“Ia Filemu ma Iloa o A’u o le Atua”
E mafai ona tatou fifilemu ma iloa o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Faaola.
I le taimi o se faletatala lata mai ma se aso o le maimoaga mo le au faasalalau mo se maota fou o le Alii, sa ou ta’ita’ia ai se vaega o le au tusitala i se maimoaga i le maota paia. Sa ou faamatalaina faamoemoega o malumalu i Le Ekalesia a Iesu Keriso o le Au Paia o Aso e Gata Ai ma tali atu i a latou mau fesili lelei tele.
A o lei ulufale atu i le potu selesitila, sa ou faamalamalama atu e faapea, o le potu faapitoa lenei i le maota o le Alii e faatusa i ai le filemu ma le matagofie o le aiga faalelagi lea e mafai ona tatou toe foi i ai pe a mavae lenei olaga. Sa ou faailoa atu i a matou malo o le a matou le talanoa a o i ai i le potu selesitila, ae o le a ou fiafia e tali soo se fesili pe a uma ona matou se’e atu i le isi vaega o le maimoaga.
I le mae’a ai o le ulufafo atu mai le potu selesitila, ma a o matou faapotopoto i le isi vaega, sa ou fesili i a matou malo pe i ai se mea na latou matauina e mananao e faasoa mai. Sa fai mai ma lagona o’otia tele se tasi o tusitala, “Ou te le’i o’o lava muamua i se mea faapena i lo’u olaga atoa. Ou te le’i iloaina e i ai se filemu faapelā i le lalolagi; sa ou le talitonu e mafai ona i ai sea to’afilemu.”
Sa taia au i le faamaoni ma le matilatila o le faaupuga a lenei tagata. Ma o le tali mai a le tusitala na faamamafa mai ai se tasi o itu taua o le to’afilemu—e faatoilalo ma tapē ai gaogaosa o lo tatou siosiomaga i fafo.
A o ou manatunatu loloto mulimuli ane i le tala a le tusitala ma toe mafaufau ai foi i le saoasaoa matautia e tele ina i ai o tatou olaga i nei ona po—i le pisi, o le pisa, faasese, faasalavei, ma lavasiga e tele ina foliga e tosina i ai la tatou gauai—sa oo mai se mau i lo’u mafaufau: “Ia filemu, ma ia iloa o A’u lava o le Atua.”1
Ou te tatalo o le a faamalamalama e le Agaga Paia i tatou taitoatasi a o tatou mafaufau i se itu maualuga atu ma sili ona paia o le toafilemu i o tatou olaga—se toafilemu faaleagaga o le agaga lea e mafai ai ona tatou iloa ma manatua o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Faaola. O loo avanoa lenei faamanuiaga ofoofogia i tagata uma o le Ekalesia, o e o tauivi faamaoni ia avea ma “tagata o le feagaiga a le Alii.”2
Ia Filemu
I le 1833, sa avea le Au Paia i Misuri ma taula’iga o sauaga ogaoga. Sa tutuliese i latou mai o latou fale i le itumalo o Siakisone e tagata amioleaga; ma sa taumafai ni isi o le Au Paia e faamautu i latou lava i isi itumalo lata ane. Peitai sa faaauau pea sauaga, ma sa tele faamata’u o le oti. I nei tulaga faigata, sa faaalia mai ai e le Alii le faatonuga lenei i le Perofeta o Iosefa Samita i Katelani, Ohaio:
“O lea, ia faamafanafanaina o outou loto e faatatau ia Siona; aua ua i ai tagata uma i oʼu lima; ia filemu ma iloa o A’u lava o le Atua.”3
Ou te talitonu o le apoapoaiga a le Alii “ia filemu” e aofia ai le tele o isi mea nai lo le na ona lē tautala pe lē minoi foi. Atonu o Lona faamoemoega e mo tatou ia manatua ma faalagolago ia te Ia ma Lona mana “i aso uma ma mea uma atoa ma nofoaga uma tatou te i ai.”4 O lea, “ia filemu” atonu o se auala e faamanatu mai ai ia i tatou e taulai atu e le aunoa i le Faaola e fai ma faapogai taualuga o le filemu faaleagaga o le agaga, lea e faamalolosia ai i tatou e faia ma faatoilalo mea faigata.
Atiae i luga o le Papa
O le faatuatua moni e taulai atu i taimi uma i le Alii o Iesu Keriso—ia te Ia o le Alo Paia ma le Toatasi na Fanaua e le Tama Faavavau, ma ia te Ia ma le misiona togiola na Ia faataunuuina.
