Kapitulo 45: Ang Ebanghelyo Magdala og Kalinaw sa Kalibutan sa mga Panahon sa Kasamok

Kapitulo 45

Ang Ebanghelyo Magdala og Kalinaw sa Kalibutan sa mga Panahon sa Kasamok

Ang ebanghelyo ni Jesukristo magdala og kalinaw sa kalibutan atol sa mga panahon sa kasamok.

Gikan sa Kinabuhi ni Joseph F. Smith

Sa mga tuig sa hapit na ang iyang kamatayon, si Presidente Joseph F. Smith sa kanunay nagbangutan sa mga kasub-anan nga may kalabutan sa Unang Gubat sa Kalibutan. Daghang miyembro sa Simbahan ang naapil sa gubat sa nagkaatbang nga mga bahin, ug gatusan ang nawad-an sa ilang mga kinabuhi. Pipila sa kaugalingong anak nga lalaki ni Presidente Smith miserbisyo sa armadong kusog ug ang usa nasamdan makaduha diha sa away.

Sa usa ka mensahe sa Pasko sa mga Santos atol niining panahona, ang Unang Kapangulohan miingon: “Samtang nagmaya sa pagkatawo sa Dili Ikatandi nga Usa, ang kahayag sa atong kalipay nalandungan uban sa mga panganod sa gubat nga nakapangitngit sa mga kalangitan sa Uropa, ug ang atong mga awit ug mga pagpasidungog sa hingpit nga kalipay ug sa panagdait gikanta nga masulub-on nga walay pagkaangay tungod sa mga dahunog sa mga kanyon ug ang mga agulo sa nasamdan ug himatyon, milanog gikan sa layo, mihamok sa atong mga kalag samtang ang makahadlok nga mga balita miabut nga nagdahunog sa kadagatan. Mga nasud mialsa batok sa mga nasud, mga igsoon batok sa mga igsoon, ‘mga Kristiyano batok sa mga Kristiyano,’ ang matag usa nag-ampo og panabang sa Dios sa gugma diha sa ilang dugoon nga panagsangka ug nangangkon og pakigdait uban sa Prinsipe sa kalinaw! Pagkamakahadlok gayud nga talan-awon ang ingon nga gipakita atubangan sa mga panon, sa mga anghel, usa ka panon kinsa nagkanta sa imortal nga awit sa ‘panagdait sa mga tawo’ diha sa pagkatawo sa bata sa Bethlehem!”¹

Si Presidente Smith buhi pa sa pagkadungog sa mga balita sa pagpirma sa kasabutan nga nagtapus sa mga panagbangi ug sa kalaglagan sa kinabuhi ug kabtangan. Ang kasabutan gipirmahan niadtong ika-11 sa Nobyembre 1918, walo ka adlaw lamang sa wala pa ang iyang kamatayon.

Gitudloan niya ang mga Santos atol niining higayuna nga ang tinuod nga kalinaw moabut lamang pinaagi sa pagdawat ug pagsunod sa ebanghelyo ni Jesukristo. Si Joseph Fielding Smith, kinsa sa kaulahian nahimong Presidente sa Simbahan, misulti kabahin sa iyang amahan: “Ang iyang espiritu malumo ug mapuanguron. Usa ka labing maloloy-on nga kalag, ang usa kinsa nakigduyog uban sa nag-antus, kinsa labaw pa nga andam sa pagtabang sa walay ikasarang aron pagpas-an sa iyang palasanon, ug sa dinaugdaog aron siya makabangon sa kalisud, nga dili makaplagan tali sa tanang miyembro sa Simbahan. Usa siya ka tigpasiugda sa kalinaw, usa ka mahigugmaon sa kalinaw.”²

Mga Pagtulun-an ni Joseph F. Smith

Ang ebanghelyo lamang ni Jesukristo ang makahimo sa pagdala og kalinaw sa kalibutan.

