Pagtuman sa Balaod sa Ikapulo

Kadtong motuman sa balaod sa ikapulo nakatabang sa pagtuman sa mga katuyoan sa Ginoo ug may katungod sa Iyang mga panalangin.

Gikan sa Kinabuhi ni Joseph F. Smith

Dapit sa katapusan sa tuig 1800, ang Simbahan nagsagubang og dako kaayong utang, nga labaw pa sa usa ka milyon ka dolyares. Kini nga obligasyon sa panalapi bug-at kaayo diha sa hunahuna ni Joseph F. Smith. Sa Oktubre 1899 nga kinatibuk-ang komperensya miingon siya: “Daghan kaayo kita og mahinungdanong instruksyon mahitungod sa atong mga katungdanan isip mga Santos sa Ulahing mga Adlaw, dili lamang mahitungod sa balaod sa ikapulo, apan usab kalabut sa ubang mga butang, nga sama ra usab kaimportante sa ilang dapit sa balaod sa ikapulo. Walay lain, bisan pa, ang mas dako og importansya sa kaayohan sa Simbahan sa karon kay sa paghunahuna niini nga balaod, diin kining mga butanga isulod ngadto sa tipiganan sa Ginoo, aron makab-ot ang panginahanglan sa katawhan.”¹

Usa ka hapon niana paglabay sa pito ka tuig, si Presidente Smith miabut gikan sa iyang opisina ug nakita ang iyang anak nga babaye nga si Rachel diha atubangan sa hall sa Beehive House.

“Asa ang imong mama?” nangutana siya.

“Wala ako kahibalo.”

“Asa man kaha siya?”

“Wala ako kahibalo.”

“Kanus-a man kaha siya moanhi?”

“Pa, wala ako masayud, wala kaayo koy nahibaloan. Bag-o pa lang akong naabut gikan sa eskwelahan.”

“Sige anak,” miingon siya, “gusto ko nga ang imong mama ang unang masayud, apan kay ikaw wala may nahibaloan sultihan ko ikaw.” Sa iyang kamot dunay usa ka papel.

“Nakita ba nimo kini nga papel?”

“Oo sir.”

“Nagpasabut kini nga sa katapusan ang Simbahan wala nay utang.” Mipahiyum siya. “Busa karon aduna ka nay nahibaloan!”²

Mga Pagtulun-an ni Joseph F. Smith

Ang pagkamasulundon sa balaod sa ikapulo nagpamatuod sa atong kamaunongon sa gingharian sa Dios.

Ang Ginoo nagkinahanglan sa ikapulo sa atong kinitaan nga ibutang ngadto sa Iyang tipiganan; ug gihimo kini isip usa ka balaod ngadto sa tanang mga Stake sa Zion.³

Pinaagi niini nga baruganan (ikapulo) ang kamaunungon sa mga katawhan niini nga Simbahan pagasulayan. Pinaagi niini nga baruganan mailhan kon si kinsa ang sa gingharian sa Dios ug kinsa ang supak niini. Pinaagi niini nga baruganan makita kinsang mga kasingkasing ang gipahimutang sa pagbuhat sa kabubut-on sa Dios ug pagsunod sa iyang mga kasugoan, sa ingon nagbalaan sa yuta sa Zion ngadto sa Dios, ug ngadto sa mga supak niini nga baruganan ug mihikaw sa ilang mga kaugalingon gikan sa mga panalangin sa Zion. Dako kaayo ang pagkamahinungdanon niini nga sumpay niini nga baruganan, kay pinaagi niini mailhan kon kita matinud-anon ba o dili matinud-anon. Kini nga buluhaton sama ra ka importante sa hugot nga pagtuo sa Dios, sa paghinulsol sa sala, sa bunyag alang sa kapasayloan sa sala, o sa pagpandong sa mga kamot alang sa gasa sa Espiritu Santo.⁴

