Ang Presidente sa Halangdon nga Priesthood sa Simbahan

Kinahanglan kitang mopaluyo ug mopatalinghug sa Presidente sa Simbahan, kinsa naghupot sa mga yawe sa balaan nga priesthood ug naggiya sa Simbahan sa Dios dinhi sa yuta.

Gikan sa Kinabuhi ni Joseph F. Smith

Si Presidente Joseph F. Smith gipaluyohan isip ikaunom nga Presidente sa Ang Simbahan ni Jesukristo sa mga Santos sa Ulahing mga Adlaw sa usa ka espesyal nga komperensya niadtong 10 sa Nobyembre 1901. Kining bag-o nga buluhaton mituman sa usa ka panagna ni Presidente Lorenzo Snow nga si Joseph F. Smith mahimong Presidente sa Simbahan.¹

Gitawag isip usa ka Apostol pinaagi ni Presidente Brigham Young niadtong 1866 ug nagserbisyo isip Magtatambag sa upat ka mga Presidente sa Simbahan—Brigham Young, John Taylor, Wilford Woodruff, ug Lorenzo Snow—si Presidente Smith kanunay nga mihatag og pagsaksi “sa balaan nga awtoridad … sa kaligdong, sa dungog, sa kaputli sa kinabuhi, sa salabutan, ug sa kabalaan sa misyon ug tawag” niining mga sulugoon sa Dios.²

Sulod sa 17 ka tuig maisugon siyang nagserbisyo isip Presidente sa Simbahan, uban sa tumang kamapainubsaon ug debosyon. Iyang gisultihan ang mga Santos, “Ako dili mahinungdanon diha niini nga buhat sa personal nga paagi, ug ako walay bili gawas diha sa mapainubsanong paningkamot sa pagbuhat sa akong katungdanan ingon nga gihatag sa Ginoo kanako ang abilidad sa pagbuhat niini.”³

Mipamatuod siya nga ang Simbahan gigiyahan sa balaanong paagi: “Gusto akong moingon nganha kaninyo nga wala gayuy panahon sukad sa pag-organisar sa ang Simbahan ni Jesukristo sa mga Santos sa Ulahing mga Adlaw, nga ang usa ka tawo migiya sa Simbahan nga dili ingon niini, wala bisan sulod sa usa ka gutlo. Wala kini mahitabo sa kapanahonan ni Joseph; wala kini mahitabo sa kapanahonan ni Brigham Young; wala kini mahitabo sukad; dili gayud kini mahitabo. Ang direksyon niini nga buhat diha sa katawhan sa kalibutan dili gayud itugyan diha sa mga tawo. Kini buhat sa Dios.”⁴

Mga Pagtulun-an ni Joseph F. Smith

Ang Dios Mismo ang naggiya sa Iyang buhat ug sa Iyang katawhan.

Ang Dios mi-establisar sa tanang mga butang diha sa han-ay niini. Ang balay sa Dios usa ka balay sa kahusay, ug dili usa ka balay sa kalibug. Diha niini nga balay ang Dios mismo mao ang Labing Halangdon nga Pangulo, ug kinahanglan nga sundon siya. Si Kristo anaa diha sa hitsura ug panagway sa iyang pagkatawo, ang iyang Bugtong Anak, ug siya nagbarug isip atong Manluluwas ug atong Dios…. Sunod sa Dios ug kang Kristo, dinhi sa yuta gibutang ang usa ka tawo kang kinsa gitugyan ang mga yawe sa gahum ug awtoridad sa balaan nga Priesthood, ug kang kinsa ang katungod sa pagpangulo gihatag. Siya ang tigpama-ba sa Dios ngadto sa iyang katawhan, sa tanang mga butang kalabut sa pagtukod sa Zion ug sa espirituhanon ug temporal nga kaluwasan sa katawhan.⁵

Walay tawo nga mangulo sa katawhan sa Dios ni sa iyang buhat. Ang Dios mahimong mopili og mga lalaki ug mohimo kanila nga mga instrumento diha sa iyang mga kamot alang sa katumanan sa iyang mga katuyoan, apan ang himaya ug dungog anaa gihapon sa Amahan, kang kinsa nagdepende ang kaalam ug ang kusog sa paggiya sa iyang katawhan ug ang pag-atiman sa iyang Zion. Wala ako mangulo sa Simbahan ni Jesukristo, ni sa mga Santos sa Ulahing mga Adlaw, ug gusto nako nga masabtan gayud kini pag-ayo. Walay tawo ang naghimo…. Hinumdumi nga ang Dios mao ang naggiya sa buhat. Iyaha kini. Dili kini buhat sa tawo. Kon buhat pa kini ni Joseph Smith, o ni Brigham Young, o ni John Taylor, Wilford Woodruff, o Lorenzo Snow, dili unta kini makalahutay sa mga pagsulay diin kini napaubos.⁶

