Ang Amahan ug ang Anak

Ang moderno nga pagpadayag nagtudlo kanato og mahinungdanon, mahangturon nga mga kamatuoran mahitungod sa atong Amahan sa Langit ug sa Iyang anak, nga si Jesukristo.

Gikan sa Kinabuhi ni Joseph F. Smith

Si Presidente Joseph F. Smith sa kasagaran mohatag og gamhanan nga pagpamatuod sa Langitnong Amahan ug sa Iyang Anak, nga si Jesukristo, ang labing halangdon nga mga binuhat sa atong hugot nga pagtuo. Siya miingon, “Nagtuo ako sa tibuok nakong kalag diha sa Dios nga Amahan ug sa atong Ginoo ug Manluluwas nga si Jesukristo.”¹ Samtang Presidente pa siya sa Simbahan, nagtinguha siya sa pagpasabut sa pagkatawo ug tahas sa Amahan ug sa Anak, ilabi na tungod kay pipila sa mga tudling sa kasulatan nagtudlo ni Jesukristo isip Amahan. Sa usa ka paningkamot aron pagtabang sa mga Santos nga mas makasabut pa sa piho nga mga kasulatan kabahin sa Amahan ug sa Anak, ang Unang Kapangulohan ug ang Korum sa Napulog Duha mipagawas og usa ka doktrinal nga pagpasabut niadtong 30 sa Hunyo 1916 nga giulohan og “Ang Amahan ug ang Anak.” Kini nga pamahayag nagpamatuod sa panaghiusa tali sa Dios nga Amahan ug sa Iyang Anak, nga si Jesukristo, ug mipasabut sa nagkalahi nga mga tahas sa matag usa sa plano sa kaluwasan. Gipasabut usab niya ang mga paagi diin ang pulong Amahan gigamit diha sa mga kasulatan sa duha, ang atong Amahan sa Langit ug ni Jesukristo.

Pipila ka mga kinutlo gikan sa pagpasabut gihisgutan niini nga hugna uban sa laing mga pagtulun-an ni Presidente Smith, kinsa mipamatuod nga aron mabatonan “ang kahibalo sa Dios ug sa Iyang Anak nga si Jesukristo, … mao ang una ug katapusang leksyon sa kinabuhi.”²

Mga Pagtulun-an ni Joseph F. Smith

Ang pagkaila sa Dios ug ni Jesukristo mao ang kinabuhing dayon.

Usa kini ka kasulatan nga kamatuoran, nga kini kinabuhing dayon ang pagkaila sa bugtong tinuod ug buhi nga Dios ug Jesukristo kinsa imong gipadala [tan-awa sa Juan 17:3]. Nagtuo ako nga ang mga Santos sa Ulahing mga Adlaw, pinaagi sa mga pagtulun-an sa mga kasulatan ug pinaagi sa mga pinadayag nga miabut ngadto kanila pinaagi sa tingog ni Propeta Joseph Smith, nakahimo sa pagkasayud sa tinuod ug buhi nga Dios ug nasayud Kaniya ug usab sa Iyang Anak kinsa Iyang gipadala dinhi sa kalibutan, kinsa nasayran nga mao ang kinabuhing dayon.³

Dili lamang gikinahanglan niini ang pagbaton og hugot nga pagtuo sa Dios, apan usab kang Jesukristo ang iyang Anak, ug Manluluwas sa katawhan ug ang Tigpataliwala sa Bag-o nga Pakigsaad; ug sa Espiritu Santo, kinsa nagpamatuod kabahin sa Amahan ug sa Anak, “nga sama gihapon sa tanang katuigan ug sa kahangturan.”⁴

Ang Amahan sa atong mga espiritu mao ang usa ka mahangturon nga nilalang nga may lawas sa unod ug mga bukog.

