Panagparsua
Babaen ti panangiturong ti Nailangitan nga Ama, pinarsua ni Jesucristo dagiti langit ken ti daga (kitaen iti Mosiah 3:8; Moises 2:1). Manipud iti nasantuan a kasuratan a naipalgak babaen ken ni Propeta Joseph Smith, ammotayo nga iti aramid ti Panagparsua, binukel ti Apo dagiti elemento nga adda idin (kitaen iti Abraham 3:24). Saanna a pinarsua ti lubong “manipud iti awan,” kas iti patien ti sumagmamano a tao.
Isuro pay dagiti nasantuan a kasuratan a ni Adan “ti immuna a tao kadagiti amin a tao” (Moises 1:34). Pinarsua ti Dios da Adan ken Eva a kaing-ingasna ken kaing-ingas ti Bugbugtongna (kitaen iti Moises 2:26–27).
Ti Panagparsua ket napateg unay a paset ti plano ti pannakaisalakan ti Nailangitan nga Ama. Mangted daytoy kadatayo iti gundaway nga umay iti daga, a pakaawatantayo iti pisikal a bagi ken pakaaramatantayo iti kinawaya nga agpili. Iti Konseho dagiti Dios sakbay daytoy a biag, naaramid ti sumaganad a panangipakdaar: “Bumabatayo, ta adda lugar sadiay, ket alaentayo dagitoy a kasapulan, ket mangaramidtayo iti daga a pagtaengan ditoy; ket subokentayo ida babaen daytoy, ta kitaentayo no aramidenda amin a banag nga ibilin kadakuada ti Apo a Diosda” (Abraham 3:24–25).
Maysaka nga espiritu nga anak ti Dios, ket naparsua ti bagim a kaing-ingasna. Tapno maipakitam ti panagyamanmo para kadagitoy a bendision, maaywanam wenno mataripatom ti bagim babaen ti panagtungpalmo iti Word of Wisdom ken iti dadduma pay a bilin nga adda pakainaiganna iti naespirituan ken pisikal a salun-atmo (kitaen iti DkK 89; kitaen met iti 88:124). Mabalinmo pay a dayawen dagiti dadduma pay a tao kas annak ti Dios.
Kas maysa a tagapaglak-am iti amin a kinangayed ti panagparsua, mabalinmo nga aywanan ti daga ken makatulongka a mangtaginayon iti daytoy para kadagiti masakbayan a kaputotan.