Usa ka Personal nga Pagsaksi kang Propeta Joseph Smith

Si Propeta Joseph Smith gipili sa Dios sa pagpahiuli sa kahingpitan sa ebanghelyo nganhi sa yuta.

Gikan sa Kinabuhi ni Joseph F. Smith

Sayo sa iyang kinabuhi, si Joseph F. Smith nakadawat og pagpamatuod nga si Propeta Joseph Smith gipili aron sa pagpahiuli sa ebanghelyo ni Jesukristo niining katapusang dispensasyon. Paglabay sa mga katuigan si Presidente Smith nakahinumdom: “Isip usa ka bata nakaila ako kang Propeta Joseph Smith. Isip usa ka bata nakapaminaw ako kaniya nga nagsangyaw sa ebanghelyo nga gisangun ug gipaatiman kaniya sa Dios. Isip usa ka bata ilado kaayo ako sa iyang panimalay, sa iyang kabanay, ingon nga ako nailhan kaayo sa mga tawo sa panimalay sa akong amahan. Akong napabilin ang pagsaksi sa Espiritu nga gisilsil ngari kanako, isip usa ka bata, ug nga akong nadawat gikan sa diosnon nga inahan, ang lig-on nga pagtuo nga si Joseph Smith usa ka propeta sa Dios; nga siya nadasig ingon nga wala nay lain pang tawo sa iyang henerasyon, o sulod sa mga siglo sa una, nga nadasig; nga siya gipili sa Dios sa pagpahimutang sa mga pundasyon sa Gingharian sa Dios.”¹

Samtang nagserbisyo isip Presidente, si Joseph F. Smith mitugot sa pagpalit sa mahinungdanong mga lugar nga importante ngadto sa kinabuhi ni Propeta Joseph Smith ug sa pagtubo sa Simbahan, lakip na ang yutang natawhan sa Propeta didto sa Sharon, Vermont; sa bilanggoan sa Carthage, Illinois; ug sa umahan ni Joseph Smith Sr. didto sa Manchester, New York.

Si Presidente Joseph F. Smith naghisgut sa buhat sa Propeta: “Mohatag ako sa akong pagpamatuod nganha kaninyo ug sa kalibutan, nga si Joseph Smith gibayaw pinaagi sa gahum sa Dios aron sa pagtukod sa mga sukaranan sa dako nga buluhaton sa ulahing adlaw, aron sa pagpadayag sa kahingpitan sa ebanghelyo nganhi sa kalibutan niini nga dispensasyon, aron sa pagpahiuli sa Priesthood sa Dios nganhi sa kalibutan, diin pinaagi niini ang katawhan mahimong molihok diha sa pangalan sa Amahan, ug sa Anak, ug sa Espiritu Santo, ug kini pagadawaton sa Dios; kini pinaagi sa iyang awtoridad. Ako mohatag sa akong pagpamatuod ngadto niini; ako nasayud nga kini tinuod.”²

Mga Pagtulun-an ni Joseph F. Smith

Si Propeta Joseph Smith mao ang pinili nga instrumento sa Dios aron sa pagpahiuli sa ebanghelyo sa kaluwasan.

Si Joseph Smith mao ang instrumento nga gipili ug gitugahan sa iyang awtoridad sa pagpahiuli sa balaan nga Priesthood, ang gahum sa Dios nga mobugkos dinhi sa yuta ug didto sa langit,—ang gahum sa Priesthood diin pinaagi niini ang katawhan mahimong mopahigayon sa mga ordinansa sa ebanghelyo ni Jesukristo alang sa kaluwasan sa katawhan. Pinaagi kang Joseph Smith ang ebanghelyo sa paghinulsol, bunyag sa tubig alang sa kapasayloan sa mga sala, ang bunyag sa Espiritu Santo ug pinaagi sa kalayo napahiuli, ug ang kahibalo nga si Jesus mao ang Kristo, ang Bugtong Anak sa Dios, gipakita pinaagi sa espiritu sa kamatuoran. Kita adunay kapangakohan ngadto niining mapainubsanon nga sulugoon nga gipili sa Ginoo aron sa pagtukod sa pundasyon niini nga buhat alang sa mga ordinansa sa ebanghelyo sa Anak sa Dios, nga nianang higayuna ug wala gihapon mahibaloi sa kalibutan, diin pinaagi niini mahimo kitang mahiusa isip mga pamilya, mga kaliwatan, ubos sa mga higot sa bago ug walay katapusan nga pakigsaad, karon ug alang sa tanan nga kahangturan.

