Ang Pagdawat og usa ka Pagpamatuod kang Jesukristo

Mahinungdanon kini alang kanato nga makabaton og pagpamatuod kang Jesukristo diha sa atong mga kasingkasing ug sa pagbuhat sa mga butang nga Iyang gisugo.

Gikan sa Kinabuhi ni Joseph F. Smith

Sa tibuok niya nga pangalagad si Presidente Joseph F. Smith mipamatuod nga si Jesus mao ang Kristo, ang Anak sa buhi nga Dios. Siya mitudlo nga ang tanang mga anak nga lalaki ug mga anak nga babaye sa Dios mahimong makadawat niining personal nga pagpadayag, niining gasa sa Espiritu.

“Sa dihang ako isip usa pa ka bata unang nagsugod sa pangalagad,” siya mipasabut, “Ako kanunay nga moduol ug mangayo sa Ginoo sa pagpakita kanako og pipila ka katingalahang butang, aron ako unta makaangkon og pagpamatuod. Apan ang Ginoo mipugong sa mga katingalahang butang gikan kanako, ug mipakita kanako sa kamatuoran, pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto, hangtud iyang napahibalo kanako ang kamatuoran gikan sa alimpulo sa akong ulo hangtud sa mga lapa-lapa sa akong mga tiil, ug hangtud nga ang pagduha-duha ug kahadlok hingpit nga nawala gikan kanako. Wala na kinahanglana nga magpadala pa siya og anghel gikan sa kalangitan aron sa pagbuhat niini, ni kinahanglan siya nga mamulong gamit ang trumpeta sa usa ka arkanghel. Pinaagi sa mga paghunghong sa ligdong nga hinagawhaw nga tingog sa Espiritu sa buhi nga Dios, iyang gihatag kanako ang pagpamatuod nga akong naangkon. Ug pinaagi niini nga baruganan ug gahum siya mohatag sa tanang mga anak sa katawhan og usa ka kahibalo kabahin sa kamatuoran nga magpabilin diha kanila, ug kini makahimo kanila nga masayud sa kamatuoran, sama sa pagkasayud sa Dios niini, ug sa pagbuhat sa kabubut-on sa Amahan sama sa gibuhat ni Kristo niini.”¹

Si Presidente Smith nagpamatuod: “Ako nakadawat sa pagsaksi sa Espiritu sa Dios sa akong kaugalingon nga kasingkasing, nga milabaw pa sa tanang mga ebidensya, kay kini nagpamatuod ngari kanako, sa ako mismong kalag, sa pagkaanaa sa akong Manunubos, si Jesukristo. Ako nasayud nga siya buhi, ug nga sa katapusang adlaw siya mobarug sa yuta, nga siya moadto sa mga tawo kinsa giandam alang kaniya.”²

Mga Pagtulun-an ni Joseph F. Smith

Ang pagpamatuod kabahin ni Jesukristo moabut isip usa ka mahimayaon nga gasa sa Dios.

Akong giisip nga ang matag baruganan sa Ebanghelyo nga atong nadawat usa ka mahimayaong gasa sa Dios ngadto sa mga anak sa katawhan. Ang gasa sa kaalam, ang gasa sa panabut, ang gasa sa panagna, ang gasa sa mga pinulongan, ang gasa sa pagayo, ang gasa sa pagpamatuod, ang gasa sa kahibalo, kining tanan gitumong sa Labawng Makagagahum nga moari kanato pinaagi sa atong pagkamasulundon sa mga baruganan kabahin sa kinabuhi ug kaluwasan.³

