Kapitulo 11: Si Jesukristo Motubos sa Mahinulsulon gikan sa Espirituhanong Kamatayon

Kapitulo 11

Si Jesukristo Motubos sa Mahinulsulon gikan sa Espirituhanong Kamatayon

Ang Pag-ula ni Jesukristo motubos niadtong kinsa mahinulsulon ug matinud-anon gikan sa espirituhanong kamatayon.

Gikan sa Kinabuhi ni Joseph F. Smith

“Ako batan-on ug walay kasinatian karon,” si Joseph F. Smith misulat samtang didto sa iyang misyon sa Hawaii. “Busa ako nanghinaut nga magmapaubsanon, mainampoon atubangan sa Ginoo, nga ako unta mahimong angayan sa mga panalangin ug gugma sa Dios.”¹ Sa bag-o pa sa iyang pagserbisyo sa Hawaii, ang batan-on nga misyonaryo adunay usa ka espirituhanong kasinatian nga nagpakita sa makalimpyo ug makahupay nga gahum sa Pag-ula ni Jesukristo: Siya miingon nga siya “gidaugdaug og maayo” sa iyang misyon diha sa usa ka “kahimtang sa kakabus, kakulang sa salabutan ug kahibalo.”

“Samtang anaa niana nga kahimtang ako nagdamgo nga ako anaa sa usa ka biyahe, ug ako giaghat nga kinahanglan ako nga magdali—nagdali sa tibuok nakong kusog, sa kahadlok nga basin og maulahi kaayo ako. Ako mipaspas sa paglakaw kutob sa akong mahimo, ug mao na lang ang akong namatngunan nga adunay usa ka gamay lang nga putos, usa ka panyo uban sa usa ka gamay nga putos nga miputos niini. Wala ako kahibalo kon unsa kadto, sa dihang nagdali ako kutob sa akong mahimo; nga sa katapusan ako miabut ngadto sa usa ka talagsaon nga mansyon, kon kini gitawag man og mansyon. Mora og dako ra kaayo kini, labihan ra ka nindot nga pagahimoon pinaagi sa kamot, apan ako naghunahuna nga ako nasayud nga kana ang akong paingnan. Sa akong pag-agi padulong niini, paspas kutob sa akong mahimo, ako nakakita og usa ka gisulat, ‘Kaligo.’ Dali akong mibalik ug miadto paingon sa kaligoanan ug giligo ang akong kaugalingon aron malimpyo. Akong giablihan kining gamay nga putos nga anaa kanako, ug adunay usa ka pares sa puti, limpyo nga mga saput, usa ka butang nga wala na nako makita sulod sa taas nga panahon.… Gisul-ob ko kini. Dayon nagdali ako nga miadto sa unsay makita nga usa ka dakong agianan, o pultahan. Ako mituktok ug ang pultahan naabli, ug ang tawo nga nagbarug didto mao si Propeta Joseph Smith. Siya mitan-aw kanako nga may gamayng kasuko, ug ang unang mga pulong nga iyang gisulti: ‘Joseph, naulahi na ka.’ Sa gihapon ako nakakuha og kompiyansa ug miingon:

“ ‘O, pero ako limpyo—ako limpyo!’

“ … Kana nga panan-awon, kana nga pagpakita ug pagsaksi nga akong natagamtaman nianang higayuna nakapahimo kanako kon unsa ako, kon ako usa man ka maayo, o limpyo, o matarung sa atubangan sa Ginoo, kon adunay bisan unsa nga butang nga maayo diha kanako. Kana nakatabang kanako nga makalatas sa matag pagsulay ug ngadto sa matag kalisdanan.”²

Mga Pagtulun-an ni Joseph F. Smith

Pinaagi sa Pagkapukan ni Adan, ang espirituhanong kamatayon miabut ngadto sa kalibutan.

