Matinuoron, Matinud-anon, Matinguhaon nga Pag-ampo

Ang matinuoron nga pag-ampo maggikan sa kasingkasing ngadto sa Dios diha sa pangalan ni Jesukristo.

Gikan sa Kinabuhi ni Joseph F. Smith

Sa tinglarag sa 1847, ang nuybe anyos nga si Joseph F. Smith; ang iyang biyuda nga inahan, si Mary Fielding Smith; ug ang iyang uyoan nga si Joseph Fielding nagkampo daplin sa Suba sa Missouri padulong ngadto sa Winter Quarters. Pagkasunod buntag ilang nadiskobrehan nga ang ilang pinakamaayo nga pundok sa mga baka nawala.

Si Joseph F. ug ang iyang uyoan dugay ug hilabihan nga nangita sa mga baka, “nabasa og maayo sa singot, naluya, naguol, ug gikapoy og maayo.” Si Joseph F. miingon: “Niining makalolooy nga kahimtang ako ang unang mibalik sa among mga karwahe, ug samtang miduol ako nakita nako ang akong inahan nga nagluhod diha sa pag-ampo. Mihunong ako og kadiyot ug hinayhinay nga nagpaduol aron madungog ang iyang pangamuyo sa Ginoo nga dili motugot nga kami mapasagdan niining walay mahimo nga kahimtang, apan sa paggiya kanamo aron makit-an ang among nawala nga pundok sa mga baka, nga kami unta makapadayon sa among mga pagbiyahe diha sa luwas nga kahimtang. Sa dihang mibarug siya gikan nga nagluhod ako nagbarug sa duol. Ang unang ekspresyon nga akong nakita sa iyang bililhong panagway mao ang usa ka maanindot nga pahiyum, diin bisan ako nga nawad-an og paglaum, nakahatag kanako og nabag-o nga paglaum ug usa ka kasiguroan nga wala nako mabati kaniadto.”

Masadyaon siyang midasig kang Joseph ug sa iyang uyoan sa paglingkod ug pagtagamtam sa pamahaw nga iyang giandam ug miingon, “Molakaw lang ko sa gawas ug tan-awon kon akong makit-an ang baka.” Bisan pa sa mga pagsupak sa iyang igsoong lalaki nga ang dugang nga pagpangita dili magmabungahon, migawas gayud si Mary, mibiya kaniya ug ni Joseph F. aron mokaon sa pamahaw. Iyang nasugatan ang usa ka magbalantay sa mga hayop kinsa mipasabut nga iyang nakita ang nawala nga mga baka sa direksyon nga sukwahi sa iyang gipadulngan. Si Joseph F. miingon, “Klaro namong nadungog kon unsay iyang gisulti, apan si mama mipadayon gihapon, ug wala gani milingi aron motan-aw kaniya.” Sa wala madugay siya mikaway ngadto kang Joseph F. ug sa iyang uyoan, kinsa midagan ngadto sa dapit diin siya nagbarug. Didto ilang nakita ang mga baka nga nahigut sa usa ka hugpong sa daghang mga sanga nga kahoy.

Si Presidente Joseph F. Smith sa kaulahian miingon, “Usa kadto sa unang praktikal ug positibo nga mga pagpakita sa kamasangputon sa pag-ampo nga akong nasaksihan sukad. Mihimo kini og dili mapapas nga impresyon sa akong hunahuna, ug nahimong usa ka tinubdan sa kahupayan, kasiguroan ug giya ngari kanako sa tibuok nakong kinabuhi.”¹

Mga Pagtulun-an ni Joseph F. Smith

Sayri kon unsaon sa pagduol sa Dios diha sa pag-ampo.

