Pagdaginot, ang Pundasyon sa Pag-uswag

Kita kinahanglan nga mobayad sa atong mga utang ug magtigum sa atong kinitaan aron kita mas makahimo sa pagserbisyo diha sa gingharian sa Dios.

Gikan sa Kinabuhi ni Joseph F. Smith

Pagka 1918 si Joseph F. Smith misulat ngadto sa iyang anak nga lalaki diin siya nakahinumdom sa mga kasinatian sa Pasko gikan sa iyang kaugalingong kabatan-on sa dihang siya “kanunay walay kwarta.” Siya nag-ingon mahitungod sa iyang bag-o nga kaminyoon: “Ako walay utang ni bisan kinsa sa tibuok niadtong panahona, ug ako kinahanglan nga motrabaho—kinahanglang dili ko magtinapul.” Siya miingon nga siya ug ang iyang pamilya kinahanglan nga magtrabaho “naningkamot uban sa tanan namong kusog aron mabuhi kami.” Diha niini nga mga kahimtang nga siya milakaw sa wala pa ang Pasko uban sa tinguha sa pagbuhat og usa ka butang nga espesyal alang sa iyang mga anak. Siya miingon, “Gusto ko og usa ka butang nga makapalipay kanila, ug sa pag-ila sa kalainan sa adlaw sa Pasko gikan sa laing mga adlaw—apan walay bisan usa ka sentabo sa pagbuhat niini! Ako milakaw patungas ug palugsong sa Main Street, nagtan-aw sa mga tinda … ug dayon miadto sa dapit nga walay tawong makakita ug mipungko ug midanguyngoy sama sa usa ka bata, hangtud nga ang nagawas nakong kasubo mihupay sa nagbangutan nakong kasingkasing; ug pagkataudtaud mipauli sa balay, walay dala sama sa akong pagbiya, ug nakigdula uban sa akong mga anak, mapasalamaton ug malipayon alang lamang kanila.…

“Human niini nga mga pagsulay, ang akong agianan nahimong mas hapsay. Nagsugod ko sa pagpalambo sa akong sitwasyon; pinaagi sa pagkugi, pagpaningkamot og maayo, pagpugong sa kaugalingon, ug paghigugma sa Dios, ako milambo.”¹

Si Bishop Charles W. Nibley, kinsa suod nga katrabaho ni Presidente Smith, miingon: “Siya sa kanunay mainampingon kaayo sa iyang mga galastuhan.… Siya naglikay sa utang, ug walay tawo nga akong nahibaloan sukad kinsa dali kaayo mobayad sa obligasyon sa katapusang kwarta.… Siya hugot gayud nga misupak sa utang; ug dili gayud, ubos sa bisan unsa nga mga kondisyon o mga kahimtang, lakip ang Simbahan sa niana nga paagi. Ni siya mismo mahimong mahilakip diha sa utang sa iyang kaugalingong mga kalihokan, apan siya makanunayong mibarug sa iyang karaang motto, ‘Bayad dayon alang sa bisan unsa nga napalit.’ ”²

Si Presidente Smith miklaro sa kapraktikal sa ebanghelyo dihang siya mitudlo, “Kini kanunay gayud nga usa ka kinahanglanong pagtulun-an sa mga Santos sa Ulahing mga Adlaw, nga ang relihiyon nga walay gahum sa pagluwas sa katawhan sa temporal nga paagi ug mohimo kanila nga magmalamboon ug malipayon dinhi, dili mahimong saligan aron sa pagluwas kanila sa espirituhanong paagi, aron sa paghimaya kanila sa umaabut nga kinabuhi.”³

Mga Pagtulun-an ni Joseph F. Smith

Paglikay sa utang ug kamo mahimong gawasnon sa pinansyal ingon man sa espirituhanong paagi.

