Ang Espiritu Santo

Ang Espiritu Santo nagpamatuod sa Amahan ug sa Anak ug naglihok isip usa ka sigurado nga giya ngadto sa tanan nga kamatuoran.

Gikan sa Kinabuhi ni Joseph F. Smith

Sa Abril 1854 nga kinatibuk-ang komperensya sa Simbahan, si Presidente Brigham Young mitawag ni Joseph F. Smith sa pagalagad og misyon ngadto sa Sandwich Islands (Hawaii). Si Joseph 15 anyos pa lamang. Ang iyang mama namatay di pa lang dugay, mibiya kaniya nga usa ka ilo. Ang iyang journal gikan nianang higayuna nagpakita nga siya nakat-on sa pagsalig sa Espiritu Santo alang sa kahupayan ug giya.

Pagka 8 sa Pebrero 1856, human sa pakigpulong ngadto sa mga Santos sa Hawaii, siya misulat, “Usa ka kusog nga presensya sa Espiritu ang nabati.” Pagka 19 sa Marso 1856, human sa lain nga pakigpulong, siya mirekord, “Sa unang higayon [ang mga Santos] nanghilak.” Pagka 30 sa Marso siya misulat, “Dayon ako mibarug ug misulay sa pagpamulong, apan gilupig sa mga luha.… Ang mga Santos miduyog kanako sa usa ka mubo ug kinasingkasing nga buhagay sa mga luha.” Pagka 29 sa Hunyo sa sama nga tuig ang iyang sinulat nagpakita nga siya nagsugod sa pagbati sa tibuok gahum sa iyang pangalagad: “Ang Espiritu sa Dios miuban kanamo sa tibuok adlaw.… Ako nagmalipayon, kay ang Espiritu nagpamatuod ngari kanako kabahin sa buhat sa Ginoo”¹

Sa kaulahian, isip sakop sa Korum sa Napulog Duha, si Joseph F. Smith miingon: “Sa akong una nga misyon ako nagsugod sa pagkat-on og usa ka butang alang sa akong kaugalingon; ako hangtud karon mituo sa mga pagpamatuod sa mga sulugoon sa Dios kinsa akong nadungog nga nakigsulti ug nagsangyaw, ingon man sa mga panudlo nga akong nadawat gikan sa usa ka pinakabuotan ug mapinanggaon nga inahan, ingon man usab sa unsay akong nasabtan pinaagi sa pagbasa sa Basahon ni Mormon, sa Doktrina ug mga Pakigsaad, ug sa Biblia. Apan diha sa pagpangalagad, diin ako nagkugi sa pagtrabaho, ako nagsugod sa pagkasabut og maayo, pinaagi sa pagdasig sa Balaang Espiritu, unsay nabasahan ug natudlo ngari kanako, ug mao nga kini nahimo na nga naestablisar nga kamatuoran diha sa akong hunahuna, diin ako sa hingpit ingon ka sigurado sama sa akong kaugalingong pagkaanaa.”²

Mga Pagtulun-an ni Joseph F. Smith

Ang gasa sa Espiritu Santo usa ka malungtaron nga saksi.

Ang Espiritu Santo usa ka personahe sa espiritu, siya naglangkob sa ikatulo nga tawo sa Trinity, ang Dios nga Kapangulohan. Ang gasa o pagtugyan sa Espiritu Santo mao ang buhat nga adunay awtoridad sa pagtugyan kaniya ngadto sa tawo. Ang Espiritu Santo sa iyang kaugalingon mahimong mobisita sa mga tawo ug mobisita niadtong kinsa angayan ug mohatag og pagsaksi ngadto sa ilang espiritu mahitungod sa Dios ug ni Kristo, apan dili mahimong magpabilin uban kanila [tan-awa sa D&P 130:22–23].³