Kita adunay kapangakohan ngadto kang Propeta Joseph Smith, isip usa ka instrumento diha sa kamot sa Ginoo, alang sa kahibalo nga atong naangkon kabahin sa buhat nga kinahanglan nga himoon diha sa balay sa Dios, alang sa kaluwasan sa mga buhi ug sa katubsanan sa mga patay, ug alang sa mahangturong panaghiusa sa mga kalag kinsa nahiusa niini nga kinabuhi pinaagi sa gahum sa Dios, ubos sa higot sa walay katapusan nga pakigsaad. Kita utangan, o adunay kapangakohan, ngadto kang Propeta Joseph Smith, isip mao ang instrumento diha sa mga kamot sa Dios, alang sa kahibalo nga ato karong naangkon nga ang tawo dili mahimaya ngadto sa presensya sa Dios ug sa hingpit nga katagbawan niini nga himaya, nga mag-inusara. Wala kini gimugna alang sa lalaki nga mag-inusara, kay diha sa Ginoo ang babaye dili gawas sa lalaki, ni ang lalaki gawas sa babaye.³

Ang Dios buhi, ug si Jesus mao ang Kristo, ang Manluluwas sa kalibutan. Si Joseph Smith usa ka propeta sa Dios—buhi, dili patay; kay ang iyang pangalan dili gayud mahanaw. Ang anghel nga mibisita kaniya ug mipadayag sa mensahe sa Dios ngadto kaniya, misulti kaniya nga ang iyang pangalan pagalitukon alang sa maayo ug alang sa dautan sa tibuok kalibutan [tan-awa sa Joseph Smith—Kasaysayan 1:33]. Kini nga panagna gihimo sa panahon sa iyang kabatan-on, sa wala pa ma-organisar ang Simbahan, ug sa wala pay bisan unsa nga pagpaabut nianang unsay natuman sukad. Ang pamahayag nahimo, bisan pa man nga nianang higayuna daw labihan gayud ka imposible; apan gikan sa adlaw nga kini gipamulong hangtud niining gutloa, ug gikan karon hangtud sa katapusang mga adlaw sa yuta, ang pangalan ni Joseph Smith, ang propeta sa ika-disenwebe nga siglo, nasangyaw, ginasangyaw, ug isangyaw sa gawas ngadto sa mga nasud sa yuta, ug pagahuptan diha sa pagpasidungog o pagtamay sa mga tawo sa kalibutan …; kay siya mihimo ug naghimo sa buhat sa Manluluwas. Iyang gitukod ang mga pundasyon niini nga dispensasyon alang sa pagpahiuli sa mga baruganan nga gitudlo sa Anak sa Dios, kinsa nagpakabuhi, nagtudlo, ug namatay alang niini nga mga baruganan, ug mibangon gikan sa mga patay.⁴

