Kinadalus ti Dayaw
Ti kinadalus ti dayaw ket seksual a kinatarnaw, maysa a kasasaad a “makaparagsak iti Dios” (Jacob 2:7). Tapno agbalin a nadalus iti dayaw, nasken nga agbalinka a nadalus iti moralidad kadagiti panunot, balikas, ken tignaymo. Nasken a saanka a makinaig iti seks sakbay a legal a makikallaysaka. No naasawaankan, nasken a naan-anay a napudnoka iti asawam.
Ti panagdekket ti bagi dagiti agassawa ket nangayed ken sagrado. Daytoy ket inordenan ti Dios para iti panagparsua kadagiti annak ken para iti pakaipeksaan ti ayat dagiti agassawa.
Iti lubong iti agdama, inturongen ni Satanas ti adu a tattao tapno mamatida a ti seksual a panagdekket sakbay ti kallaysa ket maan-anamongan. Ngem iti imatang ti Dios, nadagsen a basol daytoy. Daytoy ket panangabuso iti pannakabalin nga intednan kadatayo nga agparsua iti biag. Insuro ni propeta Alma a nadagdagsen dagiti seksual a basol ngem dagiti ania man a basbasol malaksid iti panagpatay ken panangilibak iti Espiritu Santo (kitaen iti Alma 39:3–5).
No dadduma padasen dagiti tao nga ipapati iti bagida a maan-anamongan dagiti seksual a pannakinaig sakbay ti kallaysa no la ketdi ay-ayaten ti tunggal maysa dagiti agayan-ayat. Saan a pudno daytoy. Ti panaglabsing iti linteg ti kinadalus ti dayaw ken mangyal-allukoy iti maysa a tao a mangaramid iti daytoy ket saan a panangipeksa iti ayat. Dagiti tao nga agayan-ayat ket saandanto iti kaano man mangpapeggad iti ragsak ken talged ti tunggal maysa kas kasukat ti saan nga agbayag a bukod a panagragsak.
No umdas nga agpimpinnateg dagiti tao tapno matungpal ti linteg ti kinadalus ti dayaw, dumakkel ti ayat, panagtalek, ken panagkumit, nga agbunga iti dakdakkel a ragsak ken panagkaykaysa. Iti kasupadina, saan nga agpaut dagiti relasion a nabangon iti seksual nga imoralidad. Dagiti agar-aramid iti seksual nga imoralidad ket masansan a makariknada iti buteng, basol, ken pannakaibabain. Sakit ti nakem, ilem, ken gura ti mangsukat a dagus iti ania man a nasayaat a rikna a naminsan a nagtalinaed iti relasionda.
Inted kadatayo ti Nailangitan nga Ama ti linteg ti kinadalus ti dayaw para iti pannakasaluadtayo. Ti panagtungpal iti daytoy a linteg ket kasapulan unay iti bukod a kinatalna ken kinapigsa ti kinatao ken iti kinaragsak iti pagtaengan. Kabayatan ti panangpatalinaedmo iti bagim a nadalus iti seks, maliklikamto ti pannakadadael ti kinaespirituan ken karirikna a kanayon a mapasamak gapu iti pannakidinnekketmo iti bagi iti maysa a tao sakbay ti kallaysa. Agbalinkanto a managrikna iti pannarabay, pigsa, liwliwa, ken panangsaluad ti Espiritu Santo, ket ipatungpalmonto ti napateg a kasapulan para iti panangawat iti maysa a temple recommend ken pannakiraman kadagiti ordinansa iti templo.
Dagiti Seksual a Basbasol
Ilunod ti Apo ken dagiti propetana ti seksual nga imoralidad. Amin a seksual a pannakinaig sakbay ti kallaysa ket manglabsing iti linteg ti kinadalus iti dayaw ken pagpeggadan ti bagi ken kinaespirituan dagitay agar-aramid kadagitoy.
Nairaman iti Sangapulo a Bilin ti bilin a saantayo nga aglabsing iti pannakiabig, a daytoy ti pannakipagseks ti naasawaan a lalaki iti maysa a tao malaksid iti asawana wenno pannakipagseks ti naasawaan a babai iti maysa a tao malaksid iti asawana (kitaen iti Exodo 20:14). Kinuna ni Apostol Pablo a daytoy “ti pagayatan ti Dios” nga “idian[tayo] koma ti pannakikamalala,” a daytoy ti pannakipagseks ti baro wenno balasang iti asino man a tao (1 Taga Tesalonica 4:3). Manen ken manen agsarita dagiti propeta iti ud-udina nga aldaw iti maibusor kadagitoy a basbasol ken maibusor iti dakes nga aramid a panagabuso iti seks.