Ako gusto nga mamulong sa usa ka pulong o duha kabahin ngadto sa laing kamatayon, nga mao ang mas makalilisang nga kamatayon kaysa niianang sa lawas. Sa dihang si Adan, ang atong unang ginikanan, mikaon sa gidili nga bunga, nakalapas sa balaod sa Dios, ug nahimong ulipon ngadto ni Satanas, siya gipapahawa sa presensya sa Dios.… Mao kini ang unang kamatayon. Bisan og buhi, siya usa ka patay—patay ngadto sa Dios, patay sa kahayag ug kamatuoran, patay sa espirituhanong paagi; gipapahawa gikan sa presensya sa Dios; ang komunikasyon tali sa Amahan ug sa Anak naputol. Siya sa hingpit gisalikway gikan sa presensya sa Dios sama kang Satanas ug sa mga panon nga misunod kaniya. Mao kana ang espirituhanong kamatayon.³

Gusto nakong isilsil sa inyong mga hunahuna—“diin si [Adan] namatay sa espirituhanong paagi.” Karon unsa man ang iyang kahimtang sa dihang siya gibutang sa Tanaman sa Eden? Makaduol siya sa Amahan. Siya anaa sa Iyang presensya. Siya nakiguban ug nakig-istorya uban Kaniya nawong sa nawong, ingon sa usa ka tawo nga nakigsulti sa lain. Mao kini ang kahimtang ni Adan ug ni Eva sa dihang sila didto pa sa tanaman. Apan sa dihang sila mikaon sa gidili nga bunga sila gisalikway ug gipapahawa gikan sa presensya sa Dios, … “Diin sila namatay sa espirituhanong paagi, nga mao ang unang kamatayon.” [Tan-awa sa D&P 29:41.] Ug imposible alang kang Adan nga anaa niana nga kahimtang sa pagpalingkawas sa iyang kaugalingon gikan sa lugar diin siya mibutang sa iyang kaugalingon. Siya anaa sa paghawid ni Satanas… Siya “patay sa espirituhanong paagi”—gipapahawa gikan sa presensya sa Dios. Ug kon wala pa unta ang usa ka paagi sa paglingkawas nga gihatag alang kaniya, ang iyang kamatayon mahimo unta nga mahangturon, walay kinutuban, walay katapusang kamatayon, walay bisan unsa nga paglaum sa katubsanan diha niana.⁴

Walay usa ka tawo nga maluwas sa gingharian sa Dios diha sa sala.

Walay tawo nga makasulod ngadto sa presensya sa Dios diha sa iyang mga sala, ug walay tawo nga makadawat sa kapasayloan sa iyang mga sala gawas kon siya maghinulsol ug [ilubong] uban kang Kristo [tan-awa sa Mga Taga-Roma 6:4]. Kay ang Dios mihimo kanato nga mga gawasnon, sa pagpili ug maayo o dautan, sa paglakaw diha sa kahayag o diha sa kangitngit, samtang kita nagpili, ug siya mi-orden niini sa ingon nga kita unta mahimong sama Kaniya, nga kon kita mopakita sa atong mga kaugalingon nga angayan sa kinabuhing dayon ug sa himaya diha sa Iyang presensya, kini tungod kay kita naghinulsol sa atong mga sala ug misunod ug mituman sa Iyang mga sugo.⁵

Walay tawo nga maluwas sa gingharian sa Dios diha sa sala. Walay tawo gayud nga pasayloon sa iyang mga sala pinaagi sa matarung nga Maghuhukom, gawas kon siya naghinulsol sa iyang mga sala. Walay tawo gayud nga mahimong gawasnon gikan sa gahum sa [espirituhanon] nga kamatayon gawas kon siya natawo pag-usab ingon sa gimando sa Ginoo nga Labawng Makagagahum.⁶

