« ឥទ្ធិពលរបស់ស្រ្តី » លីអាហូណា ខែ ឧសភា ឆ្នាំ ២០២៤ ។
ចេញពីការប្រជុំធម្មនិដ្ឋានរបស់សមាគមសង្រ្គោះទូទាំងពិភពលោក ឆ្នាំ ២០២៤
ថ្ងៃទី ១៧ ខែ មីនា ឆ្នាំ ២០២៤
ឥទ្ធិពលរបស់ស្រ្តី
សូមកុំមើលស្រាលអំណាចដ៏វិសេសវិសាលនៅក្នុងខ្លួនរបស់បងប្អូនក្នុងការមានឥទ្ធិពលល្អទៅដល់អ្នកដទៃឡើយ ។
បងប្អូនស្រីជាទីស្រឡាញ់របស់សមាគមសង្គ្រោះ ខ្ញុំមានអំណរគុណដែលបាននិយាយជាមួយបងប្អូននាថ្ងៃនេះ ។ ខ្ញុំបានគិតដល់បងប្អូនជាញឹកញាប់ ។ ខ្ញុំ មាន អំណរគុណយ៉ាងជ្រាលជ្រៅ និងមានអារម្មណ៍ថាជំពាក់គុណ ចំពោះ បងប្អូន ។ អំពើល្អជាច្រើនដែលសាសនាចក្រនេះសម្រេចបាន—ហើយអំពើល្អជាច្រើនដែលកើតឡើងក្នុងពិភពលោកនេះ—គឺកើតឡើងដោយសារតែ បងប្អូន ! សូមអរគុណចំពោះការលះបង់របស់បងប្អូនចំពោះព្រះអម្ចាស់ ក៏ដូចជាការខិតខំប្រឹងប្រែងរបស់បងប្អូនដើម្បីលើកស្ទួយអ្នកដទៃ ។ ខ្ញុំដឹងថាព្រះអម្ចាស់ស្រឡាញ់បងប្អូនប៉ុនណា ហើយពឹងផ្អែកទៅលើបងប្អូន ។
ខ្ញុំស្ងើចសរសើរចំពោះសេចក្តីជំនឿ និងការយកចិត្តទុកដាក់របស់បងប្អូនចំពោះអ្វីៗនៃព្រះវិញ្ញាណ ។ ខ្ញុំត្រូវបានបំផុសគំនិតដោយការឧស្សាហ៍ព្យាយាមរបស់បងប្អូន ភាពជាអ្នកដឹកនាំប្រកបដោយថាមពល និងសមត្ថភាពរបស់បងប្អូនក្នុងការមើលឃើញតម្រូវការ និងបំពេញតម្រូវការនោះ ។ មិនថាវាជាអក្ខរកម្ម កង្វះអាហារូបត្ថម្ភ កង្វល់សុខភាពផ្លូវចិត្ត ឬតម្រូវការប្រចាំថ្ងៃរបស់អ្នកដទៃទេ បងប្អូនដោះស្រាយបញ្ហាជីវិតពិតជាមួយនឹងការរួមបញ្ចូលគ្នានូវជំនាញដ៏កម្រ ក្តីមេត្តា ការយល់ដឹង និងសេចក្តីស្រឡាញ់ ។ បេសកកម្មទាំងមូលរបស់សាសនាចក្រនៃព្រះអម្ចាស់ត្រូវបានពង្រឹងដោយសារបងប្អូន ។
បងប្អូនស្រី បងប្អូនមានអំណោយទានដ៏ទេវភាព ដែលអនុញ្ញាតឲ្យបងប្អូនផ្លាស់ប្តូរជីវិតយ៉ាងពិតប្រាកដ ! នេះគឺជាការពិតជាពិសេស នៅពេលដែលយើងកំពុងចូលរួមយ៉ាងអន្ទះសានៅក្នុងបញ្ញត្តិដ៏ទេវភាពក្នុងការប្រមូលវង្សអ៊ីស្រាអែល ។ គ្រប់ពេល ដែលយើងជួយ អ្នកណាម្នាក់ ឲ្យស្វែងរកផ្លូវនៃសេចក្ដីសញ្ញា ហើយបន្តដំណើរទៅមុខទៀត នោះយើងកំពុងជួយប្រមូលវង្សអ៊ីស្រាអែលហើយ ។ គ្មាននរណាម្នាក់ធ្វើការនេះបានល្អជាងបងប្អូននោះទេ—ក្នុងនាមជាម្ដាយ ថ្នាក់ដឹកនាំ គ្រូបង្រៀន បងប្អូនស្រី និងមិត្តភក្ដិ ។ បងប្អូនកំពុងរៀបចំកូនចៅជំនាន់ក្រោយរបស់សាសនាចក្រនៃព្រះអម្ចាស់ និងពិភពលោក !
