Katulagan

Ti katulagan ket sagrado a panagtinnulag ti Dios ken ti maysa a tao wenno grupo dagiti tao. Mangituding ti Dios kadagiti nalawag a kondision, ket ikarina a bendisionannatayo no tungpalentayo dagidiay a kondision. No pilientayo ti saan nga agtungpal kadagiti katulagan, ditay makaawat kadagiti bendision, ken iti sumagmamano a gundaway agsagabatayo iti pannusa a kas bunga ti kinasukirtayo.

Amin a pangisalakan nga ordinansa ti priesthood ket karagpin dagiti katulagan. Kas pagarigan, nagaramidka iti katulagan idi nabuniaganka, ket pabaruem dayta a katulagan iti tunggal makiranudka iti sakramento (kitaen iti Mosiah 18:8–10; DkK 20:37, 77, 79). No naawatmon ti Melchizedek Priesthood, simrekkan iti kari ken katulagan ti priesthood (kitaen iti DkK 84:33–44). Ti endowment iti templo ken ti pangilantip nga ordinansa ket mangiraman pay kadagiti sagrado a katulagan.

Kanayon a laglagipen ken dayawenyo dagiti katulagan nga aramidenyo iti Apo. Kalpasanna saan a kasapulan a mabilinkanto iti amin a banag nga aramidem (kitaen iti DkK 58:26–28). Paregtaennakanto ti Espiritu Santo, ti ugali a kas ken ni Cristo ket agbalinto a paset ti kinataom. Kas iti inkari ti Apo, “umawatkayo[nto] iti paltiing iti kada paltiing, pagsiriban iti kada pagsiriban, tapno maammuanyo dagiti datdatlag ken makapatalingenngen a banag—a mangyeg iti ragsak, a mangyeg iti agnanayon a biag” (DkK 42:61). Nasken a ti kadakkelan a namnamam ket ti mangsagrap iti pannakapasanto a sumangbay manipud iti nadiosan a pannarabay; nasken a ti kadakkelan a panagbutengmo ket ti pannakapukaw dagitoy a bendision.