Ang dungog ug pagdayeg maadto [sa Presidente sa Simbahan,] kanang instrumento sa mga kamot sa Dios sa pag-establisar og kahusay taliwala sa kawalay kasiguroan, ug sa piho nga mga lagda diin kita nasayud sa direksyon nga atong paingnan.⁷

Tulo ka nagdumala nga mga high priest ang nangulo sa Simbahan dinhi sa yuta.

Ang Dios nga Amahan, Dios nga Anak, ug Dios nga Espiritu Santo, naglangkob sa Dios nga Kapangulohan ug sa dili hitupngan nga nagdumalang korum sa tanang mga nilalang sa Amahan. Tulo ka mga lalaki ang nangulo sa Simbahan dinhi sa yuta … mga lalaki kansang bugtong hunahuna mao ang pagbuhat og maayo sa tanang katawhan, kansang labing mahinungdanon nga kahingawa mao ang kaayohan sa katawhan sa Ginoo, ug kansang kanunay nga paningkamot mao ang paghiusa kanila ug pagpatrabaho kanila, ang matag usa diha sa iyang dapit ug tawag, aron sa pagtabang sa pagtukod sa Zion.⁸

Ang Ginoo sa pagsugod niini nga buhat mipadayag nga kinahanglang adunay tulo ka mga high priest nga mangulo sa Halangdon nga Priesthood sa iyang Simbahan ug sa tibuok Simbahan. (Doktrina ug mga Pakigsaad 107:22, 64, 65, 66, 67, 91 ug 92.) Iyang gitugyan ngadto kanila ang tanang awtoridad nga gikinahanglan aron sa pagdumala sa tanang mga kalihokan sa Simbahan. Naghupot sila sa mga yawe sa balay sa Dios ug sa mga ordinansa sa ebanghelyo, ug sa matag panalangin nga gipahiuli sa yuta niini nga dispensasyon. Kini nga awtoridad gitugyan diha sa usa ka kapangulohan sa tulo ka mga high priest. Tulo sila ka mga presidente. Ang Ginoo mismo ang mitawag kanila sa ingon. (Doktrina ug mga Pakigsaad seksyon 107:29.) Apan adunay usa ka tigdumalang presidente, ug ang iyang mga magtatambag mga presidente usab.⁹

Ang nagdumala sa tibuok simbahan mao ang usa ka konseho nga gitawag og unang kapangulohan, nga gilangkuban sa usa ka presidente ug duha ka mga magtatambag, sunod kanila mao ang napulog duha ka mga apostoles, tugbang diha sa awtoridad sa unang kapangulohan, bisan tuod nga ubos ngadto kanila ug magbuhat ubos sa ilang direksyon.¹⁰

Ang tigdumalang opisyal sa Simbahan mahimo ug kinahanglan nga hisgutan ug tawagon nga “Presidente;” kini mao usab sa mga magtatambag sa Unang Kapangulohan, kay ang matag usa kanila usa ka presidente sama sa gisulti sa Ginoo (Doktrina ug mga Pakigsaad 107:22, 24, 29); apan dili kini angay nga yano ra nga hisgutan kabahin sa Presidente sa Simbahan, ug [kini] dili husto ang pagtawag kaniya, isip “Propeta,” “Manalagna,” o “Tigpadayag,” bisan tuod nga kining halangdon kaayo nga mga tawag piho gayud nga iyaha, ug ila usab sa matag usa sa iyang mga magtatambag, sa matag usa sa Napulog Duha…. Kini mga katungdanan sa espirituhanong mga gahum ug mga buluhaton, ug hilabihan ka sagrado para gamiton isip yano ra nga mga tawag.¹¹

Sa kanunay adunay usa ka pangulo sa Simbahan, ug kon ang Kapangulohan sa Simbahan matangtang tungod sa kamatayon o sa laing hinungdan, nan ang sunod nga pangulo sa Simbahan mao ang Napulog Duha ka mga Apostoles, hangtud nga ang usa ka kapangulohan ma-organisar pag-usab nga adunay tulo ka mga high priest kinsa adunay katungod sa paghupot sa katungdanan sa Unang Kapangulohan sa tibuok Simbahan; … ug katungdanan kini sa Napulog Duha ka mga Apostoles sa pagpadayon gayud, sa paagi nga gitakda na, sa pagsiguro nga ang Unang Kapangulohan na-organisar pag-usab, aron wala nay kulang diha sa pagtrabaho ug kahusay sa Priesthood diha sa Simbahan.¹²

Ang Presidente sa Halangdon nga Priesthood naghupot sa mga yawe sa balaan nga priesthood.