“Ang gasa sa Espiritu Santo,” usa ka espesyal nga panalangin nga gisilyo diha sa naghinulsol nga mga tumutuo ni Jesukristo, ug “usa ka malungtaron nga saksi.” Ang espiritu sa Dios mahimong matagamtam isip usa ka temporaryo nga impluwensya diin ang balaanong kahayag ug gahum moabut ngadto sa katawhan alang sa espesyal nga mga katuyoan ug mga okasyon. Apan ang gasa sa Espiritu Santo, nga … gihatag diha sa kumpirmasyon, usa ka permanente nga saksi ug mas labaw nga tuga.⁴

Unsaon man nato sa pagbaton sa Espiritu Santo? Ang paagi o matang klaro nga gipahayag. Kita gisultihan nga magbaton og hugot nga pagtuo sa Dios, nga motuo nga siya mao, ug nga siya magabalus ra sa tanan kinsa makugihong nangita kaniya; nga maghinulsol sa atong mga sala, mobuntog sa atong mga pagbati, kabuang, ug pagkadili tarung; nga magmahiyason, matinuoron, ug matarung sa tanan natong mga gipangbuhat sa usag usa, ug mosulod ngadto sa pakigsaad uban sa Dios nga kita sukad karon mosunod sa mga baruganan sa kamatuoran, ug motuman sa mga sugo nga iyang gihatag kanato, dayon magpabunyag alang sa kapasayloan sa atong mga sala, pinaagi sa usa ka tawo nga adunay awtoridad; ug kon kini nga ordinansa sa ebanghelyo natuman na, kita mahimong modawat sa gasa sa Espiritu Santo pinaagi sa pagpandong sa mga kamot niadtong gihatagan sa awtoridad sa Priesthood. Sa ingon ang Espiritu ug ang gahum sa Dios—ang Maghuhupay—maanaa kanato nga usa ka tubod sa tubig nga magatubo ngadto sa pagkakinabuhing dayon. Siya mopamatuod sa Amahan, mopamatuod kang Jesus, ug “modala sa mga butang sa Amahan ug mopadayag niini nganha kanato,” nga molig-on sa atong pagtuo, mo-establisar diha kanato sa kamatuoran, nga kita dili na igatuyatuya ug igaliyokliyok sa tanang hangin sa tuluohan; apan mahimong “masayud sa doktrina” kon kini gikan ba sa Dios o sa tawo [tan-awa sa Mga Taga-Efeso 4:14; Juan 7:17].⁵

Ang Espiritu Santo, kinsa nagpamatuod sa Amahan ug sa Anak, kinsa modala sa mga butang sa Amahan ug mopakita niini ngadto sa mga tawo, kinsa nagpamatuod kang Jesukristo, ug sa buhi gayud nga Dios, ang Amahan ni Jesukristo, ug kinsa naghatag og pagsaksi sa kamatuoran—kini nga Espiritu, kini nga Salabutan, dili ihatag ngadto sa tanang mga tawo hangtud nga sila maghinulsol sa ilang mga sala ug moabut ngadto sa kahimtang nga angayan diha sa atubangan sa Ginoo [tan-awa sa 3 Nephi 28:11]. Dayon sila makadawat sa gasa sa Espiritu Santo pinaagi sa pagpandong sa mga kamot niadtong kinsa gitugutan sa Dios nga mohatag sa iyang mga panalangin diha sa mga ulo sa katawhan.⁶

Ang pagtugyan o “gasa” sa Espiritu Santo mao ang yano nga pagtugyan diha sa usa ka tawo og katungod sa pagdawat sa bisan unsa nga panahon, kon siya angayan niini ug nagtinguha niini, sa gahum ug kahayag sa kamatuoran sa Espiritu Santo, bisan tuod nga tingali kanunay siya ang magbuot sa iyang kaugalingong espiritu ug paghukom.⁷

Ang Espiritu Santo usa ka suga nga moiwag sa atong padayon nga paglakaw.

