Priesthood, ang Balaan nga Pagdumala

Ang balaan nga priesthood mao ang awtoridad ug gahum sa Dios nga gitugyan ngadto sa tawo aron sa pagdumala ug pagpanalangin sa Iyang katawhan.

Gikan sa Kinabuhi ni Joseph F. Smith

Sa edad nga 28, si Joseph F. Smith nagserbisyo isip secretary sa Konseho sa Unang Kapangulohan ug Korum sa Napulog Duha. Pagka 1 sa Hulyo 1866, samtang ang regular nga miting sa pagampo sa Konseho hapit na mahuman, si Presidente Brigham Young mipahibalo sa iyang mga kaigsoonan: “Kanunay nakong gibati nga maayong buhaton sama nga ang Espiritu mopugos kanako. Ako kining hunahuna ang pag-ordinar kang Brother Joseph F. Smith ngadto sa pagka-Apostol, ug mahimong usa sa akong mga magtatambag.” Iyang gitawag ang matag usa sa Kaigsoonan sa pagpahayag sa ilang mga pagbati kabahin sa tawag, ug silang tanan misuporta kang Presidente Young uban sa “masadyaong pagtugot.”

Sila dayon mipatong sa ilang mga kamot sa ulo ni Joseph F., ug si Presidente Young miingon: “Brother Joseph F. Smith, among gipatong ang among mga kamot sa imong ulo sa pangalan ni Jesukristo, ug pinaagi sa hiyas sa Balaan nga Priesthood kami miordinar kanimo nga mahimong usa ka Apostol sa ang Simbahan ni Jesukristo sa mga Santos sa Ulahing mga Adlaw, ug mahimong usa ka linain nga saksi ngadto sa kanasuran sa yuta. Among gisilyo sa imong ulo ang tanang awtoridad, gahum ug mga yawe niining balaan nga pagka-Apostol; ug kami mi-ordinar kanimo nga mahimong usa ka magtatambag sa Unang kapangulohan sa Simbahan ug sa Gingharian sa Dios dinhi sa yuta. Kini nga mga panalangin among gisilyo diha kanimo sa pangalan ni Jesukristo ug pinaagi sa awtoridad sa Balaan nga Priesthood. Amen.”¹

Pagka 8 sa Oktubre 1867, si Joseph F. Smith gipaluyohan ug gi-set apart isip usa ka sakop sa Korum sa Napulog Duha ka mga Apostoles atol sa kinatibuk-ang komperensya, usa ka mahinungdanong punto sa iyang tibuok kinabuhi nga paningkamot isip usa ka sakop sa nagdumalang konseho sa priesthood sa Simbahan. Sa panahon sa iyang pagserbisyo nga sobra sa 50 ka tuig, ang iyang dakong kasinatian ug kaalam sa priesthood ug sa pangagamhanan sa Simbahan nakahatag og kaayohan sa Simbahan sa tibuok kalibutan.

Mga Pagtulun-an ni Joseph F. Smith

Ang priesthood mao ang awtoridad diin ang Dios midumala ug mipanalangin sa Iyang katawhan.

Ang Balaan nga Priesthood mao kana nga awtoridad nga gitugyan sa Dios ngadto sa tawo, diin siya mahimong mamulong sa kabubut-on sa Dios nga ingon og ang mga anghel ania dinhi aron mamulong niini mismo sa ilang mga kaugalingon; diin ang mga tawo gihatagan og gahum sa pagbugkos dinhi sa yuta ug didto sa langit kini pagailhon nga binugkos, ug sa pagluag dinhi sa yuta ug didto sa langit pagailhon kini nga linuagan; diin ang mga pulong sa tawo, nga gipamulong agig paggamit niana nga gahum, mahimong pulong sa Ginoo, ug ang balaod sa Dios ngadto sa katawhan, kasulatan, ug balaang mga mando.… Mao kini ang awtoridad diin ang Ginoo nga Labawng Makagagahum midumala sa iyang katawhan, ug diin, sa panahon nga moabut, siya modumala sa kanasuran sa kalibutan.²