Ang Dios adunay tabernakulo sa unod ug bukog. Usa siya ka hingpit nga tawo sama kanato, kinsa karon adunay unod…. Kita mga anak sa Dios. Usa siya ka mahangturon nga nilalang, nga walay katapusan sa mga adlaw o katapusan sa mga tuig. Siya makanunayon kaniadto, siya karon, siya magpabilin sa kanunay.⁵

Dili ako motuo sa doktrina nga gituohan sa uban nga ang Dios usa lamang ka Espiritu ug siya ingon niana sa kinaiya nga malukop niya ang kadako sa kawanangan, ug anaa bisag asa sa pagkatawo, o sa pagkadili tawo tungod kay dili nako masabtan nga posible kini nga ang Dios usa ka tawo, kon malukop niya ang kadako sa kawanangan ug anaa bisag asa sa sama nga higayon. Dili kini makatarunganon, usa ka pisikal, usa ka teyolohiyanhon nga panagsumpaki, sa paghunahuna nga gani ang Dios nga mahangturong Amahan mahimong anaa sa duha ka mga dapit, isip usa ka indibidwal, sa sama nga higayon. Imposible kini. Apan ang iyang gahum mosangkad sa tibuok gilapdon sa kawanangan. Ang gahum moabut ngadto sa tanan niyang mga gilalang, ug ang iyang kahibalo makasabut niining tanan ug gidumala niya ang tanan ug nahibalo siya sa tanan.⁶

Ang Dios nga Mahangturong Amahan, kinsa atong naila pinaagi sa nabayaw nga pangalan-ulohan nga “Elohim,” mao ang tinuod nga ginikanan sa atong Ginoo ug sa Manluluwas nga si Jesukristo, ug sa mga espiritu sa mga kaliwat sa katawhan. Si Elohim mao ang Amahan sa matag salabutan diin si Jesukristo giila pag-ayo, ug klaro kaayo nga Siya mao ang Amahan sa mga espiritu.⁷

Mag-ampo [kita] ngadto sa Amahan sa atong Ginoo ug Manluluwas, si Jesukristo, nga kansang hitsura ug panagway kita gihimo, o nangatawo sa kalibutan, ug kansang panagway ug hitsura kita, tungod kay kita mga anak sa Dios, ug busa kinahanglan gayud nga pareho sa iyang Anak sa pagkatawo, ug usab sa pagka espirituhanon, hangtud sa pagsunod nato sa mga baruganan sa ebanghelyo sa mahangturong kamatuoran. Tungod kay, kita gi-orden nang daan … Aron mahimong angayan sa iyang panagway pinaagi sa maalamon ug tukma nga paggamit sa atong kagawasan sa pagpili.⁸

Ang Dios, ang mahangturong Amahan, makanunayon nga nagbantay kaninyo. Siya mabinantayon sa iyang katawhan sa tanang kayutaan, ug kamo gantihan niya sumala sa inyong pagkamatinud- anon sa pagsunod sa mga balaod sa pagkamatarung ug sa kamatuoran.⁹

Ang Dios nga atong Langitnong Amahan mao ang Tiglalang.

Ang Ginoo nga Labawng Makagagahum mao ang Tiglalang sa yuta, siya ang Amahan sa tanan natong mga espiritu. Siya adunay katungod sa pagmando kon unsay atong kinahanglan nga buhaton, ug ato kining katungdanan sa pagsunod, ug sa pagbuhat sumala sa iyang mga gikinahanglan. Natural kini, ug hilabihan ka sayon nga masabtan.¹⁰

Ang mga kasulatan yano nga mibalikbalik sa pagpamatuod nga ang Dios mao ang Tiglalang sa yuta ug mga langit ug sa tanang mga butang nga anaa niini. Sa salabutan nga gipahayag og maayo, ang Tiglalang mao ang Tig-organisar. Ang Dios milalang sa yuta isip usa ka giorganisar nga kalibutan, apan piho nga Siya wala molalang, diha sa panabut ngadto sa unang pagkaanaa, ang pinakamaayo nga mga elemento sa mga materyal nga naglangkob sa yuta, tungod kay “ang mga elemento walay katapusan” (Dok. ug mga Pak. 93:33).¹¹

Ang [tawo] utangan sa Ginoo nga Labawng Makagagahum alang sa iyang salabutan, ug sa tanan nga anaa kaniya; kay Iya sa Ginoo ang yuta ug ang pagkapuno niana [tan-awa sa Salmo 24:1]. Ang Dios ang mipasiugda, ug miplano sa tanang mga butang.¹²

Pagbantay sa mga tawo kinsa … mopahunahuna kaninyo o mopabati nga ang Ginoo nga Labawng Makagagahum, kinsa naghimo sa langit ug yuta ug milalang sa tanan nga mga butang, limitado lamang sa iyang kamandoan ibabaw sa yutan-on nga mga butang ngadto sa mga kapasidad sa mortal nga mga tawo.¹³

Si Jesukristo mao ang Unang natawo sa espiritu ug ang Bugtong Anak sa Dios diha sa unod.

