Falala ki he ʻEikí

ʻI he taimi ʻoku omi ai hotau kaungāmeʻá mo e niʻihi ʻoku tau ʻofa aí mo e hohaʻa ki heʻenau tuí, mahalo ko ʻetau ʻuluaki talí ko e loto-tailiili pe loto-hohaʻa. ʻE ala tataki koe ʻe he ngaahi meʻa ʻoku nau hohaʻa ki aí ke ke fai ha ngaahi fehuʻi faingataʻa: “E ʻuhinga fēfē ʻeni ki hoku fāmilí?” “Naʻá ku fai ha meʻa hala?”

ʻI he taimi ʻoku fehuʻia ai ʻe ha taha ʻoku ofi atu kiate koe ʻenau tuí, ʻoku ʻikai ʻuhinga ʻeni kuó ke tōnounou ai. Mahalo ʻoku fihifihi e ngaahi ʻuhinga ki he ngaahi meʻa ʻoku nau hohaʻa ki aí. ʻOku totonu ke tau fai e meʻa te tau lavá ke tokoniʻi kinautolu, ka ʻoku totonu foki ke tau falala ki he Tamai Hēvaní mo Sīsū Kalaisi. ʻOkú Na ʻofa ʻiate kinautolu ʻoku ʻi ai haʻanau ngaahi fehuʻí. Ko ha ngaahi meʻa ʻeni ʻe niʻihi te ke lava ʻo fai ke tauhi ai ʻa e melinó ʻi ho lotó mo e ʻatamaí ʻi hoʻo poupouʻi ʻa e niʻihi kehé:

Falala ʻoku tokaimaʻananga ʻa e ʻOtuá. ʻOku finangalo ʻa e ʻEikí ke tupulaki mo fiefia ʻa e tangata kotoa pē. ʻOkú Ne fakaʻaiʻai ʻetau ngaahi fehuʻi fakamātoató. ʻOkú Ne ʻafioʻi hotau ngaahi faingataʻaʻiá mo tutulu koeʻuhí ko ʻetau faingataʻaʻiá. ʻE hokohoko atu ʻene ʻofa mo tokoni ki he kakai ʻoku faingataʻaʻia pe mavahe mei he Siasí.
Fakaafeʻi ʻa e ʻEikí ke kau fakataha mo koe. Naʻa mo e ngaahi maʻuʻanga tokoni lelei tahá mo e ngaahi pōpoaki ʻoku fakakaukauʻi lelei tahá ʻe ʻikai ola lelei kapau ʻoku hala ʻa e taimí pe ongó. Lotua ke tokoniʻi koe ʻe he ʻEikí ke ke ngāue fakaetauhi. ʻE lava ke tokoniʻi koe ʻe he Laumālié ke mahino ʻa e ngaahi fiemaʻu pau ʻa ha taha pea ke ke ʻiloʻi ʻa e taimi ke tangutu fakataha ai mo fakafanongo kae ʻikai talanoa pe faiakó. ʻE lava foki ke tokoni atu ke ke ʻiloʻi ʻa e founga mo e taimi ke vahevahe ai hoʻo fakamoʻoní pe fakaafeʻi kinautolu ke nau fai ha ngaahi meʻa ke ʻunuʻunu ofi ange ai ki he ʻOtuá.
Fakaʻaongaʻi ha vakai ʻoku lōloa angé. ʻOku faʻa liliu e tui mo e ngaahi ongo ʻa ha taha fekauʻaki mo e ʻOtuá ʻi he ʻalu pē ʻa e taimí. Pea te tau kei fiemaʻu kotoa pē ke ako mo tupulaki fuoloa hili ʻetau fakalaka atu ʻi he moʻui ka hokó. Te ke lava ʻo maʻu ha ʻamanaki lelei ʻi he taimi ʻokú ke vakai ai ki he fefaʻuhi ʻa ha taha ʻokú ke ʻofa ai mo e fakakaukau ko ʻení. Hokohoko atu hono tō e ngaahi tengaʻi ʻakaú ʻi he faʻa kātaki, ʻo ʻiloʻi ko e taimi ʻo e ututaʻú ʻoku ʻi he toʻukupu ia ʻo e ʻOtuá.
Maʻu ha ʻamanaki lelei ʻi hoʻo ʻilo ki he natula ʻo e ʻOtuá. ʻOku fakangatangata pē ʻetau vakai ki he moʻuí ni. ʻOku tau ʻilo ʻoku poto, faʻa kātaki, mo ʻofa ʻa e ʻOtuá. Naʻá Ne foaki mai ʻetau tauʻatāina ke filí. Naʻá Ne ʻafioʻi te tau fehangahangai kotoa pē mo ha ngaahi faingataʻa mo ha ngaahi ʻahiʻahi. Pea naʻá Ne ʻomi ha Fakamoʻui ʻokú Ne maʻu ʻa e mālohi ke tohoakiʻi kitautolu ke tau foki ange kiate Ia.

Ngaahi potufolofola mahuʻinga: Lea Fakatātā 3:5–6; ʻĪsaia 55:8–9; 2 Tīmote 1:7–8; ʻAlamā 26:11–12