Karon, ako nagtuo sa tinuoray nga ang usa sa pinakadako nga mga hinungdan sa kabalaka nga anaa taliwala kanato—ug ako nagtuo sa samang butang magamit hapit sa tanan sa tibuok kayutaan—nga ang mga tawo milapas na labaw pa sa ilang kinitaan. Nakahulam sila og dako, nakaprenda ang ilang mga balay, mga umahan, ug hapit ang tanan nga ilang naangkon, aron makatupong sa ilang mga silingan, nagpalabwanay sa usag usa sa pagpakaaron-ingnon ug sa pagpadayon sa ilang mga negosyo sa utang nga pamaagi nga uso na kaayo sa kalibutan.…

… Daghan kanato nga adunay mga hinulaman … aron kita makita bisan na lang pareho niana sa atong silingan, kon kita wala mobuhat sa ingon, apan nagpuyo nga walay utang, ug dugang pa nakatigum og gamayng kwarta alang sa lisud nga mga panahon, aron kita unta ang pinakaindependente nga mga tawo niining kontinente.… Ingon sa akong nahibaloan, gusto nakong makita… nga sa higayon nga kita mopalit ug mga butang nga nagbalor og usa ka dolyar kita mobayad og usa ka dolyar o usa ka butang nga nagrepresentar og usa ka dolyar, ug kana atong buhaton nga dili hutdon ang atong mga kusog sa panimalay o iprenda nato ang atong kaugalingon o ang atong mga anak. Ang matag tawo nga nagpuyo sa utang nagbutang og mga kadena diha sa iyang kaugalingon ug diha sa iyang pamilya.…

Nakakita ba kamo og bisan kinsa nga tawo kinsa nakautang ug nakaprenda ug nakagapos nianang iyang naangkon, ingon ka gawasnon, ingon ka independente, ingon ka malipayon sama sa tawo kinsa nakabayad alang sa unsay anaa kaniya sa iyang pagpadayon? Kinahanglan nga kita magpuyo sumala sa atong kinitaan, ug magtukod og pundasyon diin kita makatukod, ug diin ang atong mga anak makatukod human kanato, nga dili magbayad og interes sa nakapagapos nga mga utang nga atong nahiaguman. Ako nahibalo nga wala ako magsangyaw sa pinansyal nga ebanghelyo sa kalibutan. Siguro ako nagbutang sa akong kaugalingon nga hinganlan og usa ka tawo nga sobra ka tiniguwang og istilo, walay paglambo, ug uban pa. Kining tanan nga mga angga ihatag ngadto sa mga tawo nga makapangahas sa pagsulti sa mga tawo sa pagpuyo sulod sa ilang kinitaan.… Usahay mabutang kita diha sa kahimtang diin kinahanglan nga mangutang. Kon kini gikinahanglan, buhata kini…. Apan wala pa gyud ako makombinsir nga kini gikinahanglan alang sa kaayohan sa karon o sa umaabut nga henerasyon nga ang akong mga anak mabutang diha sa pagkaulipon tungod sa akong binuhatan.⁴

Unsa ka bulahan nga kahimtang ang mahimong mahitabo diha sa Zion kon ang kadautan sa pagpangutang … mahimong klaro kaayo ngadto sa matag Santos sa Ulahing mga Adlaw, bata ug tigulang! Hinoon, sa tinuod, kini mahitabo kon ang kabug-at sa pagprenda ug sa kauban niini nga mga kagul-anan, mahimong mabati ug masabtan sa matag tawo kinsa anaa sa paghinuklog sa pagprenda sa iyang balay ug yuta alang sa kwarta—nga siya unta makatugkad sa pagpangulipon ug sa kahadlok niini—ingon ka hingpit sa wala pa buhata ingon nga siya sigurado nga mobati niini inigkahuman.⁵

Sa panahon sa pag-uswag, … angay gayud kaayo alang sa mga Santos sa Ulahing mga Adlaw sa paglingkawas sa utang.… Ako moingon, agig kalabutan niini nga hilisgutan, nga ang usa sa pinakamaayo nga mga paagi nga akong nasayran aron sa pagbayad sa akong mga obligasyon ngadto sa akong igsoon, akong silingan, o kauban sa negosyo, alang kanako mao ang pagbayad una ngadto sa akong obligasyon sa Ginoo. Ako mas makahimo sa pagbayad sa akong mga utang ngadto sa akong mga silingan, kon ako nagpas-an sa mga utang ngadto sa akong mga silingan, human sa akong pagbayad sa akong matinuoron nga obligasyon sa Ginoo, kaysa akong mahimo kon isalikway ang naulahi; ug kamo makahimo sa pagbuhat sa ingon. Kon kamo nagtinguha nga molambo, ug mahimong gawasnon nga mga lalaki ug mga babaye ug usa ka gawasnon nga katawhan, unaha pagbayad ang inyong makatarunganon nga mga obligasyon sa Ginoo, ug dayon bayad sa inyong mga obligasyon sa inyong isigkatawo.⁶

