Kapitulo 36: Ang Pulong sa Kaalam: Usa ka Balaod alang sa Pisikal ug Espirituhanon nga Kahimsog sa mga Santos

Kapitulo 36

Ang Pulong sa Kaalam: Usa ka Balaod alang sa Pisikal ug Espirituhanon nga Kahimsog sa mga Santos

Ang pagsunod sa Pulong sa Kaalam mopalig-on sa atong mga lawas, mopabayaw sa atong mga kalag, ug modala kanato nga mas mapaduol sa Dios.

Gikan sa Kinabuhi ni Joseph F. Smith

Si Presidente Joseph F. Smith mitudlo nga ang Pulong sa Kaalam mas labaw pa kay sa pagdili batok sa tsa, kape, tabako, ug alkohol; naglakip kini sa praktikal nga tambag alang sa maayong panglawas ug espirituhanong pagtubo, ug kadtong mga Santos nga nagsunod niini mas labaw pa nga mapaduol sa Ginoo ug mahimong mas mahisama Kaniya. Sa pagpahinumdom sa mga Santos sa pagkamahinungdanon sa Pulong sa Kaalam, usahay mobasa siya sa Doktrina ug mga Pakigsaad 89 sa kinatibuk-an niini sa usa ka miting. “Karon, daw kini sa kinatibuk-an wala kinahanglana ug dili angay, tingali, sa kadaghanan, nga akong hutdon ang oras niining dakong katiguman sa pagbasa niini nga pinadayag,” sa makausa siya miingon, apan basaha gihapon ang matag pulong niini aron masabtan og maayo ang mahinungdanong bili sa mensahe.¹

Siya miingon: “Akong nahinumduman ang usa ka panghitabo mga tulo na ka tuig ang milabay sa usa ka grupo sa mga tawo nga gikauban nako sa pagbiyahe. Dihay usa o duha ka tawo nga namugos nga muinom og tsa o kape sa matag dapit nga among hunongan. Gisangyaw nako ang Pulong sa Kaalam sa tibuok higayon; apan sila miingon, ‘Unsa may nakalain niana? Aniay daghang mga tawo, kinsa manginom og tsa ug kape.’ … Miingon akousa niana ka higayon, ‘O, bitaw, moingon kamo nga maayo kining butanga nga muinom og gamay nga tsa o kape, apan ang Ginoo miingon nga dili kini maayo. Unsay akong sundon?’ Ang Ginoo miingon nga kon mosunod kita sa Pulong sa Kaalam mahimo nga makaangkon kita og dakong bahandi sa kahibalo, ug mga tinago nga bahandi; modagan kita ug dili maluya, molakaw kita ug dili makuyapan; ug ang tiglaglag nga anghel mosaylo kanato, sama sa iyang gibuhat sa mga anak sa Israel, ug dili mopatay kanato…. Mag-ampo ako alang kaninyo ug matinguhaon nga maghangyo kaninyo, akong mga kaigsoonan, … sa paghunong sa paggamit niining gidili nga mga butang, ug mosunod sa mga balaod sa Dios.”²

Mga Pagtulun-an ni Joseph F. Smith

Kinahanglan nga mosunod kita sa Pulong sa Kaalam alang sa atong kaayohan ug kauswagan.

Atong makita ang mahinungdanong mga katarungan alang sa mga baruganan nga gilakip niini nga kapitulo sa basahon sa Doktrina ug mga Pakigsaad [seksyon 89] nga gitudlo sa kalibutan, ug ilabi na gayud sa mga Santos sa UIahing mga Adlaw. Walay laing labaw pa o kubus kaysa nianang simple nga Pulong sa Kaalam nga gihatag niadtong 1833, alang sa kaayohan, sa panabang, ug sa kauswagan sa mga Santos sa Ulahing mga Adlaw, nga sila unta mahinlo ug maandam sa ilang kaugalingon aron labaw pa nga mapaduol diha sa presensya sa Ginoo, nga pinaagi sa paghupot niini nga balaod sila unta mahimong andam sa ilang kaugalingon sa pagpahimulos sa mga panalangin nga labaw pa Siyang andam nga motugyan nganha kanila, kon sila takus….

