Pannakapasurot
“Ta ti nakem a linalasag isu ti patay,” impakdaar ni Apostol Pablo, “ngem ti nakem a naespirituan isu ti biag ken talna” (Taga Roma 8:6; kitaen met iti 2 Nephi 9:39). Iti natnag wenno nagbasol a kasasaadtayo, masansan a labanantayo ti sulisog, ket no dadduma patgantayo “ti pagayatan ti lasag ken ti sairo a mangik-ikut iti daytoy” (2 Nephi 2:29; kitaen met iti “Pannakatnag,” dagiti panid 166–69 iti daytoy a libro). Tapno makaawattayo iti bendision ti agnanayon a biag, nasken nga “agnakemtayo a naespirituan” ken parmekentayo dagiti saan a nalinteg a tarigagaytayo. Masapul nga agbalbaliwtayo. Naum-umno, kasapulantayo ti agbalbaliw, wenno mapasurot, babaen ti bileg ti Pannubbot ti Mangisalakan ken babaen ti bileg ti Espiritu Santo. Maawagan daytoy a proseso iti pannakapasurot.
Ti pannakapasurot iramanna ti panagbalbaliw iti galad, ngem nalablabes pay ngem iti galad; maysa daytoy a panagbalbaliw iti mismo a kadawyantayo. Maysa daytoy a napateg unay a panagbalbaliw a dinakamat ti Apo ken dagiti propetana a maysa daytoy a pannakayanak manen, panagbalbaliw iti puso, ken panagbuniag iti apuy. Kinuna ti Apo:
Dika masdaaw nga amin a sangkataw-an, wen, lallaki ken babbai, amin a pagilian, kakabsat, pagsasao ken tattao, nasken a maipasngay manen; wen, maipasngay iti Dios, mabaliwan iti nailubongan ken managbasol a kasasaad, iti kasasaad a kinalinteg, a sinubboten ti Dios, nga agbalin nga annakna a lallaki ken babbai;
“Ket kastoy ti panagbalinda a baro a parsua; ket malaksid no aramidenda daytoy, pulos a dida matawid ti pagarian ti Dios” (Mosiah 27:25–26).
Ti Proseso ti Pannakapasurot
Ti pannakapasurot ket maysa a proseso, saan a pagteng. Agbalinka a napasurot kas bunga dagiti nalinteg a panagkagumaanmo a mangsurot iti Mangisalakan. Dagitoy a panagkagumaan ket iramanna ti panangaramat iti pammati ken ni Jesucristo, panagbabawi iti basol, panagpabuniag, panangawat iti sagut ti Espiritu Santo, ken panagibtur agingga iti panungpalan a sipapammati.
Nupay ti pannakapasurot ket namilagruan ken panagbalbaliw iti biag, naulimek a milagro daytoy. Dagiti panagsarungkar dagiti anghel ken dadduma pay a nakaskasdaaw a pasamak ket saan a mangisangbay iti pannakapasurot. Uray ni Alma, a nakakita iti maysa nga anghel, ket nagbalin a napasurot laeng kalpasan a “nagayuno ken nagkararag iti adu nga aldaw” para iti pammaneknek iti kinapudno (Alma 5:46). Ket insuro ni Pablo, a nakakita iti nangungar a Mangisalakan, nga “awan ti makabalin nga agsao a ni Jesus isu ti Apo, no di babaen ti Espiritu Santo” (1 Taga Corinto 12:3).
Gapu ta naulimek, agtultuloy a proseso ti pannakapasurot, mabalin a napasurotka itan ket dimo ammo daytoy. Mabalin a maipadaka kadagiti Lamanite a, “gapu iti pammatida [ken Cristo] iti kanito a pannakapasurotda, nabuniaganda iti apuy ken iti Espiritu Santo, ket dida ammo” (3 Nephi 9:20). Ti agtultuloy a panagkagumaam a mangaramat iti pammati ken mangsurot iti Mangisalakan ket agbanagto iti nain-indaklan a pannakapasurot.
Dagiti Kababalin dagiti Tao a Napasurot
Mangipaay ti Libro ni Mormon kadagiti panangiladawan maipapan kadagiti tao a napasurot iti Apo:
Tarigagayanda ti agaramid iti naimbag.