Karon mao ang panahon alang sa tanang katawhan sa pagtuon sa tinuod nga ekonomiya, ug sa pagsugod sa pagdaginot ug sa pagpalingkawas sa ilang mga kaugalingon gikan sa utang, ug mahimong gawasnon ug independente nga katawhan.… Kon kita mobuhat pa lang sa atong mga katungdanan isip mga Santos sa Ulahing mga Adlaw ug magmaalamon sa paggamit sa atong mga kinitaan, ang mga kahimtang mamandoan kanato, ang atong mga paningkamot mopanalangin kanato, ang yuta mahimong magmabungahon, ug kita moani og mabuhong nga mga ani ug maglipay niini; kay ang Dios mopakita sa Iyang mga pagdapig ngadto sa Iyang matinud-anon nga mga anak.… Karon mao ang panahon sa pagpakunhod sa atong mga galastuhan. Karon mao ang panahon sa pagputol sa pag-usik-usik ug sa pagpugong og gamay sa atong kaugalingon sa kalibutanong kalingawan. Apan kita kinahanglan nga magmanggihatagon. Dili maghukom sa usag usa.… Dili moadto ug motook sa inyong isigkaulipon, kinsa nakautang kaninyo og pipila ka sentabos ug maningil kaniya niana nga iyang nautang ninyo, ug, kon mohangyo siya kaninyo sa paghulat og gamay nga panahon, kamo mopabilanggo kaniya, pasumbingay nga pagkasulti. Hinumdumi ang sumbingay sa Manluluwas bahin niini nga hisgutanan, ug magmanggihatagon ug magmaloloy-on ngadto sa usag usa [tan-awa sa Mateo 18:23–35].⁷

Ampingi ang inyong mga kabtangan nga gawasnon gikan sa mga utang. Gawas dayon sa utang kutob sa inyong mahimo, ug ayaw pangutang, kay kana ang paagi diin ang saad sa Dios mahimong matuman ngadto sa katawhan sa iyang Simbahan, nga sila mamahimong pinakaadunahan sa tanang mga tawo sa kalibutan. Apan dili kini mahitabo samtang kamo nagprenda sa inyong mga balay ug sa inyong mga umahan, o nasulod sa utang nga dili na ninyo kaya nga bayaran ang inyong mga obligasyon; ug busa, tingali, ang inyong pangalan ug dungog mawala tungod kay kamo nagpasulabi sa inyong kaugalingon.⁸

Ang mga Santos sa Ulahing mga Adlaw sa kanunay gipahimatngonan ug karon matinguhaong gipahimangnoan sa dili pagbutang sa peligro ang ilang mga panimalay, ug hasta niini ang ilang mga asawa ug mga anak, diha sa altar sa pinansyal nga mga pamasin.… Kon ang mga Santos sa Ulahing mga Adlaw maminaw sa maalamon nga mga pahimangno ug sa mga leksyon sa nangagi, sila magpanagana diha atubangan sa makadani nga mga tintasyon nga karon anaa bisan asa, sa pagprenda sa ilang mga balay, ilang mga luna sa negosyo, mga agianan, ug mga kaumahan, alang sa kwarta aron sa pagpamasin ug sa pagpaadunahan.…

Ang mga pahimangno nga gihatag dinhi gidirekta labi ngadto niadtong mipahiluna sa pagprenda alang sa katuyoan sa pagpamasin, ug dili niadtong kinsa nakita nga kini mahinungdanon sa pagtukod og mga katilingban o kondili sa pag-angkon og mga balay pinaagi sa binuwan o ubang data-datang mga pagbayad. Ang naulahi nga gihimo mahimong modala ngadto sa mga kinaiya sa pagdaginot, samtang ang mga pagpamasin sa kasagaran mohimo og diwa sa pag-usik-usik.⁹

