niyayakap ng ina at ama ang kanilang mga anak

Lesson 4 Materyal sa Paghahanda para sa Klase

Ang Pamilya ang Sentro sa Plano ng Ama sa Langit

Ipinahayag ng mga makabagong propeta at apostol na “ang mag-anak ang sentro ng plano ng Tagapaglikha para sa walang hanggang tadhana ng Kanyang mga anak” (“Ang Mag-anak: Isang Pagpapahayag sa Mundo,” ChurchofJesusChrist.org). Naisip mo na ba kung paano nauugnay ang pamilya sa iba pang mahahalagang bahagi ng plano ng Ama sa Langit, tulad ng Paglikha, Pagkahulog nina Adan at Eva, at Pagbabayad-sala ni Jesucristo? Sa iyong pag-aaral, isipin ang maaaring kahulugan ng mga sumusunod na turo para sa iyong mga pinipiling gawin at inaasam para sa sarili mong pamilya.

Bahagi 1

Paano nakatulong ang Paglikha ng mundo at ang Pagkahulog nina Adan at Eva para maisakatuparan ang mga walang hanggang layunin ng Ama sa Langit para sa pamilya?

Itinuro ni Elder Robert D. Hales ng Korum ng Labindalawang Apostol:

Elder Robert D. Hales

Ang doktrina ng pamilya ay nagsimula sa mga magulang sa langit. Ang ating pinakamataas na mithiin ay maging katulad nila. (“The Eternal Family,” Ensign, Nob. 1996, 64)

Nang mangusap ang Diyos kay Moises sa bundok, ipinaliwanag Niya na ang Kanyang gawain at Kanyang kaluwalhatian ay “isakatuparan ang kawalang-kamatayan at buhay na walang hanggan ng tao” (Moises 1:39). Ang buhay na walang hanggan ay ang mabuhay sa piling ng Diyos, na ibig sabihin ay mabuhay magpakailanman bilang bahagi ng isang walang hanggang pamilya. Ito ang pinakadakilang kaloob na maibibigay Niya sa atin (tingnan sa Doktrina at mga Tipan 14:7).

mag-asawang nakangiti sa kanilang sanggol na anak

Ang Paglikha ng mundo at ang Pagkahulog nina Adan at Eva ay mahahalagang bahagi ng plano ng Ama upang maisakatuparan ang mga walang hanggang layuning ito. Sa naunang kasaysayan ng Simbahan, ipinahayag ng Panginoon ang kahalagahan ng kasal at mga anak sa plano ng Diyos para sa mundo. At sa Aklat ni Mormon, ipinaliwanag ni Lehi sa kanyang anak ang mabuting dahilan sa Pagkahulog nina Adan at Eva.

icon, pag-aralan

Mag-aral upang Makapaghanda para sa Klase

Basahin ang Doktrina at mga Tipan 49:15–17 at 2 Nephi 2:22–23, at alamin kung paano nakatulong ang Paglikha at ang Pagkahulog sa pagbuo at pag-unlad ng mga walang hanggang pamilya.

Itinuro ni Pangulong Russell M. Nelson at ni Elder Jeffrey R. Holland ng Korum ng Labindalawang Apostol:

Pangulong Russell M. Nelson

Bagama’t kahanga-hanga at maringal, ang planetang Daigdig ay bahagi ng isang bagay na higit pang kahanga-hanga at maringal—ang dakilang plano ng Diyos. Sa simpleng pagbubuod, ang mundo ay nilikha para panahanan ng mga pamilya. (“The Creation,” Ensign, Mayo 2000, 85)

Elder Jeffrey R. Holland

Ang Pagkahulog ay mahalagang bahagi ng banal na plano ng ating Ama sa Langit. Kung wala ito, wala sanang mortal na mga anak sina Adan at Eva, at wala sanang pamilya ng tao na daranas ng oposisyon at pag-unlad, kalayaang moral, at kagalakan ng pagkabuhay na mag-uli, pagtubos, at buhay na walang hanggan. (“Ang Pagbabayad-sala ni Jesucristo,” Liahona, Mar. 2008, 35)

icon, pagnilayan

Magnilay-nilay upang Makapaghanda para sa Klase

Paano makaiimpluwensya ang mga dakilang layuning ito ng Paglikha at Pagkahulog sa iyong mga pagsisikap na bumuo ng sarili mong walang hanggang pamilya?