Ang mga tawo dili makadawat sa gasa sa … usa ka pagpamatuod sa Espiritu sa Buhi nga Dios diha sa ilang mga kasingkasing, [gawas kon] sila magtinguha alang niini. Ang baruganan mao: Panuktok kamo ug kini pagaablihan nganha kaninyo; pangayo kamo ug kamo pagahatagan; makakaplag kamo kon kamo magapangita [tan-awa sa Mateo 7:7–8]; ug kon kamo ganahan og kaalam, pangayo niini, sama sa gibuhat ni Solomon; kon kamo ganahan og kahibalo ug pagpamatuod sa espiritu diha sa inyong mga kasingkasing, kinasingkasing nga magtinguha niini. Ibutang ang inyong kaugalingon sa posisyon diin kamo mahimong takus nga modawat niini, dayon kini moabut kaninyo isip usa ka gasa sa Dios, ug ang Iyang pangalan kinahanglang pagadaygon tungod niana.⁴

[Ang pagpamatuod] moabut ngari kanato … tungod kay atong gibutang ang atong mga kaugalingon nga pinasubay sa baruganan sa komunikasyon gikan sa Dios ngadto sa tawo. Kita nagtuo, kita naghinulsol ug mikumpisal sa atong mga sala, kita nagbuhat nianang gikinahanglan sa Ginoo aron makabaton og kapasayloan sa atong mga sala, ug sa ingon kita makadawat sa gasa sa Balaang Espiritu. Ang atong mga hunahuna nahiangay ngadto sa Espiritu sa Dios, ug ngadto sa pamaagi diin ang Dios mipasiugda alang sa pagpadayag sa Iyang hunahuna ngadto sa mga anak sa katawhan.

Karon, usa kini ka dakong butang alang sa usa ka tawo nga makadawat sa pagsaksi diha sa iyang kasingkasing sa balaang misyon sa Anak sa Dios ug sa balaang misyon ni Propeta Joseph Smith…. Mibati kita diha sa atong mga kalag sa kamatuoran sa mga baruganan nga gipahiuli pinaagi kang Propeta Joseph Smith, ug mibati kita niini tungod kay atong gibutang ang atong kaugalingon sa usa ka posisyon nga adunay komunikasyon uban sa Espiritu ug makadungog sa tingog kon kini mamulong ngari kanato. Ang Espiritu sa Dios mamulong sa atong mga espiritu. Ang Ginoo dili sagad nga makig-istorya kanato pinaagi sa atong natural nga mga pagbati, apan kon Siya mamulong Siya mamulong ngadto sa imortal nga bahin; ang espiritu sa tawo makadawat sa mga komunikasyon nga gipadala sa Ginoo ngadto sa Iyang mga anak, ug busa kinahanglan kitang mahimong angayan aron makadawat niini.⁵

Kinahanglan kitang makabaton niini nga kahayag [sa pagpamatuod] pinaagi sa pinadayag, dili kita makahimo niini pinaagi sa atong kaugalingong kaalam. Ang Dios mohatag kanato og kahibalo ug panabut, mogiya siya kanato diha sa dalan sa kamatuoran kon atong ibutang ang atong tanang pagsalig diha kaniya ug dili diha sa tawo.⁶

Ang gasa gikan sa Dios, kon ibaliwala, o gamiton sa dili takus nga paagi, sa usa ka higayon pagakuhaon; ang pagpamatuod kabahin sa kamatuoran dili magpabilin sa usa ka tawo kinsa, human nakadawat, wala mogamit sa sagrado nga gasa sa katuyoan sa pagpalambo sa indibidwal ug sa kinatibuk-an.⁷

Kining dili masaypan nga kasiguroan, nga nakuha pinaagi sa pagnunot ngadto sa pagkamasulundon ug sa pagbuhat sa mga baruganan kabahin sa kinabuhing dayon, padayon nga gipanghimatuoran, sama kaniadto, pinaagi sa “pagtulun-an human sa usa ka pagtulun-an ug lagda human sa usa ka lagda,” pinaagi sa mga pagpadayag sa Balaang Espiritu, nga usa ka nagpadayon ug walay pagkapakyas nga tinubdan sa salabutan, sa pagmaya ug kalipay, nga mas mipaduol kaniya kinsa aduna niini ngadto sa Dios, ug sa katapusan makapahimo kaniya nga makita sama sa iyang Magbubuhat.⁸

Ang Espiritu Santo nagsaksi diha sa atong mga kasingkasing nga si Jesus mao ang Kristo.

