O Se Olioli Maualuga Atu
Tau ina ia tatou taufai saili uma ma maua le olioli maualuga atu lea e sau mai le tuuto atu o o tatou olaga i lo tatou Tama Faalelagi ma Lona Alo Pele.
Ua ou maua le faamanuiaga sili o le lauga ai i konafesi aoao mo le tolu sefulu nei tausaga. I lena taimi, e fesiligia lava a’u i fesili e fesootai ma nei savali e le toatele i le lalolagi atoa. Talu ai nei, e tasi se fesili patino o loo sau pea. E masani lava o se mea faapenei: “Elder Uchtdorf, sa ou faalogo ma le toto’a i lau lauga talu ai ae … ou te le’i faalogo lava i se mea e uiga i vaalele.”
Ia, a uma le asō, atonu o le a ou le toe faalogo i lena fesili mo se taimi umi.
E uiga i “le Fiafia Na’ua o Ao Taape ua Suluia i le La”1
E faigata ona talitonuina e na o le 120 tausaga ua te’a talu ona masii mo le taimi muamua le vaalele a Wilbur ma Orville Wright ma felelei atu i luga a’e o le matafaga o Kitty Hawk, Carolina i Matu, E fa malaga pupuu o lena aso ia Tesema na suia ai le lalolagi ma matala ai le faitotoa i se tasi o fatufatua’iga silisili i le talafaasolopito o le lalolagi.
Sa lamatia le felelei i na uluai aso. Sa iloa e le auuso lenei mea. Ma sa faapena foi i lo la tamā, o Milton. O le mea moni, sa matua fefe lava o ia i le feoti o ona atalii i se faalavelave tau vaalele lea na la folafola atu ai ia te ia o le a la le felelei faatasi lava.
Ma sa faapena lava ona fai—ae tasi lava se tuusaunoaga. I le fitu tausaga talu mai lena aso faasolopito i Kitty Hawk, na i’u ai na faamatuu atu e Milton Wright lana faatagaga ma matamata atu a o felelei faatasi ai loa Wilbur ma Orville mo le taimi muamua. Ina ua tulaueleele, sa tauanau e Orville lona tamā e alu i lana malaga muamua ma le mulimuli foi lea, ma ia vaai mo ia lava pe faape’ῑ.
Ina ua masii ese le vaalele mai le eleele, sa matuai lofituina Milton e 82 tausaga le matua i le fiafia tele i le lele lea na mou ese uma ai lona fefe. Sa olioli Orville a o alaga mai si ona tamā ma le fiafia, “Maualuga atu, Orville, Maualuga atu!”2
Sa tutusa lelei lagona o lenei tamalii ma a’u!
Masalo, o le mafuaaga lea ou te lauga atu ai e uiga i vaalele i nisi taimi ona ou te iloa se mea e pei ona lagona e le au Wright. E faapena foi lo’u “solaese mai kalave malolosi pa’a’a o le lalolagi ma siva i luga o ao a o segaia apaau siliva o le vaalele i le fiafia.”3
O le uluai malaga a le auuso Wright lea na faia i le 37 tausaga ae ou te le’i fanau mai, na matala ai faitotoa o le sogasogā, maofa, ma le olioli manino i lo’u olaga.
Ae, e ui i le ofoofogia o le olioli lava ia, sa i ai lava se isi ituaiga o olioli maualuga atu. O le asō, i le agaga o le alaga fiafia a Milton Wright, “Maualuga atu, Orville, maualuga atu,” ou te fia talanoa ai e uiga i lenei olioli maualuga atu—o le mea e sau ai, o le auala e ulufia ai o tatou loto, ma le auala e mafai ona tatou lagona ai i se fuataga tele atu.