Diin [ang pangalan ni Joseph Smith] gipamulong alang sa kaayohan, pinaagi niadtong kinsa adunay pribilehiyo nga makadungog sa ebanghelyo nga miabut sa yuta pinaagi kaniya, ug kinsa igo gayud nga nagmatinuoron ug mapainubsanon kaayo sa pagdawat sa ingon. Namulong sila kabahin niya uban sa kahibalo nga ilang nadawat pinaagi sa inspirasyon sa Balaang Espiritu, pinaagi sa pagkamasulundon ngadto sa mga baruganan nga iyang gitudlo, isip usa ka propeta ug dinasig nga tawo. Namulong sila aron sa pagdayeg kaniya, aron sa pagpasidungog kaniya, ug ilang gihuptan ang iyang pangalan sa madungganon nga paghinumdom. Ila siyang gitahud, ug ila siyang gimahal, ingon nga sila wala maghigugma og laing tawo, tungod kay sila nasayud nga siya ang gipili nga instrumento diha sa mga kamot sa Labawng Makagagahum sa pagpahiuli sa ebanghelyo sa kinabuhi ug kaluwasan ngadto kanila, sa pagbukas sa ilang mga panabut sa umaabut, sa pagkuha sa tabil sa kahangturan, ingon nga kini mao kaniadto, diha sa ilang atubangan. Kadtong kinsa nakadawat sa mga baruganan nga iyang gisangyaw nasayud nga kini dili lamang kalabut sa ilang kaugalingong kaluwasan, kalipay ug kalinaw, espirituhanon ug temporal, apan sa kaayohan, kalipay, kaluwasan ug kahimayaan sa ilang mga katigulangan kinsa namatay nga wala kahibalo sa kamatuoran.

Ang buhat diin si Joseph Smith nahilakip wala malimitahi niini nga kinabuhi lamang, apan may kalabutan usab kini sa kinabuhi nga moabut, ug sa kinabuhi nga miagi. Sa ato pa, may kalabutan kini ngadto niadtong kinsa nabuhi kaniadto dinhi sa yuta, ngadto niadtong kinsa nabuhi karon ug ngadto niadtong kinsa moabut human kanato. Dili kini butang nga adunay kalabutan lamang sa tawo samtang nagpakabuhi siya sa iyang pagkamortal, apan ngadto sa tibuok tawhanong pamilya gikan sa kahangturan ngadto sa kahangturan.… Ug wala kini malimitahi ngadto sa usa ka balangay, ni sa usa ka estado, ni sa usa ka nasud, apan moabut ngadto sa matag kanasuran, kaliwatan, pinulongan ug katawhan.⁵

Alang kanako sa tinuod lang katingalahan gayud kaayo nga adunay hilabihan kagrabe nga dili maayong pagbati nga gipakita sa kalibutan batok kang Joseph Smith. Siya walay gibinuangan nga tawo. Usa ako ka saksi niana, kay nahibalo ako sa iyang kinabuhi. Ako siyang nakita sa buhi pa, ug akong nabasa ang iyang mga gipanulti. Akong nabasa ang mga pinadayag nga gihatag sa Ginoo ngadto kaniya. Sinati ako sa iyang buhat, ug ako nasayud nga wala siya magbinuang og usa ka tawo. Wala siya makapasakit sa iyang mga isigkatawo, apan siya daghan og nahimo aron sa paghimaya kanila. Ug sa gihapon, ang katingalahan nga bahin niini mao nga ang mga tawo nga wala gayud makaila kaniya mobaton sa hilabihan ka pintas, mabinaslunon ug dautan nga mga pagbati ngadto kaniya nga posible nga bation sa mga tawo. Akong gipangutana ang akong kaugalingon, Ngano man kini? Ang mga katawhan wala mobati niana nga paagi, sa kasagaran, ngadto sa mga impostor, o ngadto sa mga tigpasiugda sa bag-o, binuhat sa tawo nga relihiyusong mga organisasyon. Apan, ingon nga katingalahan, hapit kanunay silang moulbo sa kasuko kon ang pangalan ni Propeta Joseph Smith ang hisgutan! Samtang, bisan pa man, kini katingalahan sa natural nga panglantaw, kini sumala lamang sa saad nga gihatag ngadto kaniya sa sinugdanan pinaagi sa langitnong mga mensahero nga gipadala aron sa pagtudlo kaniya.…