Si Jesus … mao ang atong pangulo, siya ang atong panig-ingnan. Ang dalan nga iyang giagian kinahanglan mao ang atong pagalaktan, kon nagpaabut gayud kita nga magpuyo, ug makoronahan uban kaniya didto sa iyang gingharian. Kinahanglan kitang motuman ug mobutang sa atong pagsalig diha kaniya, nga nasayud nga siya mao ang Manluluwas sa kalibutan.

Dili kini lisud nga butang alang kanako nga tuohan kini; nagbasa ako sa Biblia diin akong nakaplagan ang mga saysay kabahin sa daghan niyang mga gipangbuhat, mga gipanulti, mga lagda, ug mga ehemplo. Ug dili ako motuo nga ang bisan kinsa nga tarung, matinuoron nga lalaki o babaye, nga nakaangkon sa kasagaran nga salabutan, makabasa sa mga ebanghelyo sa Bag-ong Tugon ug sa mga pagpamatuod nga gihatag diha kabahin sa Manluluwas, nga dili gayud mobati nga siya mao diin gituohan siya nga mao. Kay ang matag matarung, matinuoron nga tawo naangkon, kapin kon kulang, sa Balaang Espiritu, ug kining balaan nga mensahero diha sa mga kasingkasing sa katawhan mohatag og pamatuod kabahin sa pulong sa Dios; ug sa higayon nga ang tanan sa ingon mobasa niining dinasig nga mga sinulat, uban sa kamatinuoron sa kasingkasing ug kamapainubsanon sa espiritu, nakuhaan sa mga pagpihig ug sa sayop nga mga panghunahuna nga naggikan sa mga tradisyon ug sayop nga mga pagmatuto, ang Espiritu sa Ginoo mohatag og pagsaksi diha sa dili masaypan nga pinulongan nga mopainit sa lig-on nga pagtuo, busa, ako nagtuo nga si Jesus mao ang Kristo, ang Manluluwas, ang bugtong anak sa Amahan; ug kini usab pinaagi sa pagbasa sa Biblia.

Apan nagdepende ba kita diha sa Biblia alang niining lig-on nga pagtuo ug kahibalo? Wala, salamat sa Ginoo nga kita wala. Unsa pa man ang anaa kanato aron sa pagpakigbahin niining kahibalo ug mopalig-on niini nga pagpamatuod? Aduna kita sa Basahon ni Mormon, ang “sungkod ni Ephraim,” nga miabut ngari kanato pinaagi sa gasa ug gahum sa Dios, nga nagpamatuod usab kaniya, ug nagpadayag og usa ka asoy kabahin sa iyang misyon ug mga gipangbuhat uban sa mga lumulupyo niini nga kontinente, human sa iyang pagkabanhaw gikan sa mga patay, sa dihang siya miabut niini nga yuta aron sa pagbisita sa iyang “lain nga karnero,” aron sa paghiusa kanila diha sa usa ka panon, aron sila unta maiya usab nga karnero ug siya ilang bantugan nga magbalantay. Gawas sa lig-on nga pagtuo nga dala mismo sa Basahon, kita aduna sa nag-uban nga pagpamatuod kabahin niya kinsa naghubad niini, kinsa misilyo sa iyang pagpamatuod gamit ang iyang dugo; mao usab nianang sa lain pa nga mga saksi, kinsa mipamatuod sa tibuok kalibutan nga sila nakakita sa mga palid ug sa mga nahisulat niini, diin ang Basahon nahubad….

Nan, ania, ang duha ka mga saksi—ang Biblia ug ang Basahon ni Mormon, ang duha naghatag og pamatuod kabahin sa samang kamatuoran, nga si Jesus mao ang Kristo, nga siya namatay ug nabuhi pag-usab, nakabugto sa mga higot sa kamatayon ug nagmalampuson batok sa lubnganan. Kining ulahi nga dugang ebidensya nga aduna ang mga Santos sa Ulahing mga Adlaw kabahin niini nga kamatuoran, agi og dugang nianang naangkon sa Kristohanong kalibutan kinsa wala motuo sa Basahon ni Mormon.

