“Elder Steven D. Shumway,” Liahona, Me 2024.
Elder Steven D. Shumway
Fitugafulu o le Pulega Aoao
I le lua tausaga talu ona faigaluega o ia i le Exxon Chemical Co. i Houston, Texas, ISA, na iloa ai e Elder Steven D. Shumway ua valaauina ona matua e pulefaamalumalu i se misiona i Polivia ma sa manaomia ai se fesoasoani i le pisinisi a le aiga i Arisona.
“Ou te le fia tuuina atu se uunaiga ia te oe e te toe foi mai,” o le tala lea a lona tama ia te ia. “Ae afai e te le toe foi mai, ou te popole po o le a le mea o le a tupu i le pisinisi.”
O se faaiuga faigata ona faia, o le tala lea a Elder Shumway.
Sa la malaga ma lona toalua i le lima itula i le Malumalu o Dallas Texas ma faaalu ai le aso iina e aunoa ma le mauaina o se tali. Ina ua mavae lena, sa la asiasi atu i se faletusi ma vaaia ai le talaaga o le soifuaga o Peresitene Gordon B. Hinckley (1910–2008), Go Forward with Faith.
“Sa ma lagonaina uma le fetalaiga a le Alii, ‘E tatau ona e agai i luma ma le faatuatua i lo’u ala, ae le o lou ala,’” o le tala lea a Elder Shumway. “Ma o lea na matou siitia atu ai i Arisona, lea ua avea ma se tasi o suiga sili ona taua ma matagofie i o matou olaga.”
O se tasi o mea sili ona lelei ua la aoaoina i la laua faaipoipoga, na saunoa ai Elder Shumway, o le “pe a e taliaina le valaaulia a le Alii, e te manuia. E te alualu i luma. E sili atu mea uma nai lo le taumafai e fai mea i lou ala.”
Sa fanau Steven D. Shumway i le aso 30 o Iuni, 1970, i Springerville, Arisona, ISA, ia Wilford Douglas ma Dixie Ann Shumway, ma sa ola ae i Eager, Arisona. Na ia faaipoipo ia Heidi O’Brien i le Malumalu o Sate Leki i le aso 29 o Tesema, 1994. O i laua o ni matua o se fanau e toafa ma o loo nonofo i Pinetop, Arisona.
Na maua e Elder Shumway se faailoga i le faaenisinia o vailaau mai le Iunivesite o Polika Iaga i le 1996, sa faigaluega i le Exxon Chemical Co. mai le 1996 i le 1998, ma sa avea ma peresitene ma PULE FAATONUSILI o le Whiting Brothers Investment Co. talu mai le 1998.
I le taimi o lona valaauga, sa avea o ia o se Fitugafulu Eria. Sa avea o ia ma peresitene o le Misiona a Ilinoi Chicago, peresitene o le siteki, epikopo, peresitene o le korama a toeaina, faiaoga sauniuni mo le misiona a le siteki, ma se faifeautalai faamisiona i le Misiona a Penisilevania Philadelphia.