O Le Taulaiga Atoa o le Olaga o le Tagata Soifua
Atonu e alu lava [le olaga] e aunoa ma le fai atu e mananao tagata uma ina ia fiafia.4 Ui i lea, e alu foi e aunoa ma le fai atu e le o tagata uma e fiafia. O le faanoanoaga, e foliga mai, mo le toatele o tagata, e faigata ona maua le fiafia.5
Aisea e faapena ai? Afai o le fiafia o le mea lea e tasi e sili ona mananao i ai tatou o tagata soifua, aisea la e matua le faamanuiaina ai la tatou sailiga ia mauaina? Ina ia toe faaupu se pese tuai, atonu o loo tatou sailia le olioli i nofoaga sese uma.6
O Fea e Mafai Ona tatou Maua ai le Fiafia?
Ae tatou te le’i talanoaina le auala e maua ai le olioli, faataga mai a’u e faailoa atu o le atuatuvale ma isi luitau faigata faalemafaufau ma faalelagona e moni lava, ma o le tali e le tau na ona faapea atu “Taumafai ia fiafia atu.” O lo’u faamoemoega i le asō e le o le faaitiitia po o le faatauvaaina o faafitauli tau le soifua maloloina faalemafaufau. Afai o e feagai ma ni luitau faapena, ou te faanoanoa faatasi ma oe, ma ou te tu i ou talaane. Mo nisi o tagata, o le mauaina o le olioli atonu e aofia ai le sailia o le fesoasoani mai polofesa aoaoina o le soifua maloloina faalemafaufau o e ua tuuto atu o latou olaga i o latou tomai faalematata taua tele. E tatau ona tatou faafetai atu mo lea fesoasoani.
O le olaga e le o se faasologa le muta o luitau faalelagona. “Ona e ao lava ina i ai se faafeagai o mea uma.”7 Ma afai na tutulu le Atua, e pei ona faamautu mai e tusitusiga paia,8 o lona uiga e ao foi ona tagi oe ma a’u. O le lagonaina o le faanoanoa e le o se faailoga o le toilalo. I lenei olaga, o le measili, o le olioli ma le faanoanoa o ni soa e le mafai ona tuueseeseina.9 E pei o outou uma, sa ou lagona foi le le fiafia, faavauvau, faanoanoa, ma le salamo.
Peitai, ua ou lagona foi mo a’u lava le amataga mamalu ua faatumulia ai le agaga i le olioli na matua loloto lea e fai si faigata ona taofiofia i totonu. Ua ou iloaina mo a’u lava ia o lenei talitonuga filemu e sau mai le mulimuli i le Faaola ma savali i Ona Ala.
O le filemu Na te aumai ia i tatou e le pei o le mea e aumai e le lalolagi.10 E sili atu. E maualuga atu ma paia atu. Sa fetalai mai Iesu, “Ua ou sau ina ia latou maua le ola, ma ia maua atili ai lava.”11
O le talalelei a Iesu Keriso e moni lava o le “tala fiafia e olioli tele ai”!12 O se savali o le faamoemoe le mafaatusalia! O se savali o le tauaveina o le amo ma le aveesea o avega.13 [O se savali] o le faateleina o faatosinaga paia. O le finagalo malie faalelagi, malamalamaaga maualuga atu, feagaiga paia atu, saogalemu e faavavau, ma le mamalu e faavavau!
O le olioli o le faamoemoega tonu lea o le fuafuaga a le Atua mo Ana fanau. O le mea lea na foafoa i ai oe—”ina ia [e] maua le olioli”!14 Na fausia oe mo lenei mea!
E le o natiaina e lo tatou Tama o i le Lagi le ala i le fiafia. E le o se mea faalilolilo. Ua avanoa mo tagata uma!15
Ua folafola atu ia i latou o ē savavali i le ala o le avea ma soo, mulimuli i aoaoga ma faataitaiga a le Faaola, tausi i Ana poloaiga, ma faamamalu i feagaiga ua latou osia ma le Atua. Oka se folafolaga inā ofoofogia!
Ua I Ai i le Atua se Mea e Sili Atu ua Ofo Mai
Ua tatou iloa uma tagata ua fai mai latou te le manaomiaina le Atua ina ia fiafia ai, o loo fiafia lava i latou e aunoa ma le lotu.