Apan mao na ba kining tanan? Dili. Aduna kita dinhi laing basahon, ang Doktrina ug mga Pakigsaad, nga naglangkob sa mga pinadayag gikan sa Dios pinaagi kang propeta Joseph Smith, kinsa nagpuyo nga dungan sa atong kaugalingon. Kini mga pulong ni Kristo, namahayag nga siya mao ang sama nga miadto sa mga Judeo, nga gilansang sa krus, gilubong, mibugto sa mga higot sa kamatayon ug mibangon gikan sa lubnganan…. Nan, ania, mao ang laing pagpamatuod kabahin niining balaang kamatuoran; mao nga kita adunay tulo ka mga saksi. Sa ba-ba sa duha o tulo ka mga saksi, kita giingnan, ang tanang mga butang ma-establisar; ug pinaagi sa pagpamatuod sa duha o tulo ka mga saksi kita mapasaylo, o pahamtangan og silot.

Apan makatagbaw ba kini kanako? Tingali, kon dili ako makabaton og dugang nga kahayag o kahibalo. Apan kon ang mas dako nga kahayag moabut, ug ako makabaton sa kahigayunan sa paghimo sa akong kaugalingon nga makapanag-iya niini, dili ako magpabilin nga matagbaw sa unsay mas ubos. Dili gayud kita matagbaw ni magmalipayon human dinhi, gawas kon kita makadawat og kahingpitan sa kahayag ug mga panalangin nga giandam alang sa matarung….

Gihatag kini ngari kanato nga masayud niini nga mga butang alang sa atong kaugalingon. Ang Dios miingon nga siya mopakita niini nga mga butang ngari kanato; ug alang niini nga katuyoan ang Espiritu Santo gipakigbahin ngadto sa tanan kinsa adunay katungod ngadto niini pinaagi sa pagpaubos, nga naghatag og pagpamatuod kabahin sa Amahan ug sa Anak, ug nagdala usab sa mga butang kalabut sa Dios ug mipakita niini ngadto sa tawo. Ang lig-ong mga pagtuo nga tingali atong nabatunan kaniadto kalabut sa kamatuoran gipamatud-an sa Espiritu Santo, naghatag kanato og positibo nga kasiguroan sa kahusto niini, ug pinaagi niini nakabaton kita og personal nga kahibalo, dili sama sa unsay giistorya, apan sama sa usa nga nakakita, mibati, nakadungog, ug nasayud sa iyang kaugalingon mismo.

Dayon, sa pagbarug sa inyong atubangan, akong mga kaigsoonan, isip usa ka mapaubsanong instrumento diha sa mga kamot sa Dios, ako mopamatuod, dili tungod sa kahibalo nga tingali akong nakuha gikan sa mga basahon, apan pinaagi sa mga pinadayag sa Dios ngari kanako, nga si Jesus mao ang Kristo. Ako nasayud nga ang akong Manunubos buhi; ako nasayud nga bisan tuod nga ang mga ulod mahimong moguba niini nga lawas, nga ako diha sa akong unod makakita sa Dios, ug ako makakita kaniya sa akong kaugalingon ug dili pinaagi sa uban. Kini nga kahayag miabut kanako, ug anaa sa akong kasingkasing ug hunahuna, ug kabahin niini ako mopamatuod, ug pinaagi ug tungod niini ako mopamatuod, ug ako nasayud kon unsay akong gipamulong….

