Panagbuniag
Isalaysay ti Libro ni Mormon ti maipapan iti maysa a grupo dagiti tattao a nagsursuro iti ebanghelio ken nabuniagan iti maysa a lugar a maawagan iti Mormon. Manipud iti kanito ti panagbuniagda, imbilangda ti Mormon kas maysa a lugar ti kinangayed gapu ta addada sadiay, “simngay ti pannakaammoda iti Mannubbotda” (Mosiah 18:30). Pinatibker dagiti pammaneknekda ken ti katulagan ti panagbuniagda, nagtalinaedda a napudno iti Apo, uray pay kadagiti panawen ti nakaro a pannubok (kitaen iti Mosiah 23–24).
Kas kadagiti tattao iti daytoy a pakasaritaan ti Libro ni Mormon, makapagrag-okayo bayat ti pananglagipyo iti katulagan ti panagbuniagyo ken dagiti kari ti Apo kadakayo. Makasarakkayo iti pigsa iti ordinansa ti panagbuniag, nabuniagankayo man itay kallabes wenno adun a tawen ti napalabas.
Panangserrek iti Dalan nga Agturong iti Agnanayon a Biag
Ti panagbuniag ti umuna a pangisalakan nga ordinansa ti ebanghelio (kitaen iti Pagannurotan ti Pammati 1:4). Babaen ti panangbuniag ken panangpatalged kenka ti turay ti priesthood, nagbalinka a maysa a miembro ti Ti Simbaan ni Jesucristo dagiti Santo iti Ud-udina nga Aldaw.
Idi nabuniaganka, impakitam ti kinatallugodmo a sumurot iti pagwadan ti Mangisalakan. Isu ket nabuniagan met, uray pay awan ti basolna. Bayat ti panangilawlawagna ken ni Juan Bautista, kinasapulanna ti mabuniagan a “panangtungpal iti amin a kinalinteg” (kitaen iti Mateo 3:13–17).
Amin nga agkalikagum iti agnanayon a biag ket nasken a surotenda ti pagwadan ti Mangisalakan babaen iti panagpabuniag ken panangawat iti sagut ti Espiritu Santo. Kinuna ni propeta Nephi nga impakita ti Mangisalakan kadatayo “ti ruangan a serkan[tayo]. Gapu ta ti ruangan a rumbeng a serkan[tayo] isu ti panagbabawi ken pannakabuniag babaen ti danum; ket kalpasanna umayto ti pannakapakawan dagiti basol[tayo] babaen ti apuy ken ti Espiritu Santo. Ket adda[tayon] iti daytoy nailet ken akikid a dalan nga agturong iti agnanayon a biag” (2 Nephi 31:17–18). Awatentayonto ti agnanayon a biag no agibturtayo agingga iti panungpalan, nga agtungpaltayo kadagiti katulagantayo ken umawat iti dadduma pay nga ordinansa ti pannakaisalakan.
Panagbuniag iti Wagas ti Apo
Impalgak ti Mangisalakan ti pudno a wagas ti panagbuniag ken ni Propeta Joseph Smith, a nangilawlawag a ti ordinansa ket nasken nga annongen ti maysa nga addaan iti turay ti priesthood ken nasken a maaramid babaen iti pannakairarem:
“Mapan ti tao a tinudingan ti Apo ken addaan iti turay a naggapu ken ni Jesucristo a mangbuniag iti danum a kaduana ti tao a nangidatag iti bagina a mabuniagan, ket kunana, nga awaganna iti naganna: Babaen iti pannakabalin nga inted ni Jesucristo kaniak, buniaganka iti nagan ti Ama, ken ti Anak, ken ti Espiritu Santo. Amen.
“Sa iraremna iti danum, sana met la ilung-aw” (DkK 20:73–74).
Ti pannakairarem ket tanda ti ipapatay ti managbasol a biag ti tao ken pannakaipasngayna manen iti naespirituan a biag, a maidaton iti panagserbi iti Dios ken kadagiti annakna. Tanda pay daytoy ti ipapatay ken panangungar. (Kitaen iti Taga Roma 6:3–6.)
Dagiti Babassit nga Ubbing ken Panagbuniag
Manipud iti paltiing iti ud-udina nga aldaw, ammotayo a masubbot dagiti ubbing babaen iti asi ni Jesucristo. Kinuna ti Apo, “Saanda a makapagbasol, ta saan a naikkan ni Satanas iti bileg a mangsulisog kadagiti babassit nga ubbing, agingga a mangrugida nga agbalin nga adda sungsungbatanda kaniak” (kitaen iti DkK 29:46–47). Saanda a nasken a mabuniagan agingga a madanonda ti tawen ti kaadda ti sungsungbatan, nga impalgaken ti Apo nga agtawen iti walo (kitaen iti DkK 68:27; Patarus ni Joseph Smith, Genesis 17:11). Asino man nga agkuna a kasapulan a mabuniagan dagiti babassit nga ubbing “tallikudanna ti asi ni Cristo, ket pilawenna ti pannakasubbot ken ti bileg ti pannubbotna” (Moroni 8:20; kitaen met iti Moroni 8:8–19, 21–24).