May usa lamang ka butang ang makadala og kalinaw sa kalibutan. Kini mao ang pagsagup sa ebanghelyo ni Jesukristo, husto nga gisabut, gisunod ug managsama nga gibuhat sa mga tigmando ug sa mga tawo. Gisangyaw kini pinaagi sa gahum ngadto sa tanang mga kanasuran, mga kaliwatan, mga pinulongan, ug katawhan sa kalibutan, sa mga Santos sa Ulahing mga Adlaw, ug ang adlaw dili madugay nga kining mensahe sa kaluwasan motuhop sa kinahiladman sa mga kasingkasing sa tanang mga tawo, kinsa diha sa kinasingkasing ug pagkamatinguhaon, kon moabut ang higayon, dili lamang sigurado nga mopahayag sa ilang paghukom batok sa bakak nga Kristiyanismo, kondili batok sa gubat ug sa mga tigpasiugda sa gubat isip mga krimen batok sa kaliwat sa katawhan. Sulod sa daghang mga tuig gituohan kini nga ang kalinaw moabut lamang pinaagi sa pagpangandam sa gubat; ang panagbangi karon [Unang Gubat sa Kalibutan] nagpamatuod nga ang kalinaw moabut lamang pinaagi sa pagpangandam alang sa kalinaw, pinaagi sa pagbansay sa mga tawo sa pagkamatarung ug kaangayan, ug sa pagpili ug mga tigmando kinsa nagrespeto sa matarung nga kabubut-on sa mga tawo.³

Gusto kita og kalinaw sa kalibutan. Gusto kita og gugma ug panagdait nga molungtad sa tibuok kayutaan, ug tali sa tanang katawhan sa kalibutan; apan dili gayud modangat sa kalibutan kana nga espiritu sa kalinaw ug gugma nga kinahanglan nga maanaa, hangtud nga ang katawhan modawat sa kamatuoran sa Dios ug sa mensashe sa Dios ngadto kanila, ug moila sa iyang gahum ug awtoridad diin balaanon, ug dili gayud lamang makaplagan diha sa kaalam sa mga tawo.⁴

Ang Ginoo nahigugma og kalinaw. Ang doktrina sa Manluluwas ngadto sa mga tawo mao ang “Kalinaw diha sa yuta, panagdait sa mga tawo,” gugma, tiunay nga gugma. Ang pinakamahinungdanon sa tanang mga sugo nga sukad gihatag ngadto sa mga anak sa mga tawo mao: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan. Mao kini ang una ug dakong sugo. Ug ang ikaduha susama niini, Higugmaa ang imong silingan sama sa imong kaugalingon. Niining duha ka mga sugo nagasukad ang tibuok kasugoan ug ang mga propeta.” [Mateo 22:37–40.] Kon taliwala sa mga nasud sa yuta anaa unta kining espiritu sa gugma, kining baruganan sa ebanghelyo ni Jesukristo; kon kining mahimayaong pahimangno kinasingkasing pa unta nga gibati sa mga tigmando niadto nga mga nasud, wala gayud untay bisan unsa nga gubat, wala gayud untay bisan unsang pagpaagas sa dugo, wala gayud untay kalaglagan ug pagkagun-ob ug dautan nga mga kahimtang nga anaa karon. Tungod kini kay ang katawhan sa kalibutan walay ebanghelyo. Tungod kini kay sila wala mosunod sa kamatuoran. Tungod kay wala kanila si Kristo, ug mao nga gipasagdan ra sila sa ilang kaugalingon, ug ang mga resulta nga atong nakita mao ang mga resulta sa ilang kaugalingong dautang lihok ug sa ilang kaugalingong dautan nga mga binuhatan.⁵

Adunay usa lamang ka gahum, ug usa lamang, nga makapugong sa gubat tali sa mga nasud sa yuta, ug kana mao ang tinuod nga relihiyon nga putli ug dili bulingon sa atubangan sa Dios nga Amahan. Walay lain nga makahimo niini…. Adunay usa ra gayud ka sulbad nga makapugong sa mga tawo sa pagpakiggubat, kon bation nila nga andam sa paghimo niini, ug kana mao ang Espiritu sa Dios, nga nagdasig sa paghigugma, ug dili kayugot, nga modala sa tanang mga kamatuoran, ug dili ngadto sa kasaypanan, diin mohilig sa mga anak sa Dios sa paghatag og pagtahud ngadto kaniya ug sa iyang mga balaod ug sa pagtamud niini isip labaw sa tanang mga butang sa kalibutan.