Pasayloa ko sa pag-ingon nga daghan ang daw nadani sa pagpamasin nga sa ingon niana nga ang ilang tibuok nga mga kalag makita nga sa hingpit miapil sa paghigugma sa kalibutan.… Samtang ang mga indibidwal naghakot sa ilang palibut sa mga bahandi ug nahimong nalinga uban sa kahingawa nga natural naghigut niini, sila kalagmitan makalimot sa … Dios diin sila ingon ka nagsalig sa panahon sa pag-angkon og bahandi sama sa panahon sa labihan ka talamayon nga kalisud.¹⁰

Kon adunay bisan usa ka tawo dinhi nga nagtinguha sa pagpangutang aron sa pagpamasin, … ako motambag kaniya sa pagpanagana, pag-ampo kabahin niini, ug sa mainampingong pakonsiderar niini sa dili pa siya mo-obligar sa iyang kaugalingon pinaagi sa pagpanghulam og kwarta o sa pagpangutang. Sa laing pagkasulti, ayaw pangutang kutob sa imong mahimo. Bayari dayon ang imong mga utang kutob sa imong mahimo.¹¹

Ang kwarta usa ka butang nga gikinahanglan sa tawo nga ampingan ug gamiton sa maalamong paagi kon siya aduna niini; kon siya wala masayud kon unsaon sa pag-amping niini, kini mawala gikan sa iyang mga bulsa, daling gastuhon sama sa kabuntagon nga daling mahanaw.¹²

Ako mopahimangno pag-usab sa mga Santos sa Ulahing mga Adlaw nga mangandoy ug makugihong makigbisog sa pagpalingkawas sa ilang mga kaugalingon gikan sa utang. Gawas sa utang ug ayaw pangutang, ug dayon kamo mahimong gawasnon sa pinansyal ingon man sa espirituhanong paagi.¹³

Kinahanglan nga atong higugmaon ang Dios labaw pa kaysa atong paghigugma sa kwarta ug sa pagpangita og kalingawan.

Adunay kahuyang diha sa tawo—ug … kini usa ka gamhanan nga kahuyang—aron sa pag-alagad sa iyang kaugalingon, aron sa pagtagbaw sa iyang kaugalingong mga tinguha, aron pagtuman sa iyang kaugalingong mga katuyoan, bisan unsa pa man ang bugti niini ngadto sa uban. Walay pagtagad sa dautan nga mga sangputanan nga mahimong modangat ngadto sa uban, siya maninguha sa pagtagbaw sa iyang kaugalingon nga mga ambisyon, iyang mga tinguha alang sa iyang kaugalingon nga pagpausbaw, ug sa promosyon sa iyang hinakog nga mga tinguha. Mao kini ang usa sa mga sayop sa panahon diin kita nagpuyo. Mao kini ang usa niadtong mga kahuyang nga makapahimo sa tawo nga dili mahisama sa iyang Agalon, nakapalayo kaniya gikan sa Dios ug sa kamatuoran, ug nakapahimo kaniya nga usa ka tawo kinsa mobuhat lamang sa unsay iyang gusto. Sayop kini.¹⁴

Ang maalamon nga tawo mao ang … mogiya sa iyang agianan palayo gikan sa buhing kamatayon sa pagpangita sa kalingawan. Siya dili magpagapos o mangutang aron makapalit og mga sakyanan ug ubang mahalon nga mga karwahe aron makatupong sa uso nga pagpangita sa kalingawan.…

Ang resulta niini nga pagpangita sa kalingawan ug kahinam ug sa pagtupong sa unsay mahimo lamang sa adunahan kaayo apan dili kinahanglang buhaton, mao nga daghan ang napugos sa pagbuhat sa tanang mga matang sa dili lehitimo nga mga pamaagi aron makabaton og kwarta aron sa pagtagbaw sa kahilig. Tungod niini nahitabo ang pagtubo sa pinansyal nga pagka-imoral. Daghang malimbungon nga mga pamaagi ang gihimo aron makabaton og kwarta, ug gani ang pagpanikas ug pagpamakak ug pagpanglingla sa mga higala ug mga silingan mao ang kanunay nga dangpan aron makaangkon og kwarta sa pagtagbaw sa hilabihan nga tinguha alang sa kalingawan.¹⁵