Gusto lamang akong mosulti kaninyo akong mga kaigsoonan, nga walay laing paagi nga atong madala sa kalibutan, nga may kalabutan sa atong temporal nga kaayohan ug kahimsog, labaw pa ka maayo kay sa nianang gitudlo kanato sa Ginoong Dios. Nganong dili man kita makaamgo niini? Nganong dili man kita makabaton og hingpit nga salabutan niini? Nganong dili man nato hikawan ang atong kaugalingon nianang gitinguha sa atong tinalawan nga mga kahinam? Nganong dili man nato sundon ug tumanon ang kabubut-on sa Ginoo ingon nga gibutyag kanato pinaagi niini nga pagpadayag? … Kon kini nga sugo gisunod pa unta sa tanang katawhan, ang dakong kantidad sa salapi nga napagawas karon sa kalibutan alang sa makahubog nga ilimnon ug kining uban nga mga butang nga gidili sa pulong sa kaalam, mahimo nga mahipos diha sa panimalay, ug ang kahimsog, kauswagan ug temporal nga kaluwasan sa katawhan mahimo nga magkadugang sa tukma nga paagi. Walay tawo nga makalapas sa mga balaod sa Dios nga may kalabutan sa kahimsog ug temporal nga kaluwasan, ug magpahimulos niadtong mga panalangin sa sama nga matang nga iyang mabuhat ug buhaton kon iyang sundon ang mga sugo sa Dios….

Walay miyembro sa Simbahan ni Jesukristo sa mga Santos sa Ulahing mga Adlaw ang makaako sa pagbuhat sa iyang kaugalingon sa pagdaut sa dungog o sa paghatag sa iyang kaugalingon sa pagpakaulaw, sa pagsulod sa mga balay imnanan o usa ka balay pasugalan…. Walay Santos sa Ulahing mga Adlaw, walay miyembro sa Simbahan nga makaako niini, kay makapakubos kini kaniya, makauulaw diha kaniya sa pagbuhat niini, ug ang Dios magahukom kaniya sumala sa iyang mga binuhatan. Ang lalaki o babaye kinsa tinuod nga nagtuo sa mga doktrina sa Simbahan o nangangkon nga miyembro sa Simbahan, kinsa nagtuo o nagsunod sa mga baruganan nga nalakip niining “Pulong sa Kaalam,” dili gayud malakip tali niadtong kinsa modala niini nga pagpakaulaw kanila, sa ilang mga silingan o diha sa Simbahan diin sila nahisakop; dili gayud sila mobuhat niini.

… Ang Ginoo dili mahimuot sa pagkamapatuyangon, sa pagkapalahubog, ni malipay Siya sa kakabus, sa pagpakaulaw ug kalaglagan nga sangputanan sa ingon nga mga binuhatan diha sa ilang pagkapalahubog ug niadtong kinsa nagdepende niini, ang pagkadaot sa pagkalalaki, ang pagkaguba sa mga organisasyon sa pamilya ug ang pagpakaulaw niadtong naghimo niini ug nianang nagdala og kakabus, kalaglagan, ug kamatayon sa ilang kaugalingon ug sa ilang mga pamilya. Ang kada miyembro sa Simbahan, lalaki ug babaye, kinahanglan unta nga hugtanong mosupak batok sa pagkamapatuyangon ug batok sa bisan unsang butang nga nakalapas sa mga balaod sa Dios, nga dili gayud unta sila mabuntog o mosunod sa pagtintal sa yawa. Kinahanglan nga kita unta adunay mas lunsay nga mga komunidad, mga komunidad nga wala maglunang sa bisyo, pinaagi sa makadaut nga mga kinaiya ug mga binuhatan….