Ou te faamamalu ma faaaloalogia nei lagona. E finagalo lo tatou Tama o i le Lagi i Ana fanau uma ia maua le tele o fiafiaga e mafai ai, o lea na Ia faatumuina ai lenei lalolagi i mea faafiafia ma fiafiaga matagofie, ma anoa, ina ia “faafiafia ai mata ma faaolioli ai le loto.”16 Mo a’u, o le lele na aumai ai le fiafia tele. O isi latou te maua i musika, i faatufugaga, i mea e fiafia e fai, po o le natura.
I le valaauina o tagata uma ma le faasoaina atu o le tala fiafia a le Faaola e olioli tele ai, tatou te le faatauagavale ai i soo se puna nei o le olioli. O loo tatou fai atu ma le faigofie o loo i ai i le Atua se mea e sili atu e foai mai. O se olioli maualuga atu ma loloto atu—o se olioli e sili atu i lo se isi lava mea e ofo mai e lenei lalolagi. O le olioli lea e onosaia le lotonutimomoia, e talepeina faanoanoaga, ma faaitiitia le lagona tuuatoatasi.
O le fiafia faalelolagi, i se isi itu, e le tumau. E le mafai lava. O le natura lava ia o mea uma faalelalolagi o le faasolo matua, pala, leaga, po o le le toe aoga. Ae o le olioli faaleatua e faavavau, ona o le Atua e faavavau. Na afio mai Iesu Keriso e siitia ese i tatou mai le faaletino ma suia le pala i le lē pala. Ua na o Ia e i ai lena mana, ma ua na o Lona olioli e faavavau.
Afai e te lagonaina e ono tele atu se ituaiga olioli faapenei e ao ona i ai i lou olaga, ou te valaaulia la oe ia amata lau malaga o le mulimuli ia Iesu Keriso ma Ona ala. O le malaga o le olaga atoa—ma tala atu. Faamolemole se’i o’u fautua atu ni nai laasaga amata i lenei malaga agavaa o le mauaina o le olioli mama.
Faalatalata i le Atua17
E te manatuaina le fafine i le Feagaiga Fou na onosaia se ma’i punatoto mo le 12 tausaga?18 Sa ia faaaluina mea uma na ia te ia i fomai, ae na atili ai ona ma’i. Sa ia faalogo e uiga ia Iesu; sa lauiloa Lona mana e faamalolo ai [tagata]. Ae pe mafai la ona Ia faamalolo ia te ia? Ae na faapefea ona vave ona ia latalata ia te Ia? O lona ma’i na “le mama” ai o ia e tusa ma le tulafono a Mose, ma o lea sa manaomia ai ona ia nofoese mai isi.19
O le faalatalata atu ia te Ia i luma o tagata ma ōle atu mo se faamalologa na foliga mai e le talafeagai.
Ae sa ia mafaufau pea, “Afai ou te pa’i atu tau lava o ona ofu, ona ou malolo ai lea.”20
Mulimuli ane, na faatoilalo e lona faatuatua lona fefe. Sa ia lototele i le faitioina o ia e isi ma fetaomi atu i luma i le Faaola.
Ma i’u ai ina ia latalata atu. Sa tuu atu lona lima.
Ma sa faamalolo ai o ia.
Pe le pei ea i tatou uma o lenei fafine i nisi o mea?
Atonu e tele lava ni mafuaaga tatou te faatuai ai ona faalatalata atu i le Faaola. Atonu tatou te feagai ma ni faitioga po o ni ta’usalaga mai isi. I lo tatou faamaualuga, atonu tatou te aveese ai le avanoa o se mea faigofie tele ae matua taua tele. Atonu tatou te mafaufau i o tatou tulaga ua tatou le agavaa ai mo Lana faamalologa—ma ua mamao tele le va, pe ua tele na’ua foi tatou agasala.
E pei o lenei fafine, ua ou aoao ai afai tatou te faalatalata atu i le Atua ma aapa atu ia pa’i ia te Ia, e mafai moni ona tatou maua le faamalologa, filemu, ma le olioli.