Tali sa espiritu nga mga anak ni Elohim, ang unang natawo mao si Jehova, o si Jesukristo, kang kinsa ang uban mga manghud.¹⁴

Si Jesukristo dili mao ang Amahan sa mga espiritu kinsa mikuha o gani mokuha pa og mga lawas dinhi sa yuta, tungod kay usa siya kanila. Siya ang Anak, sama nga sila anak nga mga lalaki o anak nga mga babaye ni Elohim.¹⁵

Si [Jesukristo] gikinahanglan nga mas labaw pa kay ni bisan kinsa ug sa tanan, tungod (1) sa Iyang pagkauna isip kinamagulangan o unang natawo; (2) sa Iyang pagkatalagsaon nga pagkabutang diha sa unod isip anak sa usa ka mortal nga inahan ug sa usa ka imortal, o nabanhaw ug nahimaya, nga Amahan; (3) sa Iyang pagkapili ug sa pagkaorden nang daan isip ang mao lamang nga Manunubos ug Manluluwas sa katawhan; ug (4) sa Iyang talagsaon nga pagkawalay sala.¹⁶

Walay pagduhaduha diha sa mga hunahuna sa mga Santos sa Ulahing mga Adlaw nga may kalabutan sa pagkaanaa ug sa pagkatawo sa Labawng Makagagahum nga Ginoong Dios, kinsa mao ang Amahan sa atong Ginoo ug Manluluwas nga si Jesukristo. Walay pagduhaduha diha sa mga hunahuna sa mga Santos sa Ulahing mga Adlaw nga si Jesus mao ang Anak sa Dios, nga gipanganak sa Amahan diha sa unod.¹⁷

Si Jesukristo mao ang Anak ni Elohim isip espirituhanon ug lawasnon nga kaliwat; nga maoy pagaingnon nga, si Elohim mao ang tinuod nga Amahan sa Espiritu ni Jesukristo ug usab sa lawas diin si Jesukristo mipahigayon sa Iyang misyon diha sa unod, ug kansang lawas namatay diha sa krus ug pagkahuman niana gibayaw pinaagi sa pagkabanhaw, ug sa pagkakaron ang giimortal nga tabernakulo sa mahangturong espiritu sa atong Ginoo ug Manluluwas.¹⁸

Si Jesukristo natawo sa iyang inahan, nga si Maria. Siya adunay unuron nga tabernakulo. Gilansang siya sa krus; ug ang iyang lawas gipabangon gikan sa mga patay. Gibugto niya ang mga higot sa lubnganan, ug mitunga sa kabag-o sa kinabuhi, usa ka buhi nga kalag, usa ka buhi nga binuhat, usa ka tawo uban sa lawas, nga may mga bahin ug uban sa espiritu—ang espiritu ug ang lawas nahimong usa ka buhi ug imortal nga kalag.¹⁹

Ang Dios nga Amahan … mao ang Amahan sa atong espiritu, ug … ang Amahan diha sa unod, sa iyang Bugtong Anak, nga si Jesukristo, kinsa nakig-uban sa balaanong pagkaimortal uban sa mortal, mibugkos sa sumpay tali sa Dios ug sa tawo, mihimo niini nga posible alang sa mortal nga mga kalag, kang kinsa ang kamatayon gipahimutang, aron makabaton ug kinabuhing dayon, pinaagi sa pagkamasulundon sa iyang mga balaod. Busa, himoon nato, nga magtinguha sa kamatuoran ug maglakaw sa kahayag maingon nga si Kristo mao ang kahayag nga unta makabaton kita og pagkigdait uban kaniya, ug sa matag usa, nga unta ang iyang dugo molimpyo kanato gikan sa tanang sala.²⁰

Ang Amahan ug ang Anak usa ra.

