Pannubbot ni Jesucristo
Ti balikas a subboten kaipapananna ti itunos, wenno isubli iti pannakitunos. Babaen iti Pannubbot ni Jesucristo, mabalintayo a maitunos iti Nailangitan nga Amatayo (kitaen iti Taga Roma 5:10–11; 2 Nephi 25:23; Jacob 4:11). Makapagtaengtayo iti kamaudianan iti imatangna iti agnanayon, a “nagbalin a naan-anay babaen ni Jesus” (kitaen iti DkK 76:62, 69).
Ni Jesucristo ket “naisagana manipud iti pamuon ti lubong a mangsubbot kadagiti taona[na]” (Ether 3:14). Iti lubong ti espiritu sakbay daytoy a biag, indatag ti Nailangitan nga Ama ti agnanayon a planona, a nagkasapulan iti awan inggana ken agnanayon a Pannubbotna. Ni Jesus sakbay daytoy a biag, nga idi naam-ammo a Jehova, ket sipapakumbaba a nangipakdaar nga aramidennanto ti pagayatan ti Ama iti panangipatungpal iti plano (kitaen iti Moises 4:2). Iti kasta Isu ket naordenan sakbay a nayanak tapno ipatungpalna ti Pannubbot—nga umay iti daga, agsagaba iti pannusa gapu kadagiti basoltayo, matay iti krus, ken agungarto. Nagbalin a “ti Kordero a napapatay manipud idi pannakabangon toy lubong” (Apocalipsis 13:8; kitaen met iti 1 Pedro 1:19–20; Moises 7:47).
Ti Pannubbot ket kangatuan a panangyebkas iti ayat ti Nailangitan nga Amatayo para kadatayo (kitaen iti Juan 3:16). Daytoy pay ti kaindaklanan a panangyebkas iti ayat ti Mangisalakan para iti Ama ken para kadatayo (kitaen iti Juan 14:28–31; 15:9–13; 1 Juan 3:16; DkK 34:3; 138:1–4).
Ti Panagkasapulantayo iti Pannubbot
Kas an-annabo da Adan ken Eva, tawiden ti amin a tao dagiti epekto ti Pannakatnag. Mapadasantayo amin ti naespirituan nga ipapatay, pannakaisina manipud iti sidong ti Dios, ken maipasangotayo amin iti naindagaan nga ipapatay, nga isu ti ipapatay ti pisikal a bagi (kitaen iti Alma 42:6–9; DkK 29:41–42).
Iti natnag a kasasaadtayo, makapadastayo iti pagsusupadian ken pannulisog. No sumukotayo iti pannulisog, yadayotayo dagiti bagbagitayo manipud iti Dios ket agkurangtayo iti dayagna (kitaen iti Taga Roma 3:23).
Ti agnanayon a hustisia ket agkasapulan nga agtalinaed dagiti epekto ti Pannakatnag ken madusatayonto gapu kadagiti bukodtayo a biddut. No awan ti Pannubbot, ti naespirituan ken naindagaan nga ipapatay ket mangikabil iti saan a mapagnaan a tubeng iti nagbaetantayo ken ti Dios. Gapu ta saantayo a maisalakan ti bagbagitayo manipud iti Pannakatnag wenno manipud kadagiti bukodtayo a basbasol, agnanayon a maisinatayo manipud iti Nailangitan nga Amatayo, gapu ta “awan narugit a banag ti makapagtaeng … iti sidongna” (Moises 6:57).
Ti laeng wagas a pakaisalakanantayo ket ti panangispal ti maysa a tao kadatayo. Kasapulantayo ti maysa a tao a makapatgan kadagiti kasapulan ti hustisia—nga agtaktakder iti lugartayo nga agsungbat iti dagensen ti Pannakatnag ken agikaro para kadagiti basbasoltayo. Kanayon a ni Jesucristo ti agmaymaysa laeng a makabael nga agaramid iti kasta a sakripisio.
Jesucristo, ti Kakaisuna a Namnamatayo
Manipud pay idi sakbay ti Pannakaparsua ti daga, ti Mangisalakan ti kakaisuna a namnama para iti “kappia iti daytoy a lubong, ken agnanayon a biag iti masungad a lubong” (DkK 59:23).