Ang katungdanan sa Espiritu Santo mao ang paghatag og pagpamatuod kang Kristo, o sa pagpamatuod kabahin niya, ug pagkumpirma sa tumutuo diha sa kamatuoran, pinaagi sa pagpahinumdom kaniya og balik sa mga butang nga nangagi na, ug sa pagpakita o sa pagpadayag ngadto sa hunahuna sa mga butang karon o sa umaabut. “Apan ang Manlalaban, diin mao ang Espiritu Santo, nga sa akong ngalan igapadala sa akong Amahan, siya ang magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo.” [Juan 14:26.] “Siya mao ang magatultol kaninyo ngadto sa tibuok nga kamatuoran.” [Juan 16:13.]⁸

Katungdanan sa mga Santos sa Ulahing mga Adlaw ang pagtudlo ngadto sa ilang mga anak … sa kamahinungdanon sa pagdawat sa gasa sa Espiritu Santo pinaagi sa pagpandong sa mga kamot, nga modala kanila ngadto sa tanang kamatuoran, ug nga mopadayag ngadto kanila sa mga butang nga nangagi na ug mga butang nga moabut pa, ug mopakita ngadto kanila sa mas klarong paagi niadtong mga butang nga anaa karon uban kanila, nga sila unta makasabut sa kamatuoran, ug nga sila unta maglakaw diha sa kahayag ingon nga si Kristo anaa sa kahayag; nga sila unta makabaton og pakigdait uban kaniya ug nga ang iyang dugo unta makalimpyo kanila gikan sa tanang sala.⁹

Adunay dalan nga gitakda alang kanato nga atong pagalaktan—mao kini ang higpit ug pig-ot nga agianan nga modala og balik ngadto sa presensya saDios; ang suga nga moiwag sa atong padayon nga paglakaw mao ang Espiritu Santo, nga atong nadawat sa diha o human sa atong bag-o nga pagkatawo. Kon kita matumba o moliko, ang atong suga magka-awop ug hangtud mapalong, kon sa diha nga, ang Manlalaban, ang tinubdan sa pagpadayag, mobiya kanato, ug ang kangitngit ang mopuli niini; dayon unsa kaha gayud ka grabe niana nga kangitngit! Ang katimbang sa kahayag nga atong naangkon mao ang kangitngit nga mobuntog kanato, ug gawas nga ang usa ka dinaliang paghinulsol pagahimoon ang kangitngit mag-anam og uswag diha kanato hangtud nga mawala na ang atong panan-aw sa atong calling ug malimot Kaniya kinsa mitubos kanato ug miangkon kanato nga iyaha.¹⁰

Ang katungdanan sa Balaang Espiritu mao ang paglamdag sa mga hunahuna sa mga tawo kabahin sa mga butang sa Dios, sa pagkumbinsir kanila sa panahon sa ilang pagkakabig sa ilang pagbuhat sa kabubut-on sa Amahan, ug maanaa kanila ang usa ka malungtarong pagpamatuod isip usa ka kauban sa kinabuhi, nga naglihok isip ang sigurado ug luwas nga giya ngadto sa tanan nga kamatuoran ug nagpuno kanila kada adlaw sa kalipay ug kamaya, uban sa tinguha sa pagbuhat og maayo ngadto sa tanang mga tawo, sa pag-antus nga maoy masaypan kaysa mobuhat og sayop, nga magmabination ug manggiloy-on, mainantuson ug manggihatagon. Ang tanan kinsa anaa niining dili masukod nga gasa, kining perlas nga labing bililhon, adunay padayon nga kauhaw sa pagkamatarung. Kon wala ang tabang sa Balaang Espiritu walay mortal nga tawo ang makahimo sa paglakaw diha sa higpit ug pig-ot nga agianan, kinsa dili makaila sa ensakto gikan sa sayop, ang tinuod gayud gikan sa sinundog, nga hilabihan gayud ka pareha kini kon tan-awon. Busa mipahimo kining angayan sa mga Santos sa Ulahing mga Adlaw sa pagpuyo nga putli ug ligdong, aron nga kini nga Espiritu mopuyo uban kanila; kay maangkon lamang kini diha sa baruganan sa pagkamatarung. Ako dili mahimong modawat niini alang kaninyo, ni kamo alang kanako; matag usa kinahanglan nga mobarug alang sa iyang kaugalingon, adunahan ka man o uyamot, maalam o walay kaalam, ug kini parehas nga pribilehiyo sa tanan nga mahimong mga tigambit niini.¹¹