Ang balaod sa ikapulo usa ka pagsulay diin ang katawhan isip mga indibidwal masulayan. Si bisan kinsa nga mapakyas sa pagtuman niini nga baruganan pagailhon nga usa ka tawo nga walay pagpakabana sa kaayohan sa Zion, kinsa mipasagad sa iyang katungdanan isip miyembro sa Simbahan, ug walay gihimo alang sa katumanan sa temporal nga pag-uswag sa gingharian sa Dios. Siya walay gikasalmot, sa pagsabwag sa ebanghelyo ngadto sa mga nasud sa kayutaan, ug iyang napasagdan ang pagbuhat sa makahatag unta kaniya og katungod nga makadawat sa mga panalangin ug mga ordinansa sa ebanghelyo.⁵

Ang pagtuman sa balaod sa ikapulo boluntaryo. Mahimo akong mobayad sa akong ikapulo o mahimong dili, sumala sa akong pagpili. Butang kini nga mag-agad sa akong pagpili, kon buhaton ba nako kini o dili kini buhaton; apan, ang pagbati sama sa akong gibati, nga maunungon sa Simbahan, maunungon sa mga interes niini, nga nagtuo nga husto ug makiangayon ang pagtuman sa balaod sa ikapulo ako motuman gayud niini—sa sama nga baruganan nga sa akong hunahuna husto alang kanako ang pagtuman sa balaod sa paghinulsol, ug sa bunyag, alang sa kapasayloan sa mga sala.⁶

Kita kinsa wala makabayad sa atong ikapulo sa mga nangagi, ug busa nakautang sa ikapulo ngadto sa Ginoo, diin kita wala nay kahimoan sa pagbayad, ang Dios dili na magkinahanglan niadto, apan mopasaylo siya sa mga nangagi kon kita motuman niini nga balaod uban sa kamatinuoron sa umaabut. Pagkamanggihatagon kana ug pagkamabination, ug gibati nako ang pasalamat niini.⁷

Gikaingon ko na, ug usbon nako sa pag-ingon dinhi, nga ang lalaki o babaye kinsa kanunayng mobayad sa iyang ikapulo dili gayud mobulag sa Simbahan. Walay kalainan kon unsa ka daghan o unsa ka diyutay man kini; kini usa ka balaod sa Ginoo; usa kini ka tinubdan sa kinitaan sa Simbahan; kini kinahanglanon sa Dios, ug Siya miingon nga kinsa kadtong dili motuman niini dili takus nga makapanunod sa Zion. Walay tawo nga mobulag sa Simbahan kon siya nagbayad sa iyang ikapulo. Makatarungan kini. Ngano? Tungod kay hangtud nga anaa kaniya ang hugot nga pagtuo sa pagbayad sa ikapulo anaa kaniya ang hugot nga pagtuo sa Simbahan ug sa mga baruganan sa Ebanghelyo, ug pipila sa pagkamaayo anaa kaniya, ug pipila sa kahayag anaa kaniya. Hangtud nga siya magabuhat niini ang maninintal dili makabuntog kaniya ug dili makadala kaniya sa kasaypanan.⁸

Ang ikapulo mao ang balaod sa Ginoo sa kinitaan alang sa Simbahan ug alang sa pagpanalangin sa mga Santos.

Ang balaod sa ikapulo mao ang balaod sa kinitaan alang sa Simbahan ni Jesukristo sa mga Santos sa Ulahing mga Adlaw. Kon wala kini, walay kahimoan nga mapadayon ang mga katuyoan sa Ginoo.⁹

Ang Ginoo … mihatag sa balaod sa ikapulo, aron adunay magamit diha sa tipiganan sa Ginoo alang sa pagpadayon sa mga katuyoan nga iyang gilantaw; alang sa pagpundok sa mga kabus, alang sa pagsabwag sa ebanghelyo ngadto sa mga kanasuran sa yuta, alang sa suporta niadtong gitawag aron mohalad sa tibuok nilang panahon, sa tanang higayon, alang sa buluhaton sa Ginoo, ug ngadto sa mga tawo nga nagkinahanglan niining mga butanga. Kon wala kini nga balaod kining mga butanga dili mahitabo, ingon man walay mga templo nga matukod, ug maatiman, o walay kabus nga mapakaon ug masininaan. Busa ang balaod sa ikapulo kinahanglanon kaayo alang sa Simbahan, nga ang Ginoo mipasabut gayud pag-ayo niini.¹⁰

