lo tatou Tama Faalelagi. I le suafa paia o Iesu Keriso, amene.