Tingali kadtong kinsa naanad na niini nga mga kinaiya naghunahuna nga usa kini ka hilabihan ka walay bili o hilabihan ka walay hinungdan nga butang nga pagahisgutan ngadto sa baga kaayo nga kongregasyon nga sama niini, apan sa kada higayon nga akong makita ang usa ka batang lalaki, o usa ka tawo, batan-on o tigulang, nga naadik niini nga mga kinaiya ug sa dayag nagbuhat niini; mapugos ako sa paghukom sa akong hunahuna nga siya ignorante sa kabubut-on sa Dios kabahin sa tawo o masupakon sa kabubut-on sa Dios ug wala magtagad sa bisan unsang butang mahitungod sa pulong sa Ginoo, ug kana lamang igo na sa pagdala og kasub-anan sa kasingkasing sa bisan kinsa nga tawo kinsa adunay pagtagad o pagtahud alang sa pulong o kabubuton sa Ginoo ug gusto nga makita kini nga gisunod….

… Mag-ampo kita sa Dios aron sa pag-ayo kanato kon masakit kita, ug dayon malimot sa atong mga pag-ampo ug moambit sa tanang butang nga gisulti Niya kanato nga dili maayo! Pagkadili gayud angay kini alang sa mga tawo sa pagpangayo sa Dios nga panalanginan sila, nga sila mismo naghimo og paagi sa pagpasakit ug pagdala og kadautan sa ilang mga kaugalingon. Dili ikahibulong nga dili tubagon ang atong mga pag-ampo labaw kay sa atong gihimo, ug dili ikahibulong nga ang atong kahimsog dili mas maayo kay sa niini, kon naadik kita sa mga binuhatan nga giingon sa Dios nga dili maayo alang kanato ug sa ingon modala og mga kadautan sa atong kinabuhi ug pisikal nga kaayohan; ug dayon moduol sa Ginoo ug mohangyo Kaniya sa pag-ayo kanato gikan sa mga linugdangan sa atong kaugalingong kabuang, ug makadaot nga mga binuhatan; gikan sa mga epekto sa kadautan nga atong gidala sa atong mga kaugalingon ug nga mas nakahibalo pa kita kay sa pagbuhat niini. Pagkabinuang gayud niini!³

Kon makakita ako og usa ka tawong nangangkon nga usa ka Santos sa Ulahing mga Adlaw, o gani nangangkon nga usa ka miyembro sa Simbahan, … nga nanimaho ang iyang gininhawa sa makahubog nga ilimnon, uban sa mga aso sa tabako, o wala kinahanglana nga nagpatuyang sa mga pangpalagsik, nakapasubo kini sa akong espiritu, mobati ako og kalooy kaniya ug sa masubanon nga pagbasol, ug mahibulong ako kon ngano nga kita, sa tinagsa-tagsa, dili makaamgo sa atong kaugalingong kabuang, sa atong pagkaubos sa pagnunot niining makadaut nga mga kinaiya nga dili magamit o ikadayandayan, ni sa pinakakubus nga matang dili mapuslanon, apan sa pagkatinuod makadaut. Nganong dili man kita mahimong mosaka nianang matang sa salabutan nga makahimo kanato sa pag-ingon ngadto sa maninintal, “Palayo kanako,” ug sa pagbiya sa pagbuhat og dautan. Pagkamakauulaw niini sa usa ka mahunahunaon nga tawo nga mobati nga siya usa ka ulipon sa iyang mga kahinam, o ngadto sa usa ka naghingapin ug dautan nga kinaiya, tinguha, o kahinam.⁴

Pinaagi sa pagsunod sa Pulong sa Kaalam, kita makapasalamat gayud niini.

