Panagampon

Karbengan dagiti ubbing a mapadakkel ida dagiti nagannak a mangdayaw kadagiti kari ti kallaysa ken mangipaay iti pammateg ken suporta. Mabalin a naindaklan a bendision ti panagampon para kadagiti adu nga ubbing a nayanak nga awanan iti daytoy a gundaway.

No nainaw ti maysa nga ubing iti ruar ti kallaysa, ti kasayaatan a pagpilian ket ti panagkallaysa ti ina ken ti ama ti ubing ket agtinnulongda iti panangipasdek iti agnanayon a relasion ti pamilia. No saan nga agballigi ti panagdenna ti agassawa, nasken nga ipaamponda ti ubing, nangnangruna a babaen ti LDS Family Services. Ti panangipaampon iti maladaga babaen iti LDS Family Services ket makatulong kadagiti saan pay a nagkallaysa a nagannak a mangaramid iti kasayaatan para iti ubing. Daytoy ti mangipanamnama a mailantipto ti ubing iti maysa nga ina ken maysa nga ama iti templo, ken daytoy ti mangpapintas iti namnama para kadagiti bendision ti ebanghelio iti biag ti amin a maseknan. Ti panagampon ket saan a managimbubukod, managayat a pangngeddeng a mangbendision kadagiti nagpasngay a nagannak, iti ubing, ken iti pamilia a nagampon.

No naasawaanka ket kayatyo nga agassawa ti agampon iti maysa nga ubing, penkenyo nga ammoyo ti amin a naidawat a legal a kasapulan dagiti pagilian ken ahensia ti gobierno a mairaman. Dumawat iti balakad kadagiti dadaulom ti priesthood ken, no mabalin, kadagiti miembro ti staff iti LDS Family Services. No awan ti LDS Family Services iti lugaryo, makitinnulong kadagiti dadauloyo ti priesthood a mangsarak kadagiti adda lisensiana, awtorisado nga ahensia a mangsaluad nga agpada kadagiti ubbing ken nagampon a nagannak.