“Elder D. Martin Goury,” Liahona, Me 2024.
Elder D. Martin Goury
Fitugafulu o le Pulega Aoao
I le ola a’e ai i se tamai nuu i Côte d’Ivoire, sa moemiti ai Elder D. Martin Goury e avea ma se faifeau ma auauna atu i isi.
Ia Oketopa 1992, a o i ai i Lonetona, Egelani, aoaoina le gagana Peretania ma ua a’otauina, sa ia feiloai ai i faifeautalai o le Au Paia o Aso e Gata Ai. O faifeautalai, o se tasi o i latou sa na o le pau lea o le faifeautalai e tautatala faaFarani i Lonetona, na tuuina atu ia Elder Goury se kopi o le Tusi a Mamona i le gagana Farani.
Sa amata ona ia faitauina le tusi ma e le’i umi ae maua se molimau i lona moni. Ina ua o mai se paga fou o faifeautalai i lona fale mautotogi i ni nai masina mulimuli ane, sa auai o ia i le Ekalesia. “Ou te manatua lo’u fiafia tele,” o lana tala lea.
Na faateleina lona olioli a o aoaoina o ia e faifeautalai e uiga i le perisitua. “Sa latou faamalamalamaina le uiga o le perisitua ma le auala e mafai ona ou faaaogaina ai lena mea e auauna atu ai i isi tagata. Mo a’u lava ia, o la’u miti lena ua taunuu,” o le tala lea a Elder Goury. “Sa ou fiafia.”
Sa fanau Dalébé Martin Goury i le aso 30 o Ianuari, 1964, ia Yoro Goury Maurice ma Bame Gaby Odette. Sa ola a’e o ia i se nuu e ta’ua o Lehipa ma aai o Oume ma Gagnoa. Sa faaipoipo o ia ia Ruth Simone Kennington i le Malumalu o Lonetona Egelani i le aso 8 o Aperila, 1995. E nonofo i laua i Abidjan, Côte d’Ivoire, ma e toafa le la fanau.
Na maua e Elder Goury faailoga o le tagata malaga i le faiaoga mai le CAFOP (Animation and Educational Training Centers) de Man i le 1988 ma le faaenisinia o masini mai le Iunivesite o Lonetona i Saute Bank i le 1997. Sa galue o ia o se faiaoga o le aoga tulagalua, enisinia o mamanu, pule sinia o galuega faatino ma lagolago faatonu o galuega faatino mo Cameron, pule aoao o le faagaoioiga o le Tautua a Nigeria mo le OneSubsea Services, ma le pule o le faagaoioiga o le atunuu mo Schlumberger. Talu ai nei lava, sa faigaluega ai Elder Goury mo le Ekalesia o se taitai ma se taitai faamaopoopo lagolago mo tagata o le ekalesia.
Sa auauna atu o ia o se Fitugafulu Eria i le Eria i Aferika Sisifo i le taimi o lona valaauga. Sa avea muamua o ia ma peresitene o le Misiona a Benin Cotonou, epikopo, fesoasoani i le au epikopo, peresitene o le paranesi, ma le peresitene o le korama a toeaina.