Saili mo le Olioli
Sa aoao mai Iesu, “Ole mai, ma o le a outou maua ai.”21
Ou te talitonu o lenei fasifuaitau faigofie e le gata o se folafolaga faaleagaga; ae o se tautinoga o le mea moni.
Afai tatou te saili i mafuaaga ina ia ita ai, ia masalosalo ai, ia lototiga ai pe tuuatoatasi ai, o le a tatou maua lava foi.
Peitai, afai tatou te sailia le olioli—afai tatou te saili mo ni mafuaaga e olioli ma mulimuli ai ma le fiafia i le Faaola, o le a tatou maua lava.
E seāseā lava tatou mauaina se mea tatou te le o sailia.
O e sailia le olioli?
Saili, ona tou maua lea.
Tauave Avega a le Tasi ma le Isi22
Sa aoao mai Iesu, “E sili le manuia o le na te foai atu i lo le na te talia mai.”23
Pe le o lo tatou sailiga ea mo le olioli, le auala silisili e maua ai o le avatu o le olioli i isi?
Uso e ma tuafafine, ua outou silafia ma ou iloa e moni lenei mea! O le olioli e pei o se paelo falaoamata po o se fagu suauu o le a le matūtū lava.24 O le olioli moni e faateleina pe a faasoaina.
E le tau manaomia ai se mea matautia pe faigata.
E mafai ona tatou faia ni mea faigofie.
E pei o le tatalo mo se tasi ma o tatou loto atoa.
Tuuina atu o se faamālō faamaoni.
Fesoasoani i se tasi ia lagona le talileleia, faaaloalogiaina, faatauaina, ma le alofaina.
Faasoaina atu o se mau e sili ona fiafia i ai ma lona uiga ia i tatou.
Pe tau foi na ona faalogologo atu.
“Pe a outou auauna atu i o outou uso-a-tagata, ua na o lo outou auauna atu lava lea i lo outou Atua,”25 ma o le a tauia ma le agaalofa e le Atua lou agalelei.26 O le olioli e te avatu i isi o le a toe faafoi atu ia te oe i “le fua lelei, e lolomi ma luluina, e tumu ma [taumasuasua].”27
“O Le A La Se Mea Tatou Te Faia?”28
I aso, vaiaso, ma masina a sau, ou te valaaulia outou ia:
-
Faaalu le taimi i se taumafaiga faamaoni ma le loto atoa ia faalatalata atu i le Atua.
-
Saili ma le filiga i aso uma mo ni taimi faapitoa o le faamoemoe, filemu, ma le olioli.
-
Avatu le olioli i isi o loo siomia oe.
O’u uso e ma tuafafine, uo pele, a o outou sailiili i le afioga a le Atua mo se malamalamaaga loloto atu e uiga i le fuafuaga e faavavau a le Atua, ia talia valaaulia nei, ma tauivi e savali i Ona Ala, o le a outou lagonaina “le [filemu] mai le Atua, o loo silisili lava i mea uma e manatu i ai,”29 e oo lava i le lotolotoi o faanoanoaga. O le a outou lagonaina se fuataga tele atu o le alofa silisili o le Atua ua maena a’e i totonu o lou loto. O le fotu mai o le malama faaselesitila o le a suluia ma mou ai le pogisa o ou tofotofoga, ma o le a amata ai ona e tofo i mamalu ma mea ofoofogia le mafaamatalaina o le lalolagi lemavaaia, atoatoa ma faalelagi. O le a e lagonaina le siitia ese o lou agaga mai avemalolosi o lenei lalolagi.
Ma e pei o Milton Wright lelei, masalo o le a sii lou leo i le olioli ma alaga atu, “Maualuga atu, Tamā, maualuga atu!”
Tau ina ia tatou taufai saili uma ma maua le olioli maualuga atu lea e sau mai le tuuto atu o o tatou olaga i lo tatou Tama Faalelagi ma Lona Alo Pele. O la’u tatalo faatauanau ma faamanuiaga ia i le suafa paia o Iesu Keriso, amene.