[Ang ikapulo] gigamit aron mapadayon ang ordinansa sa balay sa Dios diha sa … mga templo. Liboan ka liboan ka mga dolyares niini gigamit sa pag-edukar sa mga kabatan-onan sa Zion ug sa pag-atiman sa mga eskwelahan sa Simbahan. Liboan ka mga dolyares ang gigasto sa pagpakaon ug paghatag og mga sinina sa mga kabus, ug sa pag-atiman niadtong mga nagsalig sa Simbahan. Sila naglantaw sa ilang mga “inahan” alang sa tabang ug suporta, ug tukma lamang ug angay nga ang Simbahan mosangkap alang sa kaugalingon niini nga mga kabus ug timawa, mga luya ug walay ikasarang, kutob sa mahimo.¹¹

Gipadayag sa Ginoo kon unsaon kining mga butanga [ikapulo] sa pag-atiman, ug sa pagdumala; sa mga Kapangulohan sa Simbahan ug sa High Council sa Simbahan (nga ang mga Napulog Duha ka mga Apostoles), ug sa Presiding Bishopric sa Simbahan. Nagtuo ako nga adunay kaalam niini. Wala itugyan sa usa ka tawo lamang ang pagpahiluna niini, o huptan kini sa usa ka tawo lamang, dili gayud sa bisan unsang paagi. Moagi kini sa pinakaminus dise-otso ka mga tawo, mga tawo sa kaalam, sa hugot nga pagtuo, sa katakus, sama niining dise-otso ka mga tawo. Ako moingon nga moagi kanila kon unsaon sa pagpahiluna ang mga ikapulo sa katawhan ug sa paggamit niini sa bisan unsang katuyoan sa ilang paghukom ug kaalam nga makapatuman sa pinakamaayo alang sa Simbahan; … kini nga pundo sa ikapulo ipahiluna pinaagi sa mga tawo nga gisangunan sa Ginoo nga adunay katungod sa paghimo niini, alang sa panginahanglan ug kaayohan sa Simbahan.¹²

Ang Ginoo … tuyo nga mimando sa mga tawo nga nangulo niini nga Simbahan ug kinsa responsable alang sa giya ug direksyon sa mga katawhan sa Dios sa pagsiguro nga ang balaod sa Dios [nga ikapulo] gituman. Atong katungdanan ang paghimo niini…. Nahimo kini nga obligasyon sa mga lider sa Simbahan ang pagpamulong kabahin niini nga baruganan, nga dili lamang ang mga tawo ang mohimo niini nga katungdanan mahitungod niini nga balaod, apan unta adunay mga butang diha sa tipiganan sa Ginoo nga makatubag sa mga panginahanglan sa katawhan; kay ang mga panginahanglan sa Simbahan mga panginahanglan usab sa mga katawhan. Ang mga miyembro sa Simbahan mao ang nahimo nga Simbahan, ug busa bisan unsa man ang obligasyon nga anaa sa Simbahan, buluhaton kini sa matag usa nga miyembro sa Simbahan sa tukma kon unsay anaa kaniya. Ang Ginoo nagkinahanglan gikan kanato sa pagsuta nga ang Iyang balaod gisunod sa mga katawhan.¹³