Mahimong daghan na kaayo ang nasulti kalabut sa awtoridad ug sa mga katungod sa priesthood. Mao kini ang mahinungdanong baruganan kabahin sa pagdumala ug kabahin sa organisasyon, diin ang mga kusog ug mga pwersa sa katawhan sa Dios sa tanang mga kapanahonan nagiyahan ug magiyahan. Mao kana nga baruganan diin ang Dios nga Labawng Makagagahum midumala sa tibuok Niyang kalibutan. Mao kini ang baruganan diin ang Simbahan ni Jesukristo sa mga Santos sa Ulahing mga Adlaw gidumala.… Mao kini ang awtoridad diin ang Dios mipadayag ug mipahiuli ngadto sa mga katawhan alang sa ilang pagdumala ug paggiya as pagtukod sa Zion ug sa pagsangyaw sa Ebanghelyo ngadto sa kanasuran sa yuta, hangtud nga ang matag anak nga lalaki ug anak nga babaye ni Adan makabaton sa pribilehiyo nga madungog ang tingog sa Ebanghelyo, ug madala ngadto sa pagkahibalo sa kamatuoran, dili lamang dinhi niini nga yuta, apan didto sa kalibutan sa espiritu.³

[Ang] Melchizedek o Balaan nga Priesthood … mao ang awtoridad diin ang mga indibidwal o ang … mga korum … naglangkob sa priesthood sa Simbahan, mahimong lehitimong molihok diha sa pangalan sa Ginoo; o ang naglihok, naggiya, nagkontrolar, nagdumala o nangulo nga ahensya, katungod ug awtoridad, nga anaa sa Dios nga Kapangulohan ug gitugyan ngadto sa tawo alang sa katuyoan sa iyang panudlo, pagsulod ngadto sa Simbahan, espiritwal ug temporal nga giya, pagdumala ug kahimayaan. ⁴

Ang Ginoo miestablisar dinhi sa yuta sa Priesthood diha sa kahingpitan niini … pinaagi sa direkta nga pinadayag ug sugo gikan sa langit; … siya mipasiugda og usa ka han-ay o pagdumala nga lapas sa kapasidad, ug nga labaw gayud sa kaalam ug kahibalo ug panabut sa tawo, kutob dinhi, sa pagkatinuod, nga daw imposible alang sa hunahuna sa tawo, nga walay tabang sa Espiritu sa Dios, sa pagsabut sa mga katahum, mga gahum, ug kinaiya sa Balaan nga Priesthood. Daw lisud alang sa mga tawo sa pagsabut sa mga buhat sa Priesthood, ang lehitimo niini nga awtoridad, ang sakop ug gahum niini; ug sa gihapon pinaagi sa kahayag sa espiritu sayon ra kini nga masabtan.⁵

Bisan unsa pa man sila ka dili perpekto, ang mga tawo gihatagan niini nga awtoridad, diin sila makapamulong ug makalihok diha sa pangalan sa Amahan ug sa Anak, ug katungdanan sa Dios, kon sila mamulong pinaagi sa Iyang espiritu sa pagbuhat sa ilang mga katungdanan isip Iyang mga sulugoon, sa pagrespeto ug sa pagtuman sa unsay ilang gisulti, tungod kay sila namulong pinaagi sa awtoridad nga Iyang gihatag.… Siyempre, ang tanang mga butang kinahanglan nga buhaton diha sa pagkamatarung. Walay tawo ang makabuhat og bisan unsa diha sa pagkadili matarung nga katungdanan sa Dios nga morespeto. Apan kon ang usa ka tawo kinsa naghupot sa Priesthood maghimo nianang unsay matarung, katungdanan sa Dios nga moila niini ingon og Siya Mismo ang nagbuhat niini.⁶

Ang mahinungdanong bahin sa butang mao: ang Ginoo miestablisar sa iyang Simbahan, mi-organisar sa iyang priesthood, ug mitugyan sa awtoridad ngadto sa piho nga mga indibidwal, mga konseho ug mga korum, ug katungdanan kini sa katawhan sa Dios sa pagtuman aron nga sila masayud nga kini madawat ngadto kaniya.⁷

Bisan tuod nga ang priesthood gihatag lamang ngadto sa mga lalaki, ang mga lalaki ug mga babaye makaambit sa mga panalangin niini.

