O Malumalu, Maota o le Alii ua Togitogia Ai le Lalolagi
A o e sau ma le agavaa ma le agaga tatalo i Lona maota paia, o le a faaauupegaina oe i Lona mana.
Pe e te le fiafia ea i upu matagofie ia na tatou usuina? “Ou te faamalosi, faamanuia ia oe, … lo’u aao amiotonu, mamana na’ua.”1 O loo faamalosia e le Alii Lana Au Paia o vaitausaga uma a o latou o mai i Lona maota paia. Mai Kinshasa i Zollikofen i Fukuoka i Oakland, ua tutumu potu papatiso i le autalavou, i lo latou lava faama’ite. I aso ua mavae, o le toatele lava o le aufaigaluega pele i sauniga e ulusinā—ae ua le o toe tupu lena mea. Ua i tulimanu uma faifeautalai ua valaauina, o faifeau faamisiona mo auaunaga, ma faifeautalai ua mae’a misiona. I le salafa o le lalolagi, ua i ai se lagona faatupula’ia e tosina atu ai i tatou i le maota o le Alii.
Faatoa silia ma se tausaga talu ai, sa fai atu ai se uo pele faaleaiga, ua 95 ona tausaga, e nofo i le talafatai i sasa’e o le Iunaite Setete, o lē sa aoaoina e faifetautalai mo le 70 tausaga, i lana tamateine, “Ou te fia alu ma oe i le malumalu.”
Sa tali atu lana tamateine, “Ia tina, e tatau ona e papatiso muamua.”
“Ua lelei,” sa ia tali atu ai, “ua ou manao la ou te papatiso.” Sa papatiso o ia. I ni nai aso mulimuli ane, sa ia ulu atu ai ma le migao i le potu papatiso o le malumalu. Ma ua silia ma se masina talu ai, sa maua ai ona lava faaeega paia ma le faamauga. “Ua faalautele o mana o le Atua; Le lagi ua amata ona lē toe punia.”2
Ua e tomanatu ea i le mafuaaga ua faatonuina ai e le Alii Lana perofeta ia togitogia i le taimi nei le lalolagi i Ona malumalu paia?3 Aisea o le a Ia tuu mai ai i fanau i lenei taimi patino le manuia moomia i Lona nuu ia ua ala i a latou sefuluai paia, ua mafai ai ona fausia le fiaselau o maota o le Alii?
O le taeao nei, na faaalia ai e Peresitene Dallin H. Oaks se vaaiga matagofie o malumalu o loo fausia i le salafa o le lalolagi. Sa ma i ai talu ai nei ma Kathy i Filipaina. Mafaufau i le vavega lenei: O le Malumalu o Manila na faapaia i le 1984. O le a 26 tausaga ona faatoa mae’a lea o le malumalu lona lua i le Aai i Cebu, i le 2010. O le taimi nei, i le 14 tausaga mulimuli ane, ua 11 malumalu o loo fauina, mamanuina, pe ua saunia mo le faapaiaga. Mai matu i saute: Laoag, Tuguegarao, Santiago, Urdaneta, Alabang, Naga, Aai o Tacloban, Iloilo, Bacolod, Cagayan de Oro, ma Davao. O se mea maoae le vaai atu i galuega ofoofogia a le Atua!
I le salafa o le lalolagi, ua latalata atili mai maota o le Alii ia i tatou. Aisea ua tupu ai i o tatou aso?
O Aso Mulimuli
Sa lapatai mai le Alii e faapea i aso e gata ai, o le a i ai mafatiaga i malo,4 o le a “alolofa tagata ia i latou lava,”5 o le a] vāvāō mea uma,”6 o le a faateleina le fenumia’i,7 ma “[o le a] pepē fatu o tagata.”8 Ua tatou vaaitino i alii ma tamaitai ua pepē fatu: o faatosinaga a le lalolagi, o le faasalavei o leo faatosina o le lalolagi, o le le amanaia o le fafagaina faaleagaga, o le gapelu mai le mamafa o le tulaga faalesoo.9 Atonu na e faanoanoa a o e vaaia se tasi e te alofa i ai, o sē sa i ai se taimi na talanoa ma le faamaoni i lona faatuatua ia Iesu Keriso, tuu atu lana molimau i le Tusi a Mamona, ma sa naunau e fesoasoani i le fauina o le malo o le Atua, ua faafuasei ona aluese, pe ā mo le taimi nei, mai ona talitonuga agai atu ina le toe toaga i le Lotu. O la’u fautuaga ia te outou o le aua le faanoanoa! Ua Lelei. Aua e leai lava se mea e le mafaia e le Atua.10
Faatasi ai ma lenei vāvāo ma le le talitonu na valoia i le lalolagi, na folafola mai ai e le Alii e faapea, o le a i ai se nuu o le feagaiga, o se nuu e faatalitali ma le naunautai i Lona toe afio mai; o se nuu e tutu i nofoaga paia ma e lē masii ese lava mai lo latou nofoaga.11 Sa Ia fetalai e uiga i se nuu amiotonu e teenaina taufaasese a le fili, aloaia lo latou faatuatua, mafaufau faaselesitila, ma le faatuatuaina atoa o le Faaola, o Iesu Keriso.