Kinahanglan nga atong sundon ang Pulong sa Kaalam nga gihatag kanato…. Ang palahubog mahimong usa ka ulipon sa iyang pag-inom; ang uban nahimong mga ulipon sa paggamit og tsa, kape ug tabako, ug mao nga gihunahuna nila kini nga gikinahanglan sa ilang kalipay; apan sa pagkatinuod kini wala kinahanglana sa ilang kalipay ni ngadto sa ilang panglawas. Sa pagkatinuod, makadaot kini sa panglawas…. Mao nga pinaagi lamang sa pagsunod sa pulong sa Ginoo nga kita makapasalamat gayud niini, dili kay tan-awon lamang kini nga walay gibuhat niini. Kon atong buhaton ang kabubut-on sa Ginoo, diha atong mahibaloan ang doktrina, nga sa Dios kini; unya kon magtukod kita diha sa bato; dayon ang mga baha mobul-og ug ang mga unos mohapak sa balay, dili kini malumpag.⁵

Niining binuang nga lumba sa kinabuhi alang sa kalibutanon nga mga kadungganan ug alang sa pagpanag-iya sa mahanaw nga mga butang niini nga yuta ang mga tawo dili gayud mohunong hangtud nga sila maluya, ug dili mopahulay hangtud nga dili makuyapan. Makita nga naghunahuna sila nga ang gikinahanglan alang kanila kon maluya ug makuyapan sila mao ang pagtumar og mga pangpalagsik aron sa pagpabaskog sa ilang kaugalingon, nga makahimo unta sila sa pagdagan og gamay nga gilay-on sulod sa pipila ka mga higayon. Niining paagiha ang negosyanteng tawo mopalagsik sa iyang kaugalingon pinaagi sa pag-inom og makahubog nga mga ilimnon. Ang asawa sa panimalay ug ang inahan nga kinsa nag-atiman sa iyang pamilya isipiyang katungdanan, human sa makapakuyap nga trabaho, mibati nga siya kinahanglan gayud, aron maulian ang iyang kusog, muhigop og usa ka tasa nga tsa, ug sa ingon mopalagsik sa iyang mga kaugatan ug mopalig-on sa kaugalingon sa makadiyot aron unta makahuman siya sa inadlaw niyang trabaho. Karon, kon ang lunsay nga salabutan sa Espiritu sa Dios pagapulihan sa makapalagsik nga impluwensya sa tsa ug sa bino; kon makahimo kita pinaagi sa pipila ka mga tinubdan nga makakuha og igo nga bahin sa Espiritu sa Ginoo diha kanato nga makahimo kanato nga masayud kon unsay igong buhaton kon gibati nato ang pagkaluya ug kakuyapon nga moabut kanato, sa walay pagdangup sa panabang sa mga pangpalagsik ug mga druga nga modaut pag-ayo sa atong mga sistema ug mopaulipon kanato, ngadto sa gitinguha nga kagana, mahimo kining mas labaw pa kamahinungdanon nga butang alang kanato….

Mas gusto pa nakong mobati og kakapoy ug kaluya gikan sa pagtrabaho, ug tugotan ang kinaiyahan nga makabaton og kahigayunan sa pagpahiuli niini mismo, kay sa mosulay ako sa pagtambal sa akong kaugalingon pinaagi sa paggamit sa mga narkotiko ug mga druga nga molaglag sa tukuran sa akong pisikal ug espirituhanon nga kahimsog. Apan tungod kay wala kita mosunod sa Pulong sa Kaalam, unsaon man nato sa pagbaton sa kaalam, kahibalo ug salabutan diin kita mahimong pagadumalahon sa atong kaugalingong pamatasan? Ang saad mao nga kon kita magsunod niini makabaton kita og kahibalo, ug ang tiglaglag mosaylo lamang kanato, ug makalingkawas kita niadtong mga kadaut nga modangat gikan sa mga dautan.⁶

Ang pagsunod sa Pulong sa Kaalam modala kanato nga mas duol nga mamahimong sama sa Ginoo.