Kas kadagiti dadduma pay a panaglabsing iti linteg ti kinadalus iti dayaw, nadagsen a basol ti aramid a homoseksual wenno panagbalin a bakla wenno panagbalin a tomboy. Maisuppiat daytoy kadagiti panggep ti seksualidad ti tao (kitaen iti Taga Roma 1:24–32). Daytoy ti mangballikug kadagiti naayat a relasion ken manglapped kadagiti tao iti yaawatda kadagiti bendisiona masarakan iti biag ti pamilia ken kadagiti pangisalakan nga ordinansa ti ebanghelio.
Ti panangliklik laeng iti pannakipagseks sakbay ti kallaysa ket saan nga umdas iti pagrukodan ti Apo iti kinatarnaw ti kinatao. Idawat ti Apo ti nangato a pagrukodan ti moralidad dagiti disipulona, agraman ti naan-anay a kinapudno iti asawa ti maysa a tao iti panunot ken tignay. Iti Kaskasaba iti Bantay, kinunana: “Nangngegyo a naisao, “Dika makiabig iti saanmo nga asawa: Ngem siak kunak kadakayo, nga uray siasino man a mangmatmat iti maysa a babai tapno gartemanna nakiabigen kenkuana iti pusona” (Mateo 5:27–28). Kadagiti ud-udina nga aldaw kinunana, “Saankayo a … makiabig, … wenno agaramid iti ania man a kaarngina” (DkK 59:6). Ken inulitna nga inyunay-unay ti pagbatayan nga insurona iti Kaskasaba iti Bantay: “Isu a kumita iti babai a sigagartem wenno asino man nga agaramid iti pannakiabig iti puspusoda, awanto kadakuada ti Espiritu, ngem tallikudanda ti pammati ket agbutengda” (DkK 63:16). Mayaplikar dagitoy a pammallaag iti amin a tao, naasawaanda man wenno saan.
No nakaaramidka iti seksual a basol, kasaom ti bishop wenno branch presidentmo tapno matulongannaka iti proseso ti panagbabawi (kitaen iti “Panagbabawi” dagiti panid 114–18).
No masulsulisogka nga agaramid kadagiti seksual a basol, agraman iti panagrayo iti pada a babai wenno pada a lalaki, saanka a sumuko kadagidiay a pannulisog. Penkem a makapagpilika a mangliklik iti kasta a galad. Maawatmo ti tulong ti Apo no agkararagka para iti pigsa ken aramid a mangparmek iti problema. Kas paset daytoy a proseso, nasken nga agkiddawka iti balakad manipud iti bishop wenno branch presidentmo. Tulongannakanto.
Panagtungpal iti Linteg ti Kinadalus ti Dayaw
Nupay kasano man ti kapigsa ti pannulisog, tulongannakanto ti Apo a mangsarked kadagitoy no piliem ti sumurot Kenkuana. Impakdaar ni Apostol Pablo, “Saan nga immay kadakayo ti uray ania a pannakasulisog a di met simro kadagiti isu amin a tattao: ngem ti Dios mapagtalkan, isu a dinto mangipalubos a masulisogkayo iti aglabes iti mabalinanyo, no di ket maigiddanto iti pannakasulisog, isaganananto met ti dalan a paglisian, tapnomabalinyo a pagballigian” (1 Taga Corinto 10:13). Ti sumaganad a balakad ket makatulong kenka a mangparmek kadagiti masansan ken nabutaktak a pannulisog iti lubong iti agdama:
Ikeddengmo itan ti agbalin a natarnaw.
Kasapulam nga aramiden daytoy a pangngeddeng iti maminsan laeng. Aramidem itan ti pangngeddeng, sakbay nga umay ti pannulisog, ken aramidem koma a natibker unay ti pangngeddengmo ken addaanka iti kasta a nauneg a panagkumit a dinto kaano man madadael. Ikeddengmo itan a saankanto iti kaano man agaramid iti ania man a banag sakbay ti kallaysa a mangparugso kadagiti nabileg a rikna a nasken a maipeksa laeng iti nagbaetan dagiti agassawa. Saanmo a parugsuen dagita a rikna iti bagi ti sabali a tao wenno iti bukodmo a bagi. Ikeddengmo itan nga agbalinkanto a naan-anay a napudno iti asawam.
Pengdam dagiti panunotmo.