Ang Dios mihatag ngadto sa tanang katawhan sa kabubut-on ug mihatag kanato sa pribilehiyo sa pagserbisyo kaniya o sa dili pagserbisyo kaniya, sa pagbuhat niana nga husto o niana nga sayop, ug kini nga pribilehiyo gihatag ngadto sa tanang katawhan walay pagtagad sa tinuohan, kolor o kahimtang. Ang adunahan aduna niini nga kabubut-on, ang kabus aduna niini nga kabubut-on, ug walay tawo ang gihikawan pinaagi sa bisan unsa nga gahum sa Dios gikan sa paggamit niini sa pinakahingpit ug sa pinakagawasnon nga paagi. Kini nga kabubut-on gihatag ngadto sa tanan. Kini ang panalangin nga gihatag sa Dios ngadto sa kalibutan sa katawhan, ngadto sa tanan niya nga mga anak walay gipili. Apan siya istrikto nga mohukom kanato sa tulubagon alang sa paggamit nga atong gihimo niini nga kabubut-on, ug ingon nga kini gisulti ngadto kang Cain, kini usab isulti ngari kanato; “Kon maayo ang imong gibuhat, kini dili ba pagadayegon? ug kon dili ka magbuhat og maayo, ang sala nagahay-ad sa ganghaan” (Gen. 4:7).… Samtang ang Dios mihatag ngadto sa tanang katawhan, walay pagtagad sa kahimtang, niining kabubut-on sa pagpili og maayo o dautan, siya dili ug dili mohatag ngadto sa mga katawhan og kapasayloan sa mga sala apan pinaagi sa ilang pagkamasulundon nagdto sa balaod. Busa, ang tibuok kalibutan naglunang sa sala ug ubos sa tunglo, sanglit ang kahayag miabut na sa kalibutan ug ang katawhan wala mobutang sa ilang mga kaugalingon diha sa husto nga lugar atubangan sa Ginoo.⁷

Ang Pag-ula ni Kristo nagtubos kanato gikan sa espirituhanong kamatayon pinaagi sa paghinulsol ug pagkamasulundon.

Ang Dios miplano sa sinugdanan sa pagbutang atubangan sa tawo sa kahibalo sa maayo ug sa dautan, ug mihatag kaniya og sugo sa paghangup sa maayo ug pagdumot sa dautan. Apan kon siya mapakyas, siya mohatag ngadto kaniya og balaod sa sakripisyo ug mohatag og usa ka Manluluwas alang kaniya, nga siya mahimong mahibalik pag-usab ngadto sa presensya ug pagdapig sa Dios ug makakaon sa kinabuhing dayon uban kaniya. Mao kini ang plano sa katubsanan nga gipili ug gitukod sa Labawng Makagagahum sa wala pa ang tawo ibutang ibabaw sa yuta. Ug kon ang tawo mapukan man pinaagi sa paglapas sa balaod nga gihatag kaniya, ang Ginoo mihatag kaniya og balaod sa sakripisyo, ug mipatin-aw ngadto sa iyang panabut, nga kini alang sa katuyoan sa pagpahinumdom kaniya nianang mahinungdanon nga hitabo nga nahitabo sa kinatung-an sa panahon, diin siya ug ang tanan niya nga kaliwatan pagabangunon pinaagi sa gahum sa katubsanan ug pagkabanhaw gikan sa mga patay, ug makaangkon sa kinabuhing dayon uban sa Dios sa iyang gingharian.⁸

Adunay usa ka plano nga gihimo alang sa katubsanan ni [Adan]. Kini giplano sa Labawng Makagagahum nga siya dili magantus sa temporal nga kamatayon hangtud nga siya matudloan sa paagi sa paglingkawas gikan sa espirituhanong kamatayon nga moabut nganha kaniya tungod sa sala. Busa ang anghel miabut ug mitudlo kaniya sa Ebanghelyo sa kaluwasan, anaa sa atubangan niya si Kristo, ang Manunubos sa kalibutan, kinsa moabut sa kinatung-an sa panahon nagkupot sa gahum sa pagbuntog sa kamatayon ug sa pagtubos ni Adan ug sa iyang kaliwatan gikan sa pagkapukan, ug gikan sa paghawid ni Satanas.… Usa ka tawo kinahanglan mokanaog ug motabang kaniya sa pagsaka. Lain ug mas taas nga gahum kay sa iyaha ang kinahanglang modala kaniya paggawas sa kahimtang diin iyang gibutang ang iyang kaugalingon: kay siya naulipon ni Satanas ug walay gahum ug dili makahimo diha ug sa iyang kaugalingon.