Isuna laeng ti addaan iti bileg a mangipaay iti biagna ken mangala manen iti daytoy. Manipud iti mortal nga inana, ni Maria, tinawidna ti pannakabael a matay. Manipud iti imortal nga Amana, tinawidna ti bileg a mangparmek iti patay. Impakdaarna, “Kas ti Ama adda kenkuana met laeng ti biag; kasta met impaayna nga ti Anak adda biag kenkuana met laeng” (Juan 5:26).
Isuna laeng ti makasubbot kadatayo manipud kadagiti basbasoltayo. Inted ti Dios Ama Kenkuana daytoy a bileg (kitaen iti Helaman 5:11). Nabaelan nga inawat ti Mangisalakan daytoy a bileg ken impatungpalna ti Pannubbot gapu ta pinagtalinaedna ti Bagina a nawaya iti basol: “naglak-am kadagiti sulisog ngem saanna a dinengngeg ida” (DkK 20:22). Iti panagbiagna a naan-anay, awan basolna a biag, nawaya Isuna manipud kadagiti kasapulan ti hustisia. Gapu ta addaan Isuna iti bileg ti pannubbot ken gapu ta awan ti utangna iti hustisia, kabaelanna ti agbayad para kadagiti agbabawi. Mabalinna a kunaen:
“Ama, kitaem ti panagrigrigat ken ipapatayna a saan a nagbasol, iti nakaay-aywam unay; kitaem ti dara ti Anakmo a nagsayasay, ti dara nga intedmo tapno maidaydayawka;
“Gapuna, Ama, ispalem dagitoy kabsatko a mamati iti naganko, tapno umasidegda kaniak ken maaddaanda iti awan inggana a biag” (DkK 45:4–5).
Kinapudnona, “awanto ti sabali a nagan a maited uray ania a dalan wenno wagas para iti pannakaisalakan dagiti annak ti tao, no di laeng babaen ti nagan ni Cristo, ti Apo a Mannakabalin” (Mosiah 3:17).
Ti Pangsubbot a Sakripisio
Napasamak ti pangsubbot a sakripisio ni Jesus iti Minuyongan ti Getsemani ken iti krus iti Kalbario. Iti Getsemani nagtulnog Isuna iti pagayatan ti Ama ken nangrugi nga inawatna iti Bagina dagiti basbasol ti amin a tao. Impalgakna ti sumagmamano ti no ania ti napasaranna bayat ti panagikarona kadagiti basbasoltayo:
“Siak, a Dios, sinagabak dagitoy a banag para iti amin, tapno saanda koma nga agsagaba no agbabawida;
“Ngem no saanda nga agbabawi nasken nga agsagabada a kas kaniak;
“A dayta a panagsagaba nangipaay kaniak, uray pay Dios, a kaindaklan iti amin, nga aggarigengen gapu iti saem, ken agdara iti tunggal teterreman, ken agsagaba ti agpada a bagi ken espiritu—ken kayatko a saanak koma nga uminum iti napait a kopa, ken kumsen—
“Nupay kasta, madaydayaw koma ti Ama, ket nakiranudak ken lineppasko ti panangisaganak kadagiti annak ti tattao” (DkK 19:16–19; kitaen met iti Lucas 22:44; Mosiah 3:7).
Nagtultuloy a nagsagaba ti Mangisalakan gapu kadagiti basbasoltayo idi impalugodna ti Bagina a mailansa iti krus—“naipangato iti krus ken napapatay gapu kadagiti basol ti lubong” (1 Nephi 11:33).
Iti krus, impalugodna ti Bagina a matay. Kalpasanna naipaidda ti bagina iti maysa a tanem agingga iti panagungarna ken nagbalin nga isu “ti umuna a bunga dagiti matmaturog” (1 Taga Corinto 15:20). Babaen iti ipapatay ken Panagungarna, pinarmekna ti pisikal nga ipapatay para iti amin kadatayo. Idi agangay kinunana:
“Immayak ditoy lubong a mangaramid iti pagayatan ti Amak, gapu ta imbaonnak ti Amak.