Gusto nakong isulti sa mga kaigsoonan nako dinhi karong buntaga, nga sa akong opinyon wala pa mahitabo sukad nga ang mga miyembro sa Simbahan ni Jesukristo sa mga Santos sa Ulahing mga Adlaw nanagpuyo og mas maayong kinabuhi, mas matinud- anon ug mas makugihon, kay sa karon. Kita adunay nagkalainlaing paagi sa paghukom niini. Usa sa pinakahustong paagi sa pagkahibalo mao ang kamatuoran nga ang balaod sa ikapulo gisunod…. Kini usa ka maayong indikasyon nga ang mga Santos sa Ulahing mga Adlaw nagbuhat sa ilang mga katungdanan, nga sila adunay hugot nga pagtuo sa Ebanghelyo, nga sila andam sa pagsunod sa mga sugo sa Dios, ug sila nagtuman niini nga balaod uban sa dugang nga kamatinud-anon tingali mas labaw pa kay sa kaniadto.

May lain pa akong isulti kaninyo, ug buhaton ko kini pinaagi sa pagpahalipay, ug kana mao, nga kita, pinaagi sa mga panalangin sa Ginoo ug sa kamatinud-anon sa mga Santos sa pagbayad sa ilang ikapulo, nakabayad na sa mga utang nga nag-ulipon kanato. Karon ang mga Santos sa Ulahing mga Adlaw walay utang nga dili niya kabayaran dayon. Sa katapusan miabut na ang higayon nga makabayad kita samtang kita magpadayon. Dili na kita kinahanglang mangutang pa, ug dili na nato kini buhaton kon ang mga Santos sa Ulahing mga Adlaw magpadayon sa pagsunod sa ilang relihiyon ug mosunod niini nga balaod sa ikapulo. Mao kini ang pamalaod alang sa kinitaaan sa Simbahan.

Dugang pa, gusto nakong isulti kaninyo, nga tingali dili dayon nato kana makab-ot, apan among gilauman nga makita unya ang adlaw nga dili na kami mohangyo kaninyo og usa ka dolyar nga donasyon alang sa bisan unsang katuyoan, gawas lamang sa inyong iboluntaryo sa paghatag sa kaugalingon ninyong kagustuhan, tungod kay kita may igo nga ikapulo sa tipiganan sa Ginoo nga ikabayad sa tanang kinahanglanon aron sa pagpalambo sa gingharian sa Dios…. Mao kana ang matuod nga polisiya, ang matuod nga katuyoan sa Ginoo diha sa pagpangdumala sa mga kalihokan sa Iyang Simbahan.¹⁴

Ang pinakaunang butang kabahin sa pagbayad sa ikapulo mao ang pagkamasulundon sa balaod.

Walay duda, daghan pang pagtulun-an ang mabasa gikan sa mga kasulatan mahitungod niining baruganan sa ikapulo, nga gipadayag kanato niini nga dispensasyon, ug gimando niya nga atong tumanon, aron kita masantos, pinaagi sa kamasulundon sa iyang balaod, nga kining yuta unta mahimong usa ka yuta sa Zion ngari kanato; ug ang saad mao, nga kon kita motuman sa mga balaod sa Dios, kon atong ibutang ang atong pagsalig kaniya, kon kita mopaduol kaniya siya mopaduol kanato, ug siya moganti kanato uban sa iyang panabang ug sa iyang panalangin. Ug Siya mobadlong sa mga manunubad, ug iyang himoon ang yuta nga mabungahon, ug kini mohatag sa iyang kusog ngadto sa tig-alima, sa nagtikad sa yuta, ug sa tigbalantay sa mga panon. Iyang palamboon ang iyang mga baka, ug mohimo kaniyang mauswagon sa iyang tuo ug sa wala, maiya ang kaabunda, kay iyang gibutang ang iyang pagsalig ngadto sa Dios; kay siya mipaduol ngadto kaniya, ug siya matinguhaon nga mosulay kaniya, sa pagsuta kon dili ba niya ablihan ang mga bintana sa langit ug ibu-bu ang mga panalangin ngadto kaniya nga walay lawak nga igo sa pagdawat niini [tan-awa sa Malaquias 3:10]. Himoa nga ang matag tawo nga nakadawat sa ebanghelyo ni Jesukristo modawat niini nga panultihon, ug mopatalinghug niini nga mga pulong, kay kining tanan bililhon. Ang ubang tawo dili kaayo magtagad niini, ug kadtong mobuhat sa ingon, mahitabo, sa walay duda, mapakyas sa pagpaduol, mataligam-an nila nga masulayan ang Ginoo, dili nila matuman ang kasugoan nga gihatag, ug dili gayud sila masayud nga ang Dios namulong sa kamatuoran, ug nga siya makahimo sa pagtuman sa iyang pulong ug sa saad ngadto sa iyang mga katawhan kon sila matinguhaong motuman ug mosunod sa iyang balaod.…

