Kapitulo 47: Kaligdong: Pagsunod sa Atong Relihiyon uban sa Tibuok Natong mga Kasingkasing

Kapitulo 47

Kaligdong: Pagsunod sa Atong Relihiyon uban sa Tibuok Natong mga Kasingkasing

Kadtong mopatunhay sa ilang kaligdong pinaagi sa adlaw-adlaw nga pagbutang og una sa mga butang sa Dios ug molahutay sa mga pagsulay makaangkon og kinabuhing dayon.

Gikan sa Kinabuhi ni Joseph F. Smith

Niadtong 10 sa Nobyembre 1918, ang ika-17 nga anibersaryo sa adlaw sa pagtawag kaniya isip Presidente sa Simbahan, si Joseph F. Smith mipundok sa iyang pamilya ug misulti kabahin sa iyang kinabuhi ug unsa ang iyang nakat-unan. Ang tanan mitambong sa okasyon nga nagpuasa ug diha sa espiritu sa pagampo. Si Presidente Smith miingon, “Kon may bisan unsang butang sa yuta nga gisulayan nakong buhaton nga ingon ka daghan sa bisan unsang lain nga butang, mao ang pagbarug sa akong pulong, akong mga saad, akong kaligdong, sa pagbuhat unsay katungdanan nako nga buhaton.”¹

Mao kini ang katapusang pormal niya nga tambag. Paglabay sa siyam ka adlaw, niadtong 19 sa Nobyembre 1918, si Presidente Joseph F. Smith namatay. Usa ka pagdagsang sa sakit nga influenza ang nakapugong sa pormal nga pangpubliko nga serbisyo sa paglubong. Agi og pasidungog niining bantugan nga lider, tanang pangpubliko nga panagtigum, mga kalingawan, ug opisyal nga mga miting gisuspenso. Mga sinehan ug daghang lokal nga mga negosyo nanirado. Mga kaliboan sa mga lungsuranon sa Siyudad sa Salt Lake, mga miyembro ug dili miyembro sa Simbahan, nagpanon sa kadalanan aron sa pagpasidungog ni Joseph F. Smith samtang ang porlon milabay paingon sa South Temple ngadto sa Sementeryo sa Siyudad sa Salt Lake. Sa paglabay sa prosesyon sa Catholic Cathedral sa Madeleine, ang mga kampana sa tore sa katedral gibagting agi og pasidungog niining talahuron nga lider kinsa nakaimpluwensya og hilabihan ka daghan.

Si Presidente Joseph F. Smith mahigugmaon sa matarung; gilabanan niya ang sumbanan sa kamatuoran; hingpit nga gisunod niya ang mga baruganan nga iyang gisangyaw; ug gitahud ug gitamud siya tungod sa ingon nga kaligdong.

Mga Pagtulun-an ni Joseph F. Smith

Atong gipakita ang atong kaligdong pinaagi sa adlawadlaw nga pagbutang og una sa mga butang sa Dios.

Ang relihiyon nga atong gipili nga sundon dili usa ka pang-Dominggo nga relihiyon; dili kini usa lamang ka pangagpas nga pagtuo…. Pinakaimportante kini nga butang sa kalibutan alang kanato, ug ang mga sangputanan ngari kanato dinhi niini nga kalibutan ug sa kalibutan nga umaabut mag-agad sa atong kaligdong sa kamatuoran ug sa atong pagkamakanunayon sa pagsunod sa mga lagda niini, sa pagsunod sa mga baruganan niini, ug sa mga gikinahanglan niini.²

Kanunay kini nga akong kalipay sa pagbaton og kahigayunan sa pakighimamat sa mga lalaki ug mga babaye kinsa midawat sa kamatuoran ug kinsa matinuoron niini sa ilang adlaw-adlaw nga kinabuhi, kay hinumdumi, gitukod nato ang sumbanan sa atong kaligdong ug sa atong pagka-maunungon sa kamatuoran pinaagi sa atong adlaw-adlaw nga mga buluhaton. Ang kahoy mailhan pinaagi sa ilang mga bunga, ug dili kita mamupo og mga ubas nga tunokon ni igos sa kudyapa. Kon kamo makakita og daghang mga indibidwal, usa ka komunidad o tibuok katawhan, kinsa midawat sa ebanghelyo ni Jesukristo, makanunayon sa ilang mga pagtuo, matinuoron sa ilang mga pakigsaad, matinuoron sa matag bahin sa ilang hugot nga pagtuo, inyong makita ang mga lalaki ug mga babaye kinsa namunga og maayo ug takus sa tanang mga pagtahud.³