Nagtuo ako nga nagkaduol kita sa punto diin makahimo kita sa pagsunod nianang mahinungdanon ug mahimayaon nga balaod sa pagkadili mapatuyangon nga gihatag kanato sa Ginoo nga Labawng Makagagahum, diin siya miingon nga ang makahubog nga ilimnon dili maayo, nga ang tabako dili alang sa naandan nga paggamit sa tawo, dili alang sa tiyan…. Miabut kita sa salabutan nga ang Ginoo nasayud sa pinakamaayo, sa diha nga Iyang gitugyan ngadto sa Simbahan, pinaagi ni Propeta JosephSmith, kanang “Pulong sa Kaalam,” nga gilakip diha sa basahon sa mga pinadayag nga gikan sa Ginoo…. Ang kadaghanan nga mga tawo sa Simbahan ni Jesukristo sa mga Santos sa Ulahing mga Adlaw nag-anam og kaduol sa usa ka tukma nga pagsunod sa balaod nga gihatag sa Ginoo kanato alang sa atong kahimsog, alang sa pagpatunhay sa atong mga kinabuhi; nga kita unta mahiuyon uban sa Iyang Espiritu ug sa Iyang kabubut-on, nga kita unta mahimong limpyo ug walay mansa, nga kita unta mas hapit nga mahisama Kaniya Kinsa walay sala, Kinsa tinuod nga putli ug balaan ingon nga ang Dios putli ug balaan.⁷

Ang batan-on nga tawo kinsa gusto nga makigbisog sa kalibutan, kinsa mahimong puno sa kalagsik, ug baskog alang sa pakigbugno sa kinabuhi, makakaplag sa iyang kalig-on sa pagpakabuhi sumala sa pulong sa Ginoo; tungod kay ang saad mao nga ang tanan “kinsa mahinumdom sa pagsunod ug sa pagbuhat niini nga mga panultihon, maglakaw nga masulundon sa mga sugo, makadawat og maayo nga panglawas ug uyok sa ilang mga kabukogan, ug makakita og kaalam ug dako nga mga bahandi sa kahibalo, gani ang mga tinago nga mga bahandi; ug modagan ug dili maluya, ug molakaw ug dili makuyapan; ug Ako, ang Ginoo, mohatag ngadto kanila og usa ka saad, nga ang tiglaglag nga anghel mosaylo kanila, ingon sa mga anak sa Israel, ug dili mopatay kanila.” [Tan-awa sa D&P 89:18–21.]⁸

Kini ba nga mahimayaon nga mga saad dili paigo aron sa pagaghat kanato sa pagsunod niini nga Pulong sa Kaalam? Wala bay usa ka butang dinhi nga takus sa atong pagtagad? Dili ba ang “dako nga mga bahandi” sa kahibalo, gani “tinago nga mga bahandi,” usa ka butang nga pagatinguhaon? Apan kon makakita ako og mga lalaki ug mga babaye nga gianad ang ilang kaugalingon sa paggamit sa tsa ug kape, o makahubog nga mga ilimnon, o tabako sa bisan unsa nga matang, moingon ako sa akong kaugalingon, aniay mga lalaki ug mga babaye nga wala magtamud sa saad sa Dios nga gihatag ngadto kanila. Ila kining gitunob-tunoban sa ilang mga tiil, ug gitagad kini isip usa ka butang nga walay bili. Gitamay nila ang pulong sa Dios, ug naghimog supak niini pinaagi sa ilang mga binuhatan. Dayon kon ang kalisdanan modangat ngadto kanila, hapit na lang tunglohon nila ang Dios,tungod kay dili niya tubagon ang ilang mga pag-ampo, ug pasagdan sila nga mag-antus sa sakit ug ka sakit.⁹