Ang Ginoo misulti kanato nga … mga gubat moabut. Wala kita maignorante nga kini moabut, ug nga kini malagmit nga mobuto diha sa mga nasud sa yuta sa bisan unsang taknaa. Naghunahuna na kita alang sa katumanan sa mga pulong sa Ginoo nga kini moabut. Ngano? Tungod kay gusto ba kini sa Ginoo? Dili; dili gayud sa bisan unsa nga paagi. Tungod ba kay gitakda na kining daan sa Ginoo, o giplano na kini, sa bisan unsa nga kahimtang? Dili, dili gayud. Ngano? Tungod sa katarungan niini nga ang mga tawo wala maminaw sa Ginoong Dios, ug nasayud na siyang daan sa mga resulta nga mosunod, tungod sa mga tawo, ug tungod sa mga nasud sa yuta; ug mao nga nakahimo siya sa pagtag-an kon unsay mahitabo kanila, ug modangat diha kanila agi og sangputanan sa ilang kaugalingong binuhatan, ug dili tungod kay pagbuot niya kini ngadto kanila, kondili sila nag-antus ug nag-ani sa mga resulta sa ilang kaugalingong mga binuhatan.

… “Kalinaw sa yuta, ug panagdait sa mga tawo,” mao ang atong sanglitanan. Mao kana ang atong baruganan. Mao kana ang baruganan sa ebanghelyo ni Jesukristo. Ug samtang naghunahuna ako nga sayop kini, hilabihan ka dautan nga pagkasayop, sa pagpugos og gubat diha sa bisan kinsa nga nasud, o diha sa bisan kinsa nga mga tawo, nagtuo ako nga matarung ug angayan kini alang sa matag katawhan sa pagpanalipud sa ilang kaugalingon nga mga kinabuhi, ug sa ilang kaugalingon nga mga kagawasan, ug sa ilang kaugalingon nga mga panimalay, uban sa katapusang tulo sa ilang dugo. Nagtuo ako nga husto kini, ug nagtuo ako nga ang Ginoo mopaluyo sa bisan kinsa nga katawhan sa pagpanalipud sa ilang kaugalingong kagawasan aron sa pagsimba sa Dios sumala sa pagmando sa ilang tanlag, bisan kinsa nga katawhan nga nagsulay sa pagpatunhay sa ilang mga asawa ug ilang mga anak gikan sa mga kagusbat sa gubat. Apan dili kita gusto nga modangat ngadto sa panginahanglan nga manalipud sa atong kaugalingon.⁶

Kon gitawag sa pagserbisyo, batoni ang inyong kaugalingon nga putli ug walay buling gikan sa kalibutan.

Akong gipahimangnoan ang akong mga higala … sa pagpatunhay ibabaw sa tanang mga butang ang espiritu sa pagkatawo, sa gugma, ug sa paghimo og kalinaw, nga bisan tuod og mahimo sila nga tawgon sa pagpakig-away dili sila moguba, moyatak o molaglag sa mga baruganan diin atong gituohan, diin atong gisulayan sa pagsilsil, ug diin gipahimangnoan kita sa pagpatunhay sa: kalinaw ug panagdait ngadto sa tanang katawhan, bisan tuod kon mahimo nga dad-on kita sa pagpakigbatok sa kaaway. Gusto ko nga mosulti ngadto sa mga Santos sa Ulahing mga Adlaw kinsa mahimong magpasakop, ug kansang mga pagserbisyo mahimo nga kinahanglanon sa nasud, nga kon mahimo sila nga mga sundalo sa Estado ug sa Nasud nga dili sila makalimot nga sila usab mga sundalo sa Krus, nga sila mga ministro sa kinabuhi ug dili sa kamatayon; ug kon sila moasdang, mahimo sila nga moadto diha sa espiritu sa pagpanalipud sa mga kagawasan sa katawhan kaysa katuyoan sa paglaglag sa kaaway.⁷