Ang Priesthood sa kinatibuk-an mao ang awtoridad nga gihatag ngadto sa tawo aron sa pagbuhat alang sa Dios. Ang matag lalaki nga naordinahan sa bisan unsa nga ang-ang sa Priesthood, aduna niini nga awtoridad nga gitugyan ngadto kaniya.

Apan gikinahanglan kini nga ang matag buhat nga gipahigayon ubos niini nga awtoridad kinahanglang buhaton sa tukma nga panahon ug dapit, diha sa tukma nga paagi, ug sunod sa tukma nga han-ay. Ang gahum sa pagdumala niini nga mga buhat naglangkob sa mga yawe sa Priesthood.¹³

Ang tanang mga yawe ug awtoridad ug gahum kalabut sa pagdumala sa Simbahan ug sa Melchizedek ug Aaronic Priesthood nakasentro diha sa tigdumalang opisyal sa Simbahan. Walay kalihokan ni katungdanan, sa sulod sa Simbahan, nga dili mahimong mabutangan sa Presidente sa Simbahan, ug mahimong dili buhaton, kon kini gikinahanglan, o kon kini gikinahanglan nga iya kining buhaton [tan-awa sa D&P 107:9]. Naghupot siya sa katungdanan sa patriarch; naghupot siya sa katungdanan sa high priest ug sa apostol, sa seventy, sa elder, sa bishop ug sa priest, teacher ug deacon diha sa Simbahan; kining tanan anaa sa Kapangulohan sa Simbahan ni Jesukristo sa mga Santos sa Ulahing mga Adlaw, ug sila makahimo sa pagpahigayon sa bisan unsa ug diha sa tanan niining mga calling kon gikinahanglan sa panahon.¹⁴

Wala pa gayud sukad gawas sa usa ka gitakda sa usa ka panahon sa paghupot sa mga yawe sa gingharian sa Dios kalabut sa yuta. Samtang si Kristo nagpabilin dinhi sa yuta siya ang naghupot niini; apan sa dihang siya mibiya, iya kining gitugyan ngadto kang Pedro, siya nga mao ang presidente o pangulo sa mga apostoles; ug iya kadtong katungod sa pagdumala ug pagdawat og pinadayag alang sa Simbahan, ug paghatag og tambag sa tanang mga kaigsoonan. Human nga si Satanas ug ang dautan nga mga tawo milampus batok sa Simbahan, milansang sa krus sa Manluluwas ug mipatay sa mga apostoles, ang mga yawe sa gingharian gikuha gikan sa yuta…. Gikan sa panahon nga ang mga yawe niini nga Priesthood gikuha gikan sa yuta hangtud nga kini nadawat ni Joseph Smith, walay tawo nga nakaangkon sukad niana nga Priesthood, ni sa mga yawe niini, uban sa awtoridad sa pagtukod sa Zion sa Dios, ug sa pag-andam sa simbahan o sa katawhan alang sa ikaduhang pag-anhi ni Kristo.¹⁵

Ang Doktrina ug mga Pakigsaad miklaro gayud niini pag-ayo nga ingon nga ang matag opisyal sa Simbahan adunay katungod sa pagpahigayon diha sa iyang kaugalingong katungdanan, “ang Melchizedek nga Pagkapari naghupot sa katungod sa kapangulohan, ug adunay gahum ug pagtugot ibabaw sa tanan nga mga buhatan diha sa Simbahan sa tanan nga mga panahon sa kalibutan, sa pagtugyan sa mga espirituhanon nga mga butang.” (Doktrina ug mga Pakigsaad, seksyon 107:8.)