Anaa ra kini kanato sa pagbuhat sa atong katungdanan ug sa pagsunod sa atong relihiyon sa usa ka adlaw nga sama ni bisan kinsa. Magserbisyo kita sa Ginoo sa tibuok adlaw diha sa pagkamatarung ug Siya mahimo nato nga Amahan ug Higala, ug ang atong mga kaaway mawad-an sa gahum diri kanato.⁴

Nagkinahanglan kitang tanan og gugma sa atong mga kalag, sa tanang panahon: una, alang sa atong Dios ang atong langitnong Amahan, kinsa ang tighatag sa tanang kaayohan—gugma nga milukop sa atong mga kalag, atong mga hunahuna, atong mga kasingkasing, atong mga salabutan, atong kusog, ingon man nga mahimo kita nga mauyunon, kon gikinahanglan niya, mohatag sa atong mga kinabuhi ingon man usab sa atong panahon, mga talento, ug mga butang niini nga kalibutan sa pagserbisyo sa buhing Dios kinsa mihatag kanato sa tanan nga ania kanato…. [Kinahanglan] nga kita anaa niana nga gugma sa atong mga kasingkasing, sa hilabihan nga atong higugmaon ang Dios labaw pa kay sa negosyo, labaw pa kay sa kwarta, labaw pa kay sa kalibutanon nga mga kalingawan; nga mao ang, pagpahimulos og mas dako nga kalipay diha sa pagsimba ug paghigugma sa Dios kaysa atong paghigugma sa bisan unsang laing butang sa kalibutan.⁵

Bisan asa ang mga tawo makadungog sa pulong nga ang kalampusan nagpuyo nga naghisgot sa kalampusan nga maingon og ang kalampusan gihubad sa usa ka pulong, ug nga daw ang pinakataas nga ambisyon sa mga lalaki ug mga babaye mao ang pag-uswag sa pipila ka kalibutanon nga ambisyon…. Bisan pa niana, ang kalampusan sa usa mas matino pa gayud pinaagi sa mahangturon (ingon man usab sa pagkakaron) nga mga panginahanglan sa tawo, kaysa temporaryo nga mga sumbanan nga gihatag sa mga tawo agig paningkamot alang sa nailhan nga kalibutanong mga tumong sa panahon diin ilang gisunod. Walay pagduhaduha nga walay labaw pa ka malaglagon sa atong pagkabutang kaysa pagtuo nga ang atong karon ug mahangturon nga kaayohan natukod diha sa katigayunan ug mga pasidungog niini nga kalibutan.

Ang mahinungdanon nga kamatuoran nga gipahayag sa Manluluwas daw sa kinatibuk-an nakalimtan na pag-ayo niini nga henerasyon, nga walay kapuslanan sa usa ka tawo kon maangkon niya ang tibuok kalibutan, nga pagapildihon sa iyang kinabuhi [tan-awa sa Mateo 16:26]. Ang sumbanan sa kalampusan sumala sa gipahayag pinaagi sa pulong sa Dios, mao ang kaluwasan sa kalag.⁶

Ang kinaiya sa tinuod nga pagkamiyembro sa Simbahan ni Jesukristo sa mga Santos sa Ulahing mga Adlaw mao kini—nga ikaw ug ako, gawasnon sa matag laing tawo dinhi sa kalibutan, mosunod sa atong relihiyon ug mobuhat sa atong katungdanan, bisan unsa pa ang buhaton sa ubang tawo. Ingon sa gipahayag ni Josue sa iyang kaugalingon sa karaang mga panahon, “Alang kanako ug sa akong balay, kami mag-alagad sa Ginoo.” [Josue 24:15.] … Ang tinuod nga sukdanan sa atong baruganan niini nga Simbahan mao nga mobuhat kita sa husto walay sapayan kon kinsa ang nagbuhat sa matarung o nagbuhat sa sayop. Busa atong tinguhaon ang pag-angkon niana nga espiritu ngari kanato ug magpuyo pinaagi niana nga lagda.⁷