Kon ang atong batan-ong mga lalaki … gitawag sa pagkasundalo … , naglaum ug nag-ampo ako nga dad-on nila uban kanila ang Espiritu sa Dios, dili ang espiritu sa pagpaagas sa dugo, sa pagpanapaw, sa pagkadautan, kondili ang espiritu sa pagkamatarung, ang espiritu nga modala sa pagbuhat og maayo, aron sa pagtukod, sa pagpahimulos sa kalibutan, ug dili sa paglaglag ug sa pagpaagas sa dugo.

Hinumdumi ang tudling sa kasulatan … diha sa Basahon ni Mormon, kalabut sa putli nga batan-ong mga lalaki nga mipanghimaraut sa gubat ug sa pagpaagas sa dugo, nagpakabuhi nga putli ug walay sala, luwas gikan sa makamansa nga hunahuna sa pakig-away, sa kasuko, o pagkadautan sa ilang mga kasingkasing; apan kon ang panginahanglan gikinahanglan, ug gitawag sila aron mogawas sa pagpanalipud sa ilang mga kinabuhi ug mga kinabuhi sa ilang mga amahan ug mga inahan, ug sa ilang mga panimalay, sila miadto—dili sa paglaglag kondili sa pagpanalipud, dili sa pagpaagas sa dugo kondili hinoon sa pagluwas sa dugo sa walay sala ug sa dili makadaut, ug sa mga mahigugmaon sa kalinaw nga mga katawhan [tan-awa sa Alma 56:45–48].

Kadto ba nga mga lalaki kinsa mogawas gikan sa … ang Simbahan ni Jesukristo sa mga Santos sa Ulahing mga Adlaw makalimot sa ilang mga pag-ampo? Makalimot ba sila sa Dios? Makalimot ba sila sa mga pagtulun-an nga ilang nadawat gikan sa ilang mga ginikanan sa panimalay? Makalimot ba sila sa mga baruganan sa ebanghelyo ni Jesukristo ug sa mga pakigsaad nga ilang gihimo didto sa mga tubig sa pagbunyag, ug sa sagrado nga mga dapit? O moadto ba sila isip mga tawo sa tanang salabutan— putli nga mga tawo, dungganan nga mga tawo, matinuoron nga mga tawo, hiyasnon nga mga tawo, mga tawo sa Dios? Mao kana ang akong gilauman.

Gusto nakong makita ang bukton sa Dios nga gipakita diha sa mga binuhatan sa mga tawo nga nanggawas sa mga kapunongan sa Simbahan ni Jesukristo … aron pagtabang sa pagpanalipud sa mga baruganan sa kalingkawasan ug matarung nga pangagamhanan alang sa tawhanong pamilya. Gusto ko nga makita sila nga hilabihan ka madasigon nga sila makahimo sa pagpakigsulti uban sa Ginoo, diha sa ilang mga kampo, ug sa ilang tago nga mga dapit, ug nga taliwala sa gubat sila makaingon: “Amahan ang akong kinabuhi ug ang akong espiritu anaa sa imong kamot!”

Gusto nakong makita sa batan-ong mga lalaki nga mobiya dinhi niini nga katuyoan, molakaw nga mobati sama sa gihimo sa atong mga misyonaryo sa diha nga gipadala sa kalibutan, nagdala uban kanila sa espiritu sa usa ka buotan nga inahan sa diha nga nahimulag siya sa iyang anak nga lalaki, sa buntag sa iyang pagbiya alang sa iyang pagmisyon. Mogakus siya kaniya uban sa tibuok nga gugma sa inahan diha sa iyang kalag!