Dugang pa, sa sama nga pinadayag sa mga bersikulo 65 ug 66, gisultihan kita:

“Busa, gikinahanglan gayud nga adunay usa nga matudlo sa Halangdon nga Pagkapari aron sa pagdumala diha sa pagkapari, ug siya pagatawgon nga Presidente sa Halangdon nga Pagkapari sa Simbahan:

“O sa lain nga mga pulong, ang Tigdumala nga Halangdon nga Pari ibabaw sa Halangdon nga Pagkapari sa Simbahan.”¹⁶

Ang nag-unang kamatuoran nga mahinumduman mao nga ang Priesthood mas mahinungdanon pa kaysa bisan unsa sa mga katungdanan niini; ug nga bisan kinsa nga lalaki nga naghupot sa Melchizedek Priesthood mahimo, pinaagi sa katungod sa pagkaaduna niini, mopahigayon og bisan unsa nga ordinansa kalabut niini, o konektado niini, kon gitawag aron sa pagbuhat sa ingon pinaagi sa usa ka tawo nga naghupot sa tukma nga awtoridad, diin nga tukma nga awtoridad gitugyan diha sa Presidente sa Simbahan, o kang bisan kinsa nga iyang itudlo. Ang matag opisyal sa Simbahan ubos sa iyang paggiya, ug siya gigiyahan sa Dios. Gipili usab siya sa Ginoo nga mahimong pangulo sa Simbahan, ug sa ingon mahimo, kon ang Priesthood sa Simbahan (nga naglakip sa mga opisyal niini ug mga sakop niini), midawat ug mipaluyo kaniya. (Doktrina ug mga Pakigsaad, seksyon 107:22.)¹⁷

Ang Presidente gitudlo aron modawat sa mga pinadayag alang sa tibuok Simbahan.

Ang Ginoo mitudlo usab og usa ka tawo sa usa ka higayon dinhi sa yuta aron sa paghupot sa mga yawe sa pinadayag ngadto sa tibuok pundok sa Simbahan diha sa tanan niining mga organisasyon, mga awtoridad, mga ordinansa ug mga doktrina. Ang espiritu sa pagpadayag gitugyan ngadto sa tanang mga miyembro niini alang sa kaayohan ug paglamdag sa matag indibidwal nga nakadawat sa inspirasyon niini, ug sumala sa kahimtang diin siya gitawag sa pagtrabaho. Apan alang sa tibuok Simbahan, siya kinsa nangulo mao lamang ang gitudlo aron makadawat sa mga pinadayag pinaagi sa sugo ug sa pagtapus sa kontrobersiya. Inabagan sa iyang mga magtatambag, nangulo siya sa tibuok Simbahan sa tibuok kalibutan; sa ingon ang Unang Kapangulohan naghupot sa katungod sa paghatag og adunay awtoridad nga direksyon sa tanang mga butang nga may kalabutan sa pagtukod ug pagdumala ug paghatag og lagda sa pundok.¹⁸

Ang mga Santos sa Ulahing mga Adlaw naghupot isip usa ka baruganan sa ilang hugot nga pagtuo, nga … ang Presidente sa Simbahan giila isip ang bugtong tawo kang kinsa ang balaang komunikasyon moabut isip balaod ug doktrina ngadto sa relihiyusong pundok; nga ang ingon nga pinadayag mahimong moabut sa bisan unsa nga panahon, sa bisan unsa nga hilisgutan, espirituhanon o temporal, sigun sa pagbuot sa Dios; ug, sa katapusan, nga, sa hunahuna sa matag matinud-anon nga Santos sa Ulahing mga Adlaw, ang ingon nga pinadayag, sa bisan unsa nga itambag, ipahimangno o kinahanglanon niini, mao ang labaw sa tanan.¹⁹

Sa higayon nga ang usa ka indibidwal mobarug sa pag-angkon sa katungod sa pagkontrolar ug sa pagdiktar, o sa paglingkod sa paghukom sa iyang mga kaigsoonan, ilabi na niadtong kinsa nangulo, kinahanglan siyang pugngan dayon, o ang panagbingkil, panagbahin ug pagkalibug mao ang moresulta. Ang matag lalaki ug babaye niini nga Simbahan kinahanglang mas mahibalo pa kaysa pagnunot sa ingon niana nga espiritu; sa higayon nga ang ingon nga pagbati moabut ngadto kanila kinahanglan nila kining isalikway, kay kini direkta nga supak sa kapunongan sa Priesthood, ug ngadto sa diwa ug kaalam niini nga buhat. Dili kita modawat ingon nga adunay awtoridad apan kanang direkta nga nagagikan pinaagi sa gitudlo nga pamaagi, ang natukod nga mga organisasyon sa priesthood, nga mao ang pamaagi nga gitudlo sa Dios diin mahibaloan ang iyang hunahuna ug kabubuton ngadto sa kalibutan.²⁰