“Ona ua uma ona tali e ia iuga o le tulafono, ma ua ia i latou uma o e ua faatuatua ia te ia; ma o i latou o e ua faatuatua ia te ia o le a latou piimau i mea lelei uma; o le mea lea ua fautuaina ai e ia le faamoemoe o le fanauga a tagata.”5
O Iesu Keriso o lo tatou Togiola,6 o lo tatou Puluvaga,7 ma lo tatou Fautua8 i le Tama Faavavau ma le papa lea e ao ona tatou atiae ai le faavae faaleagaga o o tatou olaga.
Sa faamatala e Helamana: “Ia manatua, ia manatua o luga lava o le papa o lo tatou Togiola, o lē o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afā malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.”9
O le faatusa o Keriso o le “papa” lea e ao ona tatou atiae ai le faavae o o tatou olaga e aoga tele e malamalama ai. Faamolemole ia matau i le fuaiupu lenei, o le Faaola e lē o le faavae lea. Ae, ua apoapoa’iina i tatou e fau lo tatou faavae faaleagaga i Ona luga.10
O le faavae o le vaega o se fausaga e faafesoota’ia le fale i le eleele. O se faavae malosi e maua ai le puipuiga mai mala faalenatura ma le tele o isi malosiaga faataumaoi. O se faavae sa’o lelei e na te tufaina le mamafa o se fausaga i se vaega tele e ‘alofia ai le soona mamafatu o le eleele i lalo ifo ma maua ai se folaāluga laugatasi mo le fale.
O se sootaga malosi ma le faatuatuaina i le va o le eleele ma le faavae e tatau ai, pe afai e tatau ona tumau le mausali ma le mautu o se fausaga mo se taimi umi. Ma mo ituaiga faapitoa o fale, e mafai ona faaaoga pine taula ma maea u’amea e faapipii ai le faavae o se fale i le “papatū,” le papa malo, mausali i lalo ifo o anomea folaāluga e pei o le palapala ma le ‘ili’ili.
I se ala foi faapena, o faavae o o tatou olaga e tatau ona fesootai i le papa o Keriso pe afai e tatau ona tatou tumau mautu ma mausali. O feagaiga ma sauniga paia o le talalelei toefuataiina a le Faaola, e mafai ona faatusatusa i pine taula ma maea u’amea e faaaoga e faafesootai ai se fale i le papatū. O taimi uma tatou te maua ai, iloilo, manatua, ma faafou ma le faamaoni feagaiga paia, e saga faamautu atili ai ma le mausali o tatou taula faaleagaga i le “papa” o Iesu Keriso.
“O le mea lea, soo se tasi e talitonu i le Atua e mafai moni lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua, e fai ma taula i agaga o tagata, lea o le a latou mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua.”11
E auaua’i ma faateleina “i le aluga o taimi,”12 “e [teuteuina o tatou] mafaufauga e le amiomamā e le aunoa,” e [solo malosi] lo tatou mautinoa i luma o le Atua,” ma o le Agaga Paia [o la tatou] soa e le aunoa.”13 Ua atili ai ona tatou mausali, maua’a, lauiloa, ma mautu.14 A o fausia le faavae o o tatou olaga i luga o le Faaola, ua faamanuiaina i tatou “ia filemu”—e i ai se faamautinoaga faaleagaga o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Faaola.
O Taimi Paia, Nofoaga Paia, ma le Aiga
Ua saunia e le Alii taimi paia ma nofoaga paia e fesoasoani ai ia tatou maua ma aoao e uiga i lenei toafilemu loloto o o tatou agaga.
Mo se faataitaiga, o le Sapati o le aso o le Atua, o se taimi paia ua vaetofia e manatua ai ma tapuai i le Tama i le suafa o Lona Alo, e auai e faatino sauniga o le perisitua, ma maua ma faafou feagaiga paia. O vaiaso taitasi tatou te tapuai ai i le Alii i le taimi o a tatou suesuega i le fale ma faapea foi o “ni tagatanuu faatasi ma le au paia”15 i le taimi o le faamanatuga ma isi sauniga. I Lona aso paia, o o tatou mafaufauga, tāga, ma amioga o faailoga ia tatou te avatu i le Atua ma o se faailoilo foi lea o lo tatou alolofa mo Ia.16 O Aso Sa uma, pe afai tatou te mananao ai, e mafai ona tatou fifilemu ma iloa o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Faaola.