Ang Espiritu Santo moadto lamang ngadto sa matarung ug ngadto niadtong kinsa napasaylo na sa ilang mga sala.… Sa ingon nga ang mga Santos sa Ulahing mga Adlaw nagpadayon sa pagsunod sa mga sugo sa Dios, sa pagpasalamat sa mga pribilehiyo ug mga panalangin nga ilang natagamtam diha sa Simbahan, ug mogamit sa ilang panahon, ilang kabtangan, sa pagdayeg sa pangalan sa Dios, sa pagpalambo sa Zion, ug sa pag-establisar sa kamatuoran ug pagkamatarung diha sa yuta, sa ingon nga ang atong langitnong Amahan mapugos pinaagi sa iyang panumpa ug pakigsaad sa pagpanalipod kanila gikan sa matag kaatbang nga kaaway, ug sa pagtabang kanila sa pagbuntog sa matag babag nga posible nga gibutang batok kanila, o gilabay diha sa ilang agianan; apan sa higayon nga ang usa ka komunidad magsugod nga magpataas sa ilang mga kaugalingon, mahimong hakog, mahimong linga sa temporaryong mga butang sa kinabuhi, ug mobutang sa ilang pagtuo diha sa mga bahandi, nianang higayuna ang gahum sa Dios mosugod sa pagpalayo gikan kanila, ug kon sila dili maghinulsol ang Balaan nga Espiritu mopahawa gikan kanila sa hingpit, ug pasagdan na lang sila nga sila ra.¹²

Kamo kinsa nakasunod sa mga gikinahanglan sa walay katapusang Ebanghelyo, ug nga napili gikan sa kalibutan, nga nakadawat sa gasa sa Espiritu Santo pinaagi sa pagpandong sa mga kamot, inyo kining pribilehiyo ang pagdawat sa pagsaksi sa Espiritu alang sa inyong kaugalingon; inyo kining pribilehiyo sa pagila sa hunahuna ug kabubut-on sa Amahan mahitungod sa inyong kaugalingong kaayohan, ug mahitungod sa katapusang kadaugan sa buhat sa Dios.¹³

Pinaagi sa gahum sa Espiritu Santo, kita natawo pag-usab.

Ang Manluluwas miingon ngadto kang Nicodemo, “Gawas kon ang tawo igaanak pag-usab, dili siya makakita sa gingharian sa Dios,” [tan-awa sa Juan 3:3] ug kana tinuod karon. Ang usa ka tawo kinahanglan nga matawo gikan sa kawalay kahibalo paingon ngadto sa kamatuoran, karon.… Kon wala man siya natawo, siya mas buta pa kaysa usa ka tawo kinsa giayo ni Kristo, kay may mga mata apan dili makakita, ug may mga dunggan, dili makadungog.¹⁴

Kana nga kausaban miabut karon sa matag anak nga lalaki ug anak nga babaye sa Dios kinsa naghinulsol sa iyang mga sala, kinsa nagpaubos sa ilang mga kaugalingon sa atubangan sa Ginoo, ug kinsa nagtinguha sa pagpasaylo ug kapasayloan sa sala pinaagi sa bunyag pinaagi sa pagpaunlod, pinaagi sa usa ka tawo nga adunay awtoridad sa pagpangalagad niining sagrado nga ordinansa sa ebanghelyo ni Jesukristo. Kay pinaagi niining bag-ong pagkatawo nga gipamulong ni Kristo ngadto kang Nicodemo nga ingon gayud ka mahinungdanon aron ang katawhan mahimong makakita sa gingharian sa Dios, ug kon wala kini walay tawo nga makasulod ngadto sa gingharian. Matag usa kanato makahinumdom, tingali, sa kausaban nga miabut sa atong mga kasingkasing sa dihang kita gibunyagan alang sa kapasayloan sa atong mga sala.… Ako namulong kabahin sa impluwensya ug gahum sa Balaang Espiritu nga akong nasinati dihang ako gibunyagan alang sa kapasayloan sa akong mga sala. Ang pagbati nga miabut ngari kanako mao kanang sa tinuod nga kalinaw, sa gugma ug sa kahayag…