Impakdaar dagiti tao ni Ari Benjamin, “Ti Espiritu ti Apo a Mannakabalin amin, … nangipaay iti naindaklan a panagbalbaliw kadakami, wenno iti puspusomi, nga awanen kadakami ti tarigagay nga agaramid iti kinadakes, ngem ti ketdi agtultuloy a panagaramid iti kinaimbag” (Mosiah 5:2). Nagsao ni Alma maipapan kadagiti tao a “saanda a makaperreng iti basol malaksid iti gura” (Alma 13:12).
Saanda nga umalsa a maibusor iti Apo.
Imbaga ni Mormon maipapan iti maysa a grupo dagiti Lamanite a nagbalin a nadangkes ken mawaw iti dara ngem “napasurot[da] iti Apo” (Alma 23:6). Binaliwan dagitoy a tattao ti naganda iti Anti-Nephi-Lehi ken “nagbalinda a nalinteg a tattao; indissoda dagiti armas iti yaalsada, ket saandan a binusor pay ti Dios, wenno asino man kadagiti kabsatda” (Alma 23:7).
Ibinglayda ti ebanghelio.
Da Enos, Alma a Laklakay, Alma nga Ub-ubing, dagiti lallaki nga annak ni Mosiah, Amulek, ken Zeezrom ket indatonda ti bagbagida iti panangikasaba iti ebanghelio kalpasan ti pannakapasurotda iti Apo (kitaen iti Enos 1:26; Mosiah 18:1; 27:32–37; Alma 10:1–12; 15:12).
Napnuanda iti ayat.
Kalpasan a sinarungkaran ti Mangisalakan dagiti tao kadagiti kontinente ti America, “napasurot dagiti amin a tao iti Apo, iti amin a daga, dagiti Nephite ken Lamanite, ket awan ti nagririri ken nagsisinnuppiat kadakuada, ket nasayaat ti panagkikinnaawatan ti tunggal maysa. …
“Ket napasamak nga awan ti panagririnnupir iti pagilian, gapu iti ayat ti Dios a nagnaed iti puso dagiti umili.
“Ket awan ti innapal, wenno panagpupungtot, wenno riribuk, wenno panagiinnabig, wenno panagulbod, wenno pammapatay, wenno ania man a kita ti panaggartem; ket pudno awanen ti naragragsak a tao kadagiti amin a tao a pinarsua ti Dios.
“Awan ti tulisan, wenno mammapatay, wenno adda Lamanite, wenno uray ania a kita ti –ite; ngem nagsangsangkamaysada, dagiti annak ni Cristo, ken agtawid iti pagarian ti Dios” (4 Nephi 1:2, 15–17).
Panagkagumaan para iti Nain-indaklan a Pannakapasurot
Adda kangrunaan a pagrebbengam para iti bukodmo a pannakapasurot. Awan ti mabalin a mapasurot para kenka, ken awan ti makapilit kenka tapno mapasurot. Nupay kasta, matulongandaka dagiti dadduma iti proseso ti pannakapasurot. Agsursuro manipud kadagiti nalinteg a pagwadan dagiti miembro ti pamilia, dagiti lider ken mannursuro ti Simbaan, ken dagiti lallaki ken babbai kadagiti nasantuan a kasuratan.
Dumakkelto ti kabaelam a mangpadas iti naindaklan a panagbalbaliw iti puso bayat ti panagkagumaam a mangsurot iti naan-anay a pagwadan ti Mangisalakan. Agadal kadagiti nasantuan a kasuratan, agkararag a sipapammati, agtungpal kadagiti bilin, ken agkalikagum a manggun-od iti kanayon a panangkadkadua ti Espiritu Santo. Bayat panagtultuloymo iti proseso ti pannakapasurot, awatemto ti “rag-o iti kasta unay,” kas iti inaramid dagiti tao ni Ari Benjamin idi ti Espiritu “nangipaay iti naindaklan a panagbalbaliw … iti puspuso[da]” (kitaen iti Mosiah 5:2, 4). Kabaelamto a suroten ti balakad ni Ari Benjamin a “tumibker ken saan a maisin, kanayon nga agaramid iti adu a naimbag, tapno ni Cristo, ti Apo a Dios a Mannakabalin amin, kupikopannakayo, tapno maipankayo idiay langit, tapno maaddaankayo iti agnanayon a pannakaisalakan ken agnanayon a biag” (Mosiah 5:15).