… Ang pundasyon sa buhat nga gitukod ni Propeta Joseph Smith gitukod diha sa mahangturong kamatuoran. Dili kini mabuntog. Sama kini sa balay nga gitukod ibabaw sa bato. Ang mga bagyo mahimong mokuso-kuso niini, ang mga ulan mahimong mobundak, ang mga unos mahimong moabut, ang mga kasingkasing sa katawhan mahimong maukyab ngadto sa kasuko ug sa pagpanggukod batok niini; apan ingon kini ka lig-on sama sa walay katapusang mga kabungturan, tungod kay gitukod kini diha sa kamatuoran [tan-awa sa Mateo 7:24–25]. Ang pagkamatinuoron, hiyas, kaputli sa kinabuhi, hugot nga pagtuo diha ni Ginoong Jesukristo ug sa Iyang pagkabanhaw, pagkamasulundon ngadto sa mga sugo sa Dios, maoy nag-unang mga baruganan sa atong pagtuo. Kita nasayud nga ang doktrina tinuod.⁶

Ang Unang Panan-awon ni Joseph Smith mao ang pinakamahinungdanon nga panghitabo sukad sa Pagkabanhaw sa Manluluwas.

Ang pinakamahinungdanong panghitabo nga sukad nahitabo sa kalibutan, sukad sa pagkabanhaw sa Anak sa Dios gikan sa lubnganan ug sa iyang pagkayab sa langit, mao ang pag-anhi sa Amahan ug sa Anak ngadto nianang batang lalaki nga si Joseph Smith, aron sa pag-andam sa dalan alang sa pagtukod sa pundasyon sa iyang gingharian—dili ang gingharian sa tawo—nga dili na gayud mohunong ni mapukan. Kay midawat niini nga kamatuoran, akong nabantayan nga sayon ang pagdawat sa matag lain nga kamatuoran nga iyang gisulti ug gipahayag.… Wala gayud siya magtudlo og usa ka doktrina nga dili tinuod. Wala gayud siya mosunod og usa ka doktrina nga wala siya sugoa sa pagbuhat. Wala gayud siya magapasiugda og sayop. Wala siya nalingla. Siya nakakita; siya nakadungog; iyang gihimo ang unsay gisugo nga iyang buhaton; ug, busa, ang Dios maoy responsable alang sa buhat nga natuman ni Joseph Smith—dili si Joseph Smith. Ang Ginoo maoy responsable alang niini, ug dili ang tawo.⁷

Sa tingpamulak sa 1820, si [Joseph Smith] nakadawat sa unang labing talagsaon o pagpakita sa mga langitnong nilalang. Katorse anyos pa siya nianang panahona. Sa kasagaran wala kita magdahum og hilabihan kadako gikan sa usa ka batang lalaki kinsa katorse anyos pa lamang ang pangidaron, ug kini dili katuohan nga ang usa ka bata niana nga linghod nga pangidaron mahimong hilabihan ka bisyuso o ka dautan, ilabi na nga siya natawo ug nagdako sa umahan, layo sa makadaut nga mga bisyo sa dagkong mga siyudad, ug gawasnon gikan sa makadaut nga impluwensya sa dautang mga pundok. Kini dili katuohan nga siya migahin og daghang mga gutlo nga walay gibuhat atol sa mga katuigan sa iyang kinabuhi nga angayang itrabaho, hangtud sa katorse anyos ang pangidaron; kay ang iyang amahan kinahanglang motrabaho alang sa iyang panginabuhian ug makaangkon niini gikan sa yuta pinaagi sa paningkamot sa iyang mga kamot, kay usa man ka kabus nga tawo nga adunay dakong pamilya nga suportahanan.⁸

Kalabut sa espirituhanong mga pagpakita ngadto kaniya, makatarunganon ba kini nga maghunahuna nga tingali adunay gihunahuna nang daan nga pagpanglingla diha sa bahin sa batang lalaki, ug ilabi na ang batang lalaki nga sama kaniya, diha sa iyang yano nga pamahayag sa unsay iyang nakita ug nadungog? Dili; ni ang tubag nga gihatag sa langitnong mensahero ngadto kaniya, gimugna-mugna diha sa kaugalingong hunahuna sa bata. Ang pagpamatuod ni Joseph Smith kalabut sa pagpakita ngadto kaniya sa langitnong nilalang, sa kaulahian sa iyang kinabuhi, ingon ka yano, madaygonon, tataw, ug tinuod, sama sa dihang bata pa; ang kamatinud-anon, kaisug, ug gugma nga natisok ug ang kinaiya sa iyang kinabuhi sa pagkabatan-on wala mohuyang ni mausab sa pagkahamtong. Ang iyang kaalam miabut diha sa mga pinadayag sa Dios ngadto kaniya.⁹