Awan ti asino man nga agaramid iti seksual a basol iti apagdarikmat. Kanayon a mangrugi dagiti imoral wenno naalas nga aramid kadagiti saan a natarnaw a pampanunot. No palugodam nga agtalinaed ti panunotmo kadagiti naalas wenno imoral a banag, immaksawkan iti umuna nga addang nga agturong iti imoralidad. Umadayoka a dagus manipud kadagiti kasasaad a mabalin a mangiturong iti basol. Agkararagka para iti agtultuloy a pigsa a mangkedked iti sulisog ken mangpengdan kadagiti panunotmo. Aramidem daytoy a maysa a paset dagiti inaldaw a kararagmo.
Umadayoka iti pornograpia.
Saanka nga agbuya, agbasa, wenno dumgneg iti ania man a banag a mangipakita wenno mangiladawan iti bagi ti tao wenno seksual a galad a mabalin a mangparugso kadagiti rikna a mainaig iti seks. Makairuam ken makadadael dagiti banag a mainaig iti pornograpia. Mabalindaka a takawan iti panagdayaw iti bagim ken iti kabaelam a mangkita iti kinapintas ti lubong. Mabalindaka a dadaelen iti pagayatam a mangpengdan iti sulisog ken maiturongdaka nga agpanunot kadagiti dakes a banag ken iti managlablabes nga ugali.
No awan pay asawam ken makisinsinnarakka, kanayon a tratuem ti kasinnarakmo nga addaan respeto.
Dimo kaano man tratuen isuna kas maysa a banag nga usarem kadagiti nagartem a tarigagaymo. Siaannad a planuem dagiti nasayaat ken makapaimbag ken makatulong nga aramid tapno saankayo a mabati a dakdakayo laeng iti kasinnarakmo nga awan ti ar-aramidenyo. Agtalinaedka kadagiti natalged a lugar a nalaka a pakapengdam iti bagim. Saanka a makiraman kadagiti pagsasaritaan wenno aramid a makaparugso kadagiti rikna a mainaig iti seks. Saanmo nga aramiden ti aglablabes a pannakibinnisong, kaiddaen wenno pakleban ti sabali a tao, wenno sagiden dagiti pribado, sagrado a paset ti bagi ti sabali a tao, adda badona man wenno awan. Saanmo nga ipalubos nga aramiden ti asino man ti kakasta a banag kenka.
No naasawaankan, agbalinka a napudno iti asawam iti panunot, balikas, ken tignaymo.
Kinuna ti Apo: “Ayatenyo ti asawayo a naimpusuan, ket makinaigkayo kenkuana laeng ket awanen ti sabali. Ket isu a mangmatmat iti babai tapno gartemanna ilibakna ti pammati, ket mapukawna ti Espiritu; ket no saan nga agbabawi mapapanawto” (DkK 42:22–23). Saanka a manggargari iti kaano man iti ania man a wagas. Agingga a mabalin, liklikam ti agmaymaysa a kaduam ti asino man a dimo pada a babai wenno pada a lalaki. Damagem iti bagim no makaay-ayonto iti asawam no ammona maipapan kadagiti balikas wenno tignaymo. Laglagipem ti balakad ni Apostol Pablo nga “idianyo ti amin a kita ti dakes” (1 Taga Tesalonica 5:22). No umadayoka kadagiti kasta a pasamak, awan ti gundaway a maparnuay ti sulisog.
Pannakapakawan para iti Agbabawi
Ti kasayaatan nga addang ket ti naan-anay a kinadalus iti moralidad. Biddut ti agaramid kadagiti seksual a basol a panagkunam a makapagbabawikanto kalpasanna. Basol mismo daytoy a galad, a panangipakita iti saan a panagraem iti Apo ken kadagiti katulagan nga aramidem Kenkuana. Nupay kasta, no nakapaglabsingkan kadagiti seksual a basol, idiaya ti Apo ti pannakapakawan no agbabawika.
Narigat ti panagbabawi, ngem mabalin daytoy. Makapagbalinka manen a nadalus (kitaen iti Isaias 1:18). Ti pannakapaay gapu iti basol ket masukatan iti nasam-it a talna ti pannakapakawan. Tapno masursurom no ania ti nasken nga aramidem tapno makapagbabawika, kitaen iti “Panagbabawi,” dagiti panid 114–18.
Itrabahom agingga iti aldaw nga agbalinkanto a maikari a sumrek ti templo, a tarabayennaka dagiti balikas ti Salmista:
“Siasino ti umulinto iti turod ni Jehova? wenno siasino ti agtakderto iti nasantuan a yanna?
“Daydiay nga addaan nadalus nga im-ima, ken natarnaw a puso” (Salmo 24:3–4).