“ … Ako anaa sa Amahan, ug ang Amahan ania kanako, ug ang Amahan ug Ako usa ra.” (3 Nephi 11:27). Wala ako maghunahuna nga bisan kinsa nga maalamon nga tawo mohubad niini nga mga pulong aron mopasabut nga si Jesus ug ang iyang Amahan usa ra ka tawo, apan nga sila lamang usa sa kahibalo, sa kamatuoran, sa kaalam, sa panabut, ug sa katuyoan; sama nga ang Ginoong Jesukristo sa iyang kaugalingon mipahimangno sa iyang mga tinun- an nga mahiusa uban kaniya, ug mag-uban kaniya, nga siya unta maanaa kanila. Dinhi niini nga panabut nga akong nasabtan kini nga sinultihan, ug dili sama sa gipamatud-an niini sa pipila ka mga tawo, nga si Kristo ug ang iyang Amahan usa ra ka tawo. Akong ipahayag kaninyo nga sila dili usa ka tawo, kondili sila duha ka mga tawo, duha ka mga lawas, managlahi ug nagbulag, ug sama ka lahi sa bisan kinsang amahan ug anak.²¹

[Ang Amahan ug ang Anak] usa—sa mga kinaiya. Usa sila sa paghigugma, usa ra sa kahibalo, usa ra sa kapuangod, usa sa gahum, usa sa tanang mga butang nga nakahimo kanila nga maghiusa ug gamhanan, mahimayaon ug bantugan, tungod kay diha kanila nahingpit ang tanan nga mga kamatuoran, tanang hiyas ug sa tanang pagkamatarung.²²

Si Jesukristo gitawag nga Amahan.

Ang pulong “Amahan” isip Dios makita diha sa sagrado nga mga sinulat uban sa yanong nagkalahi nga mga kahulugan.²³

Si Jesukristo mao ang Amahan sa langit ug yuta.

Si Jehova, kinsa mao si Jesukristo ang Anak ni Elohim, gitawag og “ang Amahan,” ug gani “ang mao gayud nga mahangturong Amahan sa langit ug yuta” [tan-awa sa Mosiah 15:4; 16:15; Alma 11:38–39; Ether 4:7]. Uban sa susama nga kahulugan si Jesukristo gitawag og “Ang Walay Katapusan nga Amahan” (Isaias 9:6; itandi sa 2 Nephi 19:6)….

… Si Jesukristo kinsa ato usab nga nasayran isip Jehova, mao ang sinaligan sa Amahan, nga si Elohim, diha sa trabaho sa paglalang…. Si Jesukristo, nga mao ang Tiglalang, mao ang kanunay nga gitawag og Amahan sa langit ug yuta …; ug tungod kay ang Iyang mga nilalang mga mahangturon nga kalidad angayan kaayo Siya nga pagatawgon og Mahangturong Amahan sa langit ug yuta.²⁴

Si Jesukristo mao ang Amahan niadtong kinsa nagsunod sa Iyang ebanghelyo.

[Lain] nga panabut diin si Jesukristo gitamud isip “Amahan” adunay kalabutan ngadto sa relasyon tali Kaniya ug niadtong kinsa modawat sa Iyang Ebanghelyo ug sa ingon mahimo nga mga manununod sa kinabuhing dayon….

Nga pinaagi sa pagkamasulundon sa ebanghelyo ang mga tawo mahimo nga mga anak sa Dios, usab isip mga anak ni Jesukristo, ug, pinaagi kaniya, isip mga anak sa Iyang Amahan, gihan- ay sa daghang mga pinadayag nga gihatag sa karon nga dispensasyon [tan-awa sa D&P 11:28–30; 34:1–3; 35:1–2; 39:1–4; 45:7–8]….

Usa ka mapugsanon nga pagpasabut kabahin niini nga relasyon tali ni Jesukristo isip Amahan ug niadtong mituman sa mga gikinahanglan sa Ebanghelyo ingon nga Iyang mga Anak gihatag ni Abinadi, mga gatusan ka tuig sa wala pa matawo ang atong Ginoo diha sa unod: “…Ug kinsa ang mahimong kaliwatan ni [Kristo]? Tan-awa ako moingon nganha kaninyo nga kinsa ang makadungog sa mga pulong sa mga propeta, … ug motuo nga ang Ginoo motubos sa iyang mga katawhan, ug nagpaabot niana nga adlaw alang sa usa ka kapasayloan sa ilang mga sala; ako moingon nganha kaninyo, nga kini mao ang iyang binhi, o sila mao ang mga manununod sa gingharian sa Dios … ”(Mosiah 15:10–13)….

Ang mga tawo malagmit mahimong mga anak ni Jesukristo pinaagi sa pagkatawo pag-usab—natawo sa Dios, ingon sa mga gipamahayag nga pulong [tan-awa sa 1 Juan 3:8–10].