Ang Ebanghelyo, sa ingon, gisangyaw ngadto kaniya, ug ang paagi sa paglingkawas gikan niana nga espirituhanong kamatayon gihatag ngadto kaniya. Kana nga paagi sa paglingkawas mao pinaagi sa hugot nga pagtuo sa Dios, paghinulsol sa sala, bunyag alang sa kapasayloan sa sala, gasa sa Espiritu Santo pinaagi sa pagpandong sa mga kamot. Pinaagi niana siya makadawat sa kahibalo sa kamatuoran ug sa pagpamatuod ni Jesukristo, ug naluwas gikan sa espirituhanong kamatayon nga miabut gikan kaniya, nga mao ang unang kamatayon, ug usa ka kompleto ug hingpit nga kamatayon, kon bahin sa espiritu ang hisgutan, bisan og siya buhi ug naglihok ug anaa sa iyang kaugalingon, ingon sa wala pa siya mokaon sa gidili nga bunga ug nahimo nga patay sa espirituhanong paagi; siya anaa sa iyang kaugalingon ug sa iyang lawas; apan siya patay sa espirituhanong paagi, ug kinahanglan nga pagatubson gikan niana nga kahimtang.⁹

Si Adan … kinahanglan nga pagatubson gikan sa [espirituhanong kamatayon] pinaagi sa dugo ni Kristo, ug pinaagi sa hugot nga pagtuo ug pagkamasulundon ngadto sa mga sugo sa Dios. Pinaagi niini si Adan naluwas gikan sa unang kamatayon, ug nabalik pagusab ngadto sa presensya sa Dios, nabalik pag-usab ngadto sa pagdapig sa Labawng Makagagahum, nabalik pag-usab ngadto sa dalan sa walay katapusang pagtubo ug paglambo.¹⁰

Kon ang Ginoo mipadayag ngadto sa kalibutan sa plano sa kaluwasan ug katubsanan gikan sa sala, diin ang tawo mahimong mahimaya pag-usab ngadto sa iyang presensya ug makabaton sa kinabuhing dayon uban kaniya, ako mouyon, ingon sa gipahayag nga dili mahimong ilimud, nga walay tawo nga mahimaya diha sa presensya sa Dios ug makakab-ot ngadto sa hingpit nga himaya ug kalipay diha sa iyang gingharian ug presensya, gawas kon siya mosunod sa plano nga gimugna ug gipadayag sa Dios.¹¹

Kon kita nagpuyo nga nahiuyon sa mga plano sa atong Langitnong Amahan, kon ang atong mga kasingkasing mopaduol ngadto Kaniya, ug ngadto sa atong Magulang nga Igsoon, ang Anak sa Dios, ang atong mahimayaong Manunubos, pinaagi Kaniya kita pagabangunon dili lamang gikan sa mga patay, apan usab pagatubson, o mahimong matubos, gikan sa espirituhanong kamatayon, ug pagadad-on og balik ngadto sa presensya sa Dios.¹²

Si Kristo sa balaanong paagi gipili ug gipadala sa kalibutan aron sa pagpalingkawas sa katawhan sa sala pinaagi sa paghinulsol; sa pagpalingkawas sa katawhan gikan sa kamatayon nga miabut nganha kanila tungod sa sala [kalapasan] sa unang tawo. Ako nagtuo niini sa tibuok nakong kalag.¹³

Kon kita makahimo og sala, kinahanglan nga kita maghinulsol niini ug mohimo og pakighiuli kon kini maabut sa atong gahum. Kon kita dili makahimo sa pakighiuli alang sa sayop nga atong nahimo, dayon kita kinahanglang mohangyo sa grasya ug kalooy sa Dios aron sa paglimpyo kanato gikan niana nga kadautan.