Ti Katulagam iti Panagbuniag
Idi nabuniaganka, simrekka iti katulagan iti Dios. Inkarim nga awatem iti bagim ti nagan ni Jesucristo, agtungpalka kadagiti bilinna, ken agserbika Kenkuana agingga iti panungpalan (kitaen iti Mosiah 18:8–10; DkK 20:37). Pabaruem daytoy a katulagan iti tunggal kanito a makiranudka iti sakramento (kitaen iti 20:77, 79).
Panangawatmo iti Bagim ti Nagan ni Jesucristo.
No awatem iti bagim ti nagan ni Jesucristo, makitam ti bagim a kas iti Bagina. Ipangpangrunam Isuna ken ti aramidna nga umuna iti biagmo. Kalikagumam no ania ti pagayatanna imbes a ti pagayatam wenno no ania ti isuro ti lubong kenka a pagayatam.
Iti Libro ni Mormon, ilawlawag ni Ari Benjamin no apay a napateg nga awatentayo ti nagan ti Mangisalakan iti bagbagitayo:
“Awan ti sabali a nagan a naited a paggapuan ti pannakaisalakan; ngarud, kayatko a gun-odenyo ti nagan ni Cristo, dakayo a nakitulag iti Dios ta masapul a natulnogkayo agingga it kanibusanan ti biagyo.
“Ket mapasamak a siasino man a mangaramid iti daytoy masarakanto iti makanawan nga ima ti Dios, ta ammonanto ti nagan a pakaawaganna; agsipud ta maawaganto iti nagan ni Cristo.
“Ket ita mapasamak, a nasken a maawagan iti sabali a nagan ti siasino man a di umawat iti nagan ni Cristo; ngarud masarakannanto ti bagina iti makanigid ti Dios” (Mosiah 5:8–10).
Panagtungpal kadagiti Bilin.
Ti katulagam iti panagbuniag ket maysa a panagkumit nga umay iti pagarian ti Dios, panangisina iti bagim manipud iti lubong ken panagtakder a kas maysa a saksi ti Dios “iti amin a kanito ken iti amin a banag, ken iti amin a lugar” (Mosiah 18:9). Dagiti panagkagumaanam nga agtakder a kas saksi ti Dios ket mangiraman iti amin a banag nga aramidem ken sawem. Ikagumaanam a kanayon a laglagipen ken tungpalem dagiti bilin ti Apo. Pagtalinaedem a natarnaw dagiti panunot, balikas, ken tingnaymo. No agkalikagumka iti pagaliwaksayan kas koma iti sine, telebision, ti Internet, musika, libro, magasin, ken pagiwarnak, agannadka nga agbuya, dumngeg, ken agbasa laeng kadagitay banag a makaparegta wenno makaitag-ay. Agkawes a sididisente. Piliem dagiti gagayyem a mangparegta kenka a mangragpat kadagiti agnanayon a panggepmo a tun-oyen. Umadayoka iti imoralidad, pornograpia, panagsugal, tabako, alkohol, ken maiparit a druga. Pagtalinaedem ti bagim a maikari a sumrek iti templo.
Panagserbi iti Apo.
Ti bilin a mangisina iti bagim manipud kadagiti banag ti lubong ket saanna a kayat a sawen a nasken nga ilasinmo ti bagim manipud kadagiti dadduma. Paset ti katulagan iti panagbuniag ti panagserbi iti Apo, ket agserbika Kenkuana iti kasayaatan no agserbika kadagiti padam a tao. Idi insuro ni propeta Alma ti maipapan iti katulagan iti panagbuniag, kinunana a nasken a “siaayat[tayo] a makipagbaklay iti imet ti tunggal maysa, tapno lumag-anda” ken “siaayat a makipagladingit kadagiti agladladingit … ken manglinglingay kadagiti makasapul iti pannakalinglingay” (Mosiah 18:8–9). Agbalin a manangngaasi ken managdayawka iti amin a tao, a sumursurotka iti pagwadan ni Jesucristo iti wagas a panangtratom kadagiti dadduma.