“Ket imbaonnak ti Amak tapno mailansa iti krus; ket kalpasan ti pannakailansak iti krus, mayasideg koma amin a tao kaniak, tapno kas iti panangilansa kaniak ti tao, kasta met ti panangidatag ti ama iti tao, nga agtakder iti sangok, a maukom iti aramidda, no nasayaatda wenno dakesda—
“Ket nailansaak gapu iti daytoy; ngarud, babaen iti pannakabalin ti Ama yasidegko ti amin a tao kaniak, tapno maukomda babaen ti aramidda.
“Ket mapasamakto, a siasino man nga agbabawi ken mabuniagan iti naganko magunggonaanto; ket no agibtur agingga iti panungpalan, adtoy ibagakto nga awan basolna iti sango ti Amak inton tumakderak a mangukom iti lubong” (3 Nephi 27:13–16).
Sangalubongan a Pannakasubbot manipud iti Pannakatnag
Babaen iti Pannubbot, sinubbot ni Jesucristo ti amin a tao manipud kadagiti epekto ti Pannakatnag. Amin a tao a nagbiagen iti daga ken agbiagto iti daga ket mapagungarto ken maisubli iti sidong ti Dios tapno maukomto (kitaen iti 2 Nephi 2:5–10; Helaman 14:15–17). Babaen iti sagut ti asi ken ti pangsubbot a parabur ti Mangisalakan, umawattayonto iti sagut ti imortalidad ken agbiagtayo nga agnanayon iti naitan-ok, nagungar a bagi.
Pannakaisalakan manipud kadagiti Basbasoltayo
Nupay nasubbottayo nga awan kondisionna manipud kadagiti sangalubongan nga epekto ti Pannakatnag, agsungbattayo para kadagiti bukodtayo a basbasol. Ngem mabalin a mapakawan ken madalusantayo manipud iti mulit ti basol no “[aramatentayo] ti manangsubbot a dara ni Cristo” (Mosiah 4:2). Nasken nga aramatentayo ti pammati ken ni Jesucristo, agbabawi, mabuniagan para iti pannakaugas dagiti basbasol, ken awaten ti sagut ti Espiritu Santo. Imbalakad ni Alma:
“Nasken nga agbabawikayo, ken maipasngaykayo manen; ta kinuna ti Espiritu a no saankayo a maipasngay manen diyo matawid ti pagarian ti langit; ngarud umaykayo tapno mabuniagankayo iti panagbabawi, tapno maugasan dagiti basolyo, tapno maaddaankayo iti pammati iti Kordero ti Dios, a nangikkat kadagiti basol ti lubong, a maingel a mangisalakan ken mangdalus iti amin a kinikillo nga aramid” (Alma 7:14).
Ti Sagut ti Agnanayon a Biag
Impakdaar ti Mangisalakan a ti agnanayon a biag ket ti “kapatgan iti amin a sagut ti Dios” (DkK 14:7). Ti manggun-od iti agnanayon a biag ket panagbalin a maikari nga agindeg iti sidong ti Dios, a mangtawid iti maysa a lugar iti kangatuan a tukad ti celestial a pagarian. Sidadaan a magun-od laeng daytoy a sagut babaen iti Pannubbot ni Jesucristo. Kinuna ni Mormon: “Ania ti namnamaenyo? Adtoy kunak kadakayo nga addanto namnamayo gapu iti pannubbot ni Cristo ken ti pannakabalin ti panagungarna, nga agungar iti biag nga agnanayon, ken daytoy gapu iti pammatiyo kenkuana babaen iti kari” (Moroni 7:41).
Tapno maawat daytoy a sagut, nasken a mapatgantayo dagiti masinunuo a kondision. Nasken nga aramatentayo ti pammati ken ni Jesucristo, agbabawitayo kadagiti basbasoltayo, ken agibturtayo a sipupudno agingga iti panungpalan. Nasken nga awatentayo dagiti ordinansa ti pannakaisalakan: panagbuniag, ti sagut ti Espiritu Santo, ordinasion iti Melchizedek Priesthood (para kadagiti lallaki), ken ti endowment iti templo ken pannakailantip iti kallaysa. Babaen iti panangawat kadagitoy nga ordinansa ken panagtungpal kadagiti maibuyog a katulagan, umasidegtayo ken ni Cristo ket iti kamaudianan awatentayo ti sagut ti agnanayon a biag (kitaen iti Pagannurotan ti Pammati 1:3).