Ang una ug pinakataas nga sumbanan sa husto nga pagpuyo makit-an nianang indibidwal nga responsibilidad nga nakapabilin sa mga tawo nga takus alang sa katuyoan sa kamatuoran. Dili lisud alang sa mga tawo kinsa matinuoron sa ilang kaugalingon nga magmatinud-anon sa uban. Ang mga tawo kinsa mopasidungog sa Dios sa ilang kaugalingong kinabuhi wala magkinahanglan sa pagpugong sa panghunahuna sa publiko nga mahimong dili lamang sukwahi, kondili positibo kaayo nga sayop. Pinaagi lamang kini sa indibidwal nga mga responsibilidad nga ang mga tawo mobati nga makahimo sila sa pagpahimutang sa ilang kaugalingon sa husto nga katarungan sa tanang mga pangutana sa publiko. Kadtong kinsa wala magtagad sa espirituhanon nga bahin sa kinabuhi nagsalig diha sa paggiya sa publiko diin modala kanila ngadto sa tanang mga matang sa pagkasukwahi.⁸

Ang mga bunga sa Espiritu sa Dios—ang mga bunga sa espiritu sa tinuod nga relihiyon—mao ang kalinaw ug gugma, hiyas ug pagkamatinuoron, ug kaligdong ug kamaunungon sa matag hiyas nga nailhan sa balaod sa Dios.⁹

Ang atong katungdanan mao ang pagpabilin nga mapadayunon—mopadayon ug mopaingon sa direksyon nianang gimarkahan sa Ginoo nga Labawng Makagagahum alang kanato nga tinguhaon. Paghupot sa hugot nga pagtuo; pasidunggi ang pangalan sa Dios diha sa inyong mga kasingkasing; tahura ug higugmaa ang ngalan Niya kansang dugo gipaagas alang sa kapasayloan sa mga sala sa kalibutan; pasidunggi ug paghupot sa pinakataas nga pagtamud kaniya kinsa gituboy sa Dios diha sa iyang pagkabata aron mopahiluna sa tukuranan niining mahinungdanong trabaho sa ulahing adlaw.¹⁰

Ang atong kaligdong pagasulayan.

Ang akong pagkabata ug pagkabatan-on nagahin sa pagsuroysuroy uban sa katawhan sa Dios, sa pag-antus uban kanila ug sa pagmaya uban kanila. Ang tibuok nakong kinabuhi nakig-uban niining mga tawhana, ug sa pangalan ug pinaagi sa panabang sa Dios modangat kini hangtud sa katapusan. Wala ako’y laing mga kauban o dapit nga adtoan. Ania ako niini nga katuyoan sama ni Pedro sa diha nga ang Manluluwas, sa pagkakita nga namiya ang mga tawo gikan Kaniya, nangutana kaniya, Mobiya ba usab ikaw? Si Pedro mitubag, Ginoo, kon biyaan ko Ikaw asa man ako paingon, anaa Kanimo ang mga pulong mahitungod sa kinabuhing dayon. [Tan-wa sa Juan 6:67–68.] Kita walay laing buhaton gawas sa pagpadayon diha sa pig-ot nga agianan nga modala og balik ngadto sa Dios nga atong Amahan. Mao kana ang agianan nga Iyang gimarkahan alang kanato nga tinguhaon, ug ato kini nga katungdanan sa pagpadayon; dili kita mahimo nga mosimang, dili kita makahunong; dili kita makabalhin og laing agianan, “usa ang padulngan niini” ug ang kapalaran niini gipiho ug giplano na.