ថ្មីៗនេះ យើងបានដឹងពីក្មេងស្រីអាយុបីឆ្នាំម្នាក់ដែលភ្ញាក់ពីដំណេកពេលថ្ងៃ ។ ដើម្បីលួងនាង បងប្រុសរបស់នាងបានយកតុកត្តាមួយឲ្យនាង មួយហើយមួយទៀត ។ ប៉ុន្តែ តើអ្វីដែលនៅទីបំផុតនាំមកនូវការលួងលោម និងអំណរដល់នាង ? ព្រះគម្ពីរមរមនមួយក្បាលរបស់នាង ! ក្មេងស្រីតូចម្នាក់នេះមើលម្តាយរបស់នាងអានព្រះគម្ពីរមរមនជារៀងរាល់ថ្ងៃ ។ នាងចង់ធ្វើដូចជាម្តាយរបស់នាង !
វាមិនអាចធ្វើទៅបានទេក្នុងការគណនាឥទ្ធិពលនៃជីវិតរបស់ស្ត្រីដែលមានសេចក្ដីសញ្ញារបស់ព្រះ ។ ខ្ញុំស្រឡាញ់បងប្អូនប្រុសរបស់ខ្ញុំ ហើយខ្ញុំស្រឡាញ់នូវអភ័យឯកសិទ្ធិក្នុងការធ្វើការជាមួយពួកគាត់ ។ ទោះជាយ៉ាងណា មនុស្សពីរនាក់នៅលើផែនដីដែលមានឥទ្ធិពលលើខ្ញុំជាងគេគឺ ភរិយារបស់ខ្ញុំ ដេនហ្សែល ដែលជាម្តាយរបស់កូនទាំង ១០ នាក់ របស់យើង ដែលបានទទួលមរណភាពភ្លាមៗនៅអាយុ ៧៨ ឆ្នាំ ហើយអស់រយៈពេល ១៨ ឆ្នាំមកនេះ នោះគឺភរិយាដ៏ល្អរបស់ខ្ញុំ វិនឌី ។
អំឡុងពេលនៃការជាសះស្បើយឡើងវិញដ៏លំបាករបស់ខ្ញុំពីការដួលថ្មីៗនេះ វិនឌី បានមើលថែខ្ញុំដោយមិនចេះនឿយហត់ទាំងផ្លូវកាយ និងខាងវិញ្ញាណ ។ តាមរបៀបដែលគ្មាននរណាម្នាក់អាចធ្វើបានឡើយ ។ ឥទ្ធិពលដ៏ធំធេងដែល ដេនហ្សែល និង វិនឌី មានមកលើខ្ញុំ មិនអាចរៀបរាប់អស់បានទេ ។ ពួកគាត់បានផ្លាស់ប្តូរជីវិតរបស់ខ្ញុំ ! ពួកគាត់បានធ្វើឲ្យជីវិតរបស់ខ្ញុំកាន់តែពេញលេញ ។
ស្ត្រីគឺជាចំណុចសំខាន់នៃផែនការរបស់ព្រះវរបិតាសួគ៌របស់យើងតាំងពីដើមដំបូងមក ។ ផែនការនៃសេចក្តីសង្គ្រោះរបស់ព្រះគឺពឹងផ្អែកទៅលើសកម្មភាពវីរភាពរបស់ស្ត្រីក្លាហានពីររូប—នាងអេវ៉ា « ពីព្រោះនាងជាម្តាយនៃមនុស្សទាំងអស់ » ហើយ មារ៉ា មាតារបស់ព្រះអម្ចាស់ព្រះយេស៊ូវគ្រីស្ទរបស់យើង ។
