Rigat
Kas paset ti plano ti pannakasubbot ti Nailangan nga Ama, mapadasam ti rigat kabayatan ti biagmo iti daga. Dagiti pannubok, pannakaupay, kinaliday, panagsakit, ken panagladingit ket narigat a paset ti biag, ngem mabalin nga agbanagda iti naespirituan a panagdur-as, pannakapatarnaw, ken panagrang-ay bayat ti yaasidegmo iti Apo.
Aggapu ti rigat iti nadumaduma a pagtaudan. No dadduma mabalin a maipasangoka kadagiti pannubok kas bunga ti bukodmo a kinapannakkel ken kinasukir. Mabalin a maliklikan dagitoy a pannubok babaen ti nalinteg a panagbiag. Dagiti dadduma pay a pannubok ket gagangay a paset ti biag ken mabalin a dumtengda no dadduma no agbibiagka a sililinteg. Kas pagarigan, mabalinmo a mapasaran dagiti pannubok kabayatan ti panagsakit wenno panagduadua wenno iti ipupusay dagiti ipatpateg. No dadduma dumteng ti rigat gapu kadagiti nakapsut a pili dagiti dadduma ken dagiti makadangran a balikas ken tignay.
Panangsungbat iti Rigat nga Addaan iti Pammati
Ti panagballigi ken ragsakmo, agpada ita ken iti kinaagnanayon, ket ad-adda nga agpannuray kadagiti panagsungbatmo kadagiti pakarigatan ti biag.
Maysa a palawag iti Libro ni Mormon ti mangiladawan iti nadumaduma nga isusungbat iti rigat. Nagdaldaliasat ni propeta Lehi ken ti pamiliana iti langalang iti sumagmamano nga aldaw, nga us-usarenda dagiti bai ken panada a pagala iti taraon. Naipasango ti pamilia iti rigrigat idi napukaw dagiti annak ni Lehi ti pannakausar dagiti baida. Napukaw ti parteng dagiti bai da Laman ken Lemuel, ken nadadael ti bai ni Nephi. Mabisin ken nabannogda, nangrugi a nagdayamudom da Laman ken Lemuel a maibusor iti Apo. Uray ni Lehi ket nangrugi a nagdayamudom. Iti sabali a bangir, nagkedked ni Nephi a maawanan iti namnama. Nagtrabaho isuna. Kinunana: “Siak, ni Nephi, nagaramidak iti kayo a bai, ken iti pana babaen iti nalinteg a kayo; gapuna, innalak ti bai ken pana, ken batbato ken palsiit. Ket kinunak iti amak: Sadino ti pangalaak iti taraon?” Napakumbaba gapu kadagiti sao ni Nephi, nagsaludsod ni Lehi iti Apo no sadino ti nasken a papananda a pagalaan iti taraon. Sinungbatan ti Apo dagiti kararagna ket inturongna ni Nephi iti maysa a lugar a pangalaanna iti taraon. (Kitaen iti 1 Nephi 16:15–31.)
No maipasango ti sumagmamano a tao iti rigat, maipadada kada Laman ken Lemuel. Agdayamudomda ken agsakit ti nakemda. Agdamagda kadagiti saludsod kas iti “Apay a mapasamak daytoy kaniak? Apay a nasken a sagabaek daytoy ita? Ania ti naaramidko tapno maikariak iti daytoy?” Ngem addaan dagitoy a saludsod iti bileg a mangsakup iti pampanunotda. Dagiti kasta a saludsod ti mangrimbaw iti pannakaawatda, magsagepsep iti pigsada, ken mangipaidam kadakuada kadagiti padas a kayat ti Apo nga awatenda. Imbes a panangsungbat iti kastoy a wagas, nasken a surotem ti pagwadan ni Nephi. Ibilang ti panagdamag kadagiti saludsod kas iti, “Ania ti nasken nga aramidek? Ania ti nasken a masursurok manipud iti daytoy a padas? Ania ti nasken a balbaliwak? Asino ti makatulong kaniak? Kasano a malagipko dagiti adu a bendision kadagiti panawen ti pannubok?”
Agkasapulan iti nadumaduma a sungbat dagiti nadumaduma a kita ti rigat. Kas pagarigan, no naidalitka iti sakit, kasapulam laeng ti agbalin a naanus ken napudno. No agsagabaka gapu kadagiti sao wenno aramid dagiti dadduma, nasken nga itrabahom ti panangpakawan kadagiti nakabasol kenka. No maysaka a biktima ti panagabuso, nasken nga agkiddawka a dagus iti tulong. No dumteng dagiti pannubok gapu iti bukodmo a kinasukir, nasken nga aturem ti ugalim ken sipapakumbabaka nga agkiddaw iti pammakawan.