Kinahanglan nga atong atubangon ang kaaway kon kini manaa, makigbatok niini uban sa mga hinagiban sa kamatuoran nga gitugyan sa Dios sa atong mga kamot. Ug kinahanglan gayud nga lig-onon nato ang atong mga hunahuna nga kining kalibutan uban sa tanan niining mga kalingawan maoy sama sa lawog nga ikatandi uban sa kahalangdon sa kahibalo sa Dios. Gituyo Niya ang pagsulay kanato ug sa pagmatuod kanato, ug Siya may katungod sa pagbuhat niini, bisan pa ngadto sa kamatayon kon gikinahanglan, ug kadto lamang kinsa molahutay sa katapusan, kinsa dili mosibog, apan magpabilin ang ilang kaligdong diha sa kakuyaw ug mosakripisyo sa ilang tanan, kon gikinahanglan, makabaton og kinabuhing dayon, o mahimong takus sa ganti sa mga matinud-anon.¹¹

Ang akong pag-ampo nagmakanunayon, dili nga maluwas unta ako sa mga pagsulay, kondili nga makabaton unta ako og kaalam ug paghukom, pailub ug paglahutay nga gihatag kanako, sa pagpas-an sa mga pagsulay nga tingali akong masinati. Samtang dili ako matinud-anong makasulti nga nasulayan na ako sa akong hugot nga pagtuo uban sa Ebanghelyo ni Kristo, hinoon matinud-anon ako nga moingon nga nasulayan na ako sa daghang mga paagi. Nasulayan na ang akong pailub, nasulayan na ang akong paghigugma, ang akong kaligdong nasulayan na.¹²

Nagtuo ako nga ang [atong pioneer nga mga katigulangan] nakatukod og labaw pa ka maayo kay sa ilang nasayran. Nagtuo ako nga gigiyahan sila pinaagi sa gahum sa Dios, lakang sa matag lakang, ug gitudloan sa pagtulun-an human sa usa ka pagtulun-an, lagda human sa usa ka lagda. Niining paagiha napamatud-an Niya ang ilang kaligdong ug ang ilang debosyon. Sila napamatudan Niya hangtud sa kamatayon; oo, ug gani lapas pa sa kamatayon; kay ang kamatayon ngadto sa kadaghanan kanila nahimo unta nga matam-is, malinawon unta kini, malipayong kapahulayan kon itandi uban sa kabudlay ug kasamok nga ilang sagubangon.¹³

Daghang tawo ang gipamatay pinaagi sa pagsunog tungod sa pagkamasulundon, sama sa iyang pagtuo, sa mga sugo sa Dios. Walay usa sa karaan nga mga disipulo kinsa gipili ni Jesukristo ang nakaikyas sa pagkamartir, gawas ni Judas ug Juan. Si Judas miluib sa Ginoo, ug dayon gisakripisyo ang iyang kaugalingong kinabuhi, ug si Juan nakadawat og saad sa Ginoo nga mabuhi siya hangtud nga Siya moanhi pag-usab sa yuta. Ang uban gipapatay, ang pipila gilansang sa krus, pipila gipangguyod sa dalan sa Roma, ug pipila gipanghulog gikan sa pinakataas nga taluktok, ug ang uban gibato hangtud nga mamatay. Alang sa unsa? Tungod sa pagsunod sa balaod sa Dios ug sa paghatag og pagpamatuod ngadto nianang nahibaloan nila nga tinuod. Hinaut unta nga ingon usab niini karon. Apan tugoti ang espiritu niini nga ebanghelyo modikit pag-ayo sa akong kalag aron bisan tuod og ako moagi sa kakabus, sa kalisdanan, sa pagpanggukod, o sa kamatayon, tugoti ako ug ang akong balay nga moserbisyo sa Dios ug mohupot sa iyang mga balaod.¹⁴

Atong ipakita ang atong kaligdong pinaagi sa pagserbisyo sa Ginoo, bisag unsa pay mahitabo.