Bahagi 2

Paano ginawang posible ng Pagbabayad-sala ni Jesucristo ang walang hanggang pamilya?

Sa Pagkahulog nina Adan at Eva, nagkaroon ng kasalanan at kamatayan sa mundo. Ang dalawang ito ang nagpahiwalay sa atin sa Diyos at sa posibilidad na magkaroon ng buhay na walang hanggan kasama ang ating pamilya.

Sa Aklat ni Mormon, inilarawan ni Lehi ang kamusmusan ni Jacob na puno ng paghihirap at kalungkutan dahil sa kanyang mga kapatid (tingnan sa 2 Nephi 2:1). Pumanaw rin si Lehi noong bata pa si Jacob. Sa kabila ng mga hamong ito sa pamilya, nakahanap si Jacob ng pag-asa sa kaalaman niya tungkol sa sakripisyong gagawin ni Jesucristo sa hinaharap upang tulungan tayong lahat at ang ating pamilya na makaligtas sa kamatayan at impiyerno.

ang Tagapagligtas ay nananalangin sa Getsemani

icon, pag-aralan

Mag-aral upang Makapaghanda para sa Klase

Basahin ang 2 Nephi 9:6–8, 10, 18, at maaari mong markahan ang mga salita at nadama ng propetang si Jacob tungkol sa kung paano nadaig ng Pagbabayad-sala ni Jesucristo ang kasalanan at kamatayan.

Itinuro ni Pangulong Julie B. Beck, dating General Relief Society President, at ni Pangulong Henry B. Eyring ng Unang Panguluhan kung paano maaaring maging walang hanggan ang mga pamilya dahil sa Pagbabayad-sala ni Jesucristo:

Pangulong Julie B. Beck

Dahil sa Pagbabayad-sala [ni Jesucristo] sama-samang mabubuklod nang walang hanggan ang pamilya. Tinutulutan nito ang mga pamilya na magkaroon ng walang hanggang pag-unlad at maging sakdal. Ang plano ng kaligayahan, na tinatawag ding plano ng kaligtasan, ay isang planong nilikha para sa mga pamilya. (“Pagtuturo ng Doktrina tungkol sa Pamilya,” Liahona, Mar. 2011, 12)

Pangulong Henry B. Eyring

Batid ng ating mapagmahal na Ama sa Langit ang nilalaman ng ating puso. Ang Kanyang layunin ay bigyan tayo ng kaligayahan (tingnan sa 2 Nephi 2:25). Kaya nga ibinigay Niya bilang regalo ang Kanyang Anak para gawing posible ang kagalakang mabigkis sa pamilya na nagpapatuloy magpakailanman. Dahil kinalag ng Tagapagligtas ang mga gapos ng kamatayan, tayo ay mabubuhay na mag-uli. Dahil nagbayad-sala Siya para sa ating mga kasalanan, kung mananampalataya tayo at magsisisi, maaari tayong maging marapat para sa kahariang selestiyal, kung saan ang mga pamilya ay ibinibigkis ng pagmamahal magpakailanman. (“Ang Pag-asa ng Walang-Hanggang Pagmamahal sa Pamilya,” Liahona, Ago. 2016, 4)

icon, isulat

Isulat ang Iyong mga Naisip

Kung nagkaroon ka ng pagkakataong sabihin ang nadarama mo sa Tagapagligtas tungkol sa Kanyang gawain na nagtulot sa iyo upang magkaroon ka ng walang hanggang pamilya, ano kaya ang sasabihin mo sa Kanya? Bakit?

Bahagi 3

Gaano kasentro ang pamilya sa iyong plano?

