Pagserbisyo diha sa Simbahan

Magmatinud-anon kita nga magserbisyo sa atong mga calling ubos sa pagdumala sa awtoridad sa priesthood.

Gikan sa Kinabuhi ni Joseph F. Smith

Sa dihang si Presidente Joseph F. Smith nagserbisyo isip usa ka Apostol sulod sa 44 ka mga tuig ug isip Presidente sa Simbahan sulod sa 9 ka tuig, mibarug siya niadtong Oktubre 1910 nga kinatibuk-ang komperensya ug miingon, “mibati ako og kalipay niining buntaga, nga nakabaton og kahigayunan sa pagsulti kaninyo nga sa mga adlaw sa akong pagkabata ug sayo nga kabatanon, nanumpa ako ngadto sa Dios ug uban sa iyang katawhan nga ako magmatinud-anon ngadto kanila.” Siya mipasabut nga sukad niadtong higayuna siya matinud-anong nakaserbisyo sa matag calling nga gihatag kaniya:

“Sa paghunahuna sa nanglabay nga mga kasinatian sa akong kinabuhi, dili na ako karon makamatikud, ug dili na makahinumdom og usa ka hitabo sukad sa pagsugod sa akong kasinatian sa kalibutan, diin ako mibati sa makadiyut, sa pagtapol o molugak sa akong panumpa ug panaad nga akong gihimo ngadto sa Dios ug ngadto sa mga Santos sa Ulahing mga Adlaw sa akong pagkabantan- on…. Isip usa ka elder sa Israel naninguha ako nga magmatinud- anon niana nga calling; naninguha sa akong pinakamaayo sa pagpasidungog ug sa pagpalambo niana nga calling. Sa diha nga nahimo akong usa ka seventy, mibati ako sa akong kasingkasing nga magmatinuoron ngadto niana nga calling, ug naningkamot ako uban sa tibuok nga salabutan ug kadasig sa akong kalag, nga magmatinuoron niini. Wala akoy kasayuran ni mahinumdoman sa bisan unsang binuhatan nako, o bisan unsang pagkabutang sa akong kinabuhi diin nasuta nga ako dili matinuoron o dili matinud-anon ngadto niining balaan nga mga tawag sa Anak sa Dios. Sa kaulahian sa akong kinabuhi, sa diha nga gitawag ako aron magbuhat isip usa ka apostol, ug giordinahan nga usa ka apostol, ug gigahin nga mahimong usa sa Napulog Duha, naningkamot ako nga pasidunggan kana nga calling, nga magmatinuoron ngadto niini, ug ngadto sa akong mga kaigsoonan, ngadto sa mga sakop sa pagtuo ug sa mga pakigsaad ug mga obligasyon nga nalakip sa pagdawat niining balaan nga Priesthood, sunod sa kapunongan sa Anak sa Dios. Wala ako makamatngon nga nakalapas ako bisan kanus-a sa usa sa mga obligasyon o mga panumpa niini nga balaang mga tawag diin ako natawag. Nagtinguha ako nga magmatinuoron ug matinud- anon ngadto niining mga butanga.”¹

Si Presidente Smith mipahimangno sa mga Santos sa pagkugi sa ilang mga kaugalingon sa trabaho sa Ginoo ug maunongon nga moserbisyo—sa mga calling sa priesthood, diha sa mga auxiliary sa Simbahan, ug sa ubang mga matang sa walay paghinakog nga serbisyo—kanunay nga mopasidungog sa awtoridad sa priesthood diin sila gitawag ug gidumala.

Mga Pagtulun-an ni Joseph F. Smith

Ang priesthood gihatag alang sa pagpangalagad nga serbisyo.

Ang Priesthood wala ihatag alang sa kadungganan o hilabihan nga pagdayeg sa tawo, apan alang sa pagpangalagad nga serbisyo tali niadtong kinsa mga naghupot nianang sagrado nga sugo nga gitawag aron magbudlay. Kinahanglan atong hinumduman nga bisan gani ang atong Ginoo ug Magtutudlo, human sa dugay nga pagpuasa, sa diha nga lawasnong naghingutas ug pisikal nga pagkaluya tungod sa makahago nga mga pagtukaw ug nagpadayon nga pagpuasa, mibatok sa sugyot ni Satanas nga iyang gamiton ang awtoridad ug gahum sa iyang pagka-Mesiyas aron pagsangkap alang sa iyang kaugalingong dinalian nga mga panginahanglan.