Ang mga tawo dili mahimong mopasaylo sa ilang kaugalingon nga mga sala; sila dili mahimong molimpyo sa ilang mga kaugalingon gikan sa mga sangputanan sa ilang mga sala. Ang mga tawo makahimo sa paghunong sa pagpakasala ug makahimo sa pagbuhat og matarung sa umaabut, ug sa ingon nga ang ilang mga buhat kahimut-an sa atubangan sa Ginoo ug angayan sa pagtugot. Apan kinsa man ang moayo sa mga sayop nga ilang nahimo ngadto sa ilang mga kaugalingon ug ngadto sa uban, nga mora man og imposible alang kanila ang pag-ayo sa ilang kaugalingon? Pinaagi sa pag-ula ni Jesukristo ang mga sala sa mahinulsulon mahugasan; bisan pa sila lubos nga mapula sila mahimong sama sa maputing balahibo sa karnero [tan-awa sa Isaias 1:18]. Kini ang saad nga gihatag nganha kaninyo.¹⁴

Pinaagi sa Pag-ula ug sa atong pagkamatinud-anon, kita mamahimong isigkamanununod uban kang Jesukristo.

Kita mobarug sa atubangan sa hukmanan sa Dios aron pagahukman. Sama sa giingon sa Biblia, ingon usab sa Basahon ni Mormon, ug maingon usab sa mga pinadayag nga miabut sa paggiya kanato pinaagi ni Propeta Joseph Smith. Ug dayon kadtong kinsa wala magpaubos ug magmasulundon sa celestial nga balaod dili mapabuhi pinaagi sa celestial nga himaya. Ug kadtong kinsa wala magpaubos ug magmasulundon sa terrestrial nga balaod dili mapabuhi pinaagi sa terrestrial nga himaya. Ug kadtong kinsa wala magpaubos ug magmasulundon sa telestial nga balaod, dili mapabuhi pinaagi sa telestial nga himaya; apan sila makaangkon og gingharian nga walay himaya.¹⁵

Ang tanan nga mga lawas nga naghigda sa lubnganan pagabanhawon; dili ang tanan sa unang pagkabanhaw, ni sa sayo sa buntag sa unang pagkabanhaw, apan ang uban tingali sa katapusang pagkabanhaw; ug ang matag kalag gikinahanglan nga moadto sa atubangan sa hukmanan sa Dios ug pagahukman sumala sa mga binuhatan nga gibuhat sa kaugalingon. Kon ang iyang mga buhat maayo, dayon siya makadawat sa ganti sa maayong binuhatan; kon [kini mga] dautan, dayon siya papahawaon gikan sa presensya sa Ginoo.¹⁶

Kita mabuhi, nianang higayuna; kita dili mamatay; kita dili magpaabut sa kamatayon apan kita magpaabut sa kinabuhi, imortalidad, himaya, kahimayaan, ug pagpabuhi pinaagi sa himaya sa celestial nga gingharian, ug ang pagdawat sa ingon gani sa kahingpitan. Kini ang atong padulngan; kini ang nahimaya nga kahimtang diin mahimo natong maangkon ug walay gahum nga makakuha o makakawat niini kanato, kon atong ipakita nga matinud-anon ug matinuoron ngadto sa pakigsaad sa ebanghelyo.¹⁷

