Isahluko 14

U-Abhinadayi noKumkani uNowa

UZenif wayeyikumkani elungileyo yeqela lamaNifayithi. Xa wayeselekhulile, unyana wakhe uNowa waye waba yikumkani.

Mozaya 11:1

UNowa wayengeyiyo ikumkani elungileyo njengo tata wakhe. Wayengumenzi wobubi kwaye wayengayithobeli imithetho kaThixo.

Mozaya 11:2

Waye wanyanzela abantu bakhe ukuba bamnike inxalenye yeenkozo zabo, nemfuyo, negolide, kunye nesilivere yabo.

Mozaya 11:3

Ukumkani uNowa wayesenza oku kuba wayelivila. Wenza amaNifayithi ukuba amnike yonke into awayeyiswele ukuze aphile.

Mozaya 11:4

Waye watshintsha ababingeleli abalungileyo utata wakhe awayebabizile wafaka ababesenza ububi. Aba babingeleli babesenza ububi babefundisa abantu ukuba bone.

Mozaya 11:5–7

Ukumkani uNowa wayenezakhiwo ezintle ezininzi ezazenziwe, kuquka nebhotwe elikhulu elalinetrone. Izakhiwo zazihonjiswe ngegolide, nesilivere, kunye nangeenkuni ezinexabiso eliphezulu.

Mozaya 11:8–11

Ukumkani uNowa wayebuthanda ubutyebi awayebuthathe kubantu bakhe. Yena nababingeleli bakhe babechitha ixesha labo besela iwayini kwaye besenza ububi.

Mozaya 11:14–15

UThixo waye wathumela umprofethi owayebizwa ngu-Abhinadayi kubantu bakaNowa. U-Abhinadayi wabalumkisa okokuba ukuba abaguquki, bayakuba zizicaka zamaLeymenayithi.

Mozaya 11:20–22

Xa ukumkani uNowa weva izinto u-Abhinadayi wayezithethile, wabanomsindo. Waye wathumela amadoda ukuba azise u-Abhinadayi ebhotweni khon’ ukuze ambulale.

Mozaya 11:27–28

U-Abhinadayi waye wathatyathwa wasiwa kwikumkani. Ukumkani uNowa kunye nababingeleli bakhe bambuza imibuzo emininzi. Baye bazama ukumqhatha ukuba atsho into egwenxa.

Mozaya 12:18–19

U-Abhinadayi wayengoyiki ukuphendula imibuzo yabo. Wayesazi ukuba uThixo wayezakumnceda. Ababingeleli baye bakhwankqiswa ziimpendulo zika-Abhinadayi.

Mozaya 12:19

Ukumkani uNowa wabanomsindo kwaye wayalela ababingeleli bakhe ukuba babulale u-Abhinadayi. U-Abhinadayi wathi ukuba bakhe bamchukumisa, uThixo wayeyokubabulala.

Mozaya 13:1–3

UMoya oyiNgcwele wamkhusela u-Abhinadayi khon’ ukuze agqibezele ukuthetha into iNkosi eyayifuna ukuba ayitsho. Ubuso buka-Abhinadayi babukhazimla. Ababingeleli babesoyika ukumchukumisa.

Mozaya 13:3, 5

Ethetha ngamandla asuka kuThixo, u-Abhinadayi wabaxelela abantu ngenkohlakalo yabo. Waye wabafundela imithetho kaThixo.

Mozaya 13:6–7, 11–24

Waye wabaxelela ukuba uYesu Krestu wayezakuzalwa emhlabeni. UYesu wayezakwenza ukuba bakwazi ukuguquka, bavuswe kwabafileyo, kwaye baphile noThixo.

Mozaya 13:33–35; 15:21–23

U-Abhinadayi waxelela abantu ukuba baguquke kwaye bakholelwe kuYesu Krestu okanye babengena kukwazi ukusindiswa.

Mozaya 16:13

Ukumkani uNowa kunye nabo bonke ngaphandle komnye wababingeleli bakhe wala ukumkholelwa u-Abhinadayi. UNowa wabaxelela ababingeleli bakhe ukuba babulale u-Abhinadayi. Baye bambophelela baze bamphosela entolongweni.

Mozaya 17:1, 5

Omnye umbingeleli owathi wakholelwa u-Abhinadayi wayebizwa ngokuba ngu-Alma. Wacela ukumkani uNowa akhulule u-Abhinadayi ukuba ahambe.

Mozaya 17:2

Ukumkani waye wabanomsindo ku-Alma kwaye wabangela okokuba alahlelwe ngaphandle. Ngoko ke waye wathumela izicaka zakhe ukuba zimbulale. U-Alma waye wabaleka kwaye wazimela, kwaye izicaka zange zibenako ukumfumana.

Mozaya 17:3–4

Emveni kokuchitha iintsuku ezintathu entolongweni, u-Abhinadayi waye waziswa futhi phambi kokumkani uNowa. Ukumkani waye waxelela u-Abhinadayi okokuba arhoxise izinto awayezitshilo kuye nakubantu bakhe.

Mozaya 17:6, 8

Ukumkani uNowa waxelela u-Abhinadayi okokuba ukuba wayengakuphiki konke awayekuthethile, wayeyakubulawa.

Mozaya 17:8

U-Abhinadayi wayesazi ukuba wayethethe inyaniso. Wayexolele okokuba afe kunokuba arhoxise izinto uThixo awayethe makazithethe.

Mozaya 17:9–10

Ukumkani uNowa wayalela ababingeleli bakhe ukuba babulale u-Abhinadayi. Baye bambophelela, bambetha ngesabhokhwe, kwaye bamtshisa bambulala. Phambili kokuba asweleke, u-Abhinadayi wathi umkukani uNowa naye wayeyakusweleka ngomlilo.

Mozaya 17:13–15

Abanye bamaNifayithi bamchasa ukumkani uNowa kwaye bazama ukumbulala. Umkhosi wamaLeymenayithi waza nawo uzokulwa nokumkani kunye nabalandeli bakhe.

Mozaya 19:2–7

Ukumkani nabalandeli bakhe baye bawabaleka amaLeymenayithi, kodwa amaLeymenayithi aye ababamba kwaye aqalisa ukubabulala. Ukumkani waye waxelela amadoda akhe okokuba ashiye iintsapho zawo kwaye aqhubeke ngokubaleka.

Mozaya 19:9–11

Uninzi lwamadoda lwalungafuni ukuhamba. Aye athinjwa ngamaLeymenayithi.

Mozaya 19:12, 15

Uninzi lwamadoda olwabaleka nokumkani uNowa lwazisola. Ayefuna ukubuyela ngasemva ayokunceda abafazi bawo nabantwana bawo kunye nabantu bawo.

Mozaya 19:19

Ukumkani uNowa wayengafuni okokuba amadoda abuyele kwiintsapho zawo. Waye wawayalela ukuba ahlale naye.

Mozaya 19:20

Amadoda aye abanomsindo kuKumkani uNowa. Baye bamtshisa bambulala, njengoko u-Abhinadayi wayeprofethile. Ngoko ke aye abuyela kwiintsapho zawo.

Mozaya 19:20, 24