Kadtong kinsa natawo ngadto sa Dios pinaagi sa pagkamasulundon sa Ebanghelyo mahimo pinaagi sa way kahadlok nga debosyon sa katarung makabaton og kahimayaan ug gani makaabot sa kahimtang sa pagka-Dios [tan-awa sa D&P 76:58; 132:17, 20, 37]….

Pinaagi sa bag-o nga pagkatawo—niana nga tubig ug sa Espiritu— ang katawhan mahimo nga mga anak ni Jesukristo, nga tungod sa pamaagi nga Iyang gihimo nakatugyan og “anak nga mga lalaki ug anak nga mga babaye ngadto sa Dios” [D&P 76:24; tanawa usab sa 1 Mga Taga-Corinto 4:15; D&P 84:33–34; 93:21–22]….

Kon ugaling tukma kini sa pagsulti niadtong kinsa modawat ug mosunod sa Ebanghelyo isip anak nga mga lalaki ug anak nga mga babaye ni Kristo—ug diha niini nga hilisgutan ang mga kasulatan klaro ug dili mahimo nga moingon nga dili tinuod ni molimud— makanunayon nga tukma kini sa pagsulti kabahin ni Jesukristo isip Amahan sa matarung, sila nga nahimong Iyang mga anak ug Siya nga nahimong ilang Amahan pinaagi sa ikaduha nga pagkatawo— ang pagbunyag nga pagbag-o sa kinabuhi.²⁵

Si [Jesukristo] mao ang tukuran ug ang ulohan nga tukurang bato sa atong relihiyon. Iyaha kita pinaagi sa pagsagop, pinaagi sa pagkalubong uban ni Kristo diha sa bunyag, pinaagi sa pagkatawo sa tubig ug sa espiritu nabag-o diha sa kalibutan, pinaagi sa mga ordinansa sa ebanghelyo ni Kristo, ug sa ingon kita mga anak sa Dios, mga manununod sa Dios ug isigkamanununod ni Kristo pinaagi sa atong pagkasagop ug hugot nga pagtuo.²⁶

Kon walay paghinulsol ug pagbunyag ug pagdawat sa Espiritu Santo, diin naglangkob sa bag-ong pagkatawo, dili kita kapamilya ni Kristo, apan mga langyaw, nahimulag gikan sa Dios ug sa iyang mga balaod, ug dinhi niining napukan nga kahimtang magpabilin kita, sa lawas ba o sa espiritu, alang sa kapanahonan ug alang sa kahangturan, gawas kon magmasulundon kita sa plano nga gimugna didto sa mga langit alang sa katubsaan ug kaluwasan sa tawhanon nga pamilya.²⁷

Nasayud ako nga makakaplag lamang ako og [kaluwasan] diha sa pagkamasulundon sa mga balaod sa Dios, sa paghupot sa mga sugo, sa paghimo og mga buhat sa pagkamatarung, pagsunod sa mga lakang sa atong gisunod nga lider, nga si Jesus ang Panigingnan ug ang Pangulo sa tanan. Siya ang Dalan sa kinabuhi, siya ang Kahayag sa kalibutan, siya ang Pultahan diin kinahanglan gayud nga kita mosulod, aron makaangkon unta kita og dapit uban kaniya sa celestial nga gingharian sa Dios.²⁸

Walay laing pangalan, ubos sa langit, nga gihatag, gawas niana nga Jesukristo, diin mahimo kamo nga maluwas o mabayaw sa Gingharian sa Dios.²⁹

Si Jesukristo mao ang Amahan pinaagi sa balaanon nga pagtugyan og awtoridad.

Sa tanan Niya nga mga pagtagad uban sa tawhanon nga pamilya si Jesus ang Anak mirepresentar ug gani nagrepresentar kang Elohim ang Iyang Amahan sa gahum ug awtoridad. Tinuod kini kabahin kang Jesukristo sa Iyang kinabuhi sa wala pa dinhi sa yuta, sa wala pa mahimong mortal, o walay lawas nga kahimtang, diin siya nailhan isip Jehova; atol usab sa Iyang pagbaton og lawas diha sa unod; ug sa panahon sa Iyang mga paghago isip usa ka walay lawas nga espiritu sa kalibutan sa mga patay; ug sukad nianang higayona diha sa Iyang nabanhaw nga kahimtang [Tan-awa sa Juan 5:43; 10:25, 30; 14:28; 17:11, 22; 3 Nephi 20:35; 3 Nephi 28:10; D&P 50:43]. Sa ingon ang Amahan mibutang sa Iyang ngalan diha sa Iyang anak; ug si Jesukristo misulti ug mialagad diha ug pinaagi sa ngalan sa Amahan; ug kutob sa gahum, awtoridad ug pagka-Dios nga kalabutan ang Iyang mga pulong ug mga buhat mao ug kadto gikan sa Amahan….