Dagiti Naikari a Bendision ti Panagbuniag
Bayat ti panagtungpalmo iti katulagan nga inaramidmo iti panagbuniag, bendisionannakanto ti Apo iti kinapudnom. Sumagmamano kadagiti bendision nga awatem ket ti kanayon a panangkadkadua ti Espiritu Santo, ti pannakaugas dagiti basolmo, ken ti pribilehio a pannakaipasngay manen a naespirituan.
Ti Kanayon a Panangkadkadua ti Espiritu Santo.
Kalpasan a nabuniaganka, impatay ti maysa wenno ad-adu pay a napusgan nga addaan iti Melchizedek Priesthood dagiti imada iti rabaw ti ulom ket intedda kenka ti sagut ti Espiritu Santo. Daytoy a sagut ti mangted kenka iti karbengan iti kanayon a panangkadkadua ti Espiritu Santo no la ketdi maikarika. Ti kanayon a panangkadkadua kenka ti Espiritu ket maysa kadagiti kaindaklanan a bendision a maawatmo iti mortalidad. Tarabayennakanto ti Espiritu kadagiti dana ti kinalinteg ken kappia, a mangiturong kenka iti agnanayon a biag.
Pannakaugas dagiti Basbasol.
Gapu ta nabuniagankan, maawatmo ti pannakaugas dagiti basbasolmo. Iti sabali a pannao, mapakawanka babaen iti asi ti Mangisalakan. Addaan iti daytoy a bendision, mapalubosanka iti kamaudianan nga agindeg iti sidong ti Nailangitan nga Ama.
Tapno maawatmo ti pannakaugas dagiti basbasolmo, nasken nga aramatem ti pammatim ken ni Jesucristo, sipupudnoka nga agbabbabawi, ken ikagumaanam ti agtungpal a kanayon kadagiti bilin. Insuro ni propeta Mormon, “Ti pannakabuniag ti umuna a bunga ti panagbabawi; ket dumteng ti pannakabuniag babaen ti pammati iti panagtungpal kadagiti bilin; ket yeg ti panagtungpal kadagiti bilin ti pannakaugas ti basol” (Moroni 8:25). Dakayo ket “agtultuloy ti pannakapakawan ti basbasolyo” no ituloyyo nga ipakumbaba ti bagiyo iti sango ti Dios, umawag Kenkuana iti inaldaw a panagkararag, agtalinaed a natibker iti pammati, ken agserbi kadagiti agkasapulan (kitaen iti Mosiah 4:11–12, 26).
Pannakayanak Manen.
Babaen kadagiti ordinansa ti panagbuniag ken pannakapatalged, nayanakka manen iti baro a biag. Kinuna ti Mangisalakan ken ni Nicodemo, “Malaksid no mayanak ti tao iti danum ken iti Espiritu, saan a makastrek iti pagarian ti Dios” (Juan 3:5). Kas iti iseserrek ti maladaga iti baro a biag iti itataona, kasta met nga irugim ti baro a panagbiag no sumrekka iti katulagan iti panagbuniag. Makapagdur-aska a naespirituan ken agbalin nga ad-adda a kas iti Mangilasakan babaen iti panagtungpalmo iti katulagam iti panagbuniagmo, pannakiranudmo iti sakramento tapno pabaruem ti katulagam, ken panagbabawim kadagiti basbasolmo. Insuro ni Apostol Pablo a no nabuniagantayon, “magnatayo koma iti baro a panagbiag” (Taga Roma 6:4).
Panagibtur agingga iti Panungpalan
Ita ta nabuniagankan ken naawatmon ti sagut ti Espiritu Santo, nasken nga agtultuloyka iti kinalinteg, gapu ta dagitoy nga ordinansa ti mangitanda laeng iti panangrugim iti panagdaliasatmo nga agsubli a makipagnaed iti Nailangitan nga Amam. Insuro ni propeta Nephi:
“Kalpasan ti pannakastrekyo ditoy nailet ken akikid a dalan, saludsodek no nalpasen ti amin? Adtoy, kunak kadakayo, Saan; gapu ta saankayo pay a nakaadayo malaksid no babaen ti balikas ni Cristo nga addaan iti natibker a pammati kenkuana, ken naan-anay a panagtalek kenkuana a kas mannakabalin a mangisalakan.
“Gapuna, masapul nga agtultuloykayo a sitatalingenngen ken ni Cristo, nga addaan iti naan-anay a kinalawag ti namnama, ken ayat iti Dios ken iti amin a tao. Gapuna, no agtultuloykayo, nga agpennek iti balikas ni Cristo, ken agibtur agingga iti panungpalan, adtoy, kuna ti Ama: maaddaankayto iti biag nga agnanayon” (2 Nephi 31:19–20).