Aisea ua aumaia ai e le Alii le fiaselau o Ona malumalu ia latalata atili mai ia i tatou i le taimi nei? O se tasi o mafuaaga ona i le lotolotoi o fesouaiga ma faaosoosoga o le lalolagi, ua Ia folafola mai e faamalosia ma faamanuiaina Lana Au Paia o le feagaiga, ma o loo faataunuuina Ana folafolaga!
Folafolaga mai le Malumalu o Katelani
E faapefea ona faamalolosia, faamafanafanaina, ma puipuia nei maota paia i tatou? Tatou te maua se tali i aioiga a le Perofeta o Iosefa Samita i le faapaiaga o le Malumalu o Katelani. O totonu o le malumalu lenei na lagiina ai e le Au Paia le, “Ia tatou pepese ma ‘autau a le lagi.”12 Na faaali mai le Faaola lava Ia, ma na toe foi mai perofeta o anamua, e faaee mai isi ki o le perisitua i le talalelei toefuataiina.13
I lena sauniga paia i le Malumalu o Katelani, sa tatalo atu ai le perofeta e faapea, i totonu o le maota paia o le Alii, o le a faaauupegaina ai le Au Paia i le mana o le Atua, o le a i ai i o latou luga le suafa o Iesu Keriso, o le a i ai foi i o latou luga le tausiga a agelu, ma ia latou tuputupu a’e i le Alii ma “maua le atoatoa o le Agaga Paia.”14 O nei talosaga mamana ua faataunuuina i o tatou olaga a o tatou tapuai ma le faamaoni i le maota o le Alii.
Faaauupegaina i le Mana
I totonu o Lona maota, e faaeeina moni ai lava i tatou i le mana faalelagi.15 O lo tatou faatuatua ia Iesu Keriso ma lo tatou alolofa mo Ia ua faamautuina ma faamalosia. E faamautu ai faaleagaga lo tatou faasinomaga moni ma faamoemoega o le olaga.16 A tatou faamaoni, e faamanuiaina i tatou i le puipuiga mai faaosoosoga ma mea faalavefau. Tatou te lagona le alofa o le Faaola a o Ia siitia i tatou mai o tatou faigata ma faanoanoaga. E faaauupegaina i tatou i le mana o le Atua.
O Lona Suafa i luga o i Tatou
I totonu o Lona maota paia, tatou te tauaveina atoatoa ai Lona suafa i o tatou luga. Pe a papatisoina i tatou, tatou te tautino atu lo tatou talitonuga ia te Ia ma lo tatou naunautai e tausi Ana poloaiga. I totonu o le malumalu, tatou te folafola atu ma le paia, e ala i a tatou feagaiga, e mulimuli ia te Ia e faavavau.
E maoae lava le autalavou o lenei Ekalesia. I se lalolagi faigata, latou te tauaveina i o latou lava luga le suafa o Keriso. I le Aai o Heber, i Iuta, sa faia ai se fonotaga faitele e talanoa ai faamatalaga e uiga i se malumalu na fuafua mo le fauina. E tolu selau tagata talavou na tumutumu i le paka na sosoo ai e faaalia lo latou lagolago mo le malumalu sa fuafuaina. Sa faamatala ma le lototoa e se tasi o alii talavou, a o tautala atu i taitai o le malo i se felafolafoa’iga tatala, “Ua ou faamoemoe e faaipoipo i lenei malumalu. [O le a fesoasoani le malumalu] ia ou tausia au lava ia mamā ma lē ponā. Sa faamatala e le isi o le malumalu o se faatusa o le malamalama ma le faamoemoe. O loo opomauina e alii ma tamaitai talavou o le Ekalesia i le lalolagi atoa le suafa o Iesu Keriso.17
O loo faatasi ma i Tatou Agelu
I le Malumalu o Katelani, sa tatalo ai le Perofeta o Iosefa e faapea “[o le a] i ai i luga [o le Au Paia] le tausiga a “agelu18 O le faatinoina e le aunoa o sauniga mo o tatou tuaa i le malumalu, e aumaia ai se faamautuuga manaia ma le mautinoa e faaauau le olaga i talaatu o le veli.
E ui o le tele o o tatou aafiaga i le maota o le Alii e paia na’ua mo le faasoaina atu lautele, ae e mafai ona tatou faasoa atu ni nai mea. O le fasefulu tausaga ua mavae, a o nonofo ai i Florida, sa ma o ai ma Kathy i le malumalu i Atlanta, Georgia. I le po o le Aso Lulu, 9 o Me, 1984, ina ua uma se ma sauniga i le malumalu, sa sau se tagata galue i le sauniga ma fesili mai pe maua so’u taimi e fai ai na o le tasi lava se sauniga amata [mulumuluga]. O le igoa o le tagata sa ou sui ai, sa ese lava. O lona igoa o Eleazer Cercy.
