អែលឌើរ សាន់ឌីណូ រ៉ូមេន

ពួកចិតសិបនាក់ដែលមានសិទ្ធិអំណាចទូទៅ

អែលឌើរ សាន់ឌីណូ រ៉ូមេន ត្រូវបានណែនាំឲ្យស្គាល់ដំណឹងល្អនៃព្រះយេស៊ូវគ្រីស្ទកាលពីក្មេង ។ រៀងរាល់ថ្ងៃអាទិត្យ មិត្តភក្តិរបស់ម្តាយលោកបាននាំលោក និងបងស្រីលោកទៅជួបជាមួយសមាជិក ១៥ នាក់ផ្សេងទៀតនៃសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយនៅក្នុងសាលាប្រជុំតូចមួយក្នុងប្រទេសម៉ិកស៊ិក ។

កុមារអាយុប្រាំឆ្នាំនេះបានអធិស្ឋានជារៀងរាល់ថ្ងៃដើម្បីឲ្យគ្រួសាររបស់លោកប្រែចិត្តជឿលើដំណឹងល្អ ។ ពីរឆ្នាំក្រោយមក ម្ដាយឪពុករបស់លោកបានទទួលបុណ្យជ្រមុជទឹក ។ មួយឆ្នាំបន្ទាប់ពីនោះ ឪពុករបស់លោកបានធ្វើបុណ្យជ្រមុជទឹកឲ្យលោក ។ អែលឌើរ រ៉ូមេន បានមានប្រសាសន៍ថា « សម្រាប់ហេតុផលនោះ ខ្ញុំដឹងថា ព្រះអម្ចាស់បានស្ដាប់ឮការអធិស្ឋានរបស់កូនក្មេង » ។

ការឱបក្រសោបយកដំណឹងល្អ និងការបម្រើក្នុងសាសនាចក្របានផ្លាស់ប្តូរគ្រួសាររបស់លោក ។ អែលឌើរ រ៉ូមេន បានមានប្រសាសន៍ថា « ខ្ញុំបានឃើញលទ្ធផលចុងក្រោយ ដែលដំណឹងល្អនាំមកក្នុងជីវិតជាច្រើន » ។ « ខ្ញុំដឹងថាដំណឹងល្អនាំមកនូវសុភមង្គល និងក្តីសង្ឃឹម » ។

សាន់ឌីណូ រ៉ូមេន បានកើតនៅថ្ងៃទី ៧ ខែ សីហា ឆ្នាំ ១៩៧៣ ជាកូនរបស់ លីឌា ខូរ៉ាល និង ប្រូមេតេអូ រ៉ូមេន នៅទីក្រុង អ៊ីហ្គូឡា ហ្គូរ៉ែរ៉ូ នៃប្រទេសម៉ិចស៊ិក ។ ខណៈកំពុងលេងនៅក្រុមបាល់ទះនៃវិទ្យាល័យ បេនីមេរីតូ ដឺ ឡាស អាមេរិក ដែលជាកម្មសិទ្ធិរបស់សាសនាចក្រ រ៉ូមេន បានជួបនឹង ហ្គាដាលូប៉េ វៀនូអេវ៉ា រ៉ូហ្សាស ។ ពួកលោកបានផ្សារភ្ជាប់នៅព្រះវិហារបរិសុទ្ធម៉ិកស៊ីកូ ស៊ីធី ម៉ិកស៊ិក នៅថ្ងៃទី ១៩ ខែ ធ្នូ ឆ្នាំ ១៩៩៨ ។ ពួកលោកមានកូនបួននាក់ ។

អែលឌើរ រ៉ូមេន បានទទួលបរិញ្ញាបត្រវិទ្យាសាស្ត្រផ្នែកប្រព័ន្ធកុំព្យូទ័រពី ITESM ( វិទ្យាស្ថានបច្ចេកវិទ្យា ម៉ុងតេរី និងឧត្តមសិក្សា ) ក្នុងឆ្នាំ ២០០០ និងបរិញ្ញាបត្រជាន់ខ្ពស់ផ្នែកគ្រប់គ្រងអាជីវកម្មមកពីសាកលវិទ្យាល័យ ព្រិកហាំ យ៉ង់ ក្នុងឆ្នាំ ២០០៦ ។ លោកបានធ្វើការជាប្រធានផ្នែកទីផ្សារឲ្យក្រុមហ៊ុន ចនសុន & ចនសុន និងធ្វើការឲ្យសាសនាចក្រជាអ្នកគ្រប់គ្រងការិយាល័យសេវាកម្មគាំទ្រតំបន់ម៉ិកស៊ិក ។

នៅពេលនៃការហៅរបស់លោក លោកនិងភរិយារបស់លោកកំពុងបម្រើជាអ្នកដឹកនាំបេសកកម្ម អេក្វាឌ័រ គីតូ ខាងជើង ។ អែលឌើរ រ៉ូមេន ក៏បានបម្រើជាពួកចិតសិបប្រចាំតំបន់ ជាទីប្រឹក្សាគណៈប្រធានស្តេក ជាប៊ីស្សព ជាទីប្រឹក្សាជាន់ខ្ពស់ និងប្រធានកូរ៉ុមអែលឌើរ ។

អែលឌើរ រ៉ូមេន បានមានប្រសាសន៍ថា គោលបំណងចម្បងរបស់លោកក្នុងជីវិត មិនថានៅកន្លែងណាដែលលោកបម្រើនោះទេ គឺដើម្បីទទួលបានទំនុកចិត្តពីព្រះអម្ចាស់ ។ លោកបានមានប្រសាសន៍ថា « ខ្ញុំចង់ឲ្យទ្រង់ជ្រាបថា ទ្រង់អាចទុកចិត្តលើខ្ញុំឲ្យធ្វើកិច្ចការរបស់ទ្រង់ » ។