Ang katuyoan sa atong yutan-ong pagpakabuhi mao nga kita mahimong makabaton og hingpit nga kalipay, ug nga kita mahimong anak nga mga lalaki ug anak nga mga babaye sa Dios, sa hingpit nga pagsabut sa pulong, mahimong mga manununod sa Dios ug isigka mga manununod uban kang Jesukristo, nga mamahimong mga hari ug mga pari ngadto sa Dios, nga makapanunod sa himaya, kamanduan, kahimayaan, mga trono ug matag gahum ug kinaiya nga napalambo ug naangkon sa atong Langitnong Amahan. Kini ang tumong sa atong pagkaania dinhi sa yuta. Aron makakab-ot ngadto niining hinimaya nga kahimtang, kinahanglan nga kita moagi niining mortal nga kasinatian, o pagsulay, diin atong mapakita sa atong mga kaugalingon nga angayan, pinaagi sa tabang sa atong magulang nga igsoon nga si Jesus.¹⁸

Ang mga tawo mahimo lamang maluwas ug mahimaya sa gingharian sa Dios diha sa pagkamatarung, busa kita kinahanglan nga maghinulsol sa atong mga sala, ug magalakaw diha sa kahayag maingon nga si Kristo anaa sa kahayag, nga ang iyang dugo makahimo sa paglimpyo kanato gikan sa tanan nga mga sala, ug nga kita makaangkon sa pakigdait sa Dios ug makadawat sa iyang himaya ug kahimayaan.¹⁹

Pinaagi sa pag-ambit sa sakrament kita naghinumdom kang Jesukristo ug sa Iyang Pag-ula.

ASi Adan, human siya gisalikway sa tanaman, gisugo sa paghalad og mga sakripisyo ngadto sa Dios; pinaagi niini nga buhat, siya ug ang tanan nga mihimo sa mga paghalad sa mga sakripisyo, gipahinumduman kabahin sa Manluluwas kinsa moabut aron sa pagtubos kanila gikan sa kamatayon nga, kon dili pa tungod sa pag-ula nga gihimo niya, sa kahangturan dili makapaapil kanila gikan sa pagpuyo ngadto sa presensya sa Dios pag-usab. Apan sa iyang pag-abut ug kamatayon, kini nga sugo natuman; ug siya misugod sa Panihapon ug misugo sa iyang mga sumusunod sa pagambit niini sa tanang umaabot nga panahon, aron nga sila makahinumdom kaniya, nga maghunahuna nga siya mitubos kanila, usab nga sila nakigsaad sa pagsunod sa iyang mga sugo ug sa paglakaw uban kaniya sa espirituhanong pagpakatawo pagusab. Sukad niini kinahanglan nga moambit sa Sakrament, isip usa ka saksi kaniya nga kita gayud maghinumdom kaniya, ug andam sa pagsunod sa mga sugo nga iyang gihatag kanato, nga kita unta makabaton sa iyang Espiritu uban kanato sa kanunay—gani hangtud sa katapusan, ug usab nga kita unta magpadayon diha sa pagpasaylo sa mga sala.²⁰

Sa dihang si Jesus miabut ug nag-antus, “ang matarung alang sa dili mga matarung,” siya kinsa walay sala alang kaniya nga nakasala, ug anaa ubos sa silot sa balaod nga ang makasasala nakalapas, ang balaod sa sakripisyo natuman, ug imbis niana siya mihatag og lain nga balaod, nga atong gitawag og ang “Sakrament sa Panihapon sa Ginoo,” diin ang iyang kinabuhi ug misyon, iyang kamatayon ug pagkabanhaw, ang dakong sakripisyo nga iyang gihalad alang sa katubsanan sa tawo, kinahanglan nga tipigan sa walay katapusang paghinumdom, kay, nag-ingon siya nga “buhata ninyo kini … sa paghandum kanako, kay sa matag kaon ninyo niining tinapay ug matag inom ninyo niining kopa, ginasangyaw ninyo ang kamatayon sa Ginoo hangtud sa iyang pag-anhi.” Busa kini nga balaod mao ang alang kanato kon ang balaod sa sakripisyo alang niadtong kinsa nagpuyo sa wala pa ang unang pag-anhi sa Anak sa Tawo, hangtud nga siya moanhi pag-usab. Busa, kita kinahanglan nga motahud ug mopabilin niini sa sagrado nga paagi, tungod kay adunay silot ang nakataput sa pagsupak niini [tan-awa sa 1 Mga Taga-Corinto 11:25–29].²¹

