Kapitulo 26: Pagbalaan sa Adlaw nga Igpapahulay: Aron Mahingpit ang Inyong Kalipay

Kapitulo 26

Pagbalaan sa Adlaw nga Igpapahulay: Aron Mahingpit ang Inyong Kalipay

Ang Adlaw nga Igpapahulay usa ka adlaw nga gigahin sa Dios alang sa atong pagsimba, sa pag-ampo, ug paghalad sa atong mga pag-ampo ngadto sa Labing Halangdon.

Gikan sa Kinabuhi ni Joseph F. Smith

Si Presidente Joseph F. Smith nakakita ug nagtudlo sa dakong responsibilidad sa mga Santos sa Ulahing mga Adlaw mahitungod sa pagbalaan sa Adlaw nga Igpapahulay. Iyang gitudloan ang mga Santos sa pagsimba sa Ginoo panahon sa Adlaw nga Igpapahulay ug gamiton ang panahon sa pagtudlo ug sa pagpanalangin sa ilang mga pamilya. Miingon siya: “Sa mga Adlaw nga Igpapahulay, kon ako ang pangutan-on, sa tungatunga nga mga oras sa serbisyo, sa wala pa ang serbisyo sa hapon ganahan kaayo kong makalingkod kauban sa akong pamilya diha sa akong balay ug makig-istorya kanila, ug modasig kanila, ug sa paghimo nga ako mas makaila pa gayud kanila. Gusto kaayo akong mogamit sa kahigayunan kutob sa akong mahimo nga mas sayon panahon sa Adlaw nga Igpapahulay alang niini nga katuyoan; nga mas ikaila nako ang akong mga anak, ikaistorya sila, ug ubanan sila sa pagbasa sa mga kasulatan, ug mohunahuna og mga butang nga lahi kay sa paglingaw-lingaw ug pagkomedya ug sa pagkatawa ug paghudyaka, ug sa mga butang nga sama niini.”¹

Gitudlo usab niya ang mga sangputanan sa pagpasipala sa adlaw nga gibalaan sa Ginoo. Sa Dominggo, niadtong petsa 12 sa Hunyo 1898, didto sa Tabernacle sa Siyudad sa Salt Lake siya miingon: “Sa akong pag-anhi niini nga miting nalabyan nako ang usa sa mga igsoon, ug miingon siya kanako nga samtang siya milabay sa estasyunan sa tren nakita niya ang bagang duso sa katawhan nga andam na kaayong mangadto sa mga dapit nga kalingawan…. Kon ang uban kanila nangangkon man nga sila mga Santos sa Ulahing mga Adlaw, nan ang dalan nga ilang gisubay karon nasupak sa pamalaod sa Dios, nasupak sa mga pakigsaad nga ilang gihimo diha sa mga tubig sa pagbunyag, ug nasupak sa mga pakigsaad nga gihimo didto sa labing sagradong mga dapit diin ang mga Santos sa Ulahing mga Adlaw gipasulod. Ilang gisupak ang Adlaw nga Igpapahulay, wala magtahud sa usa ka kasugoan sa Ginoo; gipakita lamang nila ang ilang pagkamasinupakon sa balaod, ug ilang gihimo ang dili makapahimuot sa panan-aw sa Dios, ug ang butang nga sa ngadto-ngadto moresulta sa ilang kasakit, kon dili man gani sa ilang apostasiya.”²

Mga Pagtulun-an ni Joseph F. Smith

Ang Ginoo migahin ug mibalaan og usa ka adlaw sulod sa pito ka mga adlaw.