Ang atong mga kritiko miingon nga usa kadto ka aparisyon nga nakita ni Propeta Joseph, apan wala siya mosulti sa ingon. Miingon siya nga ang mga personahe kinsa mipakita kaniya tinuod nga mga tawo.… Ngari kanato miabut ang asoy kabahin sa pagkatawo, kinabuhi ug buhat ni Kristo, ug walay butang diha sa asoy nga mas makapatuo kanato niini kay sa istorya ni Propeta Joseph Smith. Si Kristo nakiglakaw ug nakig-istorya ug nakigtambag sa iyang mga higala sa dihang mikanaug siya gikan sa langit sobra sa 1900 ka tuig na ang milabay. Aduna bay katarungan nganong dili siya makaanhi pag-usab, nganong dili siya mobisita pag-usab niini nga yuta ug makig-istorya sa mga tawo karon? Kon aduna man malipayon akong maminaw niini. Ang butang nga gusto nakong ipadayag kaninyo mao nga ang Dios tinuod, usa ka tawo nga adunay unod ug mga bukog, sama kaninyo ug kanako. Si Kristo mao usab, apan ang Espiritu Santo usa ka tawo nga espiritu.¹⁰

Si Propeta Joseph Smith mihubad sa Basahon ni Mormon pinaagi sa gasa ug gahum sa Dios.

Sa dihang si [Joseph Smith] naa pa sa mga 17 ug 18 anyos ang pangidaron, nakadawat siya og laing langitnong pagpakita, ug pipila ka mahinungdanon ug mahimayaon nga mga butang gipadayag ngadto kaniya, ug sulod sa upat ka tuig human niana nakadawat siya og mga pagbisita gikan sa usa ka langitnong mensahero.… Kini nga personahe, siya miangkon, mipadayag kaniya sa hunahuna ug kabubut-on sa Ginoo, ug mipakita kaniya sa kinaiyahan sa mahinungdanong buhat nga siya, diha sa mga kamot sa Dios mamahimong instrumento sa pagtukod dinhi sa yuta sa pag-abut sa panahon. Mao kini ang trabaho nga gipahigayon sa anghel nga si Moroni, atol sa upat ka tuig taliwala niadtong 1823 ug 1827. Pagka 1827 iyang nadawat gikan sa mga kamot sa anghel nga si Moroni, ang bulawang mga palid diin kini nga basahon (Basahon ni Mormon) gihubad niya pinaagi sa inspirasyon sa Labawng Makagagahum, ug sa gasa ug gahum sa Dios ngadto kaniya.…

Si Joseph Smith atol sa tulo ka tuig taliwala niadtong 1827 ug 1830, samtang nagtrabaho sa dili paigo nga kinitaan, milihay sa iyang mga kaaway, ug misulay sa paglikay sa mga kamot niadtong kinsa nagtinguha sa paglaglag kaniya ug pagpugong sa katumanan sa iyang misyon, nanglimbasug sa tibuok panahon batok sa wala masulti nga mga babag ug makapahigawad nga mga pagpakaulaw sa pagkompleto sa paghubad niini nga basahon, aduna bay dakong kahigayunan nga mahimong dautan o tampalasan? Wala ako maghunahuna nga siya aduna. Sa dihang iyang nahuman ang paghubad sa Basahon ni Mormon bata pa gihapon siya, apan sa paghimo niini nga basahon nakapalambo siya og makasaysayanon nga mga kamatuoran, mga propesiya, mga pinadayag, mga panagna, mga pagpamatuod ug mga doktrina, mga lagda ug mga baruganan nga lapas pa sa gahum ug kaalam sa makinaadmanon nga kalibutan aron sundugon ug lalison. Si Joseph Smith usa ka batan-on nga walay kinaadman, sigun sa kinaadman sa kalibutan ang hisgutan. Gitudloan siya ni anghel Moroni. Nakadawat siya sa iyang edukasyon gikan sa kahitas-an, gikan sa Dios nga Labawng Makagagahum, ug dili gikan sa binuhat sa tawo nga mga institusyon; apan ang pagakusar kaniya nga ignorante dili makiangayon ug sayop; walay tawo o hiniusa nga mga tawo ang nakabaton og mas labaw nga salabutan kay kaniya, ni ang hiniusa nga kaalam ug pagkamaliputon sa mga tawo sa iyang panahon makahimo og tugbang sa unsay iyang nabuhat. Dili siya ignorante, kay siya gitudloan niya kansang tanang salabutan naggikan. Nakabaton siya og kahibalo kabahin sa Dios ug sa iyang balaod, ug sa kahangturan.¹¹

