Panagparegreg iti Sikog

Iti agdama a kagimongan, nagbalinen a gagangay nga aramid ti panagparegreg iti sikog, nga ikalkalintegan dagiti makaallilaw a rason. No maipasangoka kadagiti saludsod maipanggep iti daytoy a banag, makapagtalgedka iti panangsurot iti naipalgak a pagayatan ti Apo. Sinuppiat dagiti propeta iti ud-udina nga aldaw ti panagparegreg iti sikog, a dinakamatda ti pakdaar ti Apo, “Saankayo nga … mamapatay wenno agaramid iti ania man a kaarngina” (DkK 59:6). Nalawag ti balakadda maipanggep iti banag: Dagiti miembro ti Ti Simbaan ni Jesucristo dagiti Santo iti Ud-udina nga Aldaw ket saanda koma nga agparegreg iti sikog, mangipatungpal, mangyallukoy, mangbayad, wenno makipagurnos para iti panagparegreg iti sikog. No yallukoymo ti panagparegreg iti sikog iti ania man a wagas, mabalin a maipasangoka iti panagdisiplina ti Simbaan.

Kinuna dagiti lider ti Simbaan a ti sumagmamano a pakailaksidan a kasasaad ket mabalin a mangikalintegan iti panagparegreg iti sikog, kas koma no ti panagsikog ket bunga ti seksual a relasion ti agkabagian wenno pannakarames, no inkeddengen ti nalaing a mangngagas nga agpeggad ti biag wenno salun-at ti ina, wenno natakuatan ti nalaing a mangngagas nga adda nakaro a diperensia ti fetus a saan a mangpalugod nga agbiag ti maladaga no maipasngay. Ngem uray dagiti kastoy a kasasaad ket saan a dagus a mangikalintegan iti panagparegreg iti sikog. Dagiti maipasango kadagiti kasta a kasasaad ket nasken nga ibilangda laeng ti panagparegreg iti sikog kalpasan ti panangkonsultada kadagiti lokal a liderda iti Simbaan ken panangawat iti pammatalged babaen ti napasnek a kararag.

No nainaw ti maysa nga ubing iti ruar ti kallaysa, ti kasayaatan a pagpilian ket ti panagkallaysa ti ina ken ti ama ti ubing ket agtinnulongda iti panangipasdek iti agnanayon a relasion ti pamilia. No saan nga agballigi ti panagdenna ti agassawa, nasken nga ipaamponda ti ubing, nangnangruna a babaen ti LDS Family Services (kitaen iti “Panagampon,” dagiti panid 110–11).