Ang Ginoo misulti ngadto sa batan-on nga tawo kinsa nahigugma sa kalibutan, nga kon siya nagtinguha nga mahimong hingpit, kinahanglan nga ibaligya niya ang tanan nga anaa kaniya ug ihatag kini sa mga kabus, ug dayon miingon ang Ginoo, “Umanhi ka ug sumunod kanako.” [Mateo 19:21.] Mahimong kini simple kaayong paagi sa pag-ingon niini, apan adunay dakong kalabutan sa kamatuoran niini, adunay mahinungdanon nga baruganan nga naglakip niini. Kini mao ang pagpahiluna niana nga sagrado ug balaan, nga iya sa Dios, nga diin makahimo sa kalinaw ug kalipay sa kalag sa mga tawo, sa dili pa ang atong mga katigayunan, sa dili pa ang atong kalibutanon nga mga kadungganan ug mga kabtangan. Ang Ginoo nga Labawng Makagagahum nagkinahanglan niini gikan sa mga Santos sa Ulahing mga Adlaw; ug matag lalaki ug babaye, kinsa midawat sa Ebanghelyo mobati unta kanunay diha sa ilang kasingkasing karon, ug sa ilang mga kalag kanunay, nga “bisan unsa ang gikinahanglan sa Ginoo gikan kanako, kana akong buhaton,” o kana akong ihatag, bisan unsa pa kini.¹⁵

Kon gikinahanglan Niya nga akong ihatag ang tanan nga anaa kanako ngadto kaniya, gusto nakong bation nga kinahanglan kining buhaton nga masadyaon ug mauyunon, sama sa gibati ni Job, ug usab ni Abraham, sa diha nga ang Ginoo mitawag kanila aron mopakita sa ilang hugot nga pagtuo. Si Abraham gitawag aron ihalad ang iyang anak nga lalaki—usa ka anak sa saad— mihunong ba siya aron mangatarungan o makiglalis uban sa Labawng Makagagahum? Wala, milakaw siya sa walay pagreklamo o pagbagulbol, aron sa pagbuhat sa unsay gisugo kaniya. Tingali siya adunay lahi nga mga pagbati, ug sa walay pagduhaduha gisulayan siya sa pinakalisud; ang iyang pinakalumo nga pagbati gisulayan, apan bisan sa tanan, iyang gipakita ang pagsunod sa sugo sa Labawng Makagagahum. Hinoon, si Abraham wala makahimo sa sugo, tungod kay ang Ginoo, sa pagpakita sa iyang kaligdong ug kamauyunon, mipugong niini. [Tan-awa sa Genesis 22:1–8.] …

Karon, unsa ka daghan kanato ang adunay pagsalig sa Ginoo nga sama sa kang Abraham? Pananglitan, mohangyo Siya gikan kaninyo sa inyong unang natawo, o bisan kinsa sa inyong mga hinigugma, o inyong katigayunan, makalahutay ba kamo niini sa walay pagbagulbol?…. Makapaabut ba kita nga makakab-ot og celestial nga pagkahimaya kon kita adunay pipila ka tinagoan— pipila ka butang nga gihipus—diin ang atong mga kasingkasing o pinakamahal nga mga pagbati anaa? Pangutan-a ang inyong kaugalingon, kon takus ba kamo sa pagdawat sa kahimayaan sa celestial nga gingharian sa Dios?¹⁶

Si Job usa ka matarung nga tawo, hingpit sa tanan niya nga mga paagi. Walay sama kaniya sa tibuok yuta…. Wala niya tungloha ang mga Sabeohanon sa pagpanguha sa iyang mga baka ni ang kalayo sa langit nga miugdaw sa iyang kahayopan, ni ang mga hangin sa kalangitan, tungod sa paglaglag sa sa iyang panimalay ug mga anak. Wala siya mamalikas ug manamastamas ug molimud sa Ginoo tungod niini. Apan siya miingon, “Ang Ginoo mihatag, ug ang Ginoo mikuha; bulahan ang ngalan sa Ginoo.” [Job 1:21.] …