Ang Priesthood orihinal nga gigamit sa han-ay nga patriyarkal; kadtong kinsa naghupot niini migamit sa ilang mga gahum una pinaagi sa katungod sa ilang pagkaamahan. Mao usab kini uban sa halangdon nga si Elohim. Kining una ug kinalig-unan nga pangangkon kabahin sa atong gugma, balaang pagtahud ug pagkamasulundon gibase sa kamatuoran nga siya ang Amahan, ang Tiglalang, sa tanang katawhan.… Ang tawo nga nakaangkon sa balaan nga Priesthood may pagkasama kaniya. Apan ingon nga ang mga kalalakin-an sa yuta dili makahimo sa dapit sa Dios isip iyang mga representante nga walay awtoridad, ang pagtudlo ug ordinasyon natural lang nga mosunod. Walay tawo ang adunay katungod sa pagkuha niini nga dungog ngadto sa iyang kaugalingon, gawas kon siya pagatawgon sa Dios pinaagi sa mga paagi nga iyang nailhan ug gihatagan og gahum.⁸

Ang han-ay nga patriyarkal adunay balaang gigikanan ug magpadayon sa karon ug sa kahangturan.… Ang mga lalaki, mga babaye ug mga bata kinahanglang makasabut niini nga han-ay ug niini nga awtoridad diha sa mga panimalay sa katawhan sa Dios, ug maninguha sa paghimo niini kon unsay gitumong sa Dios nga kini mahimo, usa ka kwalipikasyon ug pagpangandam alang sa kinatas-an nga kahimayaan sa iyang mga anak.⁹

Bisan unsa nga mga kadungganan, mga pribilehiyo, o himaya nga makab-ot sa lalaki pinaagi sa Priesthood, mao kadtong giambitan ug gitagamtam sa asawa. Siya kinsa usa kaniya diha kang Kristo, ang tanan niyang mga kadungganan iyang mga kadungganan, ang iyang mga panalangin mao ang iyang mga panalangin, ang iyang himaya mao ang iyang himaya, kay sila usa ra—dili mabulag.… Sama sa gisulti ni Pablo, “Diha sa Ginoo ang babaye dili gawas sa lalaki ni ang lalaki gawas sa babaye.” [Tan-awa sa 1 Mga Taga-Corinto 11:11.] Sa ato pa, ang lalaki dili makaangkon sa himaya, dungog o kahimayaan kon wala ang babaye, ni ang babaye kon wala ang lalaki. Silang duha mga ighihingpit sa usa ka tibuok…. Ang Priesthood sa Anak sa Dios gitugyan ngadto sa lalaki, nga ang pag-angkon sa sama nga kahalangdon ug kahingpitan, siya mahimong molihok sama ni Kristo ug molihok sama sa Dios.… Samtang ang lalaki … mao ang direkta nga tumong kang kinsa ang gahum ug dungog sa Priesthood gitugyan, ug siya ang aktibo nga medyum sa mga kalihokan niini, ang babaye ang moambit sa mga kaayohan niini, sa mga panalangin niini, sa mga gahum niini, sa mga katungod ug mga pribilehiyo niini, uban sa lalaki isip ighihingpit sa iyang kaugalingon.… Ang gahum wala gihatag ngadto sa babaye aron molihok nga gawasnon sa lalaki, ni gihatag kini sa lalaki aron molihok nga gawasnon kang Kristo.¹⁰

Ang mga babaye mao ang responsable sa ilang mga lihok sama ra usab nga ang mga lalaki mao ang responsable sa ilaha, bisan tuod nga ang lalaki, nga naghupot sa awtoridad sa priesthood, giisip nga mao ang pangulo, isip ang lider.… Dugang pa, kon maghisgut kita kabahin sa mga lalaki, maghisgut usab kita kabahin sa mga babaye, kay ang mga babaye gilakip uban sa mga lalaki ug dili mabulag nga bahin sa katawhan.¹¹

Ang mga yawe sa priesthood gikinahanglan alang sa pagdumala sa Simbahan.

Ang Priesthood sa kinatibuk-an mao ang awtoridad nga gihatag sa tawo aron molihok alang sa Dios. Ang matag tawo nga giordinahan ngadto sa bisan unsa nga ang-ang sa Priesthood aduna niini nga awtoridad nga gitugyan ngadto kaniya.

