Faafeagai o Mea Uma

Saunia e Elder Mathias Held

O Le Fitugafulu

Ina ia mafai ona faaaoga lo tatou faitalia, e tatau ona i ai ni a tatou filifiliga faafeagai e mafaufau i ai.

Talu ai nei, a o tietie atu i se aai sa le mailoa ia i ma’ua, ou te le’i mafaufauina le ala na afe sesē ai le taavale, lea na taitai atu ai ma’ua ma lo’u toalua i se aualatanu televave mo le tele o maila e aunoa ma le mafai ona toe liliu. Sa ma mauaina se valaaulia agalelei i le fale o se uo ma le popole o le a sili ona tuai le taimi ma te taunuu ai nai lo le mea sa ma’ua faamoemoeina.

A o ou i ai i lenei auala ma vaavaai ma le naunautai mo se auala e o ese ai, sa ou tu’ua’ia a’u lava mo le le mataala lelei i le polokalama o le faatautaiga. O lenei aafiaga na mafua ai ona ou mafaufau i le ala tatou te faia ai i nisi taimi ni faaiuga sese i o tatou olaga ma le ala e tatau ona tatou ola ai i taunuuga i le lotomaualalo ma le onosai seia mafai ona toe suia lo tatou ala.

O le olaga e faatatau uma lava i le faia o filifiliga. Na tuuina mai ia i tatou e lo tatou Tama oi le Lagi le meaalofa paia o le faitalia ina ia mafai ai ona tatou aoao mai a tatou filifiliga—mai filifiliga sa’o ma mai filifiliga sese foi. Tatou te faasa’oina a tatou filifiliga sese pe a tatou salamo. O i lea e tupu ai le tuputupu ae. O le fuafuaga a le Tama Faalelagi mo i tatou uma e faatatau i le aoaoina, atiina ae, ma le alualu i luma agai i le ola e faavavau.

Talu lava ona aoaoina i ma’ua ma lo’u toalua e faifeautalai ma auai i le Ekalesia i le tele o tausaga ua mavae, sa faagaeetia pea lava a’u i aoaoga loloto na tuuina atu e Liae i lona atalii o Iakopo i le Tusi a Mamona. Sa ia aoao atu ia te ia e faapea “na tuuina mai e le Alii le Atua i le tagata ia tatau ona ia fai mo ia lava”¹ ma “e ao lava ina i ai se faafeagai o mea uma.”² Ina ia mafai ona faaaoga lo tatou faitalia, e tatau ona i ai ni a tatou filifiliga faafeagai e mafaufau i ai. O le faia o lea mea, ua faamanatu mai ai foi e le Tusi a Mamona ia i tatou ua “lava le aoaoina o [i tatou]”³ ma “o le Agaga o Keriso”⁴ ua tuuina mai ia i tatou uma taitoatasi ia “iloa le lelei mai le leaga.”⁵

I le olaga, tatou te fetaiai pea lava pea ma le tele o filifiliga taua. Mo se faataitaiga:

Filifili pe o le a tatou mulimuli pe leai i poloaiga a le Atua.
O le filifili ia faatuatua ma iloa le taimi e tutupu ai vavega pe faatalitali ma le le talitonu mo se mea e tupu a o lei filifili e talitonu.
Filifili e atiina ae le talitonu i le Atua pe ia faatalitali ma le fefe i se isi luitau i le aso e sosoo ai.

E pei ona ou afe sese i lena auala televave; o le mafatia mai taunuuga o a tatou lava filifiliga lē lelei e masani lava ona matua tiga aua e na o i tatou lava e tu’ua’ia. Ae ui i lea, e mafai ona tatou filifili i taimi uma ia maua le mafanafana e ala i le faagasologa paia o le salamo, toe faasa’o ia mea sese, ma i le faia o lena mea e aoao ai nisi o lesona e suia ai olaga.

O nisi taimi e mafai foi ona tatou oo i mea faafeagai ma tofotofoga mai mea i fafo atu o lo tatou malosi, e pei o le:

Taimi o le soifua maloloina ma vaitau o gasegase.
Taimi o le filemu ma taimi o fetau’aiga.
Itula o le ao ma le po ma vaitau o le taumafanafana ma le taumalulu.
O taimi o galuega e sosoo ai ma taimi o malologa.