Bisan pa niana, wala niini nga mga hunahuna ang makausab sa pinakakubos nga matang sa ligdong nga kamatuoran sa tinuod nga relasyon sa Amahan ug Anak tali ni Elohim ug ni Jesukristo.³⁰

Akong mga kaigsoonan, ako nasayud nga ang akong Manunubos buhi. Nasayud ako, ingon sa akong nasayran nga ako buhi, nga diha sa pagkatawo mibisita siya sa tawo sa atong panahon ug adlaw, ug nga wala kita mag-inusara nga magsalig sa kasaysayan sa nangagi sa kahibalo nga atong gihuptan, diin ang talaan gipahayag pinaagi sa Espiritu sa Dios, nga gibu-bo sa mga kasingkasing niadtong kinsa mosulod ngadto sa pakigsaad sa ebanghelyo ni Jesukristo. Apan kita adunay gibag-o ug sa kaulahian saksi ug pagpakita sa langitnon nga mga panan-awon ug sa pagbisita sa Dios nga Amahan ug ni Kristo ang Anak ngadto niining ilang tungtonganan sa tiil; ug sila diha sa pagkatawo mipahayag sa ilang pagkabinuhat, ilang pagkatawo ug ilang gipakita ang ilang himaya. Gibukhad nila ang ilang mga kamot aron paghingpit sa ilang buhat—ang buhat sa Dios, ug dili ang buhat sa tawo…. Mao kini ang akong pagpamatuod kaninyo, akong mga kaigsoonan, mopamatuod ako niini sa pangalan ni Ginoong Jesukristo.³¹

Mga Sugyot alang sa Pagtuon

Ngano nga kinabuhing dayon man ang pag-ila sa atong Amahan sa Langit ug ni Jesukristo? Sa unsang paagi nga ang atong pagsabut niini makaapekto sa atong relasyon uban kanila?
Ngano nga importante nga masayud niini nga ang atong Langitnong Amahan usa ka mahangturong nilalang nga may gihimaya, nabanhaw nga lawas sa unod ug bukog?
Sa unsang paagi kita napanalanginan tungod kay nasayud kita nga ang Langitnong Amahan mao ang Amahan sa atong mga espiritu?
Unsay ipabasabut sa pamahayag nga “ang Tiglalang mao ang Tig-organisar”?
Sa unsang paagi talagsaon si Jesukristo tali sa espiritu nga mga anak sa Langitnong Amahan? Unsa ang nabuhat sa Manluluwas nga natawo siya dinhi sa yuta isip Bugtong Anak sa Amahan sa unod?
Sa unsang paagi nga ang Langitnong Amahan ug Jesukristo usa ra? Sa unsang paagi kita mahimong usa uban sa Amahan ug sa Anak? (Tan-awa usab sa Juan 17:22–24.)
Ngano nga ang duha ang Amahan ug ang Anak gitawag og Tiglalang? (Tan-awa usab sa Moises 1:32–33.)
Sa unsang paagi kita mahimong anak nga mga lalaki ug anak nga mga babaye ni Kristo? (Tan-awa usab sa Mosiah 5:5–8.) Unsa ang atong mabuhat aron sa “pagsunod sa Ebanghelyo isip anak nga mga lalaki ug anak nga mga babaye ni Kristo”? (Tan-awa usab sa 1 Juan 2:3; 1 Juan 4:7–8.)
Ngano nga si Jesus nagsulti sa mga pulong sa Amahan nga mao ra og Siya ang Amahan? Unsa ang gisugyot niini mahitungod sa relasyon sa Amahan ug sa Anak?

stained-glass window — Kining gikuloran nga bildo nga bintana, gihimo niadtong 1913 alang sa balay tigumanan sa Adams Ward sa Los Angeles, California, naghulagway sa pagpakita sa Dios nga Amahan ug sa Iyang Anak, nga si Jesukristo, ngadto ni Joseph Smith.