បងប្អូនស្រីទាំងឡាយ សូមកុំមើលស្រាលអំណាចដ៏វិសេសវិសាលនៅក្នុងខ្លួនរបស់បងប្អូនក្នុងការមានឥទ្ធិពលល្អទៅដល់អ្នកដទៃឡើយ ។ វាគឺជាអំណោយមួយដែលព្រះវរបិតាសួគ៌របស់យើងបានប្រទានដល់ ស្ត្រីនៃសេចក្តីសញ្ញាគ្រប់រូប ។ ក្នុងនាមជាបុត្រីនៃសេចក្តីសញ្ញារបស់ព្រះ បងប្អូនអាចទទួលបានព្រះវិញ្ញាណ និងត្រីវិស័យខាងសីលធម៌ដ៏ប្រសើរ ដែលផ្តល់ឲ្យបងប្អូននូវសមត្ថភាពដើម្បីទទួលបានវិវរណៈផ្ទាល់ខ្លួន និងដើម្បីយល់ដឹងអំពីសេចក្តីពិតចេញពីកំហុសឆ្គង ។ ក្នុងការនិយាយនេះ ខ្ញុំមិនរារាំងបុរសចេញពីការបែងចែកការដឹងខុសត្រូវ ឬពីការធ្វើកិច្ចការខាងវិញ្ញាណដើម្បីទទួលវិវរណៈនោះទេ ។ ប៉ុន្តែ ប្រសិនបើ ពិភពលោកនេះនឹងបាត់បង់សីលធម៌របស់ស្ត្រី នោះពិភពលោកនេះនឹងមិនងើបឡើងវិញឡើយ ។
បងប្អូនស្រីទាំងឡាយ យើងត្រូវការសំឡេងរបស់បងប្អូនក្នុងការបង្រៀនគោលលទ្ធិរបស់ព្រះគ្រីស្ទ ។ យើងត្រូវការសមត្ថភាពរបស់បងប្អូនជាស្ត្រី ដើម្បីរកឃើញការបោកបញ្ឆោត និងដើម្បីបញ្ជាក់ពីសេចក្តីពិតយ៉ាងច្បាស់ ។ យើងត្រូវការប្រាជ្ញាដ៏បំផុសគំនិតរបស់បងប្អូននៅក្នុងគ្រួសារ វួដរបស់បងប្អូន និងក្រុមប្រឹក្សាស្តេក ព្រមទាំងកន្លែងដែលមានឥទ្ធិពលផ្សេងទៀតទូទាំងពិភពលោក ។ គ្រួសាររបស់បងប្អូន សាសនាចក្រ និងពិភពលោកត្រូវការបងប្អូន ! បងប្អូនស្រី គ្មាននរណាម្នាក់អាចធ្វើអ្វីគ្រប់យ៉ាងបានទេ ហើយបងប្អូនក៏មិនគួរព្យាយាមធ្វើគ្រប់យ៉ាងដែរ ។ ប៉ុន្តែ ខ្ញុំដឹងថាផ្នែករបស់បងប្អូនមានសារៈសំខាន់យ៉ាងណានៅក្នុងការស្ថាបនានគរនៃព្រះ ។