Ang Sakrament sa Panihapon sa Ginoo … usa ka baruganan sa Ebanghelyo, ang usa nga ingon ka mahinungdanon nga pagasundon sa tanan nga mga tumutuo, sama sa uban nga mga ordinansa sa Ebanghelyo. Unsa man ang katuyoan niini? Aron nga atong ibutang sa atong hunahuna sa kanunay ang Anak sa Dios kinsa mitubos kanato, gikan sa walay katapusang kamatayon, ug mihatag pag-usab kanato sa kinabuhi pinaagi sa gahum sa Ebanghelyo. Sa wala pa moanhi si Kristo sa yuta, nabutang kini sa hunahuna sa mga lumulupyo sa yuta diin ang Ebanghelyo gisangyaw, pinaagi sa laing ordinansa, nga naglakip sa sakripisyo sa kinabuhi sa hayop, usa ka ordinansa nga nagsimbolo sa dako nga sakripisyo nga moabut sa kinatung-an nga panahon.²²

Mga Sugyot alang sa Pagtuon

Unsa man ang Pag-ula? Kanus-a ninyo nabati sa makusganong paagi ang gahum sa Pag-ula diha sa inyong kinabuhi?
Unsa man ang espirituhanong kamatayon? Ngano man nga kini “usa ka mas makalilisang nga kamatayon kaysa niana sa lawas”?
Kon “wala pa unta ang usa ka paagi sa paglingkawas nga gihatag” alang kang Adan ug sa iyang kaliwatan, unsa man ang mahimong sangputanan kanato? (Tan-awa usab sa 2 Nephi 9:6–9.)
Unsa man ang gibuhat sa Manluluwas aron mahimong posible ang atong paglingkawas gikan sa espirituhanong kamatayon? Unsa man ang angay natong buhaton aron mabuntog ang espirituhanong kamatayon? Unsaon man nato sa “paghangyo sa grasya ug kalooy sa Dios aron sa paglimpyo kanato gikan sa … kadautan”?
Unsa nga mga panalangin ang miabut sa inyong kinabuhi tungod sa inyong kasayuran nga si Jesukristo makahimo sa paglimpyo sa mga sayop nga atong nahimo sa atong mga kaugalingon ug sa uban? Sa unsang paagi nga kamo nakakita niining ingon nga mga panalangin diha sa kinabuhi sa uban?
Unsa man ang buot ipasabut sa gipabuhi? Sa unsang paagi kita karon gipabuhi sa espirituhanong paagi? (Tan-awa sa Moises 6:64–68.) Unsa nga mga panalangin ang moabut niadtong kinsa “gipabuhi pinaagi sa himaya sa celestial nga gingharian”? (Tan-awa usab sa D&P 88:28–29.)
Unsa man ang “katuyoan sa atong yutan-ong pagpakabuhi”?
Sa unsang paagi nga ang pag-ambit sa sakrament makatabang kanato sa pagbuntog sa espirituhanong kamatayon? Sa unsang paagi nga kita makahinumdom sa Manluluwas sa kanunay? Unsa man ang atong buhaton aron sa pagtahud sa sakrament ug sa pagpabilin niini nga sagrado?
Sa unsang paagi nga kita mapasalamatong modawat sa gasa sa Pag-ula diha sa atong mga kinabuhi?

Christ in Gethsemane — *Si Kristo sa Getsemani,* ni Harry Anderson. Pinaagi sa Iyang Pag-ula, si Jesukristo mitubos sa tanang katawhan gikan sa pisikal nga kamatayon. Iya usab nga gitubos ang mahinulsulon gikan sa sala.