Ako nalooy sa usa ka adunahan nga tawo nga nahigugma sa iyang kwarta labaw pa kaysa iyang paghigugma sa Dios.… Sa umaabut nga adlaw kita pagatimbangon sa timbangan, ug kini mahibaloan kon kita nahigugma ba sa kalibutan labaw pa kaysa atong paghigugma sa Dios.… Ang Ginoo nag-ingon nga igakalisud unya sa datu ang pagsulod sa gingharian sa langit. Kana dili tungod kay ang tawo adunahan—kay ang Dios nagplano nga kita mamahimo nga pinakaadunahan sa tanang katawhan. Busa walay dautan nga mamahimong adunahan. Ang kadautan wala diha sa pagbaton og kwarta. Kita kanunay nga makadungog sa panultihon nga “ang kwarta mao ang gamut sa tanang pagkadautan.” Apan dili kini mao. Ang mga kasulatan nag-ingon nga ang pagkamahigugmaon og salapi nga mao ang gamut sa tanang pagkadutan [tan-awa sa 1 Timoteo 6:10].¹⁶

Ang tinuod lamang nga kakuyaw nga akong napanan-awan diha sa agianan sa mga Santos sa Ulahing mga Adlaw anaa diha sa mga resulta nga natural nga mosunod sa pagbaton og bahandi—garbo ug pagkamapahitas-on, pagpatuyang sa kaugalingon ug paghikalimot sa Dios, ug ang pagbaliwala sa sagrado nga mga obligasyon ug mga katungdanan nga atong nautang ngadto Kaniya ug ngadto sa usag usa; ug kini tungod sa ka abunda sa yutan-on nga mga panalangin nga Siya sa Iyang kamaayo mihatag kanato. Gikaingon nga sa kalisdanan kita mangita sa Ginoo, apan diha sa kaabunansya kita dili makahinumdom Kaniya. Akong makita nga niini anaa ang pinakamakuyaw nga naghulga kanato karon.¹⁷

Mas bulahan ang paghatag og kahupay ug kalipay ngadto sa atong isigka mga nilalang kaysa sila ang mohatag sa atong mga kaugalingon. Apan ubos sa espiritu ug impluwensya nga anaa ang kalibutan karon, dili kini mao ang panglantaw nga nahitabo sa kinatibuk-an. Ang mga tawo sa kalibutan nagdalidali ngadto sa unahan nga nag-apas niana nga sa ilang hunahuna makadugang sa ilang kaugalingong kalingawan. Sila dili magsapayan kon unsaon nila sa pagkuha sa kalingawan aron lamang kini ilang makuha. Isip usa ka kinatibuk-ang butang ang bulawan o kwarta mao ang butang nga labing makahatag sa ilang kalingawan ug hingpit nga kalipay. Paglabay sa pipila ka tuig, bisan pa, sila mopanaw gikan niini nga kalibutan, nga ang ilang bahandi ug tanan pa nga ilang gimahal biyaan lamang. Dili nila mahimong dad-on ang ilang bulawan uban kanila, tungod kay kini iyaha sa kalibutan. Kon sila moabut sa pikas kinabuhi kana nga nakahatag nila og kalipay mawala nga dili na nila makab-ot. Ang tinubdan sa ilang kalingawan mahanaw.…

Unsa ba ang anaa niining kalibutana nga makahatag kanato og tumang kalipay o tumang kalingaw nga sama sa pagkasayud nga ang atong mga sala napasaylo; nga kita nagbarug nga gikahimut-an sa Dios ang atong Langitnong Amahan; nga kita wala makapasakit sa atong isigka mga nilalang: nga kita gawasnon gikan sa bisan unsa nga mga pagpangutang o obligasyon; nga kita dili ulipon ngadto sa kalibutan, ni ngadto sa atong mga isigka mga nilalang? Kini maghatag sa usa ka tawo og mas labaw pa nga kalipay kay sa bisan unsa nga mahatag sa kalibutan. Ang kwarta dili makahatag niini. Ang bahandi sa kalibutan dili makahimo sa paghatag niining hingpit nga kalipay ngadto sa tawo.¹⁸

Atong gamiton ang kaalam diha sa atong temporal nga mga kalihokan aron nga kita mahimong mas maayo sa pagtukod sa gingharian sa Dios.

