Kinawaya nga Agpili
Inikkannaka ti Nailangitan nga Amam iti kinawaya nga agpili, ti kabaelan nga agpili ken agtignay para iti bagim. Ti kinawaya nga agpili ket kasapulan unay iti plano ti pannakaisalakan. No awan daytoy, saanmo koma a kabaelan ti agsursuro wenno rumang-ay wenno sumurot iti Mangisalakan. Addaan iti daytoy, sika ket “siwayawaya[ka] nga agpili iti wayawaya ken biag nga agnanayon, babaen ti naindaklan a Mangibabaet iti amin a tao, wenno mangpili iti pannakaadipen ken ipapatay, babaen ti panangadipen ken pannakabalin ti sairo” (2 Nephi 2:27).
Addaanka iti bileg nga agpili uray pay idi sakbay a nayanakka. Iti Konseho iti Langit sakbay daytoy a biag, indatag ti Nailangitan nga Ama ti planona, a nakairamanan ti pagbatayan ti kinawaya nga agpili. Nagalsa ni Lucifer ket “pinanggepna a dadaelen ti kinawaya ti tao nga agpili” (Moises 4:3). Kas bungana, naipaidam ken ni Lucifer ken dagiti simmurot kenkuana ti pribilehio ti panangawat iti mortal a bagi. Ti kaaddam iti daga ti mangipatalged nga inaramatmo ti kinawayam nga agpili tapno surotem ti plano ti Nailangitan nga Ama.
Iti mortalidad, agtultuloyka a maaddaan iti kinawaya nga agpili. Ti panangusarmo iti daytoy a sagut ti mangikeddeng iti panagragsak wenno panagrigatmo iti daytoy a biag ken iti umay a biag. Nawayaka nga agpili ken agtignay, ngem saanka a nawaya nga agpili kadagiti bunga dagiti tignaymo. Mabalin a saan a dumteng a dagus dagiti bunga, ngem sumarunodanto latta. Dagiti pili ti nasayaat ken nalinteg ket mangiturong iti ragsak, talna, ken agnanayon a biag, idinto ta dagiti pili ti basol ken dakes ket mangiturong iti liday ken rigat iti kamaudiananna.
Sika ti agsungbat kadagiti pangngeddeng nga aramidem. Nasken a saanmo a pabasolen dagiti kasasaadmo, ti pamiliam, wenno dagiti gagayyemmo no piliem ti agsukir kadagiti bilin ti Dios. Maysaka nga anak ti Dios nga addaan iti dakkel a pigsa. Addaanka iti kabaelan a pumili iti kinalinteg ken kinaragsak, iti labes dagiti kasasaadmo.
Responsableka pay iti panangpadur-as kadagiti kabaelan ken talentom nga inted kenka ti Nailangitan nga Ama. Agsungbatka Kenkuana iti no ania ti aramidem kadagiti kabaelam ken no kasano nga usarem ti orasmo. Saanmo a sayangen ti orasmo. Agtallugodka nga agtrabaho a naimbag. Piliem ti agaramid iti adu a nasayaat a banag iti bukodmo a nawaya a pagayatan.