Ipinaliliwanag ang pagiging sentro ng pamilya sa kawalang-hanggan, itinuro ni Elder L. Tom Perry ng Korum ng Labindalawang Apostol:

Elder L. Tom Perry

Ang buong teolohiya ng ating ipinanumbalik na ebanghelyo ay nakasentro sa mga pamilya at sa bago at walang-hanggang tipan ng kasal. …

Naniniwala rin tayo na ang matibay na mga tradisyonal na pamilya ay … mga pangunahing yunit ng kawalang-hanggan at ng kaharian at pamahalaan ng Diyos.

Naniniwala tayo na ang organisasyon at pamahalaan ng langit ay isasalig sa mga pamilya at kamag-anak. (“Bakit Mahalaga ang Kasal at Pamilya—sa Lahat ng Dako ng Mundo,” Liahona, Mayo 2015, 41)

magkapatid na young adult na masasaya kasama ang kanilang ama

Dahil sa kahalagahan ng pamilya sa plano ng Ama sa Langit, asahan na natin na sasalungatin ni Satanas ang ating mga pagsisikap na bumuo ng pamilya at patatagin ito. Ang pagkaunawa natin sa plano ng Ama sa Langit ay makatutulong sa atin na makita ang mga panlilinlang ni Satanas. Itinuro ni Elder Hales:

Elder Robert D. Hales

Walang-hanggang pananaw ang tumutulong sa ating mga desisyon at gawain sa araw-araw. Pinatatatag nito ang ating isipan at kaluluwa. Kapag napapaligiran tayo ng mga mapanghikayat at maling opinyon na may epekto sa kawalang-hanggan, tayo ay matatag at di-natitinag. …

Ang kasal at pamilya ay patuloy na inaatake dahil alam ni Satanas na mahalaga ang mga ito sa pagtatamo ng buhay na walang hanggan—kasinghalaga ng Paglikha, Pagkahulog, at Pagbabayad-sala at Pagkabuhay na Mag-uli ni Jesucristo. Dahil nabigong wasakin ang alinman sa mga pundasyong iyon ng plano, hinangad ni Satanas na wasakin ang ating pag-unawa at kaugalian sa pagpapakasal at pagpapamilya. (“Ang Plano ng Kaligtasan: Isang Sagradong Yaman ng Kaalaman na Gagabay sa Atin,” Liahona, Okt. 2015, 28, 29)

icon, isulat

Isulat ang Iyong mga Naisip

Paano mo magagawang mas sentro ng iyong buhay ang iyong pamilya? Paano mo maaanyayahan ang kapangyarihan ng Panginoon sa iyong mga pagsisikap na bumuo o patatagin ang sarili mong walang hanggang pamilya?

Gusto Mo Bang May Matutuhan Pa? (Opsiyonal)

How does the Atonement of Jesus Christ enable me to have an eternal family?

Elder Kim B. Clark

Elder Kim B. Clark of the Seventy shared how Jesus Christ, by virtue of His Atonement, made it possible for a young couple to become an eternal family in his article “The Redeeming and Strengthening Power of the Savior’s Atonement” (Ensign, Apr. 2016, 50–55).

Is prioritizing family really possible in our day? Can it really bring me happiness?

Watch the video “Home and Family” (5:55) to learn from families around the world who are striving to keep family a central part of their personal lives.

Saan ko matututuhan ang iba pa tungkol sa kahalagahan ng pamilya sa plano ng Diyos?

President Russell M. Nelson

President Nelson taught about the centrality of the family in God’s plan and in his own life in the article “Faith and Families” (Ensign, Mar. 2007, 36–41).

Pangulong Julie B. Beck

Binigyang-diin ni Pangulong Beck ang pinakamahalagang ginagampanan ng doktrina tungkol sa pamilya sa plano ng Ama sa Langit at tinalakay ang mga banta sa pamilya sa “Pagtuturo ng Doktrina tungkol sa Pamilya” (Liahona, Mar. 2011, 12–17).

Elder D. Todd Christofferson

Sa kanyang mensaheng “Bakit Dapat Mag-asawa at Bumuo ng Pamilya” (Liahona, Mayo 2015, 50–53), itinuro ni Elder D. Todd Christofferson ang tungkol sa pinakamahalagang papel na ginagampanan ng kasal at pamilya sa buong kasaysayan ng sangkatauhan at kung bakit dapat protektahan ang mga institusyong ito sa ating panahon.