« អែលឌើរ គ្រីស្តូហ្វើរ អេច ឃីម » លីអាហូណា ខែ ឧសភា ឆ្នាំ ២០២៤ ។
អែលឌើរ គ្រីស្តូហ្វើរ អេច ឃីម
ពួកចិតសិបនាក់ដែលមានសិទ្ធិអំណាចទូទៅ
នៅពេលអែលឌើរ គ្រីស្តូហ្វើរ អេច ឃីម អាយុ ១៤ ឆ្នាំ ហើយមានឱកាសចែកចាយដំណឹងល្អជាមួយមិត្តភក្តិជាច្រើន លោកបានដឹងថា លោកត្រូវដឹងសេចក្តីពិតអំពីព្រះគម្ពីរមរមន ដើម្បីលោកអាចនិយាយដោយជឿជាក់ ។
លោកបានរំឭកថា « នៅពេលខ្ញុំអធិស្ឋានអំពីព្រះគម្ពីរមរមន ខ្ញុំបានមានអារម្មណ៍នៃការលួងលោមដល់ព្រលឹង » ។ « ហើយភ្លាមៗនោះ មិនមានសំណួរ ឬការសង្ស័យណាមួយអំពីព្រះគម្ពីរមរមនឡើយ » ។ ជាលើកដំបូងក្នុងជីវិតរបស់លោក លោកបានបន្ថែមថា « ខ្ញុំពិតជាទទួលអារម្មណ៍ពីព្រះវិញ្ញាណ ស្គាល់សេចក្ដីពិតអំពីព្រះគម្ពីរមរមន ហើយបានដឹងថា យ៉ូសែប ស្ម៊ីធ ជាព្យាការីរបស់ព្រះ » ។
គ្រីស្តូហ្វើរ ហ៊ីស៊ូ ឃីម បានកើតនៅថ្ងៃទី ១៨ ខែ វិច្ឆិកា ឆ្នាំ ១៩៦៥ នៅ ដេហ្គូ កូរ៉េខាងត្បូង ជាកូនច្បងនៃកូនបួននាក់របស់លោក ឈិនហូ ឃីម និងលោកស្រី គន្ធឆា ឃីម ។ ឪពុកម្តាយរបស់លោកបានចូលរួមនៅក្នុងសាសនាចក្រនៅពេលលោកនៅជាទារកនៅឡើយ ។ អែលឌើរ ឃីម រស់នៅទីក្រុង ដេហ្គូ រហូតដល់លោកបានបញ្ចប់ការសិក្សានៅថ្នាក់វិទ្យាល័យ ហើយគ្រួសាររបស់លោកបានធ្វើអន្តោប្រវេសន៍ទៅកាន់សហរដ្ឋអាមេរិក ដោយរស់នៅភាគខាងត្បូងនៃរដ្ឋកាលីហ្វ័រញ៉ា ។
ខណៈលោកកំពុងបម្រើនៅក្នុងបេសកកម្ម ស៊ីអាថល វ៉ាស៊ីនតោន ស៊ីស្ទើរ សុងមី ( ស៊ូ ) ហុង បានបម្រើនៅក្នុងបេសកកម្ម ឡូស អាន់ជើឡែស កាលីហ្វ័រញ៉ា ។ ខណៈនៅទីនោះ គាត់បានស្គាល់ម្តាយរបស់អែលឌើរ ឃីម ។ ក្រោយមក បន្ទាប់ពីអែលឌើរ ឃីម និង ស៊ីស្ទើរ ហុង បានបញ្ចប់បេសកកម្មរបស់ពួកលោក ពួកលោកក៏ចាប់ផ្ដើមណាត់ជួបគ្នា ។ ពួកលោកបានរៀបការនៅថ្ងៃទី ៧ ខែ ធ្នូ ឆ្នាំ ១៩៩១ នៅព្រះវិហារបរិសុទ្ធឡូស អាន់ជើឡែស កាលីហ្វ័រញ៉ា ។ ពួកលោកមានកូនប្រុសម្នាក់ និងកូនស្រីបីនាក់ ។
អែលឌើរ ឃីម បានបញ្ចប់ការសិក្សាមកពីសាកលវិទ្យាល័យ ព្រិកហាំ យ៉ង់ បរិញ្ញាបត្រផ្នែកសង្គមវិទ្យា នៅឆ្នាំ ១៩៩៥ និងបរិញ្ញាបត្រជាន់ខ្ពស់ផ្នែកគ្រប់គ្រងអាជីវកម្មនៅឆ្នាំ ១៩៩៧ ។ បន្ទាប់ពីបានរៀនចប់ លោកបានធ្វើការនៅសហរដ្ឋអាមេរិក ប្រទេសថៃ និងកូរ៉េខាងត្បូង ។ ចាប់តាំងពីឆ្នាំ ២០០៥ លោកបានធ្វើការឲ្យក្រុមហ៊ុន យ៉ូនីស៊ីធី អន្តរជាតិ ដែលជាក្រុមហ៊ុនផ្គត់ផ្គង់ផលិតផលអាហារូបត្ថម្ភ និងគ្រឿងសំអាងដែលមានមូលដ្ឋាននៅរដ្ឋយូថាហ៍ ហើយថ្មីៗនេះលោកជាប្រធានផ្នែកទីផ្សារសកល ដែលមានមូលដ្ឋាននៅទីក្រុងសេអ៊ូល ប្រទេសកូរ៉េខាងត្បូង ។
អែលឌើរ ឃីម បានបម្រើជាពួកចិតសិបនាក់ប្រចាំតំបន់ចាប់តាំងពី ឆ្នាំ ២០១៩ ។ លោកក៏បានបម្រើជាប្រធានស្តេក ជាទីប្រឹក្សាគណៈប្រធានស្តេក ប្រធានបេសកកម្ម និងក្រុមប្រឹក្សាជាន់ខ្ពស់ផងដែរ ។