I Le Lagolagoina o le Tupulaga Faia’e

Saunia e Brother Michael T. Nelson

Fesoasoani Lua i le Au Peresitene Aoao o Alii Talavou

O sootaga i olaga o le autalavou, e i ai le tosinaga aupito sili i a latou filifiliga.

I le tapenaga e lauga atu ia te outou, sa ou tosina atu i le tala ia Helamana ma atalii talavou o le nuu o Amona. Sa ou lagonaina le mana o perofeta o le Tusi a Mamona o aoao atu i matua, epikopo, ma tagata o uarota e ala i le suesueina o lenei tala.

O Helamana o se alii sa mafai ona faatuatuaina e talavou o sa Amonā. Sa fesoasoani o ia ia i latou e atia’e ma ia mautu i le amiotonu. Sa latou iloa ma alolofa ia te ia ma “mananao ia avea o [ia] ma o latou taitai.”¹

Sa alofa Helamana i nei alii talavou e pei o ni ona atalii ma sa vaaia lo latou gafatia.² Sa aoao mai Elder Dale G. Renlund e faapea “ina ia auauna atu ma le mataalia i isi, e tatau lava ona tatou vaai atu ia i latou … e ala atu i se vaaiga mai fofoga o le Tama Faalelagi. Ona faatoa mafai lea ona tatou amata ona malamalama i le taua moni o se agaga. Ona faatoa mafai lea ona tatou lagonaina le alofa o loo i ai i le Tama Faalelagi mo Ana fanau uma.”³ Ua faamanuiaina epikopo i aso nei i le iloatino e iloa ai le faasinomaga paia o le autalavou o loo i ai i le latou vaaiga.

Sa “faitauina”⁴ e Helamana ia alii talavou sa i ai i lana vaaiga. Sa ia faamuamua le fausiaina o sootaga malolosi ma i latou.

I se taimi matautia na taulēmau manatu ai i le tulaga lamatia o le ola, sa le iloa ai e Helamana ma lana ‘autau talavou le mea na aga’i i ai le autau na tuliloaina i latou. Sa fefautuaai Helamana ma le autalavou:

“Faauta, tatou te le iloa ae ua taofi mo le faamoemoe, ia tatou o faasagatau atu ia i latou, …

“O lea ou atalii e, pe ni a fa outou …?”⁵

Sa tali atu nei alii talavou faamaoni, “Tama, faauta ua faatasi mai lo tatou Atua ma i tatou, ma o le a ia le tuua ia tatou pauu; … ia tatou o atu.”⁶ Sa manumalo le taua, a o lagolagoina e Helamana nei alii talavou i la latou faaiuga⁷ e faatino.⁸

Sa i ai i talavou o sa Amonā se faamoemoega sili ma sa totoa i latou i le “lagolagoina o tagata.”⁹ “O lenei ‘autau toalaiti,” na ta’ita’ia e Helamana, na faasalalauina “faamoemoega sili ma le olioli tele”¹⁰ i loto o ‘autau popoto a sa Nifae. E mafai e epikopo i aso nei ona taitai a latou talavou tulagaese ma talenia e faamanuia ai le uarota ma le faapotopotoina o Isaraelu. Na aoao mai e Peresitene Russell M. Nelson e faapea o le misiona lenei “na auina mai ai i [latou] i le lalolagi.”¹¹

E faapei o nei talavou a sa Amonā o e “sa faamaoni i taimi uma i soo se mea na faatuatuaina ai i latou,”¹² sa faapena foi ona mulimuli ma le faamaoni Helamana i ona taitai. Po o le a lava le luitau po o to’atuga, sa tumau pea Helamana i le “tautino ma le maua’i”¹³ e faatino lo latou faamoemoega. Ina ua faatonuina o ia e “savavali atu ma [ona] atalii laiti,”¹⁴ sa usitai o ia.

Ua faamanuiaina le autalavou i nei aso a o mulimuli epikopo i le taitaiga a o tatou taitai “ia fefautuaa’i ma peresitene o Tamaitai Talavou o uarota.”¹⁵ E faamautinoa e peresitene o siteki, o loo aoaoina ia epikopo ma peresitene o Tamaitai Talavou i le faataunuuina o o latou tiutetauave mo le autalavou.¹⁶

Sa faamamalu e Helamana ia feagaiga. Ina ua aoao atu e Amona le talalelei i matua o alii talavou totoa, sa latou taliaina ma loto matala. Sa matua’i tuuto atu i latou i lo latou olaga fou o le avea ma soo amiotonu, na latou osifeagaiga ai e “tuu i lalo a latou auupega o le fouvale.”¹⁷ Na pau le mea na afua ai ona latou mafaufau e solia lenei feagaiga, ma toe foi i lo latou tuanai masani o le fetaua’i, o le vaai atu lea ua tulaga matautia ia sa Nifae.