E ui lava e masani ona le mafai ona tatou filifili i le va o nei ituaiga o tulaga aua e tupu lava, ae tatou te saoloto lava e filifili pe faapefea ona tali atu ia i latou. E mafai ona tatou faia ma se uiga lelei po o se uiga lē lelei. E mafai ona tatou saili e aoao mai le aafiaga ma ole atu mo le fesoasoani ma le lagolago a lo tatou Alii, pe e mafai ona tatou mafaufau ua na o i tatou lava i lenei tofotofoga ma e tatau ona tatou puapuagatia ai na o i tatou. E mafai ona tatou “fetuunaia la o o tatou vaa” i le mea moni fou, po o le mafai foi ona tatou filifili e aua nei suia se mea. I le pogisa o le po, e mafai ona tatou kiina a tatou moli. I le malulu o le tau malulu, e tatau ona tatou filifili e ofu ni ofu mafanafana. I vaitau o gasegase, e mafai ona tatou saili le fesoasoani faafoma’i ma faaleagaga. Tatou te filifili pe faapefea ona tali atu i nei tulaga.

O le Fetuuna’i, aoao, saili, filifili o ni veape faatino uma. Manatua o i tatou o ni sui ae le o ni meafaitino. Ia aua lava nei galo ia i tatou na folafola mai e Iesu e “ave i ona luga tiga ma ma’i o ona tagata … ina ia mafai e ia [ona] … fesoasoani” pe fesoasoani ia i tatou a o tatou liliu atu ia te Ia.⁶ E mafai ona tatou filifili e fausia o tatou faavae i luga o le papa o Iesu Keriso ina ia oo mai le asiosio “o le a leai sona mana i luga o [i tatou].”⁷ Ua Ia folafola mai “o soo se tasi e sau [ia te Ia], o ia lea o le a ia taliaina; ma amuia lava i latou o ē e o mai ia te Ia].”⁸

Ia, o loo i ai se mataupu faavae faaopoopo se tasi e matua taua lava. Na fai mai Liae “e tatau ona i ai … o se faafeagai o mea uma.”⁹ O lona uiga e le o tuuesea mea faafeagai mai le tasi ma le isi. E mafai foi ona faaatoatoa e le tasi le isi. Semanu e le mafai ona tatou iloa le olioli sei vagana ua tatou oo foi i le faanoanoa i se taimi. O le lagonaina o le fiaai i nisi taimi e fesoasoani tatou te matuai faafetai ai pe a lava meaai tatou te toe aai ai. Semanu e le mafai ona tatou iloa le upumoni sei vagana ua tatou vaai foi i pepelo iinei ma iina.

O nei faafeagai e pei uma lava o itu e lua o le tupe siliva e tasi. E i ai itu uma e lua i taimi uma. Na tuuina mai e Charles Dickens se faataitaiga o lenei manatu ina ua ia tusia faapea “o taimi sili ona lelei, o taimi sili ona leaga.”¹⁰

Sei ou avatua se faataitaiga mai i lo’u lava olaga. O le faaipoipo, fatuina o se aiga, ma le mauaina o fanau na aumaia ai ia i ma’ua taimi sili ona maoae o le olioli ua ma oo i ai i o ma olaga ae o taimi sili foi ona o’oo’o o tiga, mafatiaga, ma le faavauvau pe a tupu se mea i se tasi o i matou. O le olioli ma le fiafia e le iu ma le ma fanau sa sosoo ai foi ma ni taimi faifaipea o ma’i, falema’i, ma le le momoe i po na faatumulia i mafatiaga, faapea foi ma le mauaina o le toomaga i tatalo ma faamanuiaga faaleperisitua. O nei aafiaga eseese na aoaoina ai i matou e le o tuua lava na o i tatou i taimi o puapuaga, ma sa latou faaali mai ai foi ia i matou le tele o mea e mafai ona tatou tauaveina faatasi ma le fesoasoani a le Alii. O nei aafiaga na fesoasoani e mamanu ai i matou i ni auala matagofie, ma ua matua aoga uma lava. Pe le o le mea ea lenei na tatou o mai ai iinei?

