Faaliliuga o Gagana mo le Konafesi Aoao

I le itula a o lumanai sauniga taitasi o le konafesi aoao, e faitau selau tagata tomai faapitoa i gagana e faapotopoto i se potu tele e toe polesi ai lauga o le konafesi ua faaliliuina ma o le a faamatalaina i se tasi o gagana e 103.

O le taimi lava e amata ai le konafesi, e tasi lava le avanoa latou te maua. E tatau ona lelei, ma e tatau ona lelei i le taimi muamua. O le faaliliuga lelei e manaomia ai le fegauia’iga masani, leo, manino o le faaleoga, ma le tomai i gagana, a o faailoa atu lagona ma faamoemoega o le failauga i le pulelaa i le agaga lava lea e tasi na fatuina ai le savali.

E silia ma le 800 tagata tautatala i gagana, ma faifeautalai ua toe foi mai na faaliliuina ni vaega o lenei konafesi aoao. Pe tusa ma le afa na tuuina atu savali mai le Aai o Sate Leki, Iuta, ISA, ae o le isi afa na tuuina mai a latou faaliliuga mai o latou atunuu moni. O nisi foi e auai i le faaliliuga o lauga o le konafesi i vaiaso a o lumanai le konafesi aoao.

I le taimi o le faasalalauga, e masani lava ona galulue faamatalaupu i ni vaega e fa i le ono i le sauniga, e faitau savali taitasi i se tamai potu e maopo lelei ai le leo i le Maota o Ofisa o le Ekalesia po o nofoaga atofaina i le salafa o le lalolagi. O le faaaogaina o ni meafaalogologo e lagona ai le gagana Peretania, e matamata faamatalaupu i se masini faafoe e taimi ai a latou faaliliuga i le failauga. E tatau i faamatalaupu ona tausisia ni talanoaga se lua—i gagana eseese—e o atu i le taimi e tasi i o latou mafaufau.

Fai mai le faamatalaupu o Jonas Prasad, o tagata o le Ekalesia e tautatala i le gagana Hindu i Fiti e naunau e faalogo i perofeta i la latou gagana. I le faamatalaina o se tasi o tuafafine, sa ia fai mai ai, “Mo le tele o tausaga, na pau lava sauniga a le Ekalesia na avanoa mo ia sa faia i le gagana Peretania. E ui lava e le’i tautala o ia i se upu, ae na sau o ia ma nofo filemu ia lagona ai le Agaga. O lea ua fiafia o ia e faalogo i le talalelei i lana gagana.”