បងប្រុស កាព្រីយ៉ែល ដបុលយូ រីដ

ទីប្រឹក្សាទីពីរនៅក្នុងគណៈប្រធានសាលាថ្ងៃអាទិត្យទូទៅ

ចំពោះ កាព្រីយ៉ែល ដបុលយូ រីដ ផ្នែកដ៏គួរឲ្យរីករាយបំផុតមួយនៃការធ្វើជាថ្នាក់ដឹកនាំបេសកកម្ម គឺការឃើញអ្នកផ្សព្វផ្សាយសាសនា « ទទួលទានព្រះបន្ទូលទាំងឡាយនៃព្រះគ្រីស្ទ » បង្កើតសេចក្តីស្រឡាញ់ចំពោះព្រះគម្ពីរ និងបំណងប្រាថ្នាចង់ក្លាយដូចជាព្រះអង្គសង្គ្រោះ ។

បងប្រុស រីដ បាននិយាយថា « ប្រសិនបើអ្នកពិតជារកឃើញពីរបៀបធ្វើឲ្យការសិក្សាដំណឹងល្អរបស់អ្នក ‹ ឆ្ងាញ់ › ចំពោះអ្នក ដូចដែលមានចែងនៅក្នុងព្រះគម្ពីរ [ សូមមើល អាលម៉ា ៣២:២៨ ] នោះហើយជាពេលដែលជីវិតរបស់អ្នកផ្លាស់ប្តូរ » បងប្រុស រីដ ដែលបញ្ចប់ការបម្រើរបស់លោកជាប្រធានបេសកកម្ម អូស្ត្រាលី ស៊ីដនី នៅ ខែ កក្កដា ។

បងប្រុស រីដ កើតនៅ ប៉ាហ្គោ ប៉ាហ្គោ សាម័រ អាមេរិក ។ លោកនិយាយភាសាសាម័រ អេស្ប៉ាញ និង អង់គ្លេស ។ លោកបាននិយាយថា នៅក្នុងព្រះគម្ពីរមរមនពាក្យ ទទួលទាន ត្រូវបានបកប្រែជាភាសាសាម័រថា « ទូម៉ាម៉ាហ្វា ហ្វីយ៉ាហ្វីយ៉ា » និងជាភាសាអេស្ប៉ាថា « ដេឡេតា » ។ លោកបាននិយាយថាពាក្យទាំងពីរនេះបង្ហាញអំពីភាពរីករាយ ។

លោកបាននិយាយថា ក្នុងនាមជាទីប្រឹក្សាក្នុងគណៈប្រធានសាលាថ្ងៃអាទិត្យថ្មី « ខ្ញុំរំភើបចិត្តក្នុងការជួយអ្នកដទៃឲ្យឃើញថាតើមានអំណរប៉ុនណាក្នុងបទគម្ពីរនេះ » ។

កាព្រីយ៉ែល « ហ្គាបេ » វ៉លធើរ ប៉ូអ៊ុ រីដ កើតនៅថ្ងៃទី ២៨ ខែ ឧសភា ឆ្នាំ ១៩៧៧ មានឪពុកឈ្មោះយូហ្គេន និងម្ដាយឈ្មោះ ទុពុ រីដ ហើយធំដឹងក្ដីនៅក្នុងភូមិ ឡេអូន ក្នុងប្រទេសសាម័រ អាមេរិក ។ សេចក្តីស្រឡាញ់របស់លោកចំពោះព្រះ និងបំណងប្រាថ្នាចង់ដាក់ទ្រង់ជាអង្គដ៏សំខាន់បំផុតបានចាប់ផ្តើមតាំងពីក្មេង ហើយបានទ្រទ្រង់លោកនៅពេលលោកលេងបាល់ឱបឲ្យសាកលវិទ្យាល័យ ព្រិកហាំ យ៉ង់ ពីឆ្នាំ ១៩៩៩ ដល់ឆ្នាំ ២០០២ ហើយបន្ទាប់មកបានបន្តអាជីពនៅក្នុងការប្រកួតបាល់ឱបលំដាប់ជាតិពីឆ្នាំ ២០០៣ ដល់ឆ្នាំ ២០០៦ ។

ក្នុងអំឡុងពេលនោះនៃឆាកជីវិតរបស់លោក លោកបានរៀនមេរៀនដ៏មានតម្លៃមួយ ៖ « ពេលព្រះអម្ចាស់មានព្រះបន្ទូលប្រាប់់អ្នកអ្វីមួយ នោះអ្នកត្រូវធ្វើតាម ‹ ទាំងស្រុង › » ។

បងប្រុស រីដ បានរៀបការនឹង ហ៊ីឌើរ លីន សាស នៅព្រះវិហារបរិសុទ្ធ បោនទីហ្វុល យូថាហ៍ នៅថ្ងៃទី ២៤ ខែ មិថុនា ឆ្នាំ ២០០០ ។ ពួកលោកមានកូនបួននាក់ ។ លោកបានបញ្ចប់ការសិក្សាមកពី ប៊ីវ៉ាយយូ ក្នុងឆ្នាំ ២០០២ ជាមួយនឹងបរិញ្ញាបត្រផ្នែកទំនាក់ទំនងអន្តរជាតិ ។ សព្វថ្ងៃនេះលោកជាម្ចាស់ក្រុមហ៊ុនគ្រប់គ្រងសំណង់ ។

បន្ថែមពីលើការធ្វើជាអធិបតីលើបេសកកម្ម អូស្ត្រាលី ស៊ីដនី បងប្រុស រីដ បានបម្រើជាទីប្រឹក្សាគណៈប្រធានស្តេក ទីប្រឹក្សាជាន់ខ្ពស់ ប៊ីស្សព ប្រធានយុវជនវួដ អ្នកធ្វើពិធីបរិសុទ្ធក្នុងព្រះវិហារបរិសុទ្ធ និងជាអ្នកបម្រើបេសកកម្មពេញម៉ោងនៅបេសកកម្មសាន់ទីអាហ្គោ ខាងត្បូង ស៊ីលី ពីឆ្នាំ ១៩៩៦ ដល់ឆ្នាំ ១៩៩៨ ។