Ang Dios mihimo o mipili sa Adlaw nga Igpapahulay alang sa usa ka adlaw nga pagpahulay, usa ka adlaw sa pagsimba, usa ka adlaw alang sa maayong mga buhat ug alang sa pagpaubos ug sa pagpenitensya, ug sa pagsimba ngadto sa Labawng Makagagahum diha sa espiritu ug sa kamatuoran.³

Adunay nagkadako nga kalagmitan sa tibuok kayutaan nga dili na mahatagan sa pagtagad ang Adlaw nga Igpapahulay. Ang kamandoan nga: “Hinumduman mo ang Adlaw nga Igpapahulay aron sa pagbalaan niini, “mao ra gihapon kini nga balaod karon sa dihang kini gihatag ngadto sa Israel sa Bukid sa Sinai [Exodo 20:8].⁴

Ang Adlaw nga Igpapahulay usa ka adlaw sa pagpahulay ug sa pagsimba, gipili ug gigahin pinaagi sa talagsaong kasugoan sa Ginoo ngadto sa Simbahan ni Jesukristo sa mga Santos sa Ulahing mga Adlaw, ug kinahanglang kita motahud ug mohimo niini nga balaan. Kinahanglan usab nga atong tudloan ang atong mga anak niini nga baruganan.⁵

Ang usa ka adlaw sulod sa pito gigahin ug gibalaan alang sa usa ka adlaw nga pagsimba, usa ka adlaw sa sagradong paghunahuna, sa pag-ampo ug pagpasalamat, ug sa pag-ambit sa Panihapon sa Ginoo sa paghinumdum Kaniya ug sa Iyang dili hitupngan nga pag-ula. Tudloan nato ang atong mga anak nga kinahanglan silang motuman sa Adlaw nga Igpapahulay sa paghimo niining balaan, ug usab, tungod kay sila nahigugma sa pagbuhat niini maingon man usab tungod kay ang Dios misugo niini. Human niini sila makalingaw- lingaw ug mopahulay, magpalahi ug makapahayahay, sa usa ka lehitimong paagi sa ubang mga adlaw…. Dili nato pasipad-an ang Adlaw nga Igpapahulay.⁶

Unsa man ang atong buhaton sa Adlaw nga Igpapahulay?

Hinumduman mo ang Adlaw nga Igpapahulay, aron sa pagbalaan niini. Simbahon ang Ginoo sa Adlaw nga Igpapahulay. Ayaw pagtrabaho. Ayaw adtoa ang walay pulos nga mga kalingawan panahon sa Adlaw nga Igpapahulay. Pahulay, ug linawa ang imong hunahuna pinaagi sa pag-ampo, pagtuon, ug sa paghunahuna diha sa mga baruganan sa kinabuhi ug kaluwasan. Kini mga lehitimo nga mga paghago sa Adlaw nga Igpapahulay….

Papaulia sila nga dala ang mga pagtulun-an ngadto sa ilang mga panimalay, ug ipahibalo kini ngadto sa mga sakop sa pamilya nga wala makatambong. Sultihi sila nga ang kapangulohan sa Simbahan ni Jesukristo sa mga Santos sa Ulahing mga Adlaw dili mouyon sa pagsupak sa Adlaw nga Igpapahulay.⁷

Ang pagtuman sa Adlaw nga Igpapahulay sa angay nga paagi mao ang yanong katungdanan sa matag Santos sa Ulahing mga Adlaw—ug kana naglakip sa batan-ong mga lalaki ug batan-ong mga babaye ug sa mga batang lalaki ug mga batang babaye. Maingon og kiwaw nga kinahanglan pa gayud nga balik-balikon kini nga kanunayng gibalik-balik nga kamatuoran. Apan makita nga adunay daghang tawo, ug usahay gani ang tibuok komunidad, nga dili magtagad niini nga katungdanan, ug busa sila nagkinahanglan niini nga pahimangno.

Unsa man ang gisugo nga atong buhaton sa Adlaw nga Igpapahulay? Ang mga pagpadayag sa Ginoo ngadto kang Propeta Joseph tin-aw kaayo mahitungod niini nga butang, ug kinahanglan nga mao kini ang modumala kanato, kay kini nagasubay gayud sa mga pagtulun-an sa Manluluwas. Ania ang pipila ka yanong mga kinahanglanon:

Ang Adlaw nga Igpapahulay gipili alang kaninyo sa pagpahulay gikan sa inyong mga kahago.

Ang Adlaw nga Igpapahulay usa ka espesyal nga adlaw alang kaninyo sa pagsimba, sa pag-ampo, ug sa pagpakita og kadasig ug mainitong pagbati sa inyong hugot nga pagtuo ug katungdanan— sa paghalad sa inyong mga pag-ampo ngadto sa Labaw nga Makagagahum.