O! nga ako untang napabilin kanang ingon nga espiritu ug kanang ingon ka mainiton nga tinguha diha sa akong kasingkasing matag gutlo sa akong kinabuhi gikan nianang adlawa hangtud niini. Sa gihapon daghan kanato kinsa nakadawat niana nga pagsaksi, niana nga bag-ong pagkatawo, niana nga kausaban sa kasingkasing, samtang kita mahimong masayop diha sa paghukom o nakahimo og daghang mga sayop, ang sa kasagaran tingali mapakyas sa pagsunod sa tinuod nga sumbanan sa atong mga kinabuhi, kita naghinulsol sa dautan, ug kita nangayo matag karon ug unya sa pagpasaylo diha sa kamot sa Ginoo; aron nga hangtud niining adlawa ang ingon nga tinguha ug katuyoan nga mipuno sa atong mga kalag sa diha nga kita nabunyagan ug nakadawat sa kapasayloan sa atong mga sala, mao gihapon ang nagkupot sa atong mga kasingkasing, ug mao gihapon ang nagdumalang pagbati ug kahinam sa atong mga kalag. Bisan may higayon nga kita maaghat ngadto sa kasuko, ug ang atong kapungot makapahimo kanato sa pagsulti ug pagbuhat sa mga butang nga dili ikahimuot diha sa panan-aw sa Dios, apan sa kalit nga pagbalik sa atong malinawong panimuot ug pagbawi gikan sa atong pagkaligas ngadto sa gahum sa kangitngit, kita mobati og pagkamapainubsanon, pagkamahinulsulon, ug pagpangayo og pasaylo alang sa sayop nga atong nahimo sa atong mga kaugalingon, ug tingali ngadto sa uban. Ang dako, mainiton, malukpanon nga tinguha, nga natawo sa kamatuoran ug sa pagsaksi sa Balaang Espiritu diha sa mga kasingkasing sa mga tawo kinsa nagsunod sa kamatuoran, moangkon og impluwensya ug mao na usab ang manag-iya sa atong mga kalag, nga magdala kanato ngadto sa dalan sa katungdanan. Kini ang akong pagpamatuod ug ako nasayud nga kini tinuod.¹⁵

Ang sala nga dili mapasaylo mao ang tinuyo nga paglimud ug pagsupak sa Espiritu Santo human madawat ang Iyang pagsaksi.

Walay tawo ang mahimong makasala batok sa kahayag hangtud nga siya aduna niini; ni batok sa Espiritu Santo, hangtud human siya makadawat niini pinaagi sa gasa sa Dios pinaagi sa gitudlo nga agianan o paagi. Ang pagpakasala batok sa Espiritu Santo, ang Espiritu sa Kamatuoran, ang Manlalaban, ang Saksi sa Amahan ug sa Anak, tinuyong paglimud ug pagsupak kaniya, human makadawat kaniya, nagbuhat og [sala nga dili mapasaylo].¹⁶

Walay tawo nga posible nga makahimo sa pagbuhat og sala nga dili mapasaylo diha sa ka walay kahibalo. Ang usa ka tawo kinahanglang modangat ngadto sa kahibalo kang Kristo; siya kinahanglang makadawat og usa ka pagpamatuod kang Kristo diha sa iyang kasingkasing, ug makaangkon sa kahayag ug gahum, kahibalo ug pagsabut, sa dili pa siya makahimo sa pagbuhat niana nga sala. Apan kon ang usa ka tawo mopahilayo gikan sa kamatuoran, mosupak sa kahibalo nga iyang nadawat, moyatak niini sa iyang mga tiil, mopakaulaw pag-usab kang Kristo sa dayag, molimud sa Iyang pag-ula, molimud sa gahum sa pagkabanhaw, molimud sa mga milagro nga Iyang gihimo alang sa kaluwasan sa tawhanong pamilya, ug moingon diha sa iyang kasingkasing, “Kini dili tinuod”, ug magpabilin niana nga paglimud sa kamatuoran, human makadawat sa pagpamatuod sa Espiritu, siya nakahimo og sala nga dili mapasaylo.¹⁷