Ang Basahon ni Mormon gihubad pinaagi sa gasa ug gahum sa Dios, pinaagi sa pagka-instrumento sa usa ka batan-ong lalaki; dili pinaagi sa usa ka makinaadmanon nga tawo, usa ka tawo nga adunay taas nga edukasyon, apan pinaagi sa usa ka tawo nga dili taas og edukasyon, walay kasinatian, inosente nga batang lalaki! Ug kanang tawo nga dili taas og edukasyon, walay kasinatian, inosente nga batang lalaki walay lain kondili si Joseph Smith. Siya wala sa kaalam, sa salabutan ni sa kahanas pinaagi kaniya sa paghubad ngadto sa pinulongang Iningles sa mga sinulat diha sa mga palid nga gitagoan sa karaan nga mga lumulupyo niini nga kontinente. Wala gayud siya miangkon nga iyang gihubad kadto nga mga sinulat pinaagi sa iyang kaugalingong kaalam. Sukwahi niini, iyang gibarugan nga iya kining nabuhat pinaagi sa gasa ug gahum sa Dios ngadto kaniya.¹²

Ang Propeta nakahimo og daghan pa alang sa kaluwasan sa mga tawo kay ni bisan kinsa nga tawo nga nakapuyo dinhi, gawas lamang kang Jesus.

Si [Joseph Smith] miabli sa komunikasyon ngadto sa kalangitan sa iyang pagkabatan-on. Iyang gipagawas ang Basahon ni Mormon, nga naglangkob sa kahingpitan sa ebanghelyo; ug sa mga pinadayag nga nalangkob diha sa Basahon sa Doktrina ug mga Pakigsaad; mipahiuli sa balaan nga Priesthood ngadto sa tawo; miestablisar ug mi-organisar sa Simbahan ni Jesukristo sa mga Santos sa Ulahing mga Adlaw, usa ka organisasyon nga walay kapareha sa tibuok kalibutan, ug diin ang tanang kahibalo ug kaalam sa tawo sulod sa taas nga panahon napakyas sa pagdiskobre o paghimo ug dili gayud makahimo. Mitukod siya og mga pamuy-anan sa mga estado sa New York, Ohio, Missouri ug Illinois, ug mitudlo sa dalan alang sa pagpundok sa mga Santos ngadto sa Rocky Mountains; midala sa ebanghelyo ngadto sa Europe ug sa mga isla sa dagat; mitukod sa lungsod sa Kirtland, Ohio, ug didto mitukod og usa ka templo nga migasto og liboan ka mga dolyares; iyang gitukod ang siyudad sa Nauvoo taliwala sa pagpanggukod; nagpundok ngadto sa Nauvoo ug sa kasilinganan og mga 20,000 ka mga tawo, ug misugod sa pagtukod sa templo didto, nga sa dihang nahuman migasto og usa ka milyon ka dolyares; ug sa pagbuhat niining tanan kinahanglan siyang makigbatok sa mga pagdaot nga anaa nianang panahona, batok sa walay kalooy nga pagpanggukod, sa naghari nga mga manggugubot, ug sa dautan nga mga pamasangil ug pagpanamastamas, nga gihan-ok ngadto kaniya gikan sa daghang mga tawo nga walay pagpugong. Sa mubong pagkasulti, siya nakahimo og mas daghan pa gikan sa katorse ngadto sa baynte ka tuig alang sa kaluwasan sa tawo kay ni bisan kinsa nga tawo, gawas lamang kang Jesus, nga nakapuyo dinhi [tan-awa sa D&P 135:3], ug sa gihapon siya giakusahan sa iyang mga kaaway nga usa ka tapulan ug walay pulos nga tawo!