Apan gikinahanglan nga ang matag lihok nga gipahigayon ubos niini nga awtoridad kinahanglan nga buhaton sa tukma nga panahon ug dapit, sa tukma nga paagi, ug pinasubay sa tukma nga han-ay. Ang gahum sa paggiya niini nga mga paningkamot naglangkob sa mga yawe sa Priesthood. Sa kahingpitan niini, ang mga yawe gihuptan sa usa lamang ka tawo sa usa ka higayon, ang propeta ug presidente sa Simbahan. Mahimo siyang motugyan sa bisan unsa nga bahin niini nga gahum ngadto sa uban, diin nga kahimtang nga kana nga tawo nga naghupot sa mga yawe nianang piho nga paningkamot. Sa ingon, ang presidente sa usa ka templo, ang presidente sa usa ka stake, ang bishop sa usa ka ward, ang presidente sa usa ka misyon, ang presidente sa usa ka korum, ang matag usa naghupot sa mga yawe sa mga paningkamot nga gipahigayon nianang piho nga pundok o lokalidad. Ang iyang Priesthood dili molambo pinaagi niining espesyal nga pagtudlo; … ang presidente sa usa ka korum sa mga elder, pananglitan, walay dugang nga Priesthood kaysa bisan kinsa nga sakop niana nga korum. Apan siya naghupot sa gahum sa pagdumala sa opisyal nga mga paningkamot nga gipahigayon diha … sa korum, o sa ato pa, ang mga yawe niana nga dibisyon nianang buhata.¹²

[Ang] Presidente mao ang tigpama-ba sa Dios, ang tigpadayag, ang tighubad, ang manalagna, ug ang Propeta sa Dios sa tibuok Simbahan. Siya kini ang naghupot sa mga yawe niining Balaan nga Priesthood—ang mga yawe nga maoy moabli sa mga pultahan sa mga Templo sa Dios ug sa mga ordinansa sa Iyang balay alang sa kaluwasan sa mga buhi ug sa katubsanan sa mga patay. Siya kini ang naghupot sa gahum sa pagbugkos, diin ang tawo mahimong mobugkos dinhi sa yuta ug kini pagailhon nga binugkos didto sa langit, ug diin ang mga lalaki nga awtorisado sa angay nga paagi ug gitudlo kaniya kinsa naghupot sa mga yawe mahimong moluag dinhi sa yuta ug didto sa langit kini pagailhon nga linuagan. Mao kini ang han-ay sa Balaan nga Priesthood.¹³

Ang priesthood nagdumala uban sa balaod sa gugma.

Ang Ginoo mipadayag sa mahinungdanong baruganan kabahin sa organisasyon, kon sa unsa nga paagi dumalaon ang Iyang Simbahan, nga giestablisar sa Ginoo Mismo diha sa Simbahan, ang awtoridad sa Balaan nga Priesthood, kanang Halangdon nga Priesthood, ang pagka-Apostol, ang mga Seventy, ug ang mga Elder, ug dayon ang mga organisasyon sa Ubos nga Priesthood—ang mga Bishop, ang mga Priest, ang mga Teacher ug ang mga Deacon— ang Dios miestablisar niining mga organisasyon diha sa Simbahan alang sa pagdumala sa mga tawo. Alang sa unsa man? Aron sa pagpanglupig kanila? Dili. Aron sa pagpasakit kanila? Dili, sa liboan ka mga higayon, dili. Alang sa unsa man? Aron nga sila ug ang ilang mga anak makabaton unta sa mga kaayohan niining mga organisasyon alang sa pagtudlo, alang sa pagtambag, alang sa giya, alang sa pinadayag, ug alang sa inspirasyon sa pagbuhat nianang gikinahanglan sa Ginoo gikan kanila, nga sila mahimong hingpit diha sa ilang mga kinabuhi.¹⁴

Gidumala kita pinaagi sa balaod, tungod kay nahigugma kita sa usag usa, ug nadasig pinaagi sa pagkamainantuson ug gugmang putli, ug maayong kabubut-on; ug ang atong tibuok organisasyon gibase sa ideya kabahin sa pagkontrolar sa kaugalingon; sa baruganan kabahin sa pagsinabtanay, ug andam hinoon nga moantus kon mahimoan og sayop kaysa mobuhat og sayop. Ang atong mensahe mao ang kalinaw sa yuta ug maayong kabubut-on ngadto sa mga tawo; gugma, gugmang putli ug kapasayloan, nga maoy modasig sa tanang adunay kalabutan sa ang Simbahan ni Jesukristo sa mga Santos sa Ulahing mga Adlaw. Ang ato mao ang usa ka Simbahan diin ang balaod mao ang naghari, apan ang balaod mao ang balaod sa gugma.¹⁵