Ang Adlaw nga Igpapahulay mao ang adlaw diin ikaw gikinahanglan nga mohalad sa inyong panahon ug pagtagad sa pagsimba sa Ginoo, diha man sa miting, sa panimalay, o bisan asa ka man—mao kana ang panghunahuna nga kinahanglang mosulod sa inyong hunahuna.

Ang Adlaw nga Igpapahulay mao ang adlaw nga, kauban sa inyong mga kaigsoonan, kamo gikinahanglang motambong sa mga miting sa mga Santos, mag-andam sa pag-ambit sa sakramento sa panihapon sa Ginoo; nga nakakumpisal nang daan sa inyong mga sala atubangan sa Ginoo ug sa inyong mga kaigsoonan, ug nakapasaylo sa inyong isig katawo sama sa inyong gilauman nga ang Ginoo mopasaylo kaninyo.

Sa Adlaw nga Igpapahulay kamo dili mohimo og uban pang mga butang kaysa pag-andam sa inyong pagkaon uban ang usa ka katuyoan sa kasingkasing, aron ang inyong pagpuasa mahimo nga hingpit, nga ang inyong kalipay mapuno. Mao kini ang gitawag sa Ginoo nga puasa ug pag-ampo [tan-awa sa D& 59:13–14].

Ang hinungdan alang niini nga katuyoan sa Adlaw nga Igpapahulay tin-aw usab nga gipahayag diha sa mga pinadayag. Ug nga kamo mahimo untang labaw nga moamping sa inyong kaugalingon nga walay buling gikan sa kalibutan, ug kamo moadto sa balay alampoanan ug mohalad sa inyong mga sakramento diha sa akong balaan nga adlaw [tan-awa sa D& 59:9]….

Ang Ginoo dili malipay sa mga tawo nga nasayud niining mga butanga ug wala mobuhat niini.

Ang mga tawo wala mopahulay gikan sa ilang paghago kon sila nagdaro, ug nananom ug nagkalot ug nanagbugwal. Wala sila mopahulay kon sila anaa ra nagpuyo sa ilang balay sa tibuok adlaw sa Dominggo, naghimo og lahi nga mga butang nga ila ra gihapong gipanghimo sa ubang mga adlaw.

Ang mga tawo wala magpakita og kadasig ug kainit sa ilang relihiyuso nga pagtuo ug sa katungdanan kon sila magdalidali sa Dominggo sa buntag … ngadto sa lawom nga walog, sa mga resort, ug pagbisita sa mga kahigalaan o sa mga dapit nga kalingawan kuyog sa ilang mga asawa ug mga anak. Wala nila ihalad ang ilang mga pag-ampo sa ingon niini nga pamaagi ngadto sa Labaw nga Makagagahum.

Dili pinaagi sa pagpangita sa makapahimuot ug kalingawan nga sila makahalad sa ilang panahon ug atensyon sa pagsimba sa Ginoo; ni nga sila sa ingon mahimong malipay uban sa diwa sa pagpasaylo ug pagsimba nga masinati sa pag-ambit sa balaan nga sakrament.

Ang mga batang lalaki ug mga batan-ong lalaki wala magpuasa uban ang usa ka katuyoan sa kasingkasing aron mahingpit ang ilang kalipay kon sila mogahin sa ilang Adlaw nga Igpapahulay sa pagsuroy-suroy libot sa balangay sa dapit nga naa ang mga ice cream o sa restawrant, nagduladula, o sa pagsakay-sakay og balsa, mamingwit, magpusil-pusil, o moapil og mga sports, excursions ug mga outing. Ang ingon niana nga buhat dili mao ang paagi aron sila malikay nga mabulingan sa kalibutan, apan hinoon usa kini ka paagi nga sila mahikawan sa buhong nga mga panaad sa Ginoo, maghatag kanila og kasubo imbis kalipay, kaluya ug kahasol imbis kalinaw nga moabut pinaagi sa binuhatang matarung.⁸

Atong maangkon, o kita makaangkon sa tanang mga kaayohan kon kita mohalad lamang sa tanang panahon sa Adlaw nga Igpapahulay sa pipila ka buluhaton, o sa pipila ka tinguha, o sa pipila ka pagtuon, nga makapalambo sa atong mga hunahuna ug mohimo kanato sa hingpit nga pagkahibalo sa atong mga katungdanan sa Simbahan, sa pamalaod sa Simbahan, sa mga kasugoan sa Dios, ug sa mga pagtulun-an sa ebanghelyo ni Jesukristo….

Ang akong pagtuo mao nga katungdanan sa mga Santos sa Ulahing mga Adlaw ang pagbalaan sa Adlaw nga Igpapahulay ug sa paghimo niini nga balaan, sama sa gisugo sa Ginoo nga atong buhaton. Lakaw ngadto sa balay alampoanan. Paminaw sa mga panudlo. Ihatag ang inyong pagpamatuod sa kamatuoran. Inom diha sa tuburan sa kahibalo ug sa mga panudlo, kay kini pagaablihan alang kanato gikan niadtong mga dinasig sa paghatag kanato og instruksyon. Kon kita mopauli na, pundoka ang pamilya. Manganta kita og pipila ka mga kanta. Mobasa kita og usa o duha ka kapitulo sa Biblia, o sa Basahon ni Mormon, o sa basahon nga Doktrina ug mga Pakigsaad. Hisgutan nato ang mga baruganan sa ebanghelyo nga naghisgut kabahin sa pagpausbaw sa eskwelahan sa balaang kahibalo, ug sa ingon niini nga paagi gamiton ang usa ka adlaw sa pito ka mga adlaw….

Nagtuo ako nga maayo alang kanato ang pag-atiman sa atong mga bata ilawom sa atong mga pako, buot ipasabot, pinakaminus kausa sa usa ka semana, ug tudloan sila sa pagtahud ug sa kamatinud- anon, ug sa balaan nga pagtahud alang sa unsay matarung ug balaanon, ug tudloan sila sa pagrespeto sa mga edaran ug sa mga kahuyang, ug sa pagkamabination ngadto sa mga estranghero nga anaa sa atong dapit…. Kinahanglan tudloan nato sila sa pagkamatinahuron. Kinahanglan nga matudloan nato ang atong mga batang lalaki nga mahimong tawo nga buotan, ug mga babaye nga mahimong mga halangdong babaye. Kon ako molitok og halangdong babaye o tawo nga buotan, gipasabut nako ang batang lalaki o batang babaye, o usa ka lalaki o babaye, kinsa nagsunod sa tinuod nga kaligdong, kaaghup, kalumo, kamapailubon, gugma ug kamabination ngadto sa mga anak sa tawo….

Daghan kaayong talagsaong mga butang nga atong mahimo sa Adlaw nga Igpapahulay nga makalingaw, makadasig, ug makatudlo sa atong mga anak diha sa panimalay, sa dili pa magpadayon ang pangdominggo nga tulumanon…. Ihatag kanila ang mga kalingawan sa tukma nga panahon, apan itugot nga sila matudloan sa mas maayong mga butang sa Adlaw nga Igpapahulay.⁹

Ang Sabado sa gabii mahimong gamiton nato sa maalamong paagi nga masugdan ang pagpangandam sa Adlaw nga Igpapahulay.

Katungdanan gayud nga ayohon og plano sa mga miyembro sa Simbahan ang ilang buluhaton aron wala silay rason nga supakon ang pagbalaan sa Adlaw nga Igpapahulay. Aron mahimo kini hatagi ang mga bata ug [panahon] sulod sa semana, og maayong higayon alang sa paglingaw-lingaw, aron ang Adlaw nga Igpapahulay magamit lamang sa espirituhanon nga kultura ug sa pagsimba. Ingon man usab ka mahinungdanon ang maayong pagplano sa atong mga kalingawan aron kini dili makabalda sa atong pagsimba.¹⁰

Gamiton nato sa maayong paagi ang Sabado sa gabii alang sa mahunahunaon nga panagsultihanay o sa puno sa ikatabang nga pagbasa isip pagpangandam sa Adlaw nga Igpapahulay.¹¹

Ang usa ka maayo og moderno … nga kasugoan mabasa nga daw ingon niini: Ayaw pagpalabi sa trabaho ug kahasol sa Sabado nga mahikawan na hinoon ang Adlaw nga Igpapahulay alang sa paghalad og mga pag-ampo ug sa pagsimba nga usa sa mga tulumanon niana nga adlaw sa pagpahulay.

Sa panimalay, ang Sabado mao ang adlaw alang sa pagpanglimpyo sa balay, dugang nga pagpangluto, pagpang-ayo ug sa tanang ayuhunon nga dili angay buhaton sa Adlaw nga Igpapahulay. Sa negosyo, ang Sabado mao ang adlaw sa pagkompleto sa mga buluhaton, sa pagtiwas sa tanang wala mahuman nianang semanaha.

Ang mga sangputanan sa atong modernong pagtagad sa katapusan nga adlaw sa semana kasagaran tataw nga mapuno na kaayo sa katapul ug kawalay pagpanumbaling sa atong mga pagbati ug sa kakulang na sa enerhiya sa sobrang kaluya nga dili na mabatyagan ang diwa sa pagsimba. Walay lapoy kaayo nga tawo, tungod sa sobrang trabaho sa sayong buntag sa Sabado ug hangtud sa gabii, ang makasimba og tarung sa Dios diha sa espiritu ug sa kamatuoran.¹²

Ang mga tawo nga naanad sa pagpasipala sa Adlaw nga Igpapahulay kaniya mawala ang Espiritu sa Ginoo.

Ikaw kinahanglan nga motahud sa Adlaw nga Igpapahulay ug mohimo niini nga balaan. Gihimo ba nato kini? Kinahanglan ba gayud kini nga buhaton? Kinahanglan gayud nato kini nga buhaton aron kita mahiangay sa balaod sa Dios ug sa mga kasugoan; ug kon kita makalapas man niana nga balaod o kasugoan nakasala kita pinaagi sa paglapas sa balaod sa Dios. Ug unsa man unya ang sangputanan, kon ato kining ipadayon? Ang atong mga anak mosunod sa atong mga tunob; dili nila respetohan ang sugo sa Dios nga ibalaan ang usa sa pito ka adlaw; ug mawala kanila ang espiritu sa kamasulundon sa mga balaod sa Dios ug sa iyang mga gikinahanglan, sama ra nga ang amahan mawad-an niini kon padayon siya nga mosupak sa mga kasugoan.¹³

Ang mga tawo nga kanunayng mopasipala sa Adlawng Igpapahulay dili na makatagamtan sa pagkahisakup, ug ang mga miyembro sa Simbahan nga wala na mosimba ug moambit sa Sakrament ug wala na maghinumdum sa pagbalaan sa Adlaw nga Igpapahulay, mamahimong huyang sa ilang pagtuo ug masakiton sa pagkaespirituhanon, ug mawala kanila ang Espiritu ug tabang sa Dios, ug sa katapusan mawad-an sa ilang mga kahigayunan kalabut sa sumbanan sa Simbahan ug sa ilang kahimayaan uban sa mga masulundon ug sa mga matinud-anon.¹⁴

Ang Ginoo miingon, “Hinumduman mo ang Adlaw nga Igpapahulay, aron sa pagbalaan niini.” Usa kini ka balaod sa Dios, dili lamang niini nga mga katawhan, apan ngadto sa tanang katawhan. Ang miyembro sa Simbahan nga dili motahud sa Adlaw nga Igpapahulay ug mobalaan niini anaa sa kalapasan; padayon nga wala kaniya ang pulong sa kamatuoran; sa pagkatinuod dili siya usa ka disipulo ni Kristo; dili siya masayud sa kamatuoran, ug ang kamatuoran dili makahatag kaniya og kagawasan hangtud nga siya masayud niini ug mosunod niini.¹⁵

Ang mga sinehan ug nagkalainlaing kalingawang pangpubliko gitumong na sa Adlawng Igpapahulay sukwahi sa mga pinadayag sa Ginoo, ug nagmatuod kini sa usa ka lig-on nga bahin sa pagguba sa pagtuo niadtong kinsa misalmot sa maong mga kalihokan. Ang mga ginikanan sa kabatan-onan sa Zion kinahanglan nga mobantay sa ilang mga anak batok niini ug uban pang kadaotan, kay sila ang manubag kon ang ilang mga anak masalaag tungod sa ilang pagpasagad.¹⁶

Susama ra ka impotante ang katungdanan sa mga Santos sa Ulahing mga Adlaw sa pagbalaan sa Adlaw nga Igpapahulay, ug sa pagbuhat sa mga katungdanan nga gisangon diha sa ilang mga kamot sa Adlaw nga Igpapahulay, sama sa ilang katungdanan nga magmatinuoron sa ilang mga silingan ug ingon man sa pagpuyo og matarung nga kinabuhi. … Katungdanan usab sa mga ginikanan ang pagpakita og ehemplo alang sa ilang mga anak sa pagbalaan sa Adlaw nga Igpapahulay, sa tibuok pamilya nga pagkamainampoon, ug sa pagbuhat sa tanang katungdanan isip Santos sa Ulahing mga Adlaw. Ang amahan ug inahan nga wala magtagad sa pagtudlo sa ilang mga anak ug sa pag-aghat kanila sa pagbuhat sa ilang mga katungdanan, magmahay ra unya sa kaugalingon nilang sala.¹⁷

Kadtong mobalaan sa Adlaw nga Igpapahulay makatagamtam sa talagsaon nga mga panalangin nga temporal ug espiritwal.

Ang Dominggo usa ka adlaw sa pahulay, pagpalahi gikan sa ordinaryo nga buluhaton sa semana, apan mas labaw pa niana. Usa kini ka adlaw sa pagsimba, usa ka adlaw diin ang espirituhanon nga kinabuhi sa tawo madugangan. Ang adlaw sa katapul, ang adlaw sa pisikal nga pagpalig-on sa kasagaran lahi ra kaayo kay sa gipili sa Dios nga adlawng ipahulay. Ang sobrang kalapoy sa panglawas ug katapulan wala mauyon sa diwa sa pagsimba. Ang tukma nga pagbuhat sa mga katungdanan ug mga pag-ampo sa Adlaw nga Igpapahulay mahimo, pinaagi sa paghimong lahi niini ug sa espirituhanong kinabuhi, mohimo sa pinakamaayo nga pagpahulay nga matagamtam sa katawhan panahon sa Adlaw nga Igpapahulay.¹⁸

Tinud-anay ang akong tinguha … nga kita unta malig-on sa atong pagtuo, ug kita mahimong mas maayong mga Santos sa Ulahing mga Adlaw kay sa unsa kita kaniadto. Usa kini sa pinakaimportante nga butang diha sa atong mga miting sa Adlaw nga Igpapahulay…. Naaghat ako sa pagtuo nga nahulog kita sa usa ka kinaiya nga moadto sa mga miting bisan walay espesyal nga pagpenitensya sa kasingkasing. Sakit hunahunaon kining mga pulonga, ug tingali dili kini alang kanatong tanan, apan kombinsido ako nga daghan ang mitambong sa miting nga walay kadasig, walay espesyal nga katuyoan. Sa akong pagtuo kinahanglan kitang mosimba aron ipakita sa atubangan sa Ginoo nga atong gihinumduman ang Adlaw nga Igpapahulay ug kita naglaum nga makakat-on sa Iyang mga pamaagi….

Ako nagtuo nga kinahanglang mapuno kita sa panghunahuna nga adunay bahin niini nga buluhaton [nga] nagkinahanglan sa matag usa ka tawo. Alang kini sa matag usa ang pagka-amgo nga kon unsa ang iyang gitanom mao sab ang iyang anihon. Busa, ang matag usa kinahanglang maghago uban sa determinasyon ug kon kita magkapundok ang matag usa kinahanglang adunay mainampoon nga espiritu ug siya moadto, dili lamang alang sa iyang kaugalingon, apan alang sa tibuok simbahan. Kon mahimo kini, walay mouli gikan sa simbahan nga dili mabatyagan ang espiritu sa Dios.¹⁹

Karon, unsa man ang saad alang sa mga Santos nga mobalaan sa Adlaw nga Igpapahulay? Ang Ginoo namahayag nga kon ila kining buhaton uban ang kamalipayon sa kasingkasing ug panagway, ang kahingpitan sa kalibutan mailaha: “ang mga kahayopan sa umahan ug ang mga kalanggaman sa kahanginan, ug kana nga mokatkat sa mga kahoy ug molakaw sa yuta. Oo, ug ang hilba, ug ang maayo nga mga butang nga gikan sa yuta, gani alang sa pagkaon o alang sa panaput, o alang sa mga balay, o alang sa mga kamalig, o alang sa mga prutasan, o alang sa mga tanaman, o alang sa mga ubasan. [D& 59:16–17.]

Kining tanan gihimo alang sa kaayohan ug sa paggamit sa tawo sa pagpahimuot sa mata ug sa pagmaya sa kasingkasing, sa paglig-on sa lawas ug sa pagbuhi sa kalag. Ang tanan gisaaran kinsa kadtong mosunod sa iyang mga kasugoan, ug ang usa nga importante niini nga mga kasugoan, mao ang tukma nga pagbalaan sa Adlaw nga Igpapahulay….

Magdula kita ug maglingaw-lingaw sa unsay gusto sa atong kasingkasing sa uban nga adlaw, apan sa Adlawng Igpapahulay mopahulay kita, mosimba, moadto sa balay alampoanan, moambit sa sakrament, mangaon uban ang usa ka katuyoan sa kasingkasing, ug mohatag og mga paghalad sa atong mga pag-ampo sa Dios, nga ang kahingpitan sa yuta atong maangkon, nga kita adunay kalinaw sa kalibutan ug kinabuhi nga dayon sa kalibutan nga umaabut.²⁰

Mga Sugyot alang sa Pagtuon

Sa unsang mga katuyoan nga ang Ginoo “migahin ug mibalaan” sa Adlaw nga Igpapahulay? Unsa ang mga panalangin sa pagkaadunay adlaw nga pahulay ug pagsimba?
Unsa ang buot ipasabut sa pagpahulay gikan sa atong mga kahago panahon sa Adlaw nga Igpapahulay? Unsa ang mga “angay nga hagoan alang sa Adlaw nga Igpapahulay”? Unsaon man nato sa pagtudlo ang mga sakop sa atong pamilya sa pagtahud sa Adlawng Igpapahulay?
Unsa ang buot ipasabut sa “pagkawalay buling gikan sa kalibutan”? Sa unsang paagi nga ang pagbalaan sa Adlaw nga Igpapahulay makatabang nato sa paghimo niini?
Sa unsang paagi nga ang kalipay ug pagmaya nahimong kabahin sa pagbalaan sa Adlaw nga Igpapahulay? (Tan-awa usab sa D& 59:13–14.) Sa unsang paagi nga ang pagsupak sa Adlaw nga Igpapahulay modala sa pagkadili malipayon, pagkawala sa Espiritu ug sa apostasiya?
Unsa man ang mga responsibilidad sa atong pamilya sa Adlaw nga Igpapahulay? Sa Adlaw nga Igpapahulay, unsaon man nato sa pagtudlo ang atong mga anak sa “balaan nga pagtahud alang sa unsay matarung ug balaanon”?
Sa unsang paagi nga ang atong mga kalihokan sa Sabado makatabang o makadaot sa atong pagsimba sa Adlaw nga Igpapahulay?
Unsa man ang atong responsibilidad kon kita moadto sa mga miting sa Dominggo? Unsang mga panalangin ang atong madawat kon anaa kanato ang tinuod nga diwa sa pagsimba panahon sa atong mga miting?
Unsang espirituhanon nga mga panalangin ang atong matagamtam kon ibalaan nato ang Adlaw nga Igpapahulay? Unsang temporal nga mga panalangin ang gisaad kanato? (Tan-awa usab sa D& 59:9–23.)

Salt Lake 20th Ward choir — Ang choir sa Salt Lake 20th Ward sayo sa mga 1900. Si Presidente Joseph F. Smith miisip sa usa ka musika nga gikanta sa “choir sa mga Santos” isip usa ka “mabination nga pagdayeg sa Dios” nga importante alang sa atong pagsimba sa Adlawng Igpapahulay (Gospel Doctrine, 259).