[Human sa Paglansang sa Krus sa Manluluwas,] ngano man nga [ang mga Apostoles] limtanon ug mora og walay kahibalo sa tanan nga gitudlo kanila sa Manluluwas kabahin sa mga butang sa iyang misyon sa yuta? Tungod kay sila kulang sa usa ka importante nga kwalipikasyon, sila wala pa “masul-uban sa gahum gikan sa kahitas-an.” [Tan-awa sa Lucas 24:49.] Wala pa sila makabaton sa gasa sa Espiritu Santo.…

Kon ang mga disipulo natugahan pa sa “gasa sa Espiritu Santo,” o “sa gahum gikan sa kahitas-an,” niining higayuna, ang ilang dalan tingali sa hingpit lahi kaayo …, ingon nga makita sa sunod nga kalamboan. Kon si Pedro, kinsa mao ang pangulo nga apostol, nakadawat pa sa gasa sa Espiritu Santo, ug sa gahum ug pagpamatuod niana sa wala pa ang makalilisang nga gabii diin siya mitunglo ug nanumpa ug milimud sa iyang Ginoo [tan-awa sa Mateo 26:69–75], ang resulta lahi unta kaayo ngadto kaniya, kay niana siya unta makasala batok sa “kahayag ug kahibalo,” ug “batok sa Espiritu Santo,” kay ang sa ingon walay kapasayloan. Ang tinuod, tungod niini, nga siya napasaylo, human sa mapait nga paghinulsol, usa ka ebidensya nga siya wala pa sa pagsaksi sa Espiritu Santo, kay wala pa sukad makadawat niini. Ang uban nga mga disipulo o mga apostoles ni Kristo sa walay duhaduha anaa usab sa sama nga kahimtang, ug ingon kini hangtud sa gabii sa adlaw nga si Jesus mibangon gikan sa lubnganan nga siya mitugyan ngadto kanila niining dili masukod nga gasa [tan-awa sa Juan 20:22].¹⁸

Sa wala pa ang nabanhaw nga Manunubos mibiya sa yuta siya mimando sa iyang mga disipulo sa pagpabilin didto sa siyudad sa Jerusalem hangtud nga sila matugahan sa gahum gikan sa kahitasan. Sila mibuhat sa ingon, ug nahimuot sa saad, ang Manlalaban miabut kon asa sila nagkapundok, mipuno sa ilang mga kasingkasing sa dili matukib nga kalipay, sa ingon nga sila namulong sa mga pinulongan ug nanagna; ug ang makapadasig nga gahum niining balaang nilalang nag-uban kanila sa tibuok nila nga gidumalahan nga mga katungdanan, nakapahimo kanila sa pagpahigayon og mahinungdanon nga misyon diin sila gitawag sa Manluluwas.¹⁹