O le aso na sosoo ai, sa faatumulia le malumalu i le Au Paia. A o ou sauniuni e faatino la’u sauniga faaeega paia lona lua o le aso, sa tuu mai ia te au le igoa o le tagata o le a ou sui ai. O le mea e ofo ai, o le igoa o le igoa lava o le tagata mai le po anapo, o Eleazer Cercy. Sa ou lagonaina le Agaga o le Alii a o faamae’aina le faaeega paia. Mulimuli ane i le aoauli, a o i ai pea i le malumalu, sa vaaia e Kathy se uo olomatua a le aiga, o Sister Dolly Fernandez, lea na nofo nei i Atlanta. O le leai o ni alii lolotu o lona aiga na latou o mai, sa ia fesili mai ai pe mafai ona ou fesoasoani i le faamauga o lona tamā i matua o lona tamā. Ioe sa faamamaluina a’u.
A o ou tootuli i le pito o le fatafaitaulaga mo lenei sauniga paia, sa ou toe faalogoina foi le igoa lea ua mau i lo’u mafaufau, o lona tamā, o Eleazer Cercy. Ou te matuai talitonu a mavae lenei olaga, o le a ou feiloai ma opomau se tamaloa na iloa i lenei olaga o Eleazer Cercy.
O le tele o o tatou aafiaga i le maota o le Alii e sili atu ona aumaia ai le olioli toafimalie ma faaaliga filemu nai lo le faalavefau matautia. Ae ia mautinoa: e tausia i tatou e agelu!
O Se Atoatoaga o le Agaga Paia
E tuuina mai le meaalofa o le Agaga Paia ia i tatou a o faamauina i tatou o se tagata o le Ekalesia. O vaiaso taitasi a o tatou aai ma feinu ma le agavaa i le areto ma le vai e manatua ai lo tatou Faaola, ua folafola mai ia i tatou Lona Agaga o le a faatasi pea ma i tatou.19 A o tatou o mai ma loto naunau i le maota o le Alii, le nofoaga aupito sili ona paia i le lalolagi, tatou te tuputupu a’e i le Alii ma mafai ona “maua se atoaga o le Agaga Paia.”20 E ala i le mana o le Agaga Paia, e faatumulia i tatou i le filemu ma le olioli ma le faamoemoe e le matā’ua.21 Tatou te maua le malosi e tumau ai o Ona soo e tusa lava pe tatou te i ai i fafo atu o nofoaga paia.
Na tautino mai e Peresitene Russell M. Nelson: “O le a faatinoina e lo tatou Faaola ma le Togiola, o Iesu Keriso, nisi o Ana galuega mamana i le va o le taimi nei ma le taimi e toe afio mai ai o Ia. O le a tatou vaai i faailoga faavavega o le pulefaamalumalu ai o le Atua le Tama ma … Iesu Keriso i luga o lenei Ekalesia i le mamalu ma le viiga.”22 O le togitogia o le lalolagi i maota o le Alii o se galuega maoae ma se faailoaga faavavega.23
A’u uo pele, afai tatou te mafai ae e le’i faateleina lava lo tatou auai atu i le malumalu, i na tatou faateleina ia e le aunoa se taimi e tapuai ai i le maota o le Alii. Ia tatou tatalo mo malumalu ua uma ona fofogaina mai, ia mafai ona faatau mai fanua, ia faamaonia e malo ia fuafuaga, ia vaaia e tagata faigaluega talenia le faalauteleina o a latou meaalofa, ma o le a aumai e faapaiaga paia le faamaoniga mai le lagi ma le asiasiga a agelu.
Folafolaga
O le malumalu o le maota moni lava o le Alii. Ou te folafola atu ia te outou, a outou o mai ma le agavaa ma le lototatalo i Lona maota paia, o le a faaauupegaina outou i Lona mana, o le a i ai i o outou luga Lona suafa, o le a i ai foi i o outou luga le tausiga a agelu, ma o le a outou tuputupu a’e i faamanuiaga a le Agaga Paia.
Ua folafola mai e le Alii, “O tagata taitoatasi uma e lafoaia ana agasala ma sau ia te aʼu, ma valaau mai i loʼu igoa, ma usitai i loʼu leo, ma tausia aʼu poloaiga, o le a vaai i oʼu mata ma iloa o i ai Aʼu.”24 E tele auala eseese e vaai ai i fofoga o Keriso, ma e leai se nofoaga e sili atu nai lo o totonu o Lona maota paia.25
I nei aso o le fenumia’i ma le vāvāō, ou te molimau atu o le malumalu o Lona maota ma o le a fesoasoani e faasaoina i tatou, puipui i tatou, ma saunia i tatou mo le aso mamalu lea, faatasi ai ma Ana agelu paia uma, e toe afio mai ai lo tatou Faaola i le mamalu, mana ma le olioli tele. I le suafa o Iesu Keriso, amene.