Nag-inusara ba ako? Wala; adunay mga napulo ka liboan karon nga makahatag niini nga pagpamatuod. Sila, usab, nasayud niini sa ilang kaugalingon mismo; ang Dios mipakita niini ngadto kanila, nakadawat sila sa Espiritu Santo, nga mihatag og pagsaksi kabahin niini nga mga butang diha sa ilang mga kasingkasing, ug sila usab wala magdepende sa mga basahon, ni diha sa mga pulong sa lain, kay sila nakadawat og kahibalo sa ilang kaugalingon mismo nga gikan sa Dios, ug nasayud sama nga siya nasayud ug nakakita sama sa iyang nakita kalabut niining yano ug bililhon nga mga butang.⁹

Ang pagpamatuod kang Jesukristo nagdasig kanato sa pagbuhat sa mga butang nga Iyang gisugo.

Naghisgut kita kabahin sa Manluluwas, kang Jesus ang Anak sa Dios, ug kita mibati nga luwas ug lig-on diha kaniya, ug nga ang atong mga tiil nagbarug diha gayud sa pundasyon sa mahangturong kamatuoran kon ang espiritu ni Kristo anaa sa atong mga kasingkasing.

Ganahan akong moingon ngadto sa akong mga kaigsoonan, nga kon adunay usa ka tawo sa tibuok kalibutan kinsa nakadawat diha sa iyang kalag sa gugma nga mas lawom ug mas matinguhaon kaysa akong nadawat, ganahan akong makakita kaniya, ganahan akong makauban ang ingon nga tawo. Si Kristo sa pagkatinuod mao ang Manluluwas sa akong kalag, ang Manluluwas sa katawhan. Siya misakripisyo sa iyang kinabuhi alang kanato aron kita mahimong maluwas, iyang gibugto ang mga higot sa kamatayon, ug nagmalampuson batok sa lubnganan, ug miawhag kanato nga mosunod kaniya. Mibangon siya pag-usab gikan sa kamatayon ngadto sa kinabuhi, mipadayag siya sa iyang kaugalingon nga mao ang dalan sa kaluwasan, ang kahayag ug kinabuhi sa kalibutan, ug ako nagtuo niini sa tibuok nakong kasingkasing. Wala lamang ako motuo niini, apan sama nga ako nasayud nga ang adlaw modan-ag, ako usab nasayud nga ang pagtuo kaniya makapadasig sa maayo ug dili sa dautan; ug sama nga ako nasayud nga ang iyang espiritu moawhag sa kalimpyo sa kinabuhi, sa dungog, sa kaligdong, sa kamatinuoron ug sa pagkamatarung, ug dili sa dautan, busa ako nasayud pinaagi sa tanang mga ebidensya nga kini posible alang kanako nga makab-ot nga si Jesus mao ang Kristo, ang Anak sa buhi nga Dios, ang Manluluwas sa katawhan.

Apan uban niining tanan, uban niining kasiguroan diha sa akong kasingkasing, uban niining kahibalo nga akong nadawat, kon ako mohunong dinhi, unsa nga kaayohan ang mahimo niini ngari kanako? Sa unsang kaayohan ang mahimo niining kahibalo ngari kanako? Unsa may mahimo niining kahibalo lamang? Makahimo kini niini, kay nakadawat man niana nga pagpamatuod diha sa akong kasingkasing, kay nakadawat man diha sa akong kalag ang pagsaksi sa espiritu kabahin sa buhi nga Dios, nga si Jesus mao ang Kristo, ug mohunong ako dinha ug dili na mopadayon pa, kana gayud nga pagsaksi diha sa akong kalag modugang sa akong mahangturong kaalautan. Ngano man? Tungod kay dili lamang kini atong katungdanan nga masayud nga si Jesus mao ang Kristo apan ang pagpabilin sa impluwensya sa iyang espiritu diha sa atong mga kalag. Dili lamang kini gikinahanglan nga makabaton sa iyang pagpamatuod diha sa atong mga kasingkasing, apan kini gikinahanglan nga kita mobuhat sa mga butang nga iyang gisugo, ug sa mga buhat sa pagkamatarung nga iyang gihimo, aron nga kita makaangkon sa kahimayaan nga giandam alang sa iyang mga anak kinsa nagbuhat ug nagtuo usab; ug kadtong kinsa wala mobuhat niini sigurado gayud nga mapakyas. “Dili ang tanang magaingon kanako, Ginoo, Ginoo, makasulod sa gingharian sa langit; kondili ang nagatuman sa kabubut-on sa akong Amahan nga anaa sa langit.” [Mateo 7:21.]