… Kon ang atong anak nga mga lalaki ipadala ngadto sa kalibutan sa niini nga paagi, dala uban kanila ang espiritu sa ebanghelyo ug ang pamatasan sa tinuod nga mga Santos sa Ulahing mga Adlaw, bisan unsa pa’y mahitabo sa ilang kinabuhi, makalahutay sila uban sa pinakamaayo. Makahimo sila sa paglahutay kutob sa posibling malahutay ni bisan kinsa sa kakapoy o sa pagantus, kon gikinahanglan, ug kon sila pagasulayan sa hilabihan makabarug sila niini! Tungod kay sila walay kahadlok sa kamatayon! Gawasnon sila gikan sa kahadlok sa mga pagadangatan sa ilang kaugalingong mga kinabuhi. Dili na sila kinahanglan nga mahadlok sa kamatayon, tungod kay nabuhat na nila ang ilang trabaho; nabatonan na nila ang hugot nga pagtuo, putli ang ilang kasingkasing, ug takus sila nga makigkita sa Dios!⁸

Adunay daghang mga dautan nga mosunod isip resulta sa gipundok nga sinangkapang mga sundalo ug miasdang sa gubat nga labaw pa ka grabe kay sa dungganang kamatayon nga mahimong moabut sa panagsangka sa gubat. Dili kaayo igsapayan kon ang atong batan-ong mga lalaki gitawag, o bisan asa sila mahimong moadto, apan dako kini og kalainan sa ilang mga ginikanan, mga higala, ug mga kauban sa kamatuoran, ug labaw sa tanan sa ilang kaugalingon, kon unsa ang ilang kahimtang. Gitudloan sila sa tibuok nilang kinabuhi isip mga miyembro sa Simbahan aron sa pagpabilin sa ilang kaugalingon nga putli ug walay buling gikan sa mga sala sa kalibutan, sa pagrespeto sa mga katungod sa uban, sa pagkamasulundon sa matarung nga mga baruganan, sa paghinumdom nga ang hiyas mao ang usa sa pinakamahinungdanon nga mga gasa gikan sa Dios. Labaw pa niana, nga kinahanglan nga morespeto sila sa hiyas sa uban ug mas maayo pa nga mamatay og kaliboan ka mga higayon kaysa bulingan ang ilang kaugalingon pinaagi sa paghimo og makamatay nga sala. Gusto namo nga molakaw sila nga limpyo, sa hunahuna ug buhat, uban sa hugot nga pagtuo sa mga baruganan sa ebanghelyo ug sa matubsanon nga grasya sa atong Ginoo ug Manluluwas. Ipahinumdom namo kanila nga pinaagi lamang sa pagpuyo nga limpyo ug matinud-anon nga mga kinabuhi nga sila makalaum nga makabaton og kaluwasan nga gisaad pinaagi sa pagpaagas sa dugo sa atong Manunubos.⁹

Nanglimbasog kita sa pagpuyo nga malinawon uban sa tanang mga tawo.

Among gipahimangnoan ang mga Santos sa Ulahing mga Adlaw sa pagsunod sa ilang relihiyon; sa paghinumdom sa ilang mga pakigsaad nga gihimo diha sa mga tubig sa bunyag; sa pagtahud sa Ginoo ug sa paghupot sa Iyang mga sugo; nga dili mahimong mabuntog sa mga kabuang sa kalibutan, kondili magtinguha sa paggiya sa Balaang Espiritu, [ug] magpuyo sa kalinaw uban sa tanang mga tawo.¹⁰

Ang bag-ong tuig ug ang umaabut nga katuigan nagdapit sa mga lumulupyo sa tanang kayutaan nga maghiusa sa pagtukod og kalinaw ug sa katumanan sa tibuok kalibutan nga panag-inigsoonay. Ang panagbangi, pagdinumtanay, pagkahakog, pagkamahilayon mao ang mga kadautan nga kinahanglan pagawad-on gikan sa indibidwal nga kinabuhi. Walay usa nga ubos kaayo, o dili takus nga tabangan. Himoa nga ang matag tawo mahigugma sa iyang silingan sama sa iyang kaugalingon ug ang mga kalisdanan karon molabay ra, ang umaabut nga mga kahadlok malikayan, ug ang “matag tawo sa matag dapit makahimamat og usa ka igsoon ug usa ka higala.”