Sa usa ka butang nga ako sigurado, ug kana mao, nga kita kinahanglan nga magtinguha nga mamahimong masinati sa mga baruganan sa ekonomiya. Kita kinahanglan nga mogamit sa pinakamaayo nga kaalam, paghukom ug panabut nga atong mabatonan sa atong temporal ingon man usab sa atong espirituhanong mga kalihokan o mga pagpakabana.… Hakog ra kaayo kita. Kinahanglan nga dili gayud “ang matag tawo maghunahuna lamang sa iyang kaugalingong panginahanglan,” apan daghan kanato ang masinahon. Nagtinguha kita diha sa atong mga kasingkasing nga makaangkon sa tanan nga anaa sa atong silingan kita nagkinahanglan man niini o wala. Aron kita mahisama sa atong silingan; aron kita mahimo niya nga suod, ug nga ang atong anak nga mga babaye mahimong suod sa iyang anak nga mga babaye, ug ang atong anak nga mga lalaki ngadto sa iyang anak nga mga lalaki, kinahanglan nga kita adunay ingon ka maanindot nga balay, ingon ka mahalon nga mga kasangkapan sa balay, … ug ingon ka daghan nga mga luho nga mahimo ba nato ingon man usab nga mahimo ba sa atong silingan o dili. Karon, kining tanan labihan gayud ka binuang. Sayop kini.…

… Ang matag Santos sa Ulahing mga Adlaw kinahanglan nga makat-on—ug labi na ang matag batan-on sa Israel kinahanglan nga makat-on—nga ang matag usa kanila kinahanglan nga maningkamot sa paghimo sa kalibutan nga mas momaayo og gamay alang sa ilang pagkaanaa dinhi, kon sila makahimo. Kitang tanan kinahanglan nga maningkamot sa pagbuhat og pipila ka maayo. Kon kita mobuhat niini, dayon adunay hinungdan ang atong pagpuyo. Ang Dios mopanalangin kanato sa atong mga pagkugi ug mga paningkamot; ug kon kita maghiusa sa pagtinabangay sa atong temporal nga mga kalihokan ug modumala sa atong negosyo sa sakto nga mga baruganan, ang kalibutan mas monindot alang kanato, ug kita mas maayo sa hingpit diha sa kalibutan. Kita adunay daghan nga mga kwarta aron sa pagtukod sa gingharian sa Dios; kita adunay daghan pa nga magamit alang sa pagpundok sa mga kabus, alang sa pagtukod sa Zion, alang sa kaayohan sa mga Santos, ug alang sa atong kaugalingon nga kaayohan.¹⁹

Kita unta mosunod sa mga sugo sa Dios, motigum sa atong kwarta … , mobayad sa atong mga utang, magmahimong gawasnon nga mga lalaki ug gawasnon nga mga babaye, ug dili ulipon nga mga lalaki ug ulipon nga mga babaye, nga sama sa kadaghanan kanato karon. Daghan kanato anaa sa pagkaulipon sa utang, ug mahimong lisud alang kanato ang paggawas niini; apan kon posible nga makagawas kita niini diha sa kaligdong, atong ipokus ang tanan natong mga paningkamot sa pagkab-ot niana nga tumong ug buhaton kini; aron kon kita pagatawgon ngadto sa mga misyon kita makaingon nga, “O ako andam nga moadto,” ug unsa pa man, “Ako walay utang ni bisan kinsa, ug ako adunay kwarta nga akong madala, ug aron pagsangkap sa akong pamilya.”²⁰