Ang Manluluwas miingon: “Daghan unya ang magaingon kanako niadtong adlawa, Ginoo, Ginoo, dili ba nanaghimo man kamig mga propesiya tungod sa imong ngalan? ug nanagpagula sa mga yawa tungod sa imong ngalan? ug nakahimo sa daghang mga milagro tungod sa imong ngalan? Ug unya magaingon ako kanila, Wala ko gayud kamo igkaila; pahawa kanako, kamong mga mamumuhat og dautan.” [Mateo 7:22–23.] Ug ngano man? Tungod kay kamo nagaingon nga nahigugma kanako, diha sa inyong mga ngabil, kamo nagaingon nga midawat kanako, diha sa inyong mga ba-ba, o diha sa inyong mga pulong, apan wala kamo magbuhat sa mga butang nga akong gisugo nga inyong buhaton; kamo wala maghinulsol sa inyong mga sala, kamo wala maghigugma sa Dios sa tibuok ninyong kasingkasing, hunahuna ug kusog, napakyas kamo sa paghigugma sa inyong silingan sama sa inyong kaugalingon, napakyas kamo nga mabunyagan pinaagi sa usa ka tawo nga adunay awtoridad sa pagbunyag alang sa kapasayloan sa mga sala; napakyas kamo sa pagdawat sa gasa sa Espiritu Santo pinaagi sa pagpandong sa mga kamot; napakyas kamo sa pagpaila sa inyong mga kaugalingon uban sa akong katawhan; wala kamo mosulod sa akong pundok; wala kamo mahilakip sa akong mga pinili, ug wala ako makaila kaninyo, “pahawa kanako, kamong mga mamumuhat og dautan.” Ang masayud sa unsay matarung nga pagabuhaton ug wala magabuhat niini, siya nakasala. (Santiago 4:17). Mao kini ang mahimong kahimtang niadtong kinsa yano lamang nga mituo. Kon kamo nagtuo, nganong wala man ninyo buhata ang mga butang nga iyang gimando? …

… Dili kini igo alang kaninyo nga maghunahuna nga kamo mga Santos sa Ulahing mga Adlaw samtang kamo nagabuhat sa inyong naandang mga buhaton, diha sa inyong pagpakabuhi, diha sa inyong mga binuhatan o mga lihok, kamo misunod … sa dili tumutuo sa Dios ug sa balaan nga misyon ni Jesukristo. Dili kini igo. Ang yawa mopahimulos kaninyo, iya kamong ipahisalaag, ug molaglag kaninyo kon dili kamo maghinulsol sa mga binuhatan o mga lihok nga wala mahisubay, o wala mahiangay, sa ebanghelyo nga inyong nadawat.¹⁰

Kinahanglan natong higugmaon ang Manluluwas sa tibuok natong kasingkasing ug kalag.

Ang usa ka lunsay nga pagpamatuod mao ang usa ka lig-on nga suporta sa tanang panahon.¹¹

Akong mga kaigsoonan, nagtinguha ako nga mohatag sa akong pagpamatuod nganha kaninyo; kay nakadawat ako og usa ka kasiguroan nga milukop sa akong tibuok pagkatawo. Mituhop kini sa akong kasingkasing; mipuno kini sa matag bahin sa akong kalag; mao nga mibati ako nga mosulti sa atubangan niini nga katawhan, ug mahimuot nga makabaton sa pribilehiyo sa pagsulti niini atubangan sa tibuok kalibutan, nga ang Dios mipadayag ngari kanako nga si Jesus mao ang Kristo, ang Anak sa buhi nga Dios, ang Manunubos sa kalibutan.¹²