O se matapule tutotonu o la tatou tapuaiga i le Sapati o le “o atu i le fale tatalo ma ofo atu a [tatou] faamanatuga i le aso paia [o le Alii].”17 O “fale o le tatalo” lea tatou te faapotopoto ai i le Sapati o maota tapuai ma isi fale ua faamaonia—o nofoaga paia o le migao, tapuaiga, ma le aoaoina. Ua faapaiaina maota tapuai taitasi ma fanua i le pule o le perisitua e fai ma nofoaga e mafai ona afio ai le Agaga o le Alii ma nofoaga e mafai ona o mai i ai fanau a le Atua e mafai ona latou maua ai “le malamalama i lo latou Togiola.”18 Afai tatou te mananao ai, e mafai ona tatou “fifilemu” i o tatou nofoaga paia o tapuaiga ma iloa moni atili ai o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Faaola.
O le malumalu o le isi nofoaga paia ua vaetofia patino mo tapuaiga ma auaunaga i le Atua ma aoao ai i upumoni faavavau. Tatou te mafaufau ai, faatino, ma ese le faiga o o tatou lavalava i le maota o le Alii mai isi lava nofoaga tatou te ono o soo i ai. I Lona maota paia, pe afai tatou te mananao ai, e mafai ona tatou fifilemu ai ma iloa o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Faaola.
O faamoemoega autu o nei taimi paia ma nofoaga paia e tutusa lelei lava: ina ia taulai atu pea lava pea lo tatou gaua’i i lo tatou Tama Faalelagi ma Lana fuafuaga, i le Alii o Iesu Keriso ma Lana Togiola, le mana faagaeetia o le Agaga Paia, ma folafolaga e o faatasi ma sauniga ma feagaiga o le talalelei toefuataiina a le Faaola.
I le asō ou te toe ta’ua se mataupu faavae na ou faamamafaina atu muamua. O o tatou fale e ao ona avea ma su’ifefiloi taualuga o taimi paia ma nofoaga paia ia e mafai ai e tagata taitasi ma aiga ona “fifilemu” ma iloa o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Faaola. O le tuua o o tatou fale e tapuai i le Sapati ma i le maota o le Alii e matuai tatau ai lava. Ae sei vagana ua tatou toe foi i o tatou fale ma le vaaiga faaleagaga ma le malosi na maua mai i na nofoaga ma gaoioiga paia, ona mafai lea ona tatou lagolagoina la tatou taulaiga i faamoemoega sili o le olaga nei ma faatoilalo ai tofotofoga ua matuai faasoloatoa i lo tatou lalolagi pa’ū.
O o tatou aafiaga faifai pea i le Sapati, malumalu, ma le fale e tatau ona faamalolosia ai i tatou i le mana o le Agaga Paia, faatasi ai ma se sootaga faifai pea ma le malosi atu o feagaiga i le Tama ma le Alo, ma faatasi ai ma “se susulu atoatoa o le faamoemoe”19 i folafolaga e faavavau a le Atua.
A o faapotopoto faatasi le aiga ma le Ekalesia ua tasi ia Keriso,20 atonu tatou te faaletonu i itu uma, ae o le a tatou le popole lava i o tatou mafaufau ma loto. Atonu tatou te fememea’i i o tatou tulaga ma luitau, ae o le a tatou lē atuatuvale ai. Atonu e sauaina i tatou, ae o le a tatou iloa foi e le o tuua lava na o i tatou.21 E mafai ona tatou maua le malosiaga faaleagaga e avea ai ma tumau mausali, mautu, ma faamaoni.
Folafolaga ma le Molimau
Ou te folafola atu a tatou fausia le faavae o o tatou olaga i luga o le “papa” o Iesu Keriso, e mafai ona faamanuiaina i tatou e le Agaga Paia ia maua se filemu taitasi ma faaleagaga o le agaga lea e mafai ai ona tatou iloa ma manatua o le Atua o lo tatou Tama Faalelagi, o i tatou o Ana fanau, o Iesu Keriso o lo tatou Faaola, ma e mafai ona faamanuiaina i tatou e fai ma faatoilalo mea faigata.
Ou te molimau atu ma le fiafia o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Togiola ma le “papa” o lo tatou faaolataga. Ou te molimau atu ai i le suafa paia o le Alii o Iesu Keriso, amene.