Asa man kita mangita og laing tawo nga nakahimo og ikausa ka libo nga bahin sa maayo nga nahimo ni Joseph Smith? … Walay tawo sa ikadisenuybe nga siglo, gawas kang Joseph Smith, ang mipahibalo sa kalibutan sa usa ka bidlisiw sa kahayag ngadto sa mga yawe ug gahum sa balaan nga Priesthood, o sa mga ordinansa sa ebanghelyo, alang sa buhi o sa patay. Pinaagi kang Joseph Smith, ang Dios mipadayag og daghang mga butang nga natago gikan sa pagkatukod sa kalibutan sa katumanan sa mga pulong nga gipamulong sa mga propeta.… Ug kini diha sa paghupot sa higpit nga paagi sa mga butang ug karakter niining mahinungdanong buhat sa ulahing mga adlaw, gitagana alang sa katumanan sa mahinungdanong mga katuyoan ug mga laraw sa Dios kalabut sa dispensasyon sa kahingpitan sa mga panahon.¹³

Si Joseph ang Propeta … nahimong paagi, diha sa pagpaigo sa Dios, sa pagpahiuli sa karaang mga kamatuoran sa walay katapusang ebanghelyo ni Jesukristo, ang plano sa kaluwasan, nga mas nauna pa kay sa kaliwatan sa mga tawo. Kini tinuod, usab, nga ang iyang mga pagtulun-an bag-o ngadto sa mga tawo sa iyang panahon tungod kay mibiya sila gikan sa kamatuoran—apan ang mga baruganan sa ebanghelyo mao ang kinadugayan nga mga kamatuoran nga anaa. Bag-o kini ngadto sa henerasyon ni Joseph, ingon nga ang bahin niini bag-o usab ngari kanato, tungod kay ang mga tawo nahisalaag, gibiyaan nga walay giya, napadpad ngadtonganhi sa nagbalibali nga hangin sa doktrina nga gipasiugdahan sa mga batid sa pagmugnag kasaypanan nga mga tawo—nga gitawag og mga progresista. Mihimo kini kang Propeta Joseph nga usa ka tigpahiuli, dili tigguba, sa karaang mga kamatuoran. Ug kini wala mohatag kanato og katarungan sa pagsalikway sa simple, sukaranang mga baruganan sa ebanghelyo ug mag-apas sa moderno nga doktrinal nga mga uso ug mga gituohan.¹⁴

