Lesona 17, Tahirin-kevitra ho an’ny mpampianatra

Mpikambana ao amin’ny Fiangonan’ny Tompo

Tahaka ny nataony tamin’ireo mpanara-dia Azy tany Palestina dia nanangana ny Fiangonany teo anivon’ireo Nefita sy Lamanita i Jesoa Kristy. Niantso mpianatra roa ambin’ny folo Izy ary nomeny fahefan’ny fisoronana hitarihana ny Fiangonany izy ireo. Ity lesona ity dia hanome ny mpianatra fahafahana hifantoka amin’ny ôrdônansin’ny fanasan’ny Tompo sy hamantatra izay azon’izy ireo atao mba hahatonga izany ho zavatra iainana manan-danja kokoa sy mifantoka amin’i Kristy kokoa. Ny mpianatra dia hamantatra ihany koa ny zavatra azon’izy ireo atao hanampiana ny hafa hahatsapa ny maha-mpikambana sy mpiombona azy ireo ao amin’ny paroasy na sampana misy azy ireo.

Sosokevitra enti-mampianatra

I Jesoa Kristy dia nampiorina ny fanasan’ny Tompo sy nandidy ny olona hivory matetika ary tsy handrara na iza na iza tsy handray anjara amin’ny fitsaohana ataon’izy ireo.

Asehoy ity sary manaraka ity ary ampahatsiahivo ireo mpianatra fa tao anatin’ny asa fanompoany teo anivon’ireo Nefita sy Lamanita, i Jesoa Kristy dia nanolotra ny fahefan’ny fisoronana an’ireo mpianany roa ambin’ny folo ary nanangana ny Fiangonany (jereo ny 3 Nefia 11:18–22; 12:1; 18:5, 37; 26:17–21).

• Fa maninona no tsapanao fa zava-dehibe ny nametrahan’ny Tompo laharam-pahamehana toy izany tamin’ny fananganana ny Fiangonany, taloha sy ankehitriny? (Azonao atao ny manasa ireo mpianatra hamerina hijery ny fanambarana nataon’ny Loholona D. Todd Christofferson ao amin’ny fizarana 1 ao amin’ny tahirin-kevitra hoenti-manomana ny fotoam-pianarana.)

Tsindrio fa hifantoka amin’ny lafiny roa fotsiny ity lesona ity na dia misy lafiny maro ao amin’ny Fiangonana azontsika ianarana bebe kokoa aza. Asehoy ireto fanontaniana manaraka ireto ary asao ny mpianatra hisafidy izay fanontaniana tian’izy ireo hojerena bebe kokoa:

• Inona no azoko atao mba hahatonga ny fanasan’ny Tompo ho ampahany manan-danja kokoa amin’ny zavatra iainako any am-piangonana?

• Ahoana no fomba ahafahako manampy amin’ny famoronana zavatra iainana any am-piangonana izay maha-te hitoetra sy ahatsapana tena ho voaray tsara kokoa ho an’ny olon-drehetra?

Manatsara ny fampianarantsika sy ny fianarantsika

Ny fifanakalozan-kevitra sy fanaovana asa ao anatin’ny vondrona kely dia afaka manampy ireo mpianatra hianatra lalindalina kokoa. Ny famoronana vondrona kely maromaro dia afaka mamela ny mpianatra betsaka kokoa handray anjara ary afaka manome tontolo azo antoka ahafahan’izy ireo mifampizara eritreritra, sy fahatsapana ary zavatra niainana. Ny vondrona kely koa dia afaka manampy ny mpianatra hampivelatra ny fahaiza-miaina ara-piaraha-monina sy fahaizana mifanerasera aman’olona. Mba hanampiana ny mpianatra hiaina zavatra manan-danja ao anaty vondrona kely dia mety hanampy ny fanomezana ireto zavatra manaraka ireto: (1) loharano fanovozan-kevitra toy ny tenina mpanoratra, tahadika-na lahateny tamin’ny fihaonamben’ny Fiangonana maneran-tany, na taratasy zaraina hafa, (2) torolalana mazava sy fanontaniana mampieritreritra, ary (3) fotoana ifanakalozan-kevitra be dia be.

Asao ny mpianatra hamorona vondrona kely (olona telo na efatra isaky ny vondrona) miaraka amin’ireo izay nisafidy fanontaniana mitovy ny azy. Omeo ny taratasy zaraina mifanaraka amin’ny fanontaniany ny vondrona tsirairay. (Samy hita any amin’ny faran’ity lesona ity ireo taratasy zaraina roa ireo.) Asao hampiasa ireo fanontaniana sy loharano fanovozan-kevitra ao amin’ilay taratasy zaraina ny mpianatra mba hiteraka fifanakalozan-kevitra manan-danja. Rehefa mifanakalo hevitra ny vondrona dia azonao atao ny mivezivezy manerana ny efitrano ka manome fitarihana sy fanampiana araka izay ilaina.

Rehefa avy omena fotoana be dia be ifanakalozan-kevitra ny amin’ny lohahevitr’izy ireo ireo vondrona dia asao ireo mpianatra hizara amin’ny iray kilasy ny fitsipika nianarany avy tamin’ny fampianarana nataon’ny Mpamonjy tamin’ny vahoaka. Mety hanampy anareo ny fifantohana amina lohahevitra iray mandritra ny minitra vitsy izay vao miresaka ny lohahevitra manaraka.

Mety hahita fitsipika mitovitovy amin’izao manaraka izao ny mpianatra:

• Rehefa mandray ny fanasan’ny Tompo isika dia manaporofo amin’ny Ray any An-danitra ny fahavononantsika hahatsiaro mandrakariva an’i Jesoa Kristy sy hankatò ny didiny.

• Rehefa mandray ny fanasan’ny Tompo isika ka miezaka mahatsiaro mandrakariva an’i Jesoa Kristy, dia hanana ny Fanahy Masiny miaraka amintsika isika.

• Nandidy antsika ny Tompo mba ho mora hanatonana sy handray tsara ny zanak’ Andriamanitra rehetra ary hanampy azy ireo hanatona Azy.

Rehefa hita ireo fitsipika dia azonao atao ny mangataka ny mpianatra hanoratra izany eny amin’ny solaitrabe. Hevero ny hangataka ny mpianatra hizara izay eritreritra na fanontaniana ananany momba ny iray amin’ireo fitsipika ireo.

Ampisehoy ireto fanontaniana manaraka ireto ary asao ireo mpianatra hisafidy iray na roa amin’izy ireo hosaintsainina. Azonao atao ny mamporisika ny mpianatra hanoratra izay eritreritra sy fahatsapana tonga ao amin’izy ireo.

• Inona no hataoko mba hanomanako ny tenako handray ny fanasan’ny Tompo ary hanaovana izany ho zavatra iainana manan-danja sy mifantoka amin’i Kristy kokoa?

• Inona no hataoko mba hanampiana ny hafa hahatsapa ho voaray tsara ary hahatsiaro ho mpikambana ao amin’ny Fiangonan’i Jesoa Kristy?

Ho an’ny fotoana manaraka

Asao ny mpianatra hieritreritra ny sasany amin’ireo toe-javatra eo amin’ny tontolo manodidina azy ireo izay mety hahatonga ny fiainana ny filazantsara ho sarotra. Amporisiho ny mpianatra mba handalina ny tahirin-kevitra hoenti-manomana ny fotoam-pianarana ho an’ny fotoam-pianarana manaraka, ka hitady izay zavatra azon’izy ireo ianarana avy amin’ny ohatra nasehon’ny olona ao amin’ny Bokin’i Môrmôna izay niezaka mafy hiaina araka ny fahamarinana na dia niaina tao amina tontolo ratsy aza.

Ireo fitahiana avy amin’ny fanasan’ny Tompo

Fampianarana sy fotopampianaran’ny Bokin’i Môrmôna: Bokin’ny mpampianatra—Lesona 17

Toromarika ho an’ireo mpitarika fifanakalozan-kevitra

Ampiasao ireto toromarika manaraka ireto mba hanamorana ny fifanakalozan-kevitra amin’ireo mpikambana ao amin’ny vondrona misy anao. Amporisiho handray anjara ny mpikambana rehetra ao amin’ny vondrona misy anao. Na izany aza, tsy tokony hisy olona hahatsapa ho voateritery hizara ny eritreriny.

Inona no azoko atao mba hahatonga ny fanasan’ny Tompo ho ampahany manan-danja kokoa amin’ny zavatra iainako any am-piangonana?

Avereno jerena ny 3 Nefia 18:6–12; 20:8–9 sy ny fampianarana avy amin’ny Loholona David A. Bednar sy D. Todd Christofferson ao amin’ny fizarana 2 ao amin’ny tahirin-kevitra hoenti-manomana ny fotoam-pianarana. Dia ifanakalozy hevitra ireto fanontaniana manaraka ireto avy eo:

• Inona no porofointsika amin’ny Ray any An-danitra rehefa mandray ny fanasan’ny Tompo isika?

• Amin’ny fomba ahoana no ahafahan’ny fanasan’ny Tompo mampanakaiky kokoa antsika amin’ny Mpamonjy? Ahoana no maha-hafa ny fiainanao rehefa mifantoka bebe kokoa amin’i Jesoa Kristy ianao ary rehefa mahatsapa ho akaiky Azy kokoa?

• Araka ny filazan’ny Loholona Bednar sy Christofferson, inona no tokony ho fiantraikan’ny fanasan’ny Tompo eo amin’ny fiainantsika sy ny toetrantsika isan-kerinandro? Misy olona vonona hijoro ho vavolombelona momba ireo fitahiana ireo avy amin’ny zavatra niainany ve?

• Inona no tena nanampy anao hahatonga ny fanasan’ny Tompo ho zavatra iainana manan-danja sy mifantoka amin’i Kristy?

© 2021 an’ny Intellectual Reserve, Inc. All rights reserved.

Ireo fitahiana avy amin’ny fanasan’ny Tompo

Mandray tsara ny olona rehetra ho ao amin’ny Fiangonana

Fampianarana sy fotopampianaran’ny Bokin’i Môrmôna: Bokin’ny mpampianatra—Lesona 17

Toromarika ho an’ireo mpitarika fifanakalozan-kevitra

Ampiasao ireto toromarika manaraka ireto mba hanamorana ny fifanakalozan-kevitra amin’ireo mpikambana ao amin’ny vondrona misy anao. Amporisiho handray anjara ny mpikambana rehetra ao amin’ny vondrona misy anao. Na izany aza, tsy tokony hisy olona hahatsapa ho voateritery hizara ny eritreriny.

Ahoana no fomba ahafahako manampy amin’ny famoronana zavatra iainana any am-piangonana izay maha-te hitoetra sy ahatsapana tena ho voaray tsara kokoa ho an’ny olon-drehetra?

Azonao atao ny manomboka ny fifanakalozan-kevitra ataonareo amin’ny alalan’ny famantarana antony mateti-pitranga vitsivitsy mety tsy hahatsapan’ny olona ho voaray tsara ao amin’ny paroasy na sampana misy azy ireo. Makà fotoana hamerenana hijery ny 3 Nefia 18:22–25 sy ny fanambarana nataon’ny Rahavavy Carol F. McConkie ao amin’ny fizarana 3 ao amin’ny tahirin-kevitra hoenti-manomana ny fotoam-pianarana. Dia ifanakalozy hevitra ireto fanontaniana manaraka ireto avy eo:

• Fampianarana sy fitsipika inona avy amin’ireo andininy ireo no heverinao fa zava-dehibe ny hahatakaran’ny mpikamban’ny Fiangonana rehetra azy? Fa nahoana?

• Inona no tena nanan-danja taminao momba ny fanambaran’ny Rahavavy McConkie? Inona araka ny eritreritrao no hevitry ny hoe “mahita [ny hafa] amin’ny maso manahaka ny an’i Kristy”? (Carol F. McConkie, “Lifting Others’” [horonan-tsary], ChurchofJesusChrist.org).

• Ohatra inona avy amin’ny fiainan’ny Mpamonjy no maneho ny faniriany hanasa sy handray tsara ireo zanak’ Andriamanitra rehetra na inona na inona toe-javatra misy azy ireo?

• Ahoana no ahafahantsika manaraka ny ohatra nasehon’ny Mpamonjy hahatonga antsika handray tsara sy mpanasa kokoa ireo mpikambana sy mpitsidika izay manatrika ny paroasy na sampana misy antsika? Inona no zavatra nataon’olona ka nanampy anao hahatsapa ho voaray tsara ao am-piangonana?

© 2021 an’ny Intellectual Reserve, Inc. All rights reserved.

Mandray tsara ny olona rehetra ho ao amin’ny Fiangonana