Sa mananao sa Amonā e fesoasoani i nei tagata o ē na ofoina atu ia i latou se aiga saogalemu. Sa tauanau i latou e Helamana, faatasi ai ma isi, ia tausia a latou feagaiga ma aua lava ne’i tau. Sa tele lona faalagolago i le malosiaga o le a saunia e le Atua nai lo le malosiaga o nei sa Amonā semanu e mafai ona latou aumaia ia latou pelu ma ‘aū.

Ina ua feagai Helamana ma lana ‘autau talavou ma luitau taufaamata’u, sa mausali pea Helamana. “Faauta, e le afaina—matou te faalagolago o le a laveaiina i matou e le Atua.”¹⁸ I se tasi taimi, i le toetoe ina a feoti i le fiaai, o la latou tali o le “sasaa atu ai o [latou] agaga i le Atua i le tatalo, ina ia faamalosia e ia i [latou] ma laveai i [latou] … [ma] sa oo ina … asiasi le Alii ia i [latou] ma ni tautinoga o le a ia laveaiina i [latou]”¹⁹ “ona o lo latou faatuatua tele i mea na aoao ai i latou ia talitonu i ai.”²⁰

Ua tatou aoaoina mai ia Helamana o nei alii talavou na lagolagoina e o latou matua. Sa iloa e nei matua faamaoni sa i ai lo latou tiutetauave autu mo le aoaoina o a latou fanau. Sa latou aoao atu a latou fanau ia tausi i poloaiga ma “savavali ma le amiotonu”²¹ i luma o le Atua. Sa aoaoina foi i latou e o latou tina, “afai latou te le masalosalo, o le a laveaiina i latou e le Atua.”²² Sa faatuina e o latou tamā se faataitaiga mamana o le osia o feagaiga.²³ Sa iloa e nei tamā sa avea muamua ma fitafita le matautia o taua. Na latou faatuatuaina Helamana e vaai o latou atalii e leai ni poto masani ma lagolagoina i latou e ala i le auina atu o “meaai ma isi mea e tele.”²⁴

Sa le’i tuuatoatasi Helamana a o ia tautuaina lana autau talavou. Sa i ai tagata na vagaia o ia, ia na ia liliu atu i ai mo se lagolago ma se taitaiga. Sa ia fesootai atu i le Taitai’au o Moronae mo se fesoasoani, ma sa aumaia.

E leai se tasi e auauna atu i le malo o le Alii e auauna atu na o ia. Ua faamanuiaina i tatou e le Alii i uarota ma siteki. E ala i Lana faalapotopotoga ua toefuatai mai, ua tatou maua ai punaoa, poto, ma musumusuga e taulima ai soo se luitau.

E tuuina atu e se epikopo le taitaiga mo le uarota e ala i aufono.²⁵ Na te faalauiloa atu faatalanoaga o auaunaga faalekuata ona uunaia lea o le korama a toeaina ma le Aualofa e faataunuu lo latou tiutetauave o le auauna atu i aiga. O nei au peresitene e taulamua i le iloiloina o manaoga ma su’e ni vaifofo musuia. E ofo atu e peresitene o siteki le lagolago e ala i le aoaoina o au peresitene o korama a toeaina ma Aualofa i nei tiutetauave.

O loo maua le taitaiga moomia mo taitai ma matua i le polokalama Gospel Library ma le Gospel Living. I nei punaoa musuia, e mafai ona tatou maua ai tusitusiga paia, aoaoga a perofeta o aso nei, ma le Tusitaulima Aoao. O le itulau a talavou i le Gospel Library e tele punaoa mo au peresitene o korama ma vasega²⁶ ma le Mo Le Malosi o le Autalavou: O Se Taiala mo le Faia o Filifiliga. A suesue e tagata uma o le uarota nei punaoa musuia ma saili le taitaiga mai le Agaga, o le a taitaia e le Alii tagata uma i le faamalolosia o le autalavou.

O le a faamanuiaina ma faamalosia le uarota atoa pe a taulai tagata o le au paia i le tupulaga faia’e. E ui i o tatou lē atoatoa ma vaivaiga, ae o loo valaaulia i tatou taitoatasi e le Tama Faalelagi, e ala i le mafutaga a Lona Agaga, e aapa atu i isi. Ua Ia silafia tatou te tuputupu a’e ma faapaiaina pe a tatou mulimuli i uunaiga a le Agaga Paia.²⁷ E le afaina le lē atoatoa o a tatou taumafaiga. Pe a tatou faipaaga ma le Alii, e mafai ona tatou faatuatuaina o le a ogatusa a tatou taumafaiga ma mea Na te faia mo le autalavou.