Ako nag-ampo nga kamo masayud kon unsaon sa pagduol sa Dios diha sa pag-ampo. Dili kini ingon ka lisud nga butang nga makat-on kon unsaon sa pag-ampo. Dili ang mga pulong nga piho natong gigamit ang naglangkob sa pag-ampo. Ang pag-ampo wala lamang maglangkob og mga pulong. Ang matinuoron, matinud-anon, matinguhaon nga pag-ampo mas naglangkob og pagbati nga naggikan sa kasingkasing ug gikan sa tinguha sa sulod sa atong mga espiritu sa pag-ampo ngadto sa Ginoo diha sa pagkamapainubsanon ug diha sa hugot nga pagtuo, nga kita unta makadawat sa iyang mga panalangin. Dili igsapayan kon unsa ka simple ang mga pulong, kon ang atong mga tinguha tinuod ug moduol kita sa Ginoo nga adunay masulub-on nga kasingkasing ug mahinulsulon nga espiritu aron sa pagpangayo kaniya alang nianang atong gikinahanglan.²

Dili Siya layo kaayo. Dili lisud nga moduol Kaniya, kon ato lamang kining buhaton nga adunay masulub-on nga kasingkasing ug mahinulsulon nga espiritu, sama sa gibuhat ni Nephi sa karaan. Mao kini ang paagi diin si Joseph Smith, sa iyang pagkabata, miduol Kaniya. Miadto siya sa kakahoyan, miluhod, ug sa kamapainubsanon matinguhaon gayud siya nga masayud kon unsa nga simbahan ang madawat sa Dios. Nakadawat siya og tubag sa iyang pag-ampo, nga iyang gihalad gikan sa kinahiladman sa iyang kasingkasing, ug iya kining nadawat sa paagi nga wala niya damha.

Akong mga kaigsoonan, ayaw pagkat-on sa pag-ampo gamit ang inyong mga ngabil lamang. Ayaw sag-uloha ang pag-ampo, ug mamulong niini matag buntag ug gabii. Butang kana nga dili gayud nako gusto. Tinuod nga daghang mga tawo ang naanad sa pagpamulong og binalik-balik nga pag-ampo. Nagsugod sila sa usa ka piho nga punto, ug ilang gihisgutan ang kasagarang mga punto sa ilang pag-ampo hangtud nga moabut sila sa katapusan sa pag-ampo; ug kon mahuman na sila, wala ako kahibalo kon ang pag-ampo misaka ba lapas sa kisame sa lawak o wala.³

Akong mga kaigsoonan, atong hinumduman ug motawag sa Dios ug matinguhaon sa iyang mga panalangin ug sa iyang pabor ngari kanato. Ato kining buhaton, bisan pa man niana, diha sa kaalam ug sa pagkamatarung, ug kon kita mag-ampo kinahanglan kitang motawag kaniya sa mapadayunon ug makatarunganon nga paagi. Kinahanglan dili kita mangayo sa Ginoo alang nianang wala kinahanglana o dili makaayo kanato. Kinahanglan kitang mangayo alang nianang atong gikinahanglan, ug kinahanglan kitang mangayo diha sa hugot nga pagtuo, “sa walay pagduhaduha, kay siya nga nagaduhaduha,” sama sa giingon sa apostol, “sama sa balod sa dagat, nga ginahandos ug ginakosokoso sa hangin. Ayaw ipadahum sa maong tawo nga siya adunay madawat gikan sa Ginoo” [Santiago 1:6–7]. Apan kon kita mangayo sa Dios alang sa mga panalangin mangayo kita diha sa hugot nga pagtuo sa ebanghelyo, niana nga hugot nga pagtuo nga iyang gisaad nga ihatag niadtong kinsa nagatuo kaniya ug nagatuman sa iyang mga sugo.⁴

Hilabihan ako nga nakadayeg ug natandog sa paagi ni [Presidente Heber C. Kimball] sa pag-ampo diha sa iyang pamilya. Wala gayud ako makadungog ni bisan kinsa nga tawo nga nag-ampo sama sa iyang gibuhat. Wala siya mamulong ngadto sa Ginoo ingon nga usa ka tawo nga layo kaayo, apan daw nakigsulti kaniya nawong sa nawong. Daghang mga higayon nga hilabihan ako nga nakadayeg sa ideya sa aktwal nga presensya sa Dios, samtang nakigsulti siya kaniya diha sa pag-ampo, nga dili ako makapugong sa paghangad aron makita kon anaa ba gayud siya ug makita.⁵

Duol kanunay sa Ginoo diha sa pagpaubos ug hugot nga pagtuo.