Ako nasayud nga atong katungdanan ang pagpangandam batok sa adlaw sa kagutom, kamatay, mga unos ug mga linog, ug sa panahon nga ang mga balud sa dagat mobanlas sa ilang mga kaugalingon lapas sa ilang naandan nga gilay-on. Sa unsang paagi kita makabuhat niini? … Pinaagi sa pagtuon ug sa pagpatuman sa mga baruganan sa tinuod nga ekonomiya diha sa atong mga kinabuhi, ug pinaagi sa usa ka sistema sa panag-inigsoonay ug gugma diin ang matag usa motabang sa iyang igsoon, ug ang tanan mobarug nga magkahiusa, aron walay usa nga mag-antus gikan sa panginahanglan kon kini anaa sa gahum sa uban sa paghupay niini. Usa sa pinakadako sa mga saad sa Ginoo gihimo mahitungod sa Iyang katawhan, ingon nga nakasulat diha sa Basahon sa Doktrina ug mga Pakigsaad, nga sila mahimong labing adunahan sa tanan nga mga katawhan [tan-awa sa D&P 38:39]. Karon, unsaon man kini sa pagkatuman kon sa matag adlaw atong gastuhon ang tanan natong kinitaan, ug manghulam og gamay sa atong silingan? …

… Kita magmakugihon ug magmadaginuton, ug magtigum sa atong kwarta. Dili sa ingon nga atong itukod ang atong mga paglaum diha sa atong mga bahandi, dili sa ingon nga ang mga bahandi atong himoon nga atong dios; apan alang sa unsa nga rason? Nga kita makahimo, kon ang makalilisang nga mga panahon moabut, sa pagtubag sa mga gikinahanglan sa mga panahon ug sa mga obligasyon nga mahimong moabut sa katawhan sa Dios aron sa pagpahinabo sa mga katuyoan sa Labawng Makagagahum diha sa yuta.²¹

Mga Sugyot alang sa Pagtuon

Kon kita nagtinguha nga molambo sa espirituhanon ug sa temporal nga paagi, unsa man ang kinahanglan natong buhaton? Sa unsang paagi nga ang pagkamasinahon makaguba sa pag-uswag?
Unsa nga mga panalangin ang resulta gikan sa paglikay sa utang? Unsa nga mga problema ang mahimong moabut niadtong kinsa dili maalamong mipadaghan sa utang? Unsa nga mga katarungan ang gamiton usahay sa mga tawo sa pagpadaghan sa dili maalamong pagpangutang?
Unsa man ang atong mahimong buhaton diha sa “panahon sa pag-uswag” aron atong mapalingkawas ang atong mga kaugalingon gikan sa utang? Unsa man ang atong pinansyal nga mga obligasyon ngadto sa Ginoo? Ngano nga unahon man nato kini sa pagtubag?
Bisan og ang mga balay sa kasagaran paliton pinaagi sa “datadata nga mga pagbayad,” unsa nga mga pasidaan ang kinahanglan nga atong bantayan mahitungod sa mga pagprenda? Sa unsang paagi nga ang “diwa sa pag-usik usik” modala sa mga tawo sa pagkompromiso sa ilang mga balay ug pinansyal nga seguridad? Sa unsang paagi nga kita makalikay niining mga butanga?
Sa unsang paagi nga ang pagkahakog ug pagpangita og kalingawan mopalayo kanato gikan sa Dios? Unsa man ang mga kakuyaw sa paghigugma sa kwarta labaw pa kaysa paghigugma sa Dios?
Sa unsang paagi nga kita mahimong makapangandam sa temporal ug sa espirituhanon nga paagi “batok sa adlaw sa kagutom”?
Sa unsang paagi nato magamit ang atong mga kwarta aron sa “pagpahinabo sa mga katuyoan sa Labawng Makagagahum”? Sa unsang paagi nga ang pagkaandam sa pinansyal makapahimo kanato nga makaserbisyo?
Unsaon nato sa pagtudlo ang atong mga anak sa mga baruganan sa maalamong pagdumala sa kwarta?

Aron sa pag-awhag og ekonomikanhong pagbarug sa kaugalingon, ang pioneer nga mga Santos nagtukod og mga negosyo sama sa Zion’s Cooperative Mercantile Institution.