Iti awan inggana a hustisia ken asina, ited pay ti Apo ti agnanayon a biag iti “amin a natay a di pay nakaammo iti daytoy nga ebanghelio, a nangawat koma no napalubosanda a nagbati” ken iti “amin nga ubbing a matay sakbay a madanonda ti tawen a mabalindan ti agsungbat” (DkK 137:7, 10).
Awisennatayo amin ti Mangisalakan nga umawat iti agnanayon a biag: “Pakaammuanna ti amin a tao, gapu ta naidiaya kadakuada ti ima ti kaasi, ket kinunana: Agbabawikayo, ket awatenkayo. Wen, kinunana: Umaykayo kaniak ket mangankayo iti bunga ti kayo ti biag; wen, mangankayo iti tinapay ken uminum iti danum ti biag a siwawaya” (Alma 5:33–34).
Panangsarak iti Kappia ken Pannakapaimbag babaen iti Pannubbot
Dagiti bendision ti Pannubbot ti Mangisalakan ket agpatingga iti kinaagnanayon, ngem sumangbayda pay iti daytoy a biag. Bayat ti yaasidegyo ken ni Cristo, maammuanyonto ti rag-o ti panagbalin a nadalus iti sango ti Apo. Kabaelanyonto nga isawang dagiti balikas ni Alma, a, kalpasan ti adu a basol ken panagalsa, nakapadas iti nasaem ngem pangpaimbag a proseso ti panagbabawi. Kalpasan ti pannakapakawanna, impaneknekna:
“Saankon a malagip ti saem; wen, saanakon a maparparigat iti lagip dagiti basolko.
“Ket o, anian a rag-o, ken anian a nakaskasdaaw a lawag ti nakitak; wen, napno ti kararuak iti rag-o a kas iti pannakapnok idi iti saem!
“… Awan ti nain-inaka ken napapait ngem iti saemko. … Iti sabali a bangir, awanen ti nain-inaka ken nasamsam-it pay ngem iti rag-ok” (Alma 36:19–21).
Kas nayon iti panangidaton iti pannubbot manipud iti saem ti basol, idaton ti Mangisalakan ti kappia kadagiti panawen ti pannubok. Kas paset ti Pannubbotna, inawat ni Jesus iti Bagina dagiti saem, saksakit, ken kinakapuy ti amin a tao (kitaen iti Alma 7:11–12). Maawatanna ti panagsagabayo gapu ta napasarannan daytoy. Addaan iti daytoy a naan-anay a panakaawat, ammona no kasano a matulongannaka. Mabalinyo nga itaklin “kenkuana ti amin a pagdanaganyo; gapu ta isu aluadannakayo” (1 Pedro 5:7).
Babaen iti pammati ken kinalintegyo ken babaen ti pangsubbot a sakripisiona, amin a basol, sugat, ken saem daytoy a biag ket naan-anay a masukatan ken maaramid a nalinteg. Dagiti naipaidam a bendision iti daytoy a biag ket maitedto kadagiti kinaagnanayon. Ken nupay saanna a mapagin-awa ti amin a sagabaenyo ita, bendisionannakayto iti liwliwa ken pannakaawat ken tibker a “laklakaen nga ibaklay[yo] dagiti dagensen” (Mosiah 24:15).
“Umaykayo kaniak dakayo amin nga agrigrigat ken madagdagsenan,” kinuna ti Mangisalakan, “ket paginanaenkayto” (Mateo 11:28). Iti sabali pay a gundaway inkarina manen ti kappiana, a kunkunana, “Ditoy lubong addanto rigatyo: ngem manginanamakayo; siak pinarmekko ti lubong” (Juan 16:33). Dagitoy dagiti kari ti Pannubbot, iti daytoy a biag ken iti unos ti kinaagnanayon.