Ang hinatag sa Dios nga titulo sa kadungganan ug labaw pa kay sa tawhanon nga pag-ila, nga giubanan sa pipila ka mga buhatan ug mga kapunongan sa balaan nga Priesthood, dili pagagamiton ni isipon sama sa mga titulo nga nagagikan sa tawo; dili kini alang sa dayan-dayan ni kini pagpakita sa pagkahawod, kondili sa pagkatudlo ngadto sa mapainubsanon nga serbisyo sa trabaho sa usa ka Magtutudlo kang kinsa atong giangkon nga alagaran.²

Nakaila ako og mga elder, kinsa, sa tibuok nilang kinabuhi, nahimong “andam ug abtik nga moserbisyo;” wala gayud sila mohunong bisan kadali aron moreklamo sa mga tawag nga gihatag ngadto kanila, ni mohunong aron hunahunaon ang ilang kaugalingong temporal nga panginahanglan, mibiya sila ug miabut sumala sa paghangyo sa ilang mga kaigsoonan diha sa pagserbisyo sa mga tawo ug sa Ginoo…. Andam ug mauyunon sila sama sa andam nga magbalantay, halos dili mohunong sa paghunahuna sa ilang mga kaugalingon…. Gibuhat kini uban sa tibuok nilang mga kasingkasing, ug ang ilang mga pagbudlay wala gayud hunahunaa nga makabudlay; apan sa laing bahin, nakahatag nila kini og hingpit nga kalipay, kahimuot ug makanunayon nga katagbawan…. Sa gihapon sila andam ug mauyunon sa pagbiya o pag-abut o mobuhat sa bisan unsa nga gikinahanglan gikan kanila, naghatag og pagtagad, sa tanang higayon, sa ilang mga katungdanan sa priesthood sa hilabihan ka mahinungdanon kay sa bisan unsang personal nga mga hunahunaon.³

Ang senemana nga mga miting sa mga korum sa priesthood … Dili lamang modugang sa pagkahanas sa priesthood tungod sa mga butang nga gitudlo o nakat-unan kondili sa pagpanagpundok sa mga kaigsoonan kausa matag semana makabaton sila og kinaiya sa regular nga kalihokan isip mga sulugoon sa Ginoo.⁴

O Dios, panalangini ang Balaan nga Priesthood, ang halangdon nga mga tawo, putli nga mga tawo, makiangayon nga mga tawo, dungganan nga mga tawo, mga tawo sa kaligdong, mga tawo kinsa nagkapundok, kadaghanan kanila, gikan sa mga nasud sa yuta tungod sa gugma sa ebanghelyo; ug daghan kanila ang natawo ubos sa pakigsaad sa Balaan nga Priesthood, ug mag-ampo ako sa Dios nga kamo panalanginan, akong mga kaigsoonan, uban sa kabuhong sa Iyang kabuotan, sa Iyang kapuangod ug mahigugmaong kalooy, nga kamo unta mouswag dinhi sa yuta, nga kamo unta mahimong tinuod nga Iyang mga sulugoon.⁵

Auxiliary nga mga organisasyon nagtugot sa tanan nga moserbisyo ubos sa tigdumala nga awtoridad sa priesthood.

Ang Priesthood mao ang mangulo. Modumala sila ibabaw sa tanang mga butang. Katungdanan kini niadtong naghupot sa Priesthood aron pagbantay sa tanang mga organisasyon sa Simbahan; dili lamang sa organisasyon sa Priesthood, kondili usab sa tanang mga organisasyon nga gitukod alang sa kaayohan sa tanang katawhan— atong mga Relief Society, mga Mutual Improvement Association [Young Men and Young Women], mga Primary, … ug sa tanang mga organisasyon nga namugna alang sa kalamboan sa katawhan sa Dios ug sa kauswagan sa kamatuoran ug katarung dinhi sa yuta. Kining tanan kinahanglan nga makadawat sa pagdumala ug maamahanon nga pag-atiman ug pagtagad ug sa lawom ug mapadayonon nga kaikag sa mga awtoridad sa Simbahan, anaa man sa ward o sa mga kinatibuk-ang kadagkoan sa Simbahan, tungod kay ang Priesthood interesado sa kaayohan sa katawhan sa Dios ug sa pagtukod ug pag-establisar sa Zion dinhi sa yuta. Ug kining tanang mga organisasyon nga naporma, natukod ug giorden sa Dios kinahanglan nga mag-agad niining tigdumala nga mga awtoridad ug maglihok diha sa panag-uyon uban kanila; magtahud kanila diha sa ilang mga katungdanan.⁶