Hingpit kini nga wala mahisubay, dili makatarunganon ug walay hinungdan nga maghunahuna nga human mitawag ang Dios og usa ka tawo ug mitudlo kaniya ngadto niini nga buhat, nga Iya na lang siyang agian ug moadto sa lain aron motuman sa samang katuyoan. Walay makatarunganon nga tawo ang modawat sulod sa usa ka gutlo sa ingon nga pahayag. Ang seryusong pagpamalandong sa ingon nga ideya mao ang pag-akusar sa Labawng Makagagahum sa pagkadili makanunayon, ug mao ang tigpasiugda sa kalibug, panagbingkil ug panagbahin. Ang Gingharian sa Dios dili gayud ma-establisar dinhi sa yuta sa ingon nga paagi.²¹

Kon [ang Presidente sa Simbahan] mahimong dili matinudanon, ang Dios motangtang kaniya sa iyang nahimutangan. Ako mopamatuod sa pangalan sa Dios sa Israel nga Siya dili motugot sa pangulo sa Simbahan, siya kinsa Iyang gipili nga mangulo, nga molapas sa Iyang mga balaod ug mobiya sa kamatuoran; sa higayon nga siya moagi sa dalan nga mopaingon ngadto niini, ang Dios motangtang kaniya. Ngano man? Tungod kay ang pagtugot sa usa ka dautan nga moangkon niana nga posisyon, mao ang pagtugot, sama sa panultihon, ang tuburan nga mahimong hugaw, butang nga dili gayud Niya tugutan.²²

Ang Dios motahud ug mopalambo sa Iyang mga sulugoon.

[Kini] dili buhat sa tawo apan sa Dios nga Labawng Makagagahum; ug Iya kining katungdanan nga mosiguro nga ang mga lalaki nga moangkon niini nga posisyon mga lalaki nga nahiuyon Kaniya, mga lalaki nga modawat og mga panudlo gikan Kaniya, ug kana mopahinabo sa sama sumala sa mga tambag sa Iyang kabubut-on.²³

Ang priesthood sa [Dios] kanunay gayud nga makita nga gilangkuban sa husto nga mga lalaki alang sa katungdanan, mga lalaki kinsa andam nga motuman sa trabaho, mga lalaki kang kinsa siya makatrabaho ug makahimo og lagda sa mga kalihokan sa iyang Simbahan sumala sa mga tambag sa iyang kaugalingong kabubut- on. Ug sa higayon nga ang mga indibidwal mangita og lain nga tinubdan, niana nga gutlo ilang gitambug ang ilang kaugalingon sa madanihong mga impluwensya ni Satanas, ug mopahimo sa ilang kaugalingon nga maoy manubag nga mahimong mga sulugoon sa yawa; nakalimot sila sa tinuod nga han-ay diin ang mga panalangin sa Priesthood matagamtaman; dili sila aprubado sa gingharian sa Dios, ug anaa sa peligro nga dapit.²⁴

Ang Dios motahud ug mopalambo sa iyang mga sulugoon diha sa atubangan sa mga tawo. Iya silang paluyohan diha sa pagkamatarung. Iya silang bayawon sa kahitas-an, mohimaya kanila ngadto sa iyang presensya, ug sila moambit sa iyang himaya hangtud sa kahangturan.²⁵

Mohatag ako sa akong pagpamatuod sa balaan nga awtoridad niadtong kinsa misunod kang Propeta Joseph Smith diha sa kapangulohan niini nga Simbahan. Mga tawo sila sa Dios…. Makapamatuod ako sa kaligdong, sa dungog, sa kaputli sa kinabuhi, sa salabutan, ug sa kabalaan sa misyon ug tawag ni Brigham [Young], ni John [Taylor], ni Wilford [Woodruff], ug ni Lorenzo [Snow]. Sila mga dinasig sa Dios aron sa pagbuhat sa misyon diin sila gitawag, ug nasayud ako niini. Nagpasalamat ako sa Dios alang nianang pagpamatuod ug alang sa Espiritu nga miawhag kanako ug miaghat kanako ngadto niining mga tawhana, ngadto sa ilang misyon, ngadto niini nga katawhan, ngadto sa akong Dios ug sa akong Manunubos.²⁶