Walay tawo ang kinahanglang lupigan. Walay awtoridad sa Priesthood ang mahimong dumalaon o buhaton sa bisan unsa nga matang sa pagkadili matarung, nga dili makapasilo sa Dios. Busa, kon motagad kita sa mga tawo kinahanglang dili kita motagad kanila uban sa paghukom og sayop diha sa atong mga hunahuna batok kanila.¹⁶

Walay usa ka tawo ang naghupot sa bisan unsa nga posisyon nga adunay awtoridad diha sa Simbahan kinsa makapahigayon sa iyang katungdanan ingon nga siya kinahanglan nga buhaton diha sa bisan unsa nga diwa kaysa diha sa diwa sa pagka-amahan ug pagkaigsoon ngadto niadtong kinsa iyang gipangulohan. Kadtong kinsa adunay awtoridad kinahanglan nga dili mahimong mga tigmando, ni mga diktador; kinahanglan dili sila modominar; kinahanglan ilang makuha ang mga kasingkasing, ang pagsalig ug gugma niadtong ilang gipangulohan, pinaagi sa pagkamabination ug tiunay nga paghigugma, pinaagi sa kalumo sa espiritu, pinaagi sa pagdani, pinaagi sa ehemplo nga dili mabadlong ug dili maabut sa dili makiangayon nga pagpanaway. Niini nga paagi, diha sa pagkamabination sa ilang mga kasingkasing, diha sa ilang gugma alang sa ilang katawhan, ila silang giyahan diha sa dalan sa pagkamatarung, ug motudlo kanila sa dalan sa kaluwasan, pinaagi sa pagsulti kanila, pinaagi sa lagda ug ehemplo: Sunda ako, sama sa akong pagsunod sa atong pangulo.¹⁷

Tahura ang gahum ug awtoridad sa balaan nga priesthood.

Usa kini ka angay nga butang alang kanato nga modawat ug motahud sa Balaan nga Priesthood nga gipahiuli sa yuta niini nga dispensasyon, pinaagi kang Joseph ang Propeta. Nasayud ako nga kini maayo, tungod kay giisip nga modapig sa kamatuoran, ug mopaluyo sa Simbahan, ug mopalambo sa mga tawo sa kahibalo, sa maayong mga buhat, sa pagkamatinud-anon sa mga katuyoan sa Ginoo, ug kini mahinungdanon sa tukma nga pagdumala sa katawhan sa Dios dinhi sa yuta, ug alang sa pagdumala sa atong kaugalingon, sa pagdumala sa atong mga pamilya, sa pagdumala sa atong temporal ug espiritwal nga mga kalihokan, sa tagsa-tagsa ug sa kinatibuk-an usab.¹⁸

Tahura kanang gahum ug awtoridad nga atong gitawag og Balaan nga Priesthood, nga sunod sa kapunongan sa Anak sa Dios, ug gihatag ngadto sa tawo pinaagi sa Dios mismo. Tahura kana nga Priesthood. Unsa man kana nga Priesthood? Dili kini sobra o kulang kaysa balaan nga awtoridad nga gitugyan ngadto sa tawo gikan sa Dios. Mao kana ang baruganan nga kinahanglan natong tahuron.… Ang Priesthood sa Anak sa Dios dili mahimong gamiton sa bisan unsa nga matang sa pagkadili matarung; ni ang gahum niini, ang hiyas niini ug sa ingon ang awtoridad maanaa kaniya kinsa dautan, kinsa mabudhion diha sa iyang kalag ngadto sa Dios ug ngadto sa iyang mga isigkatawo. Dili kini maanaa diha sa pwersa ug gahum kaniya kinsa wala motahud niini sa iyang kinabuhi pinaagi sa pagtuman sa mga gikinahanglan sa langit.¹⁹