Walay pangagamhanan diha sa Simbahan ni Jesukristo nga nahimulag ug nalain, sa ibabaw o sa gawas sa balaan nga Priesthood o sa awtoridad niini. Kita adunay atong mga Relief Society, mga Mutual Improvement nga Association, Primary Association ug mga Sunday School, … apan kini nga mga organisasyon dili mga korum o mga konseho sa Priesthood, kondili mga auxiliary, ug ubos niini; gitukod pinaagi sa hiyas sa balaang Priesthood. Wala sila sa gawas, ni sa ibabaw niini, ni sa dili maabot niini. Giila nila ang baruganan sa Priesthood. Bisan asa man kini kanunay kini nga anaa uban sa panan-aw nga makahimo og pipila ka mga kaayohan, pipila ka mga pagluwas sa kalag, temporal o espirituhanon.⁷

Gusto kong moingon nga gipaabot kini sa Relief Society, ilabi na sa kinatibuk-ang [mga opisyal] nianang mahinungdanong organisasyon, nga makabaton sila og magbalantay ibabaw sa tanang mga organisasyon niini tali sa mga babaye sa Zion. Sila ang mangulo sa tanan; kinahanglan gayud nga mangulo sila, ug kinahanglan nga palamboon nila ang ilang balaan nga tawag.⁸

Pinaagi [sa] mga organisasyon sa auxiliary nakahimo kita sa pagpadangat og maamumahon nga pagtudlo, ug sa paghatag og impluwensya alang sa kaayohan ibabaw sa kadaghanan sa atong batan-ong mga lalaki ug mga babaye, nga kinsa malisud unta sa pagkab-ot pinaagi sa mga organisasyon sa Priesthood. Sa pagkakaron, kini nga mga organisasyon nakatuman sa pinakamaayong nag-una nga trabaho.⁹

Mag-ampo ako sa Dios nga panalanginan ang tanan natong auxiliary nga mga organisasyon, gikan sa nag-una ngadto sa katapusan, nga buhaton unta nila ang ilang katungdanan nga dili unta sila magtapol ug pasagdan ang trabaho…. Maluwas lamang kita kon kita nagbuhat, kon kita anaa sa trabaho, kon kita matinguhaon, kon gibuhat nato ang pagtuman sa atong katungdanan, ug kon anaa kini nga kahimtang diha kanato luwas kita, tungod kay anaa kita sa mga kamot sa Dios ug wala sa kamot sa kaaway.¹⁰

Kinahanglan nga maghago kita alang sa kaayohan ug kaluwasan sa uban.

Kon nagtuman kita sa atong katungdanan, gibuhat nato ang usa ka mahinungdanon ug mahimayaon nga katuyoan. Mahinungdanon kaayo kini sa atong indibidwal nga kaayohan nga ang matag lalaki ug matag babaye kinsa misulod sa pakigsaad sa ebanghelyo, pinaagi sa paghinulsol ug pagbunyag, kinahanglan nga mobati nga isip mga indibidwal ila kining bug-os nga katungdanan sa paggamit sa ilang salabutan, ug sa kabubut-on nga gihatag sa Ginoo kanila, alang sa paglambo sa katuyoan sa Zion ug sa pagtukod sa katuyoan niini, dinhi sa yuta.¹¹

Kinahanglan nga kitang tanan andam sa paghago alang sa kabulahanan ug kaluwasan sa katawhan—sa pagsakripisyo sa atong kaugalingong mga tinguha ug mga pagbati alang sa kaayohan sa tanan, mahimong hingpit nga andam sa pagbuhat sa sugo sa Labawng Makagagahum, dili sa atong kabubut-on kondili aron moserbisyo sa mga katuyoan sa Ginoo…. Naghago kita alang sa kaluwasan sa mga kalag, ug kinahanglan nga mobati kita nga kini ang atong pinakamahinungdanon nga katungdanan nga gitugyan kanato. Busa, kinahanglan nga mobati kita nga andam sa pagsakripisyo sa tanang butang, kon gikinahanglan, tungod sa paghigugma sa Dios, sa kaluwasan sa mga tawo, ug sa kadaugan sa gingharian sa Dios dinhi sa yuta.¹²

