អែលឌើរ អារ៉ូលដូ ប៊ី. កាវ៉ាល់ខេនធេ

ពួកចិតសិបនាក់ដែលមានសិទ្ធិអំណាចទូទៅ

តាមការអញ្ជើញរបស់បងប្អូនជីដូនមួយ នៅអាយុ ១៨ ឆ្នាំ អារ៉ូលដូ ប៊ី. កាវ៉ាល់ខេនធេ បានចូលរួមសន្និសីទថ្នាក់តំបន់មួយក្នុងឆ្នាំ ១៩៨៨ ដែលមានប្រធាន ហ្គរដុន ប៊ី ហ៊ិងគ្លី ( ឆ្នាំ ១៩១០–២០០៨ ) ដែលនៅពេលនោះបម្រើជាទីប្រឹក្សាទីមួយក្នុងគណៈប្រធានទីមួយ ។

គាត់បានរៀបរាប់ថា « ខ្ញុំទទួលអារម្មណ៍អ្វីមួយយ៉ាងខ្លាំង » ។ « ខ្ញុំអាចមើលឃើញពន្លឺនៅក្នុងប្រធាន ហ៊ិងគ្លី » ។

ទោះជាលោកបានចូលរួមនៅក្នុងសាសនាចក្រអស់បីឆ្នាំក្រោយក៏ដោយ ក៏លោកពុំបានទទួលបុណ្យជ្រមុជទឹកដែរ ។ ថ្ងៃមួយពួកអ្នកផ្សព្វផ្សាយសាសនាបានគោះទ្វារផ្ទះរបស់លោក ។ ដោយមានកាន់សៀវភៅតំបន់របស់ពួកគេ ពួកគេអាននូវអ្វីដែលពួកអ្នកផ្សព្វផ្សាយសាសនាពីមុនបានសរសេរទុកអំពីលោក ។ អ្វីដែលធ្វើឲ្យគាត់ចាប់អារម្មណ៍គឺប្រយោគចុងក្រោយ ៖ « គាត់មិនចង់លះបង់គ្រប់យ៉ាងចំពោះព្រះយេស៊ូវគ្រីស្ទនោះទេ » ។

អែលឌើរ កាវ៉ាល់ខេនធេ បានរៀបរាប់ថា « ខ្ញុំគិតថាខ្ញុំបានលះបង់គ្រប់យ៉ាងចំពោះព្រះគ្រីស្ទហើយ ហើយឃ្លានោះពិតជាធ្ងន់ធ្ងរខ្លាំងណាស់សម្រាប់ខ្ញុំ » ។

ដោយឆ្ងល់ថាតើនោះជាអ្វីដែលព្រះអង្គសង្គ្រោះបានគិតអំពីលោកដែរទេ លោកបានសួរថា « តើខ្ញុំអាចធ្វើអ្វីដើម្បីផ្លាស់ប្តូរការណ៍នេះ អែលឌើរ ? › »

ពួកអ្នកផ្សព្វផ្សាយសាសនាចាប់ផ្ដើមបង្រៀនលោក ហើយកំលោះអាយុ ២១ ឆ្នាំ បានទទួលបុណ្យជ្រមុជទឹកនៅ ១០ ថ្ងៃក្រោយមក ។ អែលឌើរ កាវ៉ាល់ខេនធេ បានចាប់ផ្ដើមតាំងចិត្តចំពោះដំណឹងរបស់ព្រះអង្គសង្រ្គោះចាប់តាំងពីពេលនោះមក ។

អែលឌើរ កាវ៉ាល់ខេនធេ បានមានប្រសាសន៍ថា « ការងារនេះមិនមែនអំពីយើងនោះទេ ។ ការងារនេះគឺអំពីព្រះអង្គសង្រ្គោះ ។ ហើយខ្ញុំខិតខំអស់ពីសមត្ថភាពរបស់ខ្ញុំសម្រាប់ទ្រង់ មិនមែនសម្រាប់ខ្ញុំទេ » ។

អារ៉ូលដូ បារីតូ កាវ៉ាល់ខេនធេ ហ្វីហូ បានកើតនៅថ្ងៃទី ២២ ខែ វិច្ឆិកា ឆ្នាំ ១៩៧០ នៅទីក្រុង ហ្វ័រតាលីស្សា សេរ៉ា ប្រទេសប្រេស៊ីល ។ លោកបានផ្សារភ្ជាប់នឹង គ្រីស្ទីណា រ៉ាម៉ាល់ហូ បេហ្សឺរ៉ា លីត នៅក្នុងព្រះវិហារបរិសុទ្ធរ៉េស៊ីហ្វេ ប្រេស៊ីល នៅថ្ងៃទី ២១ ខែ មករា ឆ្នាំ ២០០៤ ។ ពួកលោកមានកូនបួននាក់ ។

អែលឌើរ កាវ៉ាល់ខេនធេ បានរៀនចប់ថ្នាក់បរិញ្ញាបត្រជាន់ខ្ពស់ផ្នែកច្បាប់រដ្ឋបាលពីសាកលវិទ្យាល័យ Federal University of Ceará នៅ ឆ្នាំ ១៩៩៧ ។ លោកបានបម្រើការជាមេធាវីឲ្យ Procuradoria Geral do Município ពីឆ្នាំ ១៩៩៧ ដល់ឆ្នាំ ២០០៥ និងជាដៃគូគ្រប់គ្រងរបស់ Barreto Cavalcante Advogados ចាប់តាំងពីឆ្នាំ ១៩៩៩ ។

ពីមុនការហៅរបស់លោកជាពួកអ្នកមានសិទ្ធិអំណាចទូទៅ អែលឌើរ កាវ៉ាល់ខេនធេ បានបម្រើជាប្រធានបេសកកម្មនៅប្រទេសប្រេស៊ីល ។ លោកក៏ធ្លាប់បម្រើជាពួកចិតសិបនាក់ប្រចាំតំបន់ ប្រធានស្តេក ប៊ីស្សព ទីប្រឹក្សាក្នុងគណៈប៊ីស្សពផងដែរ ។