Kita … midawat nga walay pagpangutana sa mga doktrina nga gitudlo ngari kanato ni Propeta Joseph Smith ug sa Anak sa Dios mismo, nga kon kita mag-ampo sa Dios, ang Mahangturong Amahan, diha sa pangalan sa iyang bugtong Anak, kang kinsa ang atong amahang Adan usab ug ang iyang kaliwatan nag-ampo gikan sa sinugdanan.⁶

Sa akong hunahuna mas matinguhaon alang kanato nga mopili og maayo sa atong mga pulong kon mag-ampo kita sa Ginoo. Iya kitang dunggon sa hilum, ug moganti kanato sa dayag. Dili kita kinahanglan nga mangamuyo ngadto kaniya gamit ang daghang mga pulong. Dili kita kinahanglan nga mopaluya kaniya tungod sa atong tag-as nga mga pag-ampo. Unsay atong gikinahanglan, ug unsay kinahanglan natong buhaton isip mga Santos sa Ulahing mga Adlaw, alang sa atong kaugalingong kaayohan, mao ang pagduol kaniya sa kanunay, sa pagsaksi ngadto kaniya nga kita nahinumdom kaniya ug nga kita andam sa pagdala ngari kanato sa iyang pangalan, motuman sa iyang mga sugo, mobuhat og katarung; ug nga kita magtinguha sa iyang Espiritu sa pagtabang kanato. Dayon, kon anaa kita sa kalisud, moduol kita sa Ginoo ug sa direkta ug sa piho mangayo kaniya ug aron sa pagtabang kanato nga makalingkawas sa kalisud nga kita anaa; ug himoa nga ang pag-ampo maggikan sa kasingkasing, himoa nga dili kini sa mga pulong nga sama sa mga agi sa mga ligid diha sa dalan nga gisige og gamit, nga wala hunahunaa o batia ang paggamit niadto nga mga pulong.

Mamulong kita sa simple nga mga pulong, mamahayag sa atong panginahanglan, nga madani pag-ayo ang Tighatag sa matag maayo ug hingpit nga gasa. Makadungog siya sa hilum; ug siya nasayud sa mga tinguha sa atong mga kasingkasing sa wala pa kita mangayo, apan iyang gihimo kini nga usa ka kinahanglan, ug usa ka katungdanan nga kita motawag sa iyang pangalan—nga kita mangayo aron kita unta makadawat; ug manuktok nga kini mahimong ablihan ngari kanato; ug mangita aron kita makakaplag [tan-awa sa Mateo 7:7]. Sa ingon, ang Ginoo mihimo niini nga usa ka mahigugmaong katungdanan nga kita kinahanglang mohinumdom kaniya, nga kita mosaksi ngadto kaniya sa buntag, udto, ug gabii, aron kita dili makalimot sa Tighatag sa matag maayo nga gasa ngari kanato.⁷

Tumana kanang mahinungdanong sugo sa Manluluwas, kanunay nga mohinumdom sa Ginoo, sa pag-ampo sa buntag, ug sa gabii, ug kanunay nga magpasalamat alang sa mga panalangin nga inyong nadawat matag adlaw.⁸

Walay limitasyon ang kinahanglan o mahimong itakda ngadto sa paghalad og pag-ampo ug sa paghatag og pagdayeg sa Tighatag sa Maayo, kay piho kitang giingnan sa pag-ampo nga walay paghunong, ug walay espesyal nga awtoridad sa Priesthood o katungdanan diha sa Simbahan ang kinahanglan sa paghalad og pag-ampo.⁹