Inyo bang gitahud kini nga Priesthood? … Kamo ba, nga naghupot niana nga Priesthood, ug nakaangkon sa katungod ug awtoridad gikan sa Dios sa pagdumala diha sa pangalan sa Amahan, ug sa Anak, ug sa Espiritu Santo, molapas sa pagsalig ug gugma sa Dios, sa paglaum ug tinguha sa Amahan natong tanan? Kay, sa pagtugyan niana nga yawe ug panalangin nganha kaninyo, siya nagtinguha ug nagpaabut kaninyo nga mopalambo sa inyong calling.²⁰

Kon kamo motahud sa balaan nga Priesthood og una diha sa inyong kaugalingon, motahud kamo niini diha niadtong kinsa nangulo kaninyo, ug kadtong kinsa nagdumala sa nagkalainlaing mga calling, sa tibuok Simbahan.²¹

Kini … dili maayo nga ang mga Santos sa Ulahing mga Adlaw ug ang mga anak sa mga Santos sa Ulahing mga Adlaw dili kaayo mohatag og igong pagtagad niining sagradong baruganan kabahin sa awtoridad nga gipadayag gikan sa kalangitan sa dispensasyon diin kita nagpuyo.… Kini sagrado, ug kinahanglan kining huptan isip sagrado sa mga tawo. Kinahanglan kining tahuron ug respetohan nila, bisan kinsa man ang naghupot niini, ug bisan kinsa man ang gisangunan sa responsibilidad diha sa Simbahan. Ang mga batan-ong lalaki ug mga batan-ong babaye ug ang mga tawo sa kinatibuk-an kinahanglang motahud niini nga baruganan ug moila niini isip butang nga sagrado, ug dili kana matiawtiawan ni ipamulong nga dili kaayo hatagan og pagtagad nga walay silot. Ang pagbaliwala niini nga awtoridad mosangput ngadto sa kangitngit ug sa apostasiya, ug pagkaputol gikan sa tanang mga katungod ug mga pribilehiyo sa balay sa Dios; kay pinaagi kini sa hiyas niini nga awtoridad nga ang mga ordinansa sa ebanghelyo gipahigayon sa tibuok kalibutan ug sa matag sagrado nga dapit, ug kon wala kini dili sila mapahigayon. Kadto usab kinsa naghupot niini nga awtoridad kinahanglan nga motahud niini diha mismo sa ilang mga kaugalingon. Kinahanglan silang magpakabuhi sa ingon aron mahimong takus sa awtoridad nga gitugyan ngadto kanila ug takus sa mga gasa nga nahatag na ngadto kanila.²²

Mga Sugyot alang sa Pagtuon

Unsa man ang priesthood? Alang sa unsa man nga mga katuyoan nga gitugyan sa Ginoo ngadto sa tawo ang awtoridad sa priesthood?
Unsaon man nato “sa pagsabut sa mga buhat sa Priesthood”?
Sa unsang paagi nga ang kalalakin-an ug kababayen-an sa Dios moambit sa mga panalangin, mga gahum, ug mga pribilehiyo sa priesthood?
Sa unsang paagi nga ang priesthood mipanalangin sa inyong kinabuhi? Giunsa man niini sa pagpanalangin niadtong anaa sa inyong panimalay?
Unsa man ang yawe sa priesthood? Nganong gihatag man kini? Kinsa man ang naghupot sa tanang mga yawe sa priesthood? Kinsa man ang naghupot sa mga yawe diha sa ward ug sa stake?
Sa unsa man nga diwa nga kinahanglang ipahigayon sa mga naghupot sa priesthood ang ilang mga katungdanan? (Tanawa sa D&P 121:41–46.) Unsa nga impluwensya ang anaa sa usa ka naghupot sa priesthood diha sa panimalay ug sa Simbahan kon magpakita siya og “tiunay nga gugma” ug “kalumo sa espiritu”?
Unsaon man nato sa pagtahud sa priesthood ug sa paghupot niini nga sagrado? Sa unsang paagi nga mahimo natong “wala kaayo mahatagi og maayong pagtagad” kining sagrado nga awtoridad?
Sa unsang paagi nga ang ehemplo sa Manluluwas makatabang kanato nga masabtan kon unsaon sa paggamit ug pagtahud niining awtoridad sa priesthood?

Si Presidente Joseph F. Smith niadtong mga 1860, usa ka sakop sa Korum sa Napulog Duha ka mga Apostoles ug Magtatambag ngadto kang Presidente Brigham Young.