Ako matinuorong mopahayag kaninyo, ug sa tumang kamatinguhaong kalag, nga ako nagtuo sa tibuok nakong kasingkasing sa balaanong misyon ni Joseph Smith, ang Propeta, nga ako nakumbinsir sa tibuok nakong pagkatawo nga ang Dios mitagana kaniya aron sa pagpahiuli dinhi sa yuta sa ebanghelyo ni Kristo, nga sa pagkatinuod mao ang gahum sa Dios ngadto sa kaluwasan. Ako mopamatuod nganha kaninyo nga si Joseph Smith nahimong instrumento sa kamot sa Ginoo sa pagpahiuli sa kamatuoran sa Dios nganhi sa kalibutan, ug usab ang balaang Priesthood, nga mao ang awtoridad nga gidelegar ngadto sa tawo. Ako nasayud nga kini tinuod, ug ako mopamatuod niini nganha kaninyo. Alang kanako kini mao ang tanan; kini ang akong kinabuhi, kini ang akong kahayag; kini ang akong paglaum, ug akong hingpit nga kalipay; naghatag kini kanako sa bugtong kasiguroan nga anaa kanako alang sa kahimayaan, alang sa akong pagkabanhaw gikan sa kamatayon, uban niadtong akong gihigugma ug gimahal ninii nga kinabuhi, ug kang kinsa akong nakauban niini nga kalibutan—madungganon nga mga tawo, putli, mapainubsanon nga mga tawo, kinsa masulundon ngadto sa Dios ug sa iyang mga sugo, kinsa wala maulaw sa ebanghelyo ni Kristo, ni sa ilang mga hilabihan nga pagtuo o kahibalo bahin sa kamatuoran sa ebanghelyo; mga tawo kinsa nakapahimo sa mga martir, ug kinsa andam sa bisan unsang higayon sa pagtugyan sa ilang mga kinabuhi alang kang Kristo, ug alang sa ebanghelyo, kon gikinahanglan, nga ilang nadawat uban sa pagpamatuod sa Balaang Espiritu diha sa ilang mga kasingkasing. Gusto akong mahiusa pag-usab uban niining mga tawo kon akong matapos ang akong pagdagan sa lumba dinhi. Kon ang akong misyon mahuman na dinhi, naglaum ako sa pag-adto lapas pa sa kalibutan sa espiritu diin sila nagpuyo, ug mahiusa pag-usab uban kanila. Mao kini nga ebanghelyo sa Anak sa Dios nga naghatag kanako sa paglaum nga anaa kanako kalabut niini nga pagkahiusa, ug sa pagkaamgo kalabut sa akong tinguha niini nga direksyon. Akong gisalig ang tanan diha niini nga ebanghelyo, ug wala nako kini buhata nga walay kapuslanan. Ako nasayud kang kinsa ako mosalig. Ako nasayud nga ang akong Manunubos buhi, ug nga siya mobarug ibabaw sa yuta sa katapusang mga adlaw.¹⁵

Mga Sugyot alang sa Pagtuon

Sa unsang mga paagi nga si Propeta Joseph Smith “usa ka instrumento diha sa kamot sa Ginoo”? Sa unsa nga mga paagi nga kamo napanalanginan pinaagi sa mga butang nga gipadayag sa Ginoo pinaagi kang Propeta Joseph Smith?
Nganong importante man ang pagbaton og pagpamatuod nga si Joseph Smith usa ka propeta sa Dios niini nga dispensasyon?
Unsa nga mahinungdanong mga kamatuoran nga nakat-unan ni Joseph Smith gikan sa Unang Panan-awon? Unsa nga mahinungdanong mga kamatuoran nga inyong nakat-unan gikan sa Unang Panan-awon? Sa unsang paagi nga ang pagpamatuod kabahin sa Unang Panan-awon usa ka pundasyon alang sa pagdawat sa ubang mga kamatuoran sa ebanghelyo?
Nganong importante man nga masayud nga ang Basahon ni Mormon “gihubad pinaagi sa gasa ug gahum sa Dios”?
Unsa ang pipila ka mga paagi diin si Propeta Joseph Smith nakahimo og mas daghan pa “alang sa kaluwasan sa tawo kay ni bisan kinsa nga tawo, gawas lamang kang Jesus”?
Nganong importante man nga masayud nga si Propeta Joseph Smith “usa ka tigpahiuli, dili tigguba, sa karaang mga kamatuoran”?
Sa unsang paagi kamo napalig-on pinaagi sa pakig-uban sa mga kalalakin-an, kababayen-an, o kabataan kinsa adunay lig-on nga mga pagpamatuod ug “wala maulaw sa ebanghelyo ni Kristo”? Sa unsang paagi nga kita makapalig-on sa uban gamit ang atong mga pagpamatuod?
Unsay labing nakapadayeg kaninyo sa mga pagpamatuod ni Presidente Joseph F. Smith kabahin sa Propeta? Unsa man ang inyong kaugalingong pagsaksi sa balaanong misyon ni Propeta Joseph Smith?

Si Presidente Joseph F. Smith mipahayag kang Propeta Joseph Smith nga mao “ang instrumento nga gipili sa Dios ug gitugahan sa iyang awtoridad aron sa pagpahiuli sa balaan nga Priesthood” (*Gospel Doctrine,* 478).