Molaum kita nga makita ang adlaw … nga ang matag konseho sa Priesthood sa Simbahan ni Jesukristo sa mga Santos sa Ulahing mga Adlaw makasabot sa katungdanan niini; moako sa kaugalingong katungdanan niini, mopalambo sa calling niini, ug pun-on ang dapit niini sa Simbahan, ngadto sa pinakataas, sumala sa salabutan ug abilidad nga gipanag-iya niini…. Ang Ginoo miplano ug mipasabot niini gikan pa sa sinugdanan, ug mihimo Siya og mga sangkap sa Simbahan diin matag panginahanglan matubag pinaagi sa regular nga mga organisasyon sa Priesthood. Tinuod nga gisulti kini nga ang Simbahan hingpit nga naorganisar. Ang problema lamang mao nga ang mga organisasyon dili hingpit nga nagtagad sa mga obligasyon nga gisangon diha kanila. Kon mahimo na silang hingpit nga makamatngon sa mga gikinahanglan diha kanila, sila motuman na sa ilang mga katungdanan sa mas labaw pa ka matinud-anon, ug ang trabaho sa Ginoo mahimo nga labaw pa ka lig-on ug labaw pa ka gamhanan ug makaimpluwensya dinhi sa kalibutan.¹³

Ang matag tawo kinahanglan nga mobati diha sa iyang kasingkasing sa panginahanglan sa pagbuhat sa iyang bahin sa mahinungdanon nga trabaho sa ulahing mga adlaw. Ang tanan kinahanglan nga maninguha nga mahimong instrumento sa pagpakaylap niini. Ilabi na nga katungdanan kini sa matag usa kinsa nagbaton og bisan unsa nga bahin sa awtoridad sa balaan nga Priesthood aron sa pagpalambo ug sa pagpasidungog niana nga calling, ug walay dapit nga kita makasugod sa pagbuhat sa mas labaw ka maayong bintaha kay sa dinhi mismo, sulod sa atong kaugalingon ug kon ato na nga mahinloan ang atong kaugalingon, mahinloan ang atong kaugalingong mga kasingkasing, mahinloan ang atong kaugalingong mga kinabuhi, tarungon ang atong mga hunahuna diha sa pagbuhat sa tanan natong katungdanan sa Dios ug tawo, mahimo na kitang andam sa paghatag og impluwensya alang sa kaayohan sa atong tibuok pamilya, sa katilingban ug sa tanang klase nga tawo.¹⁴

Ang mga lalaki ug mga babaye kinsa mga matinuoron sa atubangan sa Dios, kinsa mapainubsanon nga nagpadayon kanunay sa pagbuhat sa ilang katungdanan, nagbayad sa ilang ikapulo, kinsa nagbansay nianang relihiyon nga putli, ug walay buling sa atubangan sa Dios ug sa atong Amahan, diin mao ang pagduaw sa mga ilo ug mga biyuda sa ilang mga kaguol-anan, ug sa pag-amping sa kaugalingon nga dili mahugawan sa kalibutan [tan-awa sa Santiago 1:27], ug kinsa mitabang sa pag-atiman sa mga kabus; ug kinsa nagpasidungog sa balaan nga Priesthood, kinsa wala mag-usikusik, kinsa mga mainampoon sa ilang mga pamilya, ug kinsa miila sa Ginoo diha sa ilang mga kasingkasing, ilang tukuron ang usa ka tukuranan diin ang mga ganghaan sa impyerno dili makabuntog batok niini; ug kon mobul-og ang mga baha ug ang mga unos mohampak sa ilang balay, dili kini mapukan, tungod kay pagatukuron man kini ibabaw sa bato sa mahangturon nga kamatuoran [tanawa sa Mateo 7:24–27].¹⁵

Mga Sugyot alang sa Pagtuon

Unsa ang gitudlo kanato sa ehemplo ni Jesukristo mahitungod sa paggamit sa awtoridad sa priesthood?
Sa unsang paagi nga ang pagka-orden sa priesthood usa ka “pagkatudlo sa mapainubsanon nga serbisyo”?
Unsa ang mga katuyoan sa mga organisasyon sa auxiliary sa Simbahan? Giunsa kini pagpanalangin sa mga miyembro sa Simbahan? Nganong importante nga masayud niini nga ang mga auxiliary naglihok ubos sa pagdumala sa priesthood?
Unsay mga kaayohan sa pagpaluyo ug sa pagtahud sa usag usa sa atong mga responsibilidad ug mga balaang tawag sa Simbahan?
Unsay atong bation mahitungod sa “paghago alang sa kaluwasan sa mga kalag”? Unsa ang pipila ka mga sakripisyo ang gihimo sa uban aron sa paghago alang sa inyong kaluwasan? Unsay andam ninyong isakripisyo alang sa kaayohan sa uban?
Unsay ipasabut niini nga mahimong “hingpit nga nakamatngon” sa atong mga obligasyon? Unsay mahimong mga resulta kon mahitabo kini?
Unsay ipasabut sa “mapainubsanon nga nagpadayon”? Unsa nga mga panalangin ang moabut niadtong nagbuhat sa ingon?