បងប្រុស ឆាដ អេច វិប

ទីប្រឹក្សាទីមួយក្នុងគណៈប្រធានសាលាថ្ងៃអាទិត្យទូទៅ

កាលពីក្មេង ឆាដ វិប បានចូលរៀននៅមហាវិទ្យាល័យយូថាហ៍ភាគខាងកើត ( ឥឡូវនេះហៅថា សាកលវិទ្យាល័យរដ្ឋយូថាហ៍ភាគខាងកើត ) ជាពេលដែលលោកទទួលបានបទពិសោធន៍គ្រឹះខាងវិញ្ញាណដែលធ្វើឲ្យទីបន្ទាល់របស់លោកអំពីដំណឹងល្អកាន់តែរឹងមាំ ។ បទពិសោធន៍នោះបានចាប់ផ្ដើមជាមួយនឹងបំណងប្រាថ្នាមួយដើម្បីពង្រឹងសេចក្ដីជំនឿរបស់លោក ។

នៅពេលធ្វើកិច្ចការសាលា និងលេងបាល់បោះនៅក្នុងក្រុមមហាវិទ្យាល័យរបស់លោក បងប្រុស វិប បានដាក់ការសិក្សាព្រះគម្ពីរ ការអធិស្ឋាន និងការជញ្ជឹងគិត ជាអាទិភាពកាលរៀបចំខ្លួនចេញបម្រើបេសកកម្មពេញម៉ោងនៅទីក្រុង វ៉េរ៉ាក្រូហ្ស ប្រទេសម៉ិកស៊ិក ។

នាយប់ដ៏ត្រជាក់មួយ លោកបានចេញទៅដើរលេងយ៉ាងយូរនៅជុំវិញទីក្រុង ផ្រាយ រដ្ឋយូថាហ៍ ហើយគិតអំពីអ្វីគ្រប់យ៉ាងដែលលោកកំពុងរៀន ។ ពេលលោកចូលទៅក្នុងចំណតរថយន្តដ៏ទទេស្អាតមួយ លោកក៏បានទទួលការណែនាំពីស្ថានសួគ៌ ។

លោកបាននិយាយថា « ខ្ញុំមានអារម្មណ៍ថា ចម្លើយទាំងអស់ចំពោះការអធិស្ឋាន និងសំណួររបស់ខ្ញុំបានមក ហើយខ្ញុំទទួលអារម្មណ៍យ៉ាងខ្លាំងថាដំណឹងល្អ និងសាសនាចក្រពិតប៉ុនណា » ។ « សេចក្តីពិតទាំងនោះបានមកជាមួយនឹងភាពច្បាស់លាស់ដ៏អស្ចារ្យនៅក្នុងចិត្តរបស់ខ្ញុំ រួមជាមួយនឹងអារម្មណ៍ថាព្រះវរបិតាសួគ៌បានដឹងអំពីខ្ញុំ ។ ខ្ញុំទទួលអារម្មណ៍នៃក្ដីស្រឡាញ់របស់ទ្រង់ និងការដឹកនាំរបស់ទ្រង់ ។ នោះជាបទពិសោធន៍ដ៏មានឥទ្ធិពលដំបូងមួយដែលខ្ញុំបានមានដើម្បីទៅពង្រឹងទីបន្ទាល់របស់ខ្ញុំ » ។

ឆាដ អេច វិប កើតនៅ ទីក្រុងរិចប៊ើក រដ្ឋអៃដាហូ ស.រ.អា នៅថ្ងៃទី ១៨ ខែ ធ្នូ ឆ្នាំ ១៩៦៤ ដែលជាកូនរបស់លោក ឡារី ចច វិប និង លោកស្រី ផេច វិប ។ លោកបានធំដឹងក្ដីនៅភាគអាគ្នេយ៍រដ្ឋអៃដាហូ ហើយបានរៀបការជាមួយនឹង គ្រីស្ទី អាន ប្រ៊ុនសុន ក្នុងព្រះវិហារបរិសុទ្ធ ឡូហ្គេន យូថាហ៍ នៅថ្ងៃទី ៤ ខែ សីហា ឆ្នាំ ១៩៩០ ។ ពួកលោករស់នៅទីក្រុង ឡេតុន រដ្ឋយូថាហ៍ ស.រ.អា និងមានកូនប្រាំមួយនាក់ ។

បងប្រុស វិប បានបញ្ចប់ការសិក្សាមកពីសាកលវិទ្យាល័យ ព្រិកហាំ យ៉ង់ ដោយមានបរិញ្ញាបត្រផ្នែកភាសាអេស្ប៉ាញ និងបរិញ្ញាបត្រជាន់ខ្ពស់ផ្នែកមូលដ្ឋានគ្រឹះខាងការអប់រំ និងភាពជាអ្នកដឹកនាំ ។ លោកបានបង្រៀនថ្នាក់សិក្ខាសាលានៅទីក្រុង សលត៍លេក និងថ្នាក់វិទ្យាស្ថាននៅរដ្ឋវើជីញ៉ា និងរដ្ឋយូថាហ៍ បានសម្របសម្រួលកម្មវិធីវិទ្យាស្ថាននៅ វ៉ាស៊ីនតោនឌីស៊ី និងបានត្រួតពិនិត្យការបណ្តុះបណ្តាល និងការជ្រើសរើសគ្រូបង្រៀនថ្នាក់សិក្ខាសាលា ។ ចាប់តាំងពី ឆ្នាំ ២០០៨ លោកបានបម្រើការជាអ្នកគ្រប់គ្រងថ្នាក់សិក្ខាសាលា និងថ្នាក់វិទ្យាស្ថានសាសនា ។

បងប្រុស វិប ត្រូវបានដោះលែងពីប្រធានស្ដេក ឡេតុន យូថាហ៍ វ៉ាលីវ្យូ ភ្លាមៗមុនពេលការហៅរបស់លោកនេះ ។ ការហៅរបស់លោកកាលពីមុន រួមមានជាប៊ីស្សព ជាទីប្រឹក្សាជាន់ខ្ពស់ និងជាប្រធានកូរ៉ុមអែលឌើរ ។