I tusitusiga paia tatou te maua ai foi nisi o faataitaiga mananaia:

Na aoao atu e Liae i lona atalii o Iakopo o puapuaga na ia mafatia ai i le vao na fesoasoani ia te ia e iloa ai le silisiliese o le Atua ma “o le a faapaiaina [e le Atua ona] puapuaga mo lona manuia.”¹¹
I le taimi o le faafalepuipuiina saua o Iosefa Samita i le Falepuipui o Liperate, sa ta’u atu ai e le Alii ia te ia “o nei mea uma e tuuina atu ai ia te ia le poto masani, ma o le a avea mo lona lelei.”¹²
O le mea mulimuli, o le taulaga e le i’u a Iesu Keriso sa mautinoa lava o le faataitaiga aupito silisili lea o le tiga ma mafatiaga ua vaaia, ae na aumaia ai foi faamanuiaga matagofie o Lana Togiola i fanau uma a le Atua.

I le mea o i ai le la susulu, e tatau foi ona i ai iina atalafoia. E mafai e lologa ona aumaia le faatafunaga, ae e masani lava ona latou aumaia ai foi le ola. O loimata o le faavauvau e masani ona liua i loimata o le toomaga ma le fiafia. O lagona o le faanoanoa pe a tuua ē e pele, e tauia mulimuli ane i le olioli o le toe feiloai ai. I vaitau o taua ma le faatafunaga, e tele nai faatinoga laiti o le agalelei ma le alofa o loo tutupu foi mo i latou e i ai “mata e vaai, ma taliga e faalogo.”¹³

E masani ona iloga lo tatou lalolagi i aso nei i le fefe ma le popole—fefe i mea e ono aumaia e le lumanai mo i tatou. Ae ua aoaoina i tatou e Iesu ia faalagolago ma “vaai atu ia te Ia i mafaufauga uma; aua le masalosalo, aua le fefefe.”¹⁴

Ia tatou faia pea lava pea se taumafaiga magafagafa lelei e vaai ai i itu e lua o tupe siliva uma ua tuuina mai ia i tatou i o tatou olaga. E ui atonu o nisi taimi tatou te le vave iloa ai itu uma e lua, e mafai ona tatou iloa ma talitonu o loo i ai pea iina.

E mafai ona tatou mautinoa o o tatou faigata, faanoanoaga, puapuaga, ma tiga e le faamatalaina ai i tatou; ae o le auala o tatou taulimaina ai lea o le a fesoasoani tatou te tuputupu a’e ai ma faalatalata atili atu ai i le Atua. O o tatou uiga ma filifiliga e sili atu ona faamatalaina ai i tatou nai lo o tatou luitau.

Pe a soifua maloloina, faapelepele ma ia lotofaafetai i ai i taimi uma. Pe a ma’i, saili ia aoao ma le onosai mai ai ma iloa e mafai ona toe suia lenei mea e tusa ai ma le finagalo o le Atua. Pe a faanoanoa, faalagolago o loo i ai le fiafia i le tulimanu; e masani lava ona le mafai ona tatou vaai i ai. Ia suia ma le iloa lelei lau taulaiga ma siitia ou mafaufauga i vaega lelei o luitau, aua e le masalomia lava lo latou i ai iina i taimi uma! Aua nei galo le lotofaafetai. Filifili e talitonu. Filifili e faatuatua ia Iesu Keriso. Filifili e faalagolago i taimi uma i le Atua. Filifili e “mafaufau faaselesitila,” e pei ona aoaoina ai talu ai nei i tatou e Peresitene Russell M. Nelson!¹⁵

Ia tatou manatua pea le fuafuaga matagofie a lo tatou Tama Faalelagi mo i tatou. E alofa o Ia ia i tatou ma auina mai Lona Alo Pele e fesoasoani i o tatou tofotofoga ma tatala mo i tatou le faitotoa e toe foi atu ai ia te Ia. O loo soifua Iesu Keriso ma o loo tu iina i taimi uma, ma faatalitali mo i tatou e filifili e valaau atu ia te Ia e tuuina mai le fesoasoani, malosi, ma le faaolataga. Ou te molimau atu ai i nei mea, i le suafa o Iesu Keriso, amene.