Dagiti Konseho iti Panagdisiplina ti Simbaan
Adda pagrebbengan dagiti bishop ken branch president ken stake, mission, ken district president a mangtulong kadagiti miembro a mangrimbaw iti panaglabsing babaen ti panagbabawi. Dagiti kadagsenan a basol, kas iti nadagsen a panaglabsing iti linteg a sibil, panagabuso iti asawa, panagabuso iti anak, pannakiabig, pannakinaig iti seks dagiti babbaro ken babbalasang, ken pannakinaig iti seks iti asideg a kabagian, ket masansan nga agkasapulan iti pormal a panagdisiplina ti Simbaan. Mabalin nga iraman iti pormal a panagdisiplina ti Simbaan ti panagiget kadagiti pribilehio ti kinamiembro iti Simbaan wenno pannakapukaw ti kinamiembro iti Simbaan.
Mangrugi ti proseso ti pormal a panagdisiplina no mangawag ti mangidadaulo a dadaulo ti priesthood iti maysa a disiplinary council. Dagiti panggep ti konseho iti panagdisiplina ket mangisalakan kadagiti kararua dagiti naglabsing, mangprotekta kadagiti inosente, ken mangsaluad iti kinatarnaw, integridad, ken nasayaat a nagan ti Simbaan.
Ti panagdisiplina ti Simbaan ket maysa a naparegta a proseso a maipatpatungpal iti uneg ti maysa a panawen. Babaen iti daytoy a proseso ken babaen iti Pannubbot ni Jesucristo, mabalin nga awaten ti maysa a miembro ti pannakapakawan dagiti basolna, makagun-od manen iti talna iti panunot, ken makagun-od iti pigsa a mangliklik iti panaglabsing iti masakbayan. Ti tignay a panagdisiplina ti Simbaan ket saan a naisangrat a pangigibus iti proseso. Naisangrat daytoy a pangtulong kadagiti annak ti Nailangitan nga Ama a mangitultuloy kadagiti panagkagumaanda a mangisubli iti naan-anay a pannakisinninged ken dagiti naan-anay a bendisionda iti Simbaan. Ti natarigagayan a resulta ket ti aramiden ti tao ania man dagiti panagbalbaliw a kasapulan tapno makapagbabawi a naan-anay.