… May nahimamat akong usa ka igsoon—dili na kinahanglang isulti pa ang iyang ngalan, kay siya usa sa mga liboan nga makapamatuod sa samang pagpamatuod, dili lamang pinaagi sa ba-ba apan pinaagi sa mga ebidensya sa pagdaginot, sa kamalamboon, kamauswagon ug sa kausbawan nga naglibut kaniya taliwala sa disyerto. Niini nga panahon siya nakaangkon og daghan kaayong ani, ang iyang uma namunga og daghan kaayo, samtang ang uma sa iyang mga silingan natabunan sa mga sagbut, ug ang ilang ani mga katunga o ikatulo lamang nga bahin ang gidaghanon itandi sa iyang ani. Sa inyong hunahuna unsa may hinungdan niini? Ako nagtuo nga ang hinungdan niini mao ang kamatuoran nga ang Ginoo nanalangin kaniya; ug siya mihimo, kay siya usa ka intelehente nga tawo, usa ka tawo nga wala lamang maghago pinaagi sa kamaalamon ug kamabinantayon, apan uban sa kahadlok sa Dios, ug sa tinguha sa iyang kasingkasing sa pagtuman sa iyang mga balaod…. Nagbayad siya sa iyang ikapulo, gihinumduman niya ang iyang mga halad, masulundon siya sa mga balaod sa Dios, ug dili siya mahadlok nga mopaambit sa iyang pagpamatuod ngadto sa iyang mga higala ug mga silingan nga pinaagi sa pagkamasulundon ang Dios mipanalangin ug mipalambo kaniya, ug mihimo kaniya kon unsa siya karon. Dili lamang kay siya ra; aduna pay ubang milambo sa samang paagi. Ug ako mopamatuod nga nahimo kini kay ang Dios nanalangin kaniya, ug sa iyang yuta, ug sa iyang mga kahago, hinungdan nga naangkon niya ang timusbawan, ug naangkon ang mga panalangin nga iyang gitinguha ug gihagoan. Nagtrabaho siya uban ang pagsalig sa Ginoo; ang Ginoo nasayud sa iyang kasingkasing, ug mipanalangin kaniya tungod niana.¹⁵

Busa sa katapusan nakaingon ako nga ang pinakaunang butang kabahin sa pagbayad sa ikapulo mao ang pagkamasulundon sa balaod, ug ang dugang nga kaayohan moabut kanato pinaagi sa pagkamasulundon kay ni bisan kinsa pa. Tingali bililhon kaayo ang kantidad nga napulo ka mga liboan alang kanato, ug mobayad sa matinuoron nga ikapulo sa atong kinitaan, nga naghimo sa atong ikapulo nga daw dako na kaayo; bisan pa ang kaayohang moabut sa atong kaugalingon pinaagi sa pagkamasulundon sa balaod sa Dios mas dako pa gayud kaayo sa kaulahian kay sa kaayohang nahatag niini ngadto sa mga kabus. Mas bulahan siya nga mihatag og limos kay kaniya nga nakadawat niini.