Ako adunay bug-os nga pagsalig diha kang [Jesukristo]. Ang akong tibuok kasingkasing ug kalag hingpit nga napuno sa gugma alang kaniya. Ang akong mga paglaum gitukod diha sa Iyang mahimayaong kinaiya ug sa Iyang pulong. Siya walay sala; Siya walay buling, ug nagbaton og gahum ngadto sa kinabuhing dayon; Iyang giablihan ang dalan gikan sa lubnganan ngadto sa walay katapusan nga kinabuhi alang kanako ug sa tanang mga katawhan. Ang akong pagsalig diha Kaniya walay kinutuban. Ang akong gugma alang kaniya milabaw sa tanan dinhi sa yuta, kon ako makabaton sa Diwa sa Ebanghelyo ingon nga ako kinahanglan, ug Siya alang kanako mao ang una ug labing mahinungdanon. Siya ang pinakabantugan sa tanan nga sukad nakapuyo niining atong kalibutan, ug Siya mianhi aron mahimo natong tan-awon ang kahayag, atong giya ug panig-ingnan, ug ato kining katungdanan ang pagsunod Kaniya.¹³

Mga Sugyot alang sa Pagtuon

Unsa man ang usa ka pagpamatuod? Unsaon man nato sa pagdawat og usa ka pagpamatuod ni Jesukristo? Unsa nga bahin ang papel sa “pagkamasulundon sa mga baruganan kabahin sa kinabuhi ug kaluwasan” diha sa pagpalambo sa usa ka pagpamatuod?
Sa unsang paagi nga ang inyong pagpamatuod mitubo “pagtulun-an human sa usa ka pagtulun-an ug lagda human sa usa ka lagda”? Unsa nga mga panalangin ang moabut ngadto niadtong kinsa modawat sa padayon nga mga pagpadayag sa Balaang Espiritu?
Ubos sa unsa nga mga kahimtang nga ang gasa sa pagpamatuod mahimong kuhaon? Unsaon man nato pag-amuma ang atong mga pagpamatuod? Unsa nga mga sangputanan ang mosunod sa kapakyas sa pag-amuma sa atong mga pagpamatuod?
Unsaon man nato sa pagpakita og pasalamat alang sa gasa sa pagpamatuod?
Sa unsang paagi nga ang pagtuon sa mga kasulatan makatabang kanato nga makabaton og usa ka pagpamatuod ni Jesukristo? Sa unsa man nga diwa nga kita kinahanglan nga mohangup sa mga kasulatan aron motubo ang atong mga pagpamatuod?
Unsaon man nato sa pagbaton og personal nga kahibalo nga si Jesus mao ang Kristo, “dili sama sa unsay gi-istorya, apan sama sa usa nga … nasayud sa iyang kaugalingon mismo”?
Sa unsang paagi nga ang nadawat nga pagpamatuod pinaagi sa Espiritu Santo molabaw sa tanang mga ebidensya? Sa dihang napanalanginan kamo og usa ka pagsaksi gikan sa Espiritu Santo, unsa may inyong gibati?
Nganong gikinahanglan man nga mobuhat sa mga butang nga gisugo sa Manluluwas ingon man usab ang pagtuo diha Kaniya? Sa unsang paagi nga ang inyong pagpamatuod napalig-on pinaagi sa mga buhat sa pagkamatarung? Unsaon man nato sa “pagpabilin sa impluwensya sa espiritu [sa Manluluwas] diha sa atong mga kalag”?
Sa unsang paagi nga ang gamhanang pagsaksi ni Presidente Smith kabahin sa Manluluwas nakatandog sa inyong kasingkasing? Sa unsang paagi nga ang mga pagpamatuod sa Unang Kapangulohan ug sa Korum sa Napulog Duha ka mga Apostoles nakapanalangin kaninyo? Sa atong paghatag sa atong kaugalingon nga mga pagpamatuod, nganong kinahanglan man natong isentro ang atong mga hunahuna diha kang Jesukristo?