Akong mga kaigsoonan, ang akong buluhaton, ang akong katungdanan, mao ang pagsangyaw sa Ebanghelyo ni Jesukristo ug Kaniya nga gilansang sa krus ug mibangon gikan sa mga patay ug milingkod nga kinoronahan og gahum, himaya ug kahalangdon diha sa tuo nga kamot sa iyang Amahan, ang atong Dios.… Kinahanglan akong buhaton ang pinakamaayo kutob sa akong mahimo, ang pinakamaayo nga akong nahibaloan kon unsaon, alang niadtong gisalig sa Dios nga akong atimanon. Kinahanglan usab nakong buhaton ang akong katungdanan ngadto sa katawhan sa Dios kang kinsa Iyang kabubut-on nga kinahanglan akong mahimong mapainubsanon nga ministro ug magtutudlo sa Ebanghelyo.²⁷

Buhat kini sa Ginoo, ug mangamuyo ako kaninyo nga dili kini kalimtan. Mangaliyupo ako kaninyo nga motuo niini; kay kini tinuod. Ang tanan nga giingon sa Ginoo kalabut niining buhat sa ulahing mga adlaw mapahinabo. Ang kalibutan dili makapugong niini…. Ang Dios ang nangulo, ug iyang giyahan ang iyang katawhan ngadto sa kadaugan.²⁸

Sa higayon, kon mahitabo, makasulti ako og pulong nga madawat sa Dios, sa higayon nga mamulong ako sa Iyang kamatuoran, pinaagi kini sa presensya ug impluwensya sa Iyang Espiritu, ug kini mao ang Iyang dungog ug Iyang himaya nga ako mihimo niini. Wala gayud ako mokuha og bisan unsa nga dungog ngari sa akong kaugalingon. Dili ako gusto og dungog; wala ako modawat gawas nianang pagkasakop sa Simbahan ni Kristo, ang dungog sa pagbaton og usa ka posisyon nga wala mahugawi, wala mabulingi, dili matarug, ug dili mabalhin, sa gingharian sa akong Dios ug sa Iyang Kristo.²⁹

Kini mao ang gingharian sa Dios o wala, kutob sa may kalabutan kanako. Ako dili mahinungdanon diha niini nga buhat sa personal nga paagi, ug ako walay bili gawas diha sa mapainubsanong paningkamot sa pagbuhat sa akong katungdanan ingon nga gihatag sa Ginoo kanako ang abilidad sa pagbuhat niini. Apan kini ang gingharian sa Dios. Unsay buot nakong ipasabut sa gingharian sa Dios mao ang organisasyon sa Simbahan ni Jesukristo sa mga Santos sa Ulahing mga Adlaw, diin si Jesukristo mao ang hari ug ang pangulo.³⁰

Mga Sugyot alang sa Pagtuon

Kinsa man ang nangulo sa Simbahan? Nganong importante man alang kanato nga masabtan nga “walay tawo nga mangulo sa katawhan sa Dios ni sa iyang buhat”?
Unsa nga mga panalangin ang gisaad ngadto sa mga miyembro sa Simbahan kon sila matinud-anong mosunod sa Presidente sa Simbahan? (Tan-awa usab sa D&P 21:4–6.) Sa unsa nga mga paagi nga kamo napanalanginan pinaagi sa pagsunod sa tambag sa buhi nga mga propeta?
Unsaon ninyo sa pagpaluyo sa Unang Kapangulohan ug sa Korum sa Napulog Duha ka mga Apostoles diha sa ilang buhat?
Unsay buot ipasabut sa “halangdon kaayo nga mga tawag” nga propeta, manalagna, ug tigpadayag? Ngadto kang kinsa man kining mga tawag magamit?
Unsa man ang mga yawe sa priesthood? Unsay buot ipasabut sa pagpaluyo sa Presidente sa Simbahan isip ang bugtong tawo dinhi sa yuta kinsa nakaangkon og awtoridad nga mogamit sa tanang mga yawe sa priesthood?
Nganong mahinungdanon man kaayo nga masayud nga bugtong ang Presidente sa Simbahan lamang ang gitudlo aron makadawat og pinadayag alang sa tibuok Simbahan? Unsaon man nato sa pagpanalipod batok sa pagtuo sa mini nga mga propeta ug mini nga mga pinadayag?
Nganong makasiguro man kita nga ang Presidente sa Simbahan kanunay nga mogiya kanato sumala sa kabubut-on sa Dios?

First Presidency — Ang Unang Kapangulohan, Abril 1910 ngadto sa Oktubre 1911 (wala ngadto sa tuo): Anthon H. Lund, Joseph F. Smith, John Henry Smith.