O le mulimuli i le taitaiga a le Agaga Paia e aapa atu i le autalavou, e avea ai i tatou ma molimau o le alofa o le Tama Faalelagi i o latou olaga. O le faatinoina o uunaiga mai le Alii e fausia ai sootaga o le alofa ma le faatuatuaina. O sootaga i olaga o le autalavou, e i ai le tosinaga aupito sili i a latou filifiliga.

O le a aoaoina e le autalavou le mamanu o faaaliga a o latou auai faatasi ma i tatou i le faagasologa o le sailia ma le faatinoina o uunaiga e auauna atu i isi. A o liliu atu le autalavou i le Alii mo lenei taitaiga musuia, o le a faalolotoina o latou sootaga ma Ia ma faatuatuaina atili o Ia.

Tatou te faaali atu lo tatou talitonuga mautinoa i le autalavou e ala i le ofoina atu o le lagolago ma le taitaiga, e aunoa ma lo tatou pulepuletutu.²⁸ A o tatou la’a i tua ae faataga le autalavou e aoao e ala i le fefautuaai faatasi, filifili se ala musuia, ma faatino la latou fuafuaga, o le a latou lagonaina le olioli moni ma le tuputupu a’e.

Na aoao mai e Peresitene Henry B. Eyring e faapea “o le mea o le a sili ona taua o le mea e aoaoina [e isi] mai ia te [oe] i le pe o ai moni lava i latou ma le mea e mafai ona avea moni ai i latou. O la’u mate o le a le mafai ona latou aoaoina tele mai lauga. O le a latou mauaina mai lagona po o ai oe, tagata e te manatu e i ai i latou, ma pe o ai e te manatu e ono avea ai i latou.”²⁹

E faaofo i tatou e o tatou talavou i lo latou lotototoa, lo latou faatuatua, ma o latou tomai. A o latou filifili ia avea o ni soo gaua’i atoatoa o Iesu Keriso, o le a tamau Lana talalelei i o latou loto. O le mulimuli ia te Ia o le a avea o se vaega o o latou tagata, ae le na o mea latou te fai.

Sa fesoasoani Helamana i le autalavou sa Amonā ia latou iloa le ala sa ola ai se soo lototoa o Iesu Keriso. E mafai ona avea i tatou ma faataitaiga mamana i le autalavou i le ala o ola ai so’o o Keriso i aso nei. O loo tatalo matua faamaoni mo nei faataitaiga i olaga o a latou fanau. E leai se polokalama e mafai ona suitulaga i le tosinaga a tagata matutua alolofa, ma tausi feagaiga.

I le avea ai ma peresitene o le korama a ositaulaga, e mafai e le epikopo ona fai se faataitaiga mo le autalavou i le ala e avea ai o se tane faamaoni ma se tamā alofa³⁰ e ala i le puipuia, saunia, ma pulefaamalumalu³¹ i ala amiotonu. O epikopo, e i ai se “taulaiga mamafa i le autalavou,”³² o le a i ai se tosinaga e tumau mo augatupulaga.

O talavou i aso nei o ni isi o agaga e aupito sili ona malualii.³³ O i latou o nisi o leoleo maua’i o le upumoni ma le faitalia i le muai olaga.³⁴ Na fananau mai i latou i nei aso e faapotopoto Isaraelu e ala i la latou molimau mamana i le Alii o Iesu Keriso. Na te silafia i latou taitoatasi ma silafia lo latou gafatia tele. E onosai o Ia a o latou tuputupu a’e. O le a Ia togiola ma puipuia i latou. O le a Ia faamaloloina ma taiala i latou. O le a Ia musuia i latou. O i tatou, o o latou matua ma taitai, ua saunia e lagolago i latou. Ua i ai le Ekalesia a le Faaola e lagolago i latou a o tatou tausi a’e le isi augatupulaga e sosoo ai.

Ou te tuu atu la’u molimau o le Ekalesia a Keriso, na toefuatai mai e ala i le Perofeta o Iosefa Samita ma o loo ta’ita’ia i aso nei e Peresitene Russell M. Nelson, ua faatulagaina e fesoasoani i le autalavou e faataunuu lo latou faamoemoega tele i nei aso e gata ai. I le suafa o Iesu Keriso, amene.