Nupay agdudumanto dagiti panagsungbatmo iti rigat, nasken a di agbalbaliw ti maysa a sungbat—ti panagtalekmo iti Nailangitan nga Ama ken ni Jesucristo. Insuro ni propeta Alma, “Asino man nga agtalek iti Dios matarabaydanto kadagiti pannubok kadakuada, ken kadagiti parikutda, ken kadagiti rigrigatda, ket mabitibitdanto iti maudi nga aldaw” (Alma 36:3).
Panagtalek iti Nailangitan nga Ama ken ni Jesucristo
No agtalekka iti Ama ken iti Anak, agtalekka nga ay-ayatendaka a naan-anay—gapu ta kayatdaka nga agragsakka ken gapu ta tulongandakanto a dumur-as a naespirituan. Agtungpalka kadagiti bilin. Kalikagumam a maammuan ti pagayatanda, ken aramidem no ania ti idawatda a uray no tarigagayam ti sabali pay a banag. Dagiti kararagmo a pangpagin-awa ket buyogan ti pannakaawat a saanto a risuten a dagus ti Nailangitan nga Ama ti amin a banag—tapno mapalugodannaka nga aguray tapno makapagtultuloyka nga agsursuro ken dumur-as. Babaen iti amin daytoy, masarakamto ti liwliwa iti pammatalged a maawatan a naan-anay ti Mangisalakan dagiti pannubokmo. Kas paset ti awan inggana a Pannubbotna, inawatna iti Bagina “ti saem ken saksakit dagiti taona.” Inawatna iti Bagina dagiti “pagkuranganda, tapno mapno ti lalaemna iti kaasi, a maibatay iti lasag, tapno maammuanna a maibatay iti lasag no kasano nga alawenna dagiti taona a maibatay kadagiti pagkuranganda” (Alma 7:11–12). Gapu ta napasaranna ti saemmo, ammona no kasano a matulongannaka. No agpannurayka Kenkuana a sipapammati, papigsaennakanto tapno masarkedam ti ania man a pannubok a mapasaram.
Bayat ti panagkagumaam nga agtalek iti Apo kadagiti panawen ti pannubok, laglagipem ti sumaganad a balakad a naited babaen ken ni Propeta Joseph Smith:
“Isu a napudno iti panagtutuok, dakdakkelto ti gunggonana iti pagarian ti langit.
“Diyo makita iti gagangay a matayo, ta iti agdama a panawen, ti panggep ti Diosyo maipanggep kadagitoy a banag a dumtengto kalpasan daytoy, ken ti gloria a sumaruno kalpasan ti adu a panagtutuok.
“Ta kalpasan ti adu a panagtutuok umay dagiti bendision” (DkK 58:2–4).
Panangsarak iti Talna ken Rag-o kabayatan ti Rigat
Masarakam ti talna ken rag-o uray no makidangadangka kadagiti karit ken kinaliday. Iraman ti Libro ni Mormon ti pakasaritaan dagiti nalinteg a tattao a nakasursuro iti daytoy a kinapudno. Iti panagsagabada gapu iti panangadipen kadakuada ti naranggas nga agturay, imbukbokda ti puspusoda iti Dios (kitaen iti Mosiah 24:8–12). Insungbat ti Apo:
“Yangadyo dagiti uloyo ket maliwliwakayo, ta ammok ti katulagan nga inaramidyo kaniak; ket makitulagak kadagiti taok ken wayawayaak ida iti pannakaadipen.
“Kasta met a palag-anek dagiti dagensen nga adda kadagiti abagayo, tapno diyo ida marikrikna iti kaaddada iti likudyo, uray pay iti pannakaadipenyo; ket aramidek daytoy tapno agbalinkayo a saksi kalpasanna, ken tapno maammuanyo nga awan duadua a siak, ti Apo a Dios, sarungkarak dagiti taok iti panagsagabada” (Mosiah 24:13–14).
Simmungbat dagiti tao nga addaan iti pammati, ket “limmag-an dagiti dagensen a naipabaklay [kadakuada]; wen, pinatibker ida ti Apo tapno laklakaenda nga ibaklay dagiti dagensenda, ket pinaiturayanda a siraragsak ken siaanus iti amin a pagayatan ti Apo” (Mosiah 24:15).
Kas kadagitoy nalinteg a tattao, mabalinmo ti “agtulnog a siraragsak ken siaanus iti amin a pagayatan ti Apo,” nga ammom a patibkerennakanto kadagiti pannubokmo. Inkarina, “Amin a banag a nagrigatanyo agbalindanto a pagimbaganyo, ken pakaitan-okan ti naganko” (DkK 98:3).