Si Saulo, nga taga-Tarsus, nga nakabaton og talagsaong salabutan ug kaalam, gimatuto sa tiilan ni Gamaliel, natudloan sumala sa hingpit nga pamaagi sa balaod, milutos sa mga Santos ngadto sa kamatayon, migapos ug mipabalhug ngadto sa mga bilanggoan sa mga lalaki ug mga babaye; ug sa diha nga ang dugo sa Martir nga si Esteban mibanaw, si Saulo mibarug pinaagi sa paghupot sa saput niadtong mipatay kaniya, ug mitugot sa iyang kamatayon. Ug “siya nagpadayon og daot sa Simbahan, sa pagpanaka sa kabalayan, ug sa pagtaral sa mga lalaki ug mga babaye sa pagbanlod kanila sa bilanggoan.” [Mga Buhat 8:3.] Ug sa dihang gipamatay sila, siya mipahayag sa iyang tingog batok kanila, ug siya “sa makadaghan midagmal kanila sa tanang mga sinagoga, ug mipugos kanila sa pagpanampalas; ug sa mabangis nga kapungot batok kanila, migukod kanila hangtud sa mga siyudad nga atua na sa gawas sa nasud,” [Mga Buhat 26:11] ug sa gihapon kini nga tawo wala makahimo og sala nga dili mapasaylo, tungod kay wala siya masayud sa Espiritu Santo.²⁰

Kon ang si bisan kinsa nga mga tawo sa yuta makahimo og sala nga dili mapasaylo, kamo makakita kanila taliwala niadtong kinsa nakadawat na, o modawat pa, sa kahibalo sa kamatuoran.… Kamo ug ako nakadawat sa kahayag. Kita nakadawat sa Balaan nga Priesthood. Kita nakadawat sa pagpamatuod sa Balaang Espiritu, ug naluwas gikan sa kamatayon ngadto sa kinabuhi. Busa, kita karon anaa sa hilabihan ka luwas o sa makuyaw nga kahimtang,—makuyaw kon kita nagtiaw-tiaw uban niining sagrado nga mga butang nga gisalig aron atong ampingan. Gikan karon ako mopasidaan kaninyo, akong igsoong mga lalaki ug mga babaye, labi na akong igsoong mga lalaki, batok sa pagtiaw-tiaw sa inyong [priesthood].… Kon inyo kining buhaton, ingon nga ang Dios buhi Siya mokuha sa Iyang Espiritu gikan kaninyo, ug ang higayon moabut nga kamo makita nga nakigaway batok sa kahayag ug kahibalo nga inyong nadawat, ug kamo mahimong mga anak sa kapildihan. Busa, mas maayo nga mag-amping kamo basin unya og ang ikaduha nga kamatayon ipahamtang diha kaninyo.²¹

Mga Sugyot alang sa Pagtuon

Unsa man ang kalainan tali sa temporaryo nga impluwensya o pagpabati sa Espiritu Santo ug sa gasa sa Espiritu Santo? (Tan-awa sa Moroni 10:4.) Unsaon nato sa pagdawat ang gasa sa Espiritu Santo? Unsa man nga mga panalangin ang moabut kanato kon atong tahuron kini nga gasa?
Sa unsang paagi nga ang Espiritu Santo makagiya kanato ngadto sa tanan nga kamatuoran? (Tan-awa sa Juan 16:13.) Unsa man nga mga kamatuoran ang gipamatuod sa Espiritu Santo nganha kaninyo?
Ngano nga ang suga man ang usa ka maayo nga simbolo aron sa pagrepresentar sa Espiritu Santo? Unsa man ang atong buhaton aron sa pagsiguro nga kini nga suga hayag kaayo og siga diha sa atong mga kinabuhi?
Unsa man ang atong mabuhat aron molambo ang impluwensya sa Espiritu Santo diha sa atong mga kinabuhi? Unsaon nato sa pagtabang sa uban nga masabtan kon sa unsa nga paagi nga ang Espiritu Santo makapanalangin sa ilang mga kinabuhi?
Unsa man ang kinahanglan natong buhaton aron madawat ang bag-o nga pagkatawo nga gipamulong sa Manluluwas? (Tan-awa sa Juan 3:5.) Unsa man nga mga pagbati ang kauban niini nga bag-o nga pagkatawo? Unsaon man nato sa pagpabilin niini nga mga pagbati? (Tan-awa sa Alma 5:14–16, 26.)
Unsa man ang sala nga dili mapasaylo? Unsay buot ipasabut sa pagtiaw-tiaw sa “sagrado nga mga butang nga gisalig aron atong ampingan”?