ដូច្នេះ នៅថ្ងៃនេះ ខ្ញុំសូមអញ្ជើញបងប្អូនធ្វើឲ្យព្រះគម្ពីរក្លាយជា លីអាហូណា ផ្ទាល់ខ្លួនរបស់បងប្អូន ព្រះវិហារបរិសុទ្ធដែលជាកន្លែងជ្រកកោន និងជាការកែតម្រូវឡើងវិញរបស់បងប្អូន និងការអធិស្ឋានផ្ទាល់ខ្លួនរបស់បងប្អូនទៅតាមវិធីដែលបងប្អូនរៀនពីកន្លែងដែលព្រះអម្ចាស់ត្រូវការបងប្អូននៅថ្ងៃ នោះ ។ យូរៗទៅ បងប្អូននឹងមានការភ្ញាក់ផ្អើលអំពីរបៀបដែលទ្រង់ដឹកនាំបងប្អូនឲ្យទៅកន្លែងដែល ជាក់លាក់ ដែលបងប្អូនអាចដឹកនាំ ណែនាំ និងដើរក្បែរនរណាម្នាក់ដែលត្រូវការ បងប្អូន ។
ដោយហេតុផលនោះ ខ្ញុំសូមផ្ដល់ពរដល់បងប្អូនឲ្យមានការបង្កើនការយល់ដឹងខាងវិញ្ញាណ និងសមត្ថភាពក្នុងការស្វែងរកអំណរក្នុងការផ្តល់សេចក្តីសង្គ្រោះដល់អ្នកដទៃ ។ ខ្ញុំសូមផ្ដល់ពរដល់បងប្អូនឲ្យមានប្រាជ្ញាដើម្បីដឹងពីអ្វីដែលចាំបាច់ ហើយមិនត្រូវធ្វើអ្វីឲ្យហួសពីសមត្ថភាពរបស់បងប្អូនឡើយ ។ ខ្ញុំសូមផ្ដល់ពរឲ្យបងប្អូនមាននូវសេចក្តីក្លាហាន ដើម្បីរស់នៅតាមអភ័យឯកសិទ្ធិដ៏ទេវភាពរបស់បងប្អូនក្នុងនាមជាបុត្រីនៃសេចក្តីសញ្ញារបស់ព្រះ ។ ខ្ញុំសូមផ្ដល់ពរឲ្យបងប្អូនទទួលអារម្មណ៍យ៉ាងជ្រាលជ្រៅថា ព្រះវរបិតាសួគ៌ និងព្រះរាជបុត្រារបស់ទ្រង់ គឺព្រះយេស៊ូវគ្រីស្ទស្គាល់បងប្អូន ហើយស្រឡាញ់បងប្អូន ។ ទ្រង់ទាំងទ្វេបានបញ្ជូនបងប្អូនមកកាន់ផែនដីនាពេល ឥឡូវនេះ ដោយសារបងប្អូនមានសារៈសំខាន់ចំពោះនគរព្រះ នៅពេលនេះ ! ខ្ញុំសូមផ្ដល់ពរដល់បងប្អូនឲ្យដឹងថា អំណោយដ៏ទេវភាពរបស់បងប្អូនក្នុងនាមជាបុត្រីរបស់ព្រះ ផ្តល់ឲ្យបងប្អូននូវអំណាចមិនត្រឹមតែផ្លាស់ប្តូរជីវិតប៉ុណ្ណោះទេ ថែមទាំងផ្លាស់ប្តូរពិភពលោកផងដែរ !
ខ្ញុំស្រឡាញ់បងប្អូន ឱ បងប្អូនស្រីជាទីស្រឡាញ់របស់ខ្ញុំអើយ ។ អ្វីៗទាំងអស់នេះជាការពិត ។ យើងទាំងអស់គ្នាចូលរួមនៅក្នុងកិច្ចការរបស់ព្រះអម្ចាស់ ។ ខ្ញុំសូមថ្លែងទីបន្ទាល់ថា ព្រះយេស៊ូវមានព្រះជន្មរស់ ! ទ្រង់ជាអង្គដឹកនាំសាសនាចក្រនេះ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។