Karon, nangandoy ako uban sa tibuok kong kasingkasing—dili tungod kay ako kining gisulti, kondili tungod kay nahisulat kini sa pulong sa Ginoo—nga kinahanglang patalinghugan ninyo kini nga Pulong sa Kaalam. Gihatag kini ngari kanato … alang sa atong paggiya, alang sa atong kalipay ug pag-uswag sa kada baruganan nga may kalabutan sa gingharian sa Dios, sa karon ug sa tibuok kahangturan, ug nag-ampo ako alang kaninyo aron sundon kini. Makaayo kini kaninyo; makapabayaw kini sa inyong mga kalag, makapalingkawas kini sa inyong mga hunahuna ug inyong mga kasingkasing gikan sa espiritu sa kalaglagan; makapabati kini kaninyo nga sama sa Dios, kinsa mipatunhay bisan pa gani sa langgam nga goryon, nga dili kini mahulog sa yuta nga dili niya mamatikdan; modala kini kaninyo nga mas duol sa pagkahisama sa Anak sa Dios, ang Manluluwas sa kalibutan, kinsa miayo sa masakiton, kinsa mihimo sa bakol nga makaambak tungod sa kalipay, kinsa mipahiuli sa pangdungog sa bungol ug panan-aw sa buta, kinsa misabwag og kalinaw, hingpit nga kalipay, ug kahupayan ngadto sa tanan nga iyang gikasugat.¹⁰

Mga Sugyot alang sa Pagtuon

Sa unsa nga mga katuyoan ang Pulong sa Kaalam gihatag kanato? (Tan-awa usab sa D&P 89:1–4.)
Sa unsang paagi ang makapaanad nga mga butang o mga binuhatan mogapus sa atong mga lawas ug makapawala sa atong pagkadali nga mobati ngadto sa impluwensya sa Espiritu?
Unsa nga mga matang sa “pagpakaulaw ug kalaglagan” ang sagad mag-uban sa pagkadili masulundon sa Pulong sa Kaalam? Kon mobaliwala ang mga tawo sa tambag diha sa Pulong sa Kaalam, sa unsa nga paagi ang ilang mga minahal sa kasagaran mag-antus?
Sa unsang paagi nga ang pagsunod sa Pulong Sa Kaalam makatabang kanato nga adunay “mas lunsay nga mga komunidad, mga komunidad nga wala maglunang sa bisyo, uban sa makadaut nga mga kinaiya ug mga binuhatan.”
Sa unsang paagi nakat-unan ninyo ang pagpasalamat sa Pulong sa Kaalam pinaagi sa “pagsunod sa pulong sa Ginoo”? (Tan-awa usab sa Juan 7:17.)
Sa unsang paagi inyong nakita nga natuman ang mga saad nga gihatag diha sa Doktrina ug mga Pakigsaad sa inyong kaugalingong kinabuhi o sa mga kinabuhi sa uban? (Tan-awa usab sa D&P 89:18–21.)
Sa unsang paagi nga ang pagsunod sa Pulong sa Kaalam makatabang kanato nga makabaton og “kaalam, kahibalo ug salabutan” diin mahimo nato ang pagdumala sa atong pamatasan?
Sa unsang paagi ang pagsunod sa Pulong sa Kaalam makapabayaw sa atong mga kalag? Sa unsa nga paagi mopalingkawas kini sa atong mga hunahuna ug mga kasingkasing gikan sa espiritu sa kalaglagan? Sa unsang paagi nga ang pagsunod niini nga balaod makadala kanato nga “mas duol sa pagkahisama sa Anak sa Dios”??

Daniel Refusing the King’s Meat and Wine — *Si Daniel Mibalibad sa Karne ug Bino sa Hari,* ni Del Parson. Si Daniel ug ang iyang mga higala mibalibad sa pagkaon sa hari sa Babelonia ug sa pag-inum sa iyang bino tungod kay nasayud sila nga dili kini maayo alang kanila. Mitubo sila nga himsog ug lig-on ug napanalanginan uban sa kaalam tungod kay mipili sila sa pagkaon nga mas maayo alang kanila.