Ang usa ka tawo mahimong magpuasa ug mag-ampo hangtud iyang mapatay ang iyang kaugalingon, ug walay bisan unsang panginahanglan niini; ni kaalam diha niini. Ako moingon sa akong mga kaigsoonan, kon sila magpuasa, ug mag-ampo alang sa masakiton, ug alang niadtong kinsa nagkinahanglan og hugot nga pagtuo ug pag-ampo, ayaw paglapas sa unsay maalamon ug mabinantayon diha sa pagpuasa ug pag-ampo. Ang Ginoo makadungog og simple nga pag-ampo nga gihalad diha sa hugot nga pagtuo, sa tunga sa dosena nga mga pulong, ug siya moila og pagpuasa nga dili magpadayon sobra sa baynte kwatro ka oras, nga ingon ka andam ug ka epektibo sama sa pagtubag niya sa pag-ampo gamit ang usa ka libo ka mga pulong ug pagpuasa sulod sa usa ka bulan.¹⁰

Unsa may atong buhaton kon atong napasagdan ang atong mga pag-ampo? Magsugod kita sa pag-ampo. Kon atong napasagdan ang bisan unsa nga laing katungdanan, tinguhaon nato ang Ginoo alang sa iyang Espiritu, aron kita masayud kon asa kita nasayop ug nawad-an sa atong mga oportunidad, o napasagdan kini nato nga wala mapahimusli. Magtinguha kita ngadto sa Ginoo diha sa pagkamapainubsanon, determinado nga mosalikway sa tanan nga mahimong babag sa atong pagdawat sa salabutan ug kahayag nga atong gikinahanglan, ug sa tubag sa atong mga pag-ampo, aron kita moduol kaniya nga masaligon nga ang iyang mga dunggan bukas alang sa atong mga pangamuyo, nga ang iyang kasingkasing maminaw kanato diha sa kalooy, nga ang atong mga sala mapasaylo, ang atong mga hunahuna malamdagan pinaagi sa impluwensya ug gahum sa Dios, nga kita unta makasabut sa atong katungdanan ug makabaton og disposisyon sa pagpahigayon niini, dili sa paglangay niini, dili sa pagpadaplin niini.¹¹

Kinahanglan atong dad-on uban kanato ang diwa sa pag-ampo sa matag katungdanan nga kinahanglan natong ipahigayon sa kinabuhi. Nganong gikinahanglan man nato? Usa sa simple nga mga rason nga makadani ngari sa akong hunahuna uban sa dakong pwersa mao nga ang tawo hilabihan gayud nga nagdepende sa Dios! Pagka wala nato’y mabuhat kon wala siya; pagkagamay sa atong mabuhat kon wala ang iyang maloloy-on nga pagsangkap alang kanato!¹²

Kon dili kamo makalimot sa pag-ampo ang Dios dili makalimot kaninyo, ug dili Siya mopalayo sa Iyang kaugalingon gikan kaninyo kon dili kamo mopalayo sa inyong mga kaugalingon gikan Kaniya. Nganong mobiya man ang tawo gikan sa kamatuoran? Nganong mawala man kanila ang pagtuo? Nganong ang ilang mga hunahuna nangitngit man? Tungod kay misimang man sila sa husto nga dalan; ilang gipasagdan ang ilang mga katungdanan ug nakalimot sa pag-ampo, ug sa pag-ila sa Ginoo ug Siya mipahilayo sa Iyang Espiritu gikan kanila ug gibiyaan sila diha sa kangitngit.… [Dili kini mahitabo] ngadto sa tawo kinsa mag-ampo sa buntag, udto ug gabii ug mopaubos sa iyang kaugalingon sa atubangan sa Ginoo, ug mag-ampo sa Ginoo diha sa iyang kausbawan ingon nga siya mag-ampo ngadto Kaniya diha sa kalisdanan. Kana nga tawo dili gayud mobiya gikan sa kamatuoran.¹³

Ang panimalay mao ang templo sa pamilya alang sa pag-ampo ug pagdayeg sa Dios.