Ang problema lang, kay kon ang usa ka tawo maadunahan na gani mag-anam siya og kaluya sa pagsunod sa mga balaod sa Dios. Ang mga katigayunan makapakabus sa katawhan kon hisgutan ang kabahin sa Labaw nga Makagagahum. Ang usa ka tawo nga kabus sayon rang makabayad sa iyang ikapulo ug moamot gikan sa diyutay nilang pagkaon alang sa kaayohan sa mga timawa; apan kon siya mamilyonaryo na, o bisan unsa nga ingon niini, sa iyang kasingkasing mag-anam siya og kahakog. Ang resulta, mahikawan niya ang iyang kaugalingon sa mga opurtunidad nga makadawat og mas daghan pang pagpakita sa kamaayo og kalooy sa Dios diha kaniya, nga iya untang madawat pinaagi sa nagkadugang nga gidaghanon sa kaayohan nga iyang mabuhat tungod sa nagkadaghan niyang magamit.

Ang pagkamasulundon mao ang gikinahanglan sa Labawng Makagagahum. Pagkamasulundon ang gikinahanglan Niya gikan kang Abraham. Namulong ako karon sa pagkamasulundon ngadto sa Dios, ug dili sa tawo; ug anaa ako sa pagsupak kang bisan kinsa nga moprubar nga ang pagkamasulundon ngadto sa Dios, bisan gani ang pagbayad og ikapulo, dili mas maayo kay sa pagkasupakan—dili maayo kay sa tawo mismo, ug sa tibuok katawhan. Kon ang usa ka tawo masulundon sa balaod sa ikapulo, siya adunay katungod sa panalangin sa Dios sa iyang kaugalingon ug, kon siya ang hunahunaon, adunay magamit diha sa tipiganan sa Ginoo nga ikapakaon sa mga kabus, alang sa pagsabwag sa Ebanghelyo ngadto sa mga kanasuran, alang sa pagtukod og mga templo, ug alang sa pagtuman sa Iyang mga katuyoan; apan kon siya dili masulundon niini nga balaod, nan walay anaa didto, ug siya mismo mahikawan sa mga panalangin nga ihatag unta sa Ginoo kaniya.¹⁶

Mga Sugyot alang sa Pagtuon

Unsa ang balaod sa ikapulo sa Ginoo? (Tan-awa usab sa D&P 119:3–4.) Unsa nga mga baruganan sa ebanghelyo ang atong gisunod kon kita mobayad sa atong ikapulo? Ngano nga ang pagkamasulundon sa balaod mao ang “pinakaunang butang” sa pagbayad sa ikapulo?
Unsa man ang mahimo sa mga miyembro sa Simbahan kon sa nangagi wala sila makabayad sa ilang ikapulo ug karon gusto na nga mosunod niini nga sugo? Unsa ang pipila sa mga rason nga ang mga tawo dili makabayad sa ilang ikapulo? Sa unsang paagi kaha nga ang katigayunan “makapahakog” sa kasingkasing?
Unsa ang pipila ka mga katuyoan nga gamitan sa ikapulo? Sa unsang paagi nga ang ikapulo makatabang sa pagkab-ot sa espirituhanon ug sa temporal nga mga panginahanglan sa mga miyembro sa Simbahan ug sa uban?
Kinsa man ang modeterminar kon unsaon sa paggamit ang mga pundo o kabtangan sa Simbahan? (Tan-awa usab sa D&P 120.)
Unsaon man sa pagtudlo niini kabahin sa pagbayad sa ikapulo ngadto sa pamilya?
Unsa nga mga panalangin ang gisaad sa Ginoo ngadto sa mga mobayad sa ilang ikapulo? (Tan-awa usab sa Malaquias 3:10–12.) Kanus-a ug sa unsang paagi kamo napanalanginan pinaagi sa pagtuman sa balaod sa ikapulo?

Prove Me Now Herewith — *Sulayi Ninyo Ako Karon,* ni Glen S. Hopkinson, naghulagway sa matinud-anong pioneer nga mga Santos nga nagdala sa ilang mga ikapulo, nga sa kasagaran dili kwarta ang gihatag kon dili mga butang nga kinahanglanon, ngadto sa buhatan alang sa ikapulo duol sa Salt Lake Temple.