Gobierno ken Linteg a Sibil
Balabalaen ti maika-134 a benneg ti Doktrina ken Katulagan ti “pammati [dagiti Santo iti Ud-udina nga Aldaw] maipapan kadagiti sapasap a naindagaan a gobierno ken paglintegan” (DkK 134, paulo a benneg). Iraman ti benneg dagiti sumaganad a palawag:
“Mamatikami nga impasdek ti Dios dagiti gobierno para iti pagimbagan dagiti tao; ken kinednganna dagiti tao nga agsungbat kadagiti aramidda a mainaig kadakuada, agpadpada iti panagaramidda kadagiti paglintegan ket iti panangipatungpalda kadagitoy, para iti pagimbagan ken pannakasalaknib ti gimong. …
“Mamatikami a naikudi a kanunongan dagiti amin a tao ken itandudoda ti gobierno iti pagnaedanda, bayat ti pannakasalaknib ti nakaisigudanda ken ti di mayakar a kalintegan babaen dagiti paglintegan dayta a gobierno; ket mainumo iti tunggal makipagili a masalakniban ti kalinteganna iti aramid a panagsulsol ken yaalsa, ket nasken a madusa daytoy kas naiparbeng; ket adda kalintegan amin a gobierno a mangipakat kadagita a paglintegan no ti pangngeddengda ket manamnama nga agpaay iti pagimbagan ti kagimongan; kagiddanna nupay kasta, ti pannakabigbig a sagrado ti wayawaya ti konsensia.
“Mamatikami a nasken a maraem ti tunggal tao iti pagrebbenganna, kasta met dagiti agturay ken mahistrado, a naipan a para iti pannakasalaknib dagiti inosente ken ti pannakadusa dagiti agbasol; ken tapno utang ti tunggal tao ti panangbigbig ken panagtungpalna kadagiti paglintegan, ta no awanda masukatan ti kappia ken panagtutunos iti panangilupitlupit ken buteng; ta naipasdek dagiti paglintegan ti tao para iti pannakatimon ti pagsayaatantayo a kas tao ken pagilian, iti nagbaetan ti tao ken tao; ken dagiti nailangitan a paglintegan nga inted ti langit, a mangisuro kadagiti annuroten iti pakaseknan a naespirituan, ta ti pammati ken panagdaydayaw, agpadpada a sungbatan ti tao iti Namarsuada” (DkK 134:1, 5–6).
Maysa a kangrunaan nga elemento ti panagsina ti simbaan ken estado ket ti pagrebbengan ti gobierno a mangpatgan iti wayawaya ti relihion. Anamongan dagiti propeta iti ud-udina nga aldaw daytoy a pagbatayan, kas nadakamat iti maikasangapulo-ket-maysa a pagannurotan ti pammati: “Itandudomi ti karbengan nga agrukbab iti Mannakabalin a Dios babaen ti panangibagnos ti konsensiami, ken ipalugodmi iti amin a tao ti umasping a karbengan, bay-anmi nga agrukbabda iti wagas no kasano, sadino, ken no ania pay.” Maitunos iti panagsina ti simbaan ken estado, ti Simbaan ket saan nga agendorso iti ania man a partido ti politika wenno kandidato. Saanna nga ipalubos ti panangusar kadagiti pasdek ken pasilidadna para kadagiti panggep a mainaig iti politika. Saan a makiraman ti Simbaan kadagiti politika malaksid no adda saritaan maipapan iti moralidad, a masansan a ti Simbaan ti mangilawlawag iti daytoy.
Nupay agtalinaed nga awan kankanunongan ti Simbaan maipanggep iti politika, allukoyen dagiti lider ti Simbaan ti tunggal miembro a makiramanda a kas makipagili. Kas maysa a Santo iti Ud-udina nga Aldaw, nasken a maawatam ti lugar ken sasaadem iti pagilian a pagnanaedam. Ammuem ti maipapan iti pakasaritaan, tawid, ken dagiti linteg ti pagilian. No addaanka iti gundaway a bumutos ken makiraman kadagiti aramid a pakaseknan ti gobierno, sigaganetgetka a makiraman iti panangsuporta ken panangsalaknib kadagiti pagbatayan ti kinapudno, kinalinteg, ken wayawaya.