Ang kasarangan nga panimalay sa “Mormon” mao ang templo sa pamilya, diin ang mga sakop sa panimalay magpundok sa buntag ug gabii, alang sa pag-ampo ug pagdayeg sa Dios, nga gihalad diha sa pangalan ni Jesukristo, ug sa kasagaran inubanan sa pagbasa sa kasulatan ug sa pagkanta og espirituhanong mga awit.¹⁴

Kini usa ka simple nga butang ang pag-ampo, apan sa gihapon unsa ka sagad nga kini nga katungdanan gipasagdan. Ang mga ginikanan makalimot sa pagtawag og tingub sa ilang mga kabanay ug mangaliyupo tungod kanila sa mga panalangin sa Dios; sila sa kasagaran gayud nagdali-dali, o hilabihan nga nabalaka sa mga kalihokan sa kinabuhi nga nakalimot na hinoon sa ilang mga obligasyon ngadto sa Labawng Makagagahum. Ang pag-ampo diha sa pamilya nga nag-alirong mahimong tan-awon sa uban nga mga Santos sa Ulahing mga Adlaw isip usa ka simple kaayo nga butang, apan ang pagpasagad niini makahimo og grabe kaayo nga mga resulta.… Ang ubang mga Santos sa Ulahing mga Adlaw makahinumdom lamang Kaniya sa higayon nga ang kalisdanan moabut kanila; diha sa kausbawan sila makalimot kaniya. Karon ang Ginoo mahimong mohukom sa paghikalimot kanato kon kita labing nagkinahanglan sa iyang panabang, ug kon siya mobuhat sa ingon atong makaplagan ang atong mga kaugalingon sa usa ka makalolooy nga kahimtang. Ayaw gayud kalimti ang Dios; tinguhaa siya diha sa pag-ampo sa buntag ug gabii.… Magmainampoon diha sa dili maayo nga panahon ug sa maayo nga panahon, dayon kon ang kangitngit moabut kaninyo, ang kahupayan sigurado gayud nga moabut.¹⁵

Mga amahan, pag-ampo uban sa inyong mga pamilya; yukbo uban kanila sa buntag ug sa gabii; pag-ampo ngadto sa Ginoo, pasalamati siya alang sa iyang kaayo, kalooy ug kamabination sa usa ka Amahan, ingon nga ang atong yutan-ong mga amahan ug mga inahan hilabihan gayud ka mabination ngari kanato nga kabus, masinupakon ug badlungon nga mga anak.

Nag-ampo ba kamo? Unsa may inyong gi-ampo? Pag-ampo kamo nga ang Dios moila kaninyo, nga siya modungog sa inyong mga pag-ampo, ug nga siya mopanalangin kaninyo sa iyang Espiritu, ug nga siya mogiya kaninyo ngadto sa tanang kamatuoran ug mopakita kaninyo sa husto nga dalan; nga siya mopasidaan kaninyo batok sa sayop ug mogiya kaninyo ngadto sa husto nga dalan; nga kamo dili mahisalaag, nga kamo dili kalit nga mosimang sa sayop nga dalan padulong sa kamatayon, apan nga kamo magpabilin diha sa pig-ot nga dalan.¹⁶

Kon ang gamay nga bata moyukbo diha sa hingpit nga pagkayano ug mangayo sa Amahan alang sa usa ka panalangin, ang Amahan modungog sa tingog, ug motubag sa mga panalangin diha sa iyang ulo, tungod kay ang bata inosente ug mangayo diha sa hingpit nga pagtuo ug pagsalig. Kini simple nga mga baruganan nga akong gitinguha sa pagsilsil diha sa inyong mga hunahuna. Kini simple, apan gikinahanglan, ug mahinungdanon.¹⁷