… Dinhi gihatagan og panig-ingnan ang baruganan nga kinahanglan mahimo nga basihanan sa tanang hugot nga pagtuo, ang paglaum, ang gugma nga putli, ang paghigugma, ug paghago, ang tinguha sa tanang katawhan—nga sila moserbisyo sa Dios, bisan unsa pa ang mahitabo kanila. Bisan pa kon nag-antus sila sa pagkabilanggo, bisan kon nag-antus sila sa mga pagpanggukod, bisan kon nag-antus sila sa kakabus, bisan pa kon ang Dios mosulay kanila sa hilabihan, ug ibutang sila sa pinakagrabe nga pagsulay aron sa pagpamatuod sa ilang kaligdong, kinahanglan nga moingon sila sama ni Job, “Ako hubo nga migula sa tiyan sa akong inahan ug hubo usab ako nga mopauli didto; ang Ginoo mihatag ug ang Ginoo mikuha; bulahan ang ngalan sa Ginoo.” [Job 1:21.] Sa ingon himayaa ang Dios, higugmaa Siya sa tibuok mong kasingkasing, gahum, salabutan ug kusog; dayon higugmaa ang atong silingan sama sa atong kaugalingon; nga sa dihang moabut ang mga pagsulay mahimo kita nga makalahutay niini ug dili moreklamo, kondili maghulat hangtud nga ang Dios mopalambo sa Iyang mga katuyoan. Dayon atong makita nga walay gugma nga sama niana sa Dios alang sa nag-antus Niya nga mga anak; walay kalooy nga hilabihan ka lapad, walay katuyoan nga hilabihan ka dako, ug mahinungdanon ug halangdon sama sa katuyoan sa Dios kalabut sa Iyang mga anak. Kon kini atong buhaton, makaton kita niini sa kaulahian ug makadayeg kita sa Dios uban sa tibuok natong mga kasingkasing.¹⁷

Mga Sugyot alang sa Pagtuon

Unsa man ang kaligdong? Sa unsang paagi atong “gitukod ang sumbanan sa atong kaligdong … pinaagi sa atong kada adlaw nga mga trabaho”? Unsa nga mga kahimtang sa inyong kada adlaw nga kinabuhi ang makapahimo kaninyo sa pagpili o sa pagpahiluna og una sa mga butang sa Dios?
Sa unsang paagi kita makapalambo sa abilidad aron “makatagamtam og mas dako nga kalipay diha sa pagsimba ug paghigugma sa Dios” kaysa paghigugma sa negosyo, kwarta, o ubang kalibutanon nga mga kalipay? Samtang nag-atubang kamo sa mga pagsulay sa pagpahiluna “niana nga sagrado ug balaan” nga una kaysa “kalibutanon nga mga kadungganan ug mga kabtangan,” sa unsa nga paagi kamo mitubag?
Unsa ang tinuod nga sumbanan sa kalampusan sa atong mga kinabuhi? Unsay laing mga kahulugan sa kalampusan nga usahay makapugong kanato sa pagtinguha niining tinuod nga sumbanan? Sa unsang paagi ang pagbuhat sumala sa gipadayag nga kamatuoran mosukwahi sumala sa “paggiya sa publiko”?
Ngano nga ang mga pagsulay ug oposisyon sagad moabut kanato kon kita nanlimbasog sa pagsunod sa ebanghelyo? Sa unsang paagi kamo nasulayan ug napamatud-an sa inyong mga paningkamot sa pagsunod sa kabubut-on sa Dios? Sa unsang paagi kamo mitubag?
Sa unsang paagi ang mga ehemplo sa matinud-anon nga mga disipulo sama ni Abraham ug Job nakatabang kanato nga mas makasabut kon unsaon sa “pagserbisyo sa Dios, bisan unsa pay mahimong mahitabo”? Sa unsang paagi ang inyong pagpamatuod napalig-on pinaagi sa ilang mga ehemplo? Unsa nga mga butang ang makaandam kanato sa pag-alagad sa Dios sa niini nga paagi atol sa atong mga panahon sa pagsulay?
Sa unsang paagi ang pagpalambo ug pagpatunhay sa personal nga kaligdong mopanalangin ug molig-on sa atong mga pamilya? sa atong mga kumunidad?

Beehive House — Ang Beehive nga Balay sa Siyudad sa Salt Lake, diin si Presidente Smith nagpuyo sulod sa daghang mga tuig. Namatay siya dinhi niadtong 19 sa Nobyembre 1918.