Usa ka dungganan nga ehemplo sa matarung nga pagpuyo ug halangdon nga pakigdait ang gihatag sa kalibutan baynte ka gatos ka tuig na ang milabay diha ni Jesukristo. Ang Iyang mensahe mao ang kalinaw ug pagkigdait. Ang Iyang balaod gitukod diha sa kaangayan nga maalamon nga gibansay ug ang pagkamatarung may kabuot nga gigamit. Ang kahayag mao ang Iyang sumbanan ug kamatuoran mao ang Iyang tinuhoan.¹¹

Bisan pa man sa “dili tawhanon nga pagtagad sa tawo ngadto sa tawo,” hilabihan ka makalilisang nga gipakita diha sa pagpakigbisog tali sa mga nasud nga naghulga karon, uban sa pangatarungan atong giila ang mga hinungdan sa kamaya ug pagpasalamat karon, ug motan-aw lahus sa mga panganud sa makalilisang nga gubat ngadto sa siguro ug piho nga katumanan sa mga panaad sa malungtaron nga kalinaw sa nagkaduol nga pag-abut sa atong Ginoo ug Hari.¹²

Ako … ligdong nga mopaluyo niini nga baruganan, nga ang kamatuoran anaa sa ebanghelyo ni Jesukristo, nga ang gahum sa katubsanan, ang gahum sa kalinaw, ang gahum alang sa pakigdait, gugma, gugma nga putli ug pagpasaylo, ug ang gahum sa pagpakigdait uban sa Dios, magsunod sa ebanghelyo ni Jesukristo ug sa pagkamasulundon niini diha sa bahin sa sa katawhan. Mao nga dawaton nako, ug dili lamang dawaton kondili angkonon, ug walay lain nga labaw pa dinhi sa yuta, ni sa langit, kaysa kamatuoran sa ebanghelyo sa Dios nga iyang giplano ug gipahiuli alang sa kaluwasan ug sa katubsanan sa kalibutan. Ug mao nga pinaagi sa ebanghelyo kana nga kalinaw moabut sa mga anak sa tawo, ug dili kini moabut sa kalibutan sa bisan unsa nga laing paagi.¹³

Mga Sugyot alang sa Pagtuon

Ngano man nga ang ebanghelyo ni Jesukristo mao lamang ang butang nga mahimong makadala og kalinaw sa kalibutan? Unsay atong mabuhat aron makatabang sa pagdala og kalinaw sa kalibutan?
Asa magsugod ang kalinaw? Sa unsang paagi nga ang pagsunod sa duha ka mahinungdanon nga mga sugo modala og kalinaw sa panimalay ug sa gawas sa panimalay?
Sa unsang paagi kadtong kinsa moserbisyo sa militar mahimo nga “mga ministro sa kinabuhi ug dili sa kamatayon”?
Sa unsang paagi gidala sa mga miyembro uban kanila ngadto sa serbisyo militar “ang espiritu sa ebanghelyo ug ang pamatasan sa tinuod nga mga Santos sa Ulahing mga Adlaw”?
Kon ang mga miyembro gitawag sa pagserbisyo sa militar, unsa nga mga pagtuo ug mga kinaiya ang makatabang kanila nga dili mahadlok sa kamatayon?
Unsay mabuhat sa matag usa kanato aron makahimo og labaw pa ka hingpit nga “pagpuyo sa kalinaw uban sa tanang mga tawo”?
Unsay gitudlo kanato sa ehemplo sa Manluluwas mahitungod sa pagpuyo uban sa kalinaw ug pakigdait?

Two Thousand Stripling Warriors — *Duha ka Libo ka Batan-ong mga Manggugubat,* pinaagi ni Arnold Friberg. Si Helaman misulat kabahin sa batan-ong mga lalaki kinsa iyang gipangulohan sa gubat: “Sila labaw nga naghunahuna diha sa kalingkawasan sa ilang mga amahan kay sa ilang mga kinabuhi; oo, sila gitudloan sa ilang mga inahan, nga kon sila dili magduha-duha, ang Dios moluwas kanila” (Alma 56:47).