Gimandoan kita sa pagtawag sa Dios diha sa pangalan ni Jesukristo. Gisultihan kita nga kinahanglan ato siyang hinumduman diha sa atong mga panimalay, mopabilin sa iyang balaang pangalan nga presko diha sa atong mga hunahuna, ug mohatag kaniya og balaang pagtahud diha sa atong mga kasingkasing; kinahanglan kitang motawag kaniya matag karon ug unya, matag adlaw; ug, gani, matag gutlo sa atong mga kinabuhi kinahanglan kitang magpakabuhi sa ingon aron ang mga tinguha sa atong mga kasingkasing mahimong usa ka pag-ampo ngadto sa Dios alang sa pagkamatarung, alang sa kamatuoran, ug alang sa kaluwasan sa tawhanong pamilya.¹⁸

Himoa nga ang inyong kalag mag-ampo alang sa kaayohan sa uban.

Kon kita magpundok ang matag usa kinahanglan adunay mainampoong espiritu ug himoa ang iyang kalag nga mogawas, dili lamang alang sa iyang kaugalingon, apan ngadto sa tibuok simbahan. Kon kini gihimo, walay mogawas sa balay nga alampoanan nga dili makasinati sa espiritu sa Dios.… [Kon ang pag-ampo ihalad,] ang matag usa … kinahanglang mo-endorso niini pinaagi sa pulong nga amen.¹⁹

Kon ang usa ka tawo magtinguha sa diwa sa kaalam ug sa inspirasyon gikan sa Labawng Makagagahum, … ang Ginoo moligon kaniya, tungod kay siya adunay kahadlok sa Dios sa atubangan sa iyang mga mata, tungod kay siya nahigugma sa iyang silingan ingon nga siya nahigugma sa iyang kaugalingon, ug dili siya magampo og: “O Ginoo, panalangini ako ug ang akong asawa, akong anak nga si John ug ang iyang asawa; kaming upat, ug wala nay lain. Amen.” Ang ingon nga tawo dili mag-ampo niini nga paagi, apan siya mag-ampo alang sa kaayohan sa Zion, ug sa taas nga kinabuhi niining mga kalalakin-an kinsa gibayaw sa Ginoo nga mahimo natong mga lider, atong mga magtatambag ug atong mga adviser diha sa mga baruganan sa Ebanghelyo. Mag-ampo siya alang sa iyang silingan.²⁰

Ang tawo kinsa mainampoon sa atubangan sa Ginoo mopakita og ehemplo sa atubangan sa uban kinsa makakita ug mahibalo sa iyang binuhatan.²¹

Wala gayud ako mag-ampo sa Ginoo nga wala maghinumdom sa Iyang mga sulugoon kinsa anaa sa mga kanasuran sa yuta nga nagsangyaw sa Ebanghelyo. Ang gibug-aton sa akong pag-ampo mao, “O Dios, ipabilin sila nga putli ug walay lama gikan sa kalibutan; tabangi sila sa pagpabilin sa ilang kaligdong, nga sila dili unta masugamak ngadto sa mga kamot sa ilang mga kaaway ug mabuntog; giyahi sila ngadto sa matinuoron sa kasingkasing.” Mao kini ang akong pag-ampo sukad anaa ako sa misyon, ug magpadayon ako sa pag-ampo sa ingon samtang buhi pa ako.²²

[Ngadto sa iyang misyonaryo nga anak nga lalaki nga si Joseph Fielding, si Joseph F. Smith misulat niadtong 18 sa Hulyo 1899:] Ang among mga kasingkasing puno sa panalangin alang kanimo ug … kauban ang tanan nimong mga kauban kamo among gihinumduman sa atubangan sa Ginoo sa higayon nga mag-ampo kami. O! Dios, akong Amahan, panalangini, hupaya, paluyohi ug himoa nga sarang ang akong mga anak nga lalaki, ug ang tanan nimong mga sulugoon nga anaa sa misyon. Kon ang mga pultahan ilamba sa ilang mga nawong, hatagi sila og grasya, pagpailub ug mapasayloon nga mga kasingkasing. Kon walay pagbati nga isalikway sa mabiaybiayon nga mga tawo, painita sila pinaagi sa imong bililhong gugma, kon trataron sa mapintas nga paagi ug pagagukuron ikaw anaa aron sa pagpanalipod kanila pinaagi sa imong gahum. Pahibaloa ang imong mga sulugoon nga Ikaw Dios, ug sa pagpabati sa imong presensya. Pakan-a sila uban sa espirituhanong kinabuhi ug uban sa hingpit nga gugma nga mosalikway sa tanang kahadlok ug unta ang tanan nilang mga panginahanglan sa lawas mahatag. Tabangi sila sa pagtipig diha sa ilang mga hunahuna sa mapuslanong kahibalo, ug mapabilin diha sa ilang mga panumduman ang imong kamatuoran ingon nga puno sa kaayo nga bahandi. Unta magmapainubsanon sila sa Imong atubangan ug maaghup ug mapainubsanon sama sa imong mahimayaon nga Anak! Ibutang ang ilang pagsalig diha Kanimo, diha sa imong pulong, ug diha sa imong mabination nga mga saad. Ug unta ang kaalam ug paghukom, pagkamabinantayon ug presensya sa hunahuna, kahait sa salabutan ug gugmang putli, kamatuoran ug kaputli, ug dungog ug dignidad mopakita sa ilang pangalagad ug mosul-ob kanila nga daw sama sa balaang mga saput. O, Dios, panalangini sa buhong nga paagi ang imong batan-ong mga sulugoon sa matag gikinahanglan nga gasa ug grasya ug balaang hunahuna, ug gahum aron mahimo nimong mga Anak nga Lalaki sa mismong buhat!²³

Mga Sugyot alang sa Pagtuon

Unsay gipasabut sa “pag-ampo ngadto sa Ginoo diha sa pagkamapainubsanon ug diha sa hugot nga pagtuo”? Unsay gipasabut sa pagbaton og usa ka masulub-on ug mahinulsulon nga espiritu? Sa unsang paagi nga ang usa ka masulub-on ug mahinulsulon nga espiritu makatabang kanato sa pagduol sa Langitnong Amahan diha sa pag-ampo?
Nganong ang hugot nga pagtuo gikinahanglan man samtang kita mag-ampo? (Tan-awa usab sa Helaman 10:5.) Nganong kinahanglan man natong likayan ang mga pag-ampo nga binalik-balik? Unsay atong mabuhat aron himoon ang atong mga pag-ampo nga mas makahuluganon?
Nganong kinahanglan man kita nga andam “mosalikway sa tanan nga mahimong babag” sa pagdawat og tubag sa pagampo? Unsa man ang pipila niini nga mga babag?
Unsaon man nato sa “pagdala uban kanato ang diwa sa pagampo sa matag katungdanan nga kinahanglan natong ipahigayon sa kinabuhi”?
Unsa ang “grabe nga mga resulta” nga tingali atong masagubang kon atong ibaliwala ang pag-ampo sa pamilya?
Unsa ang nakapahimong hilabihan ka epektibo sa pag-ampo sa usa ka bata? Sa unsang paagi nga mahimo kitang mas mahisama sa usa ka bata diha sa atong mga pag-ampo?
Nganong importante man ang “pag-endorso” sa mga pagampo sa uban “pinaagi sa pulong nga amen”?
Nganong importante man ang pag-ampo alang sa uban? Sa unsa nga paagi nga ang pag-ampo alang sa kinatibuk-an ug sa lokal nga mga lider sa Simbahan makapanalangin kanila? Sa unsang paagiha kini makapanalangin kanato ug sa atong mga pamilya?