Lesona 19, Tahirin-kevitra hoenti-manomana ny fotoam-pianarana

Miaina am-pahamarinana amin’ny andron’ny faharatsiana

Ny Filoha Ezra Taft Benson dia nampianatra fa ny Bokin’i Môrmôna dia “mampatanjaka ireo mpanara-dia an’i Kristy izay manetry tena hahatohitra ireo teti-dratsy, paikady ary fotopampianaran’ny devoly amin’izao androntsika izao” (“The Book of Mormon Is the Word of God,” Ensign, Jan. 1988, 3). Ato amin’ity fizarana ity dia hanana fotoana hianarana ny fomba ampihariharian’ny Bokin’i Môrmôna ireo loza ireo ianao mba hahafahanao miaro tsara kokoa ny tenanao. Rehefa mandalina ity lesona ity ianao dia mitadiava fitsipika izay afaka manampy anao hiaina am-pahamarinana mandritra ny fotoam-paharatsiana.

Fizarana 1

Ahoana no ahafahako mijanona ho mahatoky amin’ny Tompo rehefa miatrika fanenjehana noho ny fiainana ny filazantsara aho?

Rehefa nipetraka tamin’ny toeram-pitsarana i Helamàna, zanakalahin’i Helamàna, dia niaina vanim-potoana nilamina ny Nefita ary olona an’aliny no niditra ho mpikambana tao amin’ny Fiangonana. Na dia niroborobo aza ny Fiangonana dia nisy mpikambana sasantsasany lasa niavonavona ary nanomboka nanenjika ireo mpanara-dia an’i Jesoa Kristy nanetry tena. (Jereo ny Helamàna 3:20–34.)

Halalino mba hanomanana ny fotoam-pianarana

Vakio ny Helamàna 3:33–35, ary tadiavo ny fomba namalian’ireo mpanara-dia an’i Kristy nanetry tena ny fanenjehana nataon’ny mpikambana hafa tao amin’ny Fiangonana.

Saintsaino mba hanomanana ny fotoam-pianarana

Mieritrereta fotoana iray izay niainanao na nanatrehanao maso fihetsika nandratra na teny mifono haratsiam-panahy avy amina mpikambana iray hafa ao amin’ny Fiangonana. Ahoana no nasetrinao izany? Inona no azonao ianarana avy amin’ireo Olomasina nanetry tena ireo momba ny fomba iatrehana karazana fanenjehana toy izany?

Fizarana 2

Ahoana no ahafahako ho olo-marina rehefa voahodidin’ny faharatsiana aho?

Ny mpaminany Môrmôna sy ny zanany lahy Môrônia dia niatrika fotoana nanjakan’ny faharatsiana. Noho ny fahotana sy ny tsy finoana dia nitsahatra ny fahagagana ary tsy niaraka tamin’ny vahoaka intsony ny Fanahy Masina. Nanjaka eran-tany ny herin’i Satana. (Jereo ny Môrmôna 1:13–19.) Tao amin’ny taratasy iray ho an’i Môrônia zanany lahy dia nilazalaza ny toetoetry ny olona i Môrmôna ary nanatsoaka hevitra fa mamohehitra izy ireo hany ka “tsy manaraka fahalalam-pomba” (Môrônia 9:11). Herisetra, ady ary vono olona no namely ny tany rehefa niady tsy anki-janona ny Lamanita sy ny Nefita. Nanjaka ny Lamanita tamin’ny farany ary nanatri-maso ny famongorana tanteraka ny Nefita i Môrmôna sy i Môrônia (jereo ny Mormôna 2–6; 8:1–3, 7).

Halalino mba hanomanana ny fotoam-pianarana

Vakio ny Môrmôna 1:1–2, 15 sy ny Môrônia 9:25–26, ary tadiavo ireo antony vitsivitsy nahafahan’i Môrmôna sy i Môrônia nijanona ho mahatoky na dia voahodidin’ny faharatsiana aza izy ireo.

Raha niresaka momba ny herin’ny fifantohana amin’ny Mpamonjy ao anatin’ny tontolo feno ota ny Filoha Joy D. Jones, Filohan’ny Kilonga maneran-tany, dia nampianatra hoe:

Raha toa ny fisarihan’izao tontolo izao ka matanjaka kokoa noho ny finoantsika ny Mpamonjy sy ny fahatokiantsika Azy dia handresy hatrany ny fisarihan’izao tontolo izao. …

… Raha matetika no mora kokoa ny matoritory ara-panahy raha oharina amin’ny fanaovana ny ezaka ara-panahy mba hahatsiahy sy hanaiky ny toetrantsika amin’ny maha-Andriamanitra, dia tsy azontsika atao ny manome vahana izany amin’izao andro farany izao. Enga anie isika … “ho mahatoky ao amin’i Kristy; … fa hanandratra [antsika] kosa anie i Kristy, ary enga anie ny fijaliany sy ny fahafatesany, … ary ny famindram-pony sy ny fahari-pony, ary ny fanantenana ny voninahiny sy ny fiainana mandrakizay hitoetra mandrakizay ao [an-tsaintsika]” [Môrônia 9:25]. Rehefa ampiakarin’ny Mpamonjy eo amin’ny faritra ambony kokoa isika dia tsy hoe afaka mahita mazava bebe kokoa fotsiny ilay tena maha-izy antsika fa lasa akaiky Azy kokoa noho izay noheverintsika.. (“Fananana lanja tsy hay refesina,” Liahona, nôv. 2017, 15)

Ny Loholona Neil L. Andersen ao amin’ny Kôlejin’ny Apôstôly Roambinifolo dia nanao izao fijoroana ho vavolombelona manaraka izao momba ny fomba hanampian’ny Tompo ny mpino hiatrika tontolo ratsy:

Efa hitan’ny Tompo mialoha ny androntsika, ary nomeny fiarovana ara-panahy isika. … Koa satria mitombo ny faharatsiana eto amin’izao tontolo izao, dia misy herin’ny fanambarana mifandanja amin’izany sy fanomezana ara-panahy omena ireo olo-marina. Omen’ny Tompo hery fanampiny isika rehefa vonona ny hitoetra ho marina ao anatin’ny tontolo ratsy.. (“A Classroom of Faith, Hope, and Charity” [takariva iarahana amin’ny Manam-pahefana Ambony, 28 feb 2014], ChurchofJesusChrist.org)

Raketo an-tsoratra ny eritreritrao

Mitadiava olona na vondron’olona ao amin’ny Bokin’i Môrmôna izay niatrika faharatsiana ary nijanona ho mahatoky tamin’ny Tompo toa an’i Môrmôna na i Môrônia. Rehefa mieritreritra ity ohatra ity ianao dia mitadiava andinin-tsoratra masina iray izay afaka manome fahatakarana fanampiny momba io olona (na vondron’olona) io. Avy eo dia raketo an-tsoratra ny eritreritrao momba ireto fanontaniana manaraka ireto:

• Ahoana no hamaritanao ny faharatsiana natrehin’io olona (na vondron’olona) io?

• Inona no zavatra nataon’io olona (na vondron’olona) io ka azonao atao mba hijanonana ho mahatoky amin’ny Tompo rehefa miatrika ny faharatsiana sy ny fakam-panahin’izao tontolo izao ianao?

Aoka ianao ho vonona hizara ny ohatrao rehefa tonga ao am-pianarana. Azonao atao koa ny miomana hizara ohatra-na olona iray fantatrao manokana izay niatrika faharatsiana ary nijanona ho mahatoky tamin’ny Tompo.

Te hianatra misimisy kokoa ve ianao? (Tsy voatery hatao)

Amin’ny fomba ahoana no ahafahako hotahiana amin’ny alalan’ny fanolorako ny foko amin’ Andriamanitra?

Vakio ny lohatenin-toko an’ny Helamàna 7–9. Avy eo dia vakio ny Helamàna 10:1–5 ka tadiavo ny fomba nitahiana an’i Nefia, zanakalahin’i Helamàna, noho ny fanekeny ny sitrapon’ny Tompo.

Ao amin’ny lahateniny “Manolotra ny fontsika ho an’ Andriamanitra” (Liahona, nôv. 2015, 30–32), ny Rahavavy Neill F. Marriott, mpanolotsaina teo taloha tao amin’ny Fiadidian’ny Zatovovavy maneran-tany, dia nampianatra ny fomba ahafahantsika mampitombo ny herintsika mba hiaina am-pahamarinana rehefa manolotra ny fontsika ho an’ Andriamanitra isika (jereo ihany koa ny Helamàna 3:35).

Nahoana no zava-dehibe ny fananana herim-po rehefa miatrika toe-javatra izay tsy mifanaraka amin’ny fampianaran’i Jesoa Kristy?

Ao amin’ny lahateniny “Afin que nous ayons toujours son Esprit avec nous” (Liahona, mai 2006, 28–31), ny Loholona David A. Bednar ao amin’ny Kôlejin’ny Apôstôly Roambinifolo dia nampitandrina momba ireo zavatra izay afaka mampisaraka antsika amin’ny Fanahy Masina (tondrom-potoana 4:40–7:24).

Aiza no ahafahako mianatra bebe kokoa momba ny fomba hananana fiainana sambatra ao anatina tontolo ratsy fanahy?

Ao amin’ny lahateniny “Comment bien vivre au milieu du mal grandissant” (Liahona, mai 2004, 100–102), ny Loholona Richard G. Scott tao amin’ny Kôlejin’ny Apôstôly Roambinifolo dia niresaka momba ny fomba ahafahan’ny fifantohana amin’i Jesoa Kristy manome anao “fiainana tsara sy feno